Read Futuna-Aniwa 2Korintus 11 Bible Online

2Korintus 11 - Futuna-Aniwa bible

2Korintus 11

¹Ni kwityabwe, sunci niti, “Erdamnyi erebdeibdandoka lub nang uram ato ebmar, se,” tenebnindate ababyi, niryi sunti, “Ni uram kekebmurubde biting,” tenen dibde bunun. Ato ebmasin bok, sunci ni uram asi diboka kekermururanurum ati ebmasin.

²Nun Nai Imtamnyi biryi sunti, “Ni mabwe nermabwe kunung,” tenen busul kuboka kalingsurur to, nibabyi neiktoto sunsi busul weik kuboka kalingsunun. A deyok aryi, niryi sunsi, “Ni uram kekebmurubde bindarur,” ebmasin. Sunda dib tenen nang ara nun Du Yesus biryi dobkwansir ner ato kurandum. Ati, niryi sunti, “Yuk nang aryi bowanikminikoka dobingnyei,” tenen, “Nun Du bikwe dobkwandur,” tenen matan kanya bonun cok, sunsi kalingsunun. Ati, niryi sunti, “Sal aryi er dam bardena ton kum kuramingnyi ner asi nun Du Yesus urasintam bobinkwan,” tenen kalingsunun.

³Ba, niryi sunti, “Nun Du Kristus bisi boukwe kuramnyi ani, ninyi aryi bowanikminikmai uca, boukwe tuba kum kuraming darib,” tenen ilil kanya bonun. Minob ura isa sienyi Iblis biryi kwatima biriman aryi uram ulubyang dakoka tola uram ebmou asi nun tat Hawa biryi dib tenebmou. Ura, sunbabyi neiktoto sun kanya dam aryi tola uram dib tenebkalibmandate ati tenesunun. Tola uram dib tenebkalibmandate uca, sunci nun Du Yesus tentok asi diboka kum milibmurubdate ati tenesunun.

⁴Ton nang ara sun dam yandoka nun Du Yesus deyok ati tola uram etereransing bok, sunci a nang uram dororandum ci, nunci nun Du Yesus uram dib en uram etereransoubwe asi taklobmarum se. Tonda, yuk nang aryi yandoka, “Isa eteren dinyi dobdobdarur,” eraming bok, sunci isa eteren dinyi dororandum ci, sunci Er Imtamnyi Kanya Roh Kudus dobdobmandau asi taklobdandum se. Tonda, yuk nang aryi yandoka Teleb Uram yuk uram asi etereransing bok, sunci a uram asi bisik sengna kum uca dororandum ci, nunci sunsi etereransoubwe Teleb Uram taklobmarum se. A deyok aryi, niryi sunsi, “Ni uram kekebmurubde bindarur,” ebmasin.

⁵Ni Paulus bibabyi nun Du Yesus biryi bokdonoknounyi kunun deyok aryi, sunci ni eteresina uram dib tenenina teleb. Yuk nang ara sundamnyi ati, “Nunda nun Du Yesus biryi bokdonokmou nang kankan aryi iya erebdob kunub,” erdaramingiryok, nisi outam kimdongobmanto kum kunung ati ebman. Nira nun Du biryi bokdonoknounyi diboka kunun ati ato ebman.

⁶Nira ninyi kanya teleb kurdeirin uram doboka caknam asa enanyi kum kunun cok, niryi dib en uram diboka bingnunyi kunun ati ebman. Niryi sunglona kum uca sun nirya asi Teleb Uram tuba-tuba lak etereransise ati sunci niti, “Dib en uram bingdurnyi,” tenen diboka bikdate.

⁷Ati, niryi sunti, “Teleb Uram eterebnyi uca, Er Imtamnyi biryi sunsi erebdeibte,” tenen nidamnyi luknubdandoka Teleb Uram etereransise. Ara, “Co bok kareboka dekeibnumun ba, niryi Teleb Uram eterebkwinsin,” eboka Teleb Uram kum etereransise. Erda, niryi nidamnyi luknubdongobdandoka Teleb Uram ur etererasise. Niryi ato kuboka Teleb Uram etereranse ara sunsi manmalirdeiriransise do?

⁸Niryi sunti, “Dibnilibkwan,” tenen, “Co bok kareboka dekeibnindarur,” eboka kum arukdeibmasise. Erda, niryi sunda Korintus nang asi dirniliransisiryok, sun yuk atei-yuk atei aryi kuboka dib tenen nang asi, “Co bok karebsindarur,” eboka moloranse. Sunda Korintus nang aryi nunsi co bok ton kum karerandau bok, yuk atei yuk atei aryi kuboka dib tenen nang ara nunsi co bok langdeiboka kareransei ati ebman.

⁹Tonda, ni ab sun ab tonkwa kuramoubwe ba, kwaning ataranou ababyi niryi sunda Korintus nang asi, “Yina karebnindarur,” eboka kum moloransise. Erda, sun ni ab tonkwa yanmoubwe nang ara Makedonia mutuk aryi kuboka yanganmai nang aryi nisi yina kareranei. A deyok aryi, niryi sunda Korintus nang asi, “Yina kum co bok kum karebnindarur,” eboka kum takurdeiriransise. Ura, aminda ababyi niryi, “Ikin dinyi utotoa takubdeibnyei,” tenen ato eboka kum arukdeibkwansin.

¹⁰Ni kwityabwe, niryi nidamnyi kisal dangdanun cok, “Nira sun yina moloryisinanyi kuma,” esunun. Nira ato eboka ebmurubde binkwan deyok aryi, sun Akhaya mutuk aryi kurandum nang aryi, “Yina karebtibyi biriman aryi a kisal dangdan dinyi bisik sektibyi,” tenebnumunyei. Nun Du Kristus bira nisi dib en uram diboka lak kibdeibmasunyi si deib aryi niryi katabum eboka, “A kisal dangdan uram bisik sekingnyei,” ebniryok, “Co bok kum yina kum karebnindarur,” eboka kum molobkwansin.

¹¹Niryi sunsi, “Nira sun yina moloryisinanyi kuma,” esunun ara unato ati esunun do? Niryi sunsi boukwe kum kimsunun deyok aryi, ato kuboka esunun do? Ato tenen kum. Niryi sunsi boukwe weik kimsunun ara nun Nai Imtamnyi biryi nisi bingnanir.

¹²Niryi sunti, “Co bok karebnindarur,” eboka kum arungdeiriranse to, aminda ababyi neiktoto, “Co bok karebnindarur,” eboka kum arukdeibkwansin. Ara, sun kankan aryi sundamnyi ererdeirirdan nang asi bisik sekwan ati ato kubmurubkwan. A nang ara, “Nunda nun Du Yesus biryi bokdonokmou nang ab neik kikib nang kunub,” teneramingiryok, “Co bok karebsindarur,” eboka moloransing. A nang ara sundamnyi kisal dakdandoka ererdeirirdaraming nang asi niryi alyi kibdongobkwan ati niryi nidamnyi ati, “Nira yuk nang yina moloryinanyi kum kunun,” eboka erdanun.

¹³Sundamnyi erebdeibdandoka, “Nunda nun Du biryi bokdonoksou nang kunub,” eraming nang ara yina moloryin nang kuramingiryi, tola uram eteren nang akwe kunung ati ebman. A nang ara sundamnyi ati, “Nunda Er Imtamnyi wa irmilin nang kunub,” erdaramingiryok, Er Imtamnyi wa irmilin nang diboka kum kunung. A nang ara sundamnyi ati, “Nunda nun Du Yesus biryi bokdonoksou nang kunub,” erdaramingiryok, nun Du biryi bokdonokmou nang diboka kum kunung.

¹⁴Sunci a ebmasin uram ati, “Naie, a ebmasirim uram ara ilil uram,” tenebnumunyei. Isa sienyi Iblis bira, “Ninyi kanya bowanikminiktinyi,” tenen erci, “Bikningnyei,” tenen erdamnyi Imtamnyi Uram eryuryangananyi bitonyi kimdarande.

¹⁵Ura, sun tola uram eteren nang ara isa sienyi milin nang kuraming deyok aryi, sunbabyi neiktoto, “Ninyi kanya bowanikminibtibyi asi biksingnyei,” tenen sunci, “Ato-ato kuboka Er Imtamnyi urasintam aryi teleb dinyi kunubdarur,” eboka eteren nang ato kimdaramingiryok, malyi dinyi akwe kunuraming. Ati, nunci, “Isa biryi kunubde barur to, er milin nang ababyi neiktoto kunubde baraming,” tenen bingnamibiryok, “Naie,” tenen kanya bobibyei. A nang ara iya wenebmanto nang kunub to, Er Imtamnyi biryi sunsi iya wenen dinyi karebkwande.

¹⁶Ni kwityabwe, niryi sunsi sirya ebmasin to, tamuboka ebkwinsin. Sunci niti, “Lub nang uram enanyi bica,” tenebnumunyei. Ba, sunci niti, “Lub nang uram enanyi bica,” tenebdate ababyi, sunci ni uram kekebnindarur. Yuk nang aryi lub nang uram eransing asi dobdobmarum to, sunci nira lub nang uram mitik anun eboka nidamnyi kisal dakdankun ababyi dobdobdarur ati molobmasin.

¹⁷Nun Du biryi nisi, “Ilil kanya bona kum uca kandamnyi kisal dakdarum,” eboka kum arukdeibmanou bok, niryi, “Sundamnyi talyi ati kisal dangdaraming nang alyi kibdeibkwan,” tenen ilil kanya bona kum uca nidamnyi kisal dakdankun ati ebman. Ati niryi lub nang kanya atonyi kibdandoka nidamnyi kisal dakdankwan.

¹⁸Sun kankan kurandum nang ilinto ara sundamnyi talyi ati erebdeibdandoka kisal dangdaraming. Ara, sun tukwetam kanya bon nang sundamnyi kisal dangdaraming to, sun kankan aryi kurandum nang ababyi neiktoto sundamnyi talyi ati kisal dangdaraming. Ura, nira nun Du Yesus biryi bokdonoknounyi diboka kunun deyok aryi, nibabyi neiktoto nidamnyi kisal ur dakdatinyi ati ebman.

¹⁹Sunda Korintus nang ara sundamnyi biti, “Nunda bikdob nang kunub,” tenerdarandum. Ati, sunci sun lub nang ati bico tenerandum cok, lub nang uram ababyi bisik sengna kum uca kekerandum. Ati, sunci niti, “Lub nang en uram erutnyi,” tenebnindate ababyi niryi ebkwinsin uram kekebdarur.

²⁰Ura, ton nang ara yandoka tola uram etereransingiryok, ikin dinyi yuk-yuk takurdeiriransing uca, sunda tabwe demna nang ato kurandum. Ato kurandum cok, sunci, “Nun li,” ena kum kurandum. Tonda, ninyi aryi, “Co bok ilinto karebsiting,” tenen uram ulubyang eransing bok, sunci, “Nun li,” kum erandum. Tonda, ninyi aryi sundamnyi ati talyi ati ererdeirirdaraming bok, sunci, “Nun li,” ena kum kurandum. Tonda, ninyi aryi u molong-molong eransing ababyi sunci, “Nun li,” ena kum kurandum.

²¹Yuk nang aryi sunti ato kuboka malyi kurdeirisunung bok, nunda namin kanya bon nang kunub cok, sunsi malyi kum kurdeirisunub. Ura, nunci sunsi malyi kum kurdeirisunub deyok aryi, nunci, “Yuk nang ara mikib nang kunung bok, nunda mitang nang kunub se,” tenen alyi kanya borantibyi do? Ato tenen kum. Sun kankan aryi kuraming tola uram eteren nang ara sundamnyi ati talyi erebdeibdandoka kisal dangdaraming to, nibabyi neik dinyi akwe eboka kisal ur dakdatinyi. Lub kanya bon nang eraming to uram ato ebniryok, niryi dib en uram akwe ebkwinsin.

²²A nang ara sundamnyi erebdeibdandoka, “Nunda Ibrani yala nang ara Er Imtamnyi biryi nunukeiboka wibdeibsou nang kunub,” erdaraming. Ato erdaraming bok, nibabyi Ibrani yala nang kunun ati ebman. Tonda, a nang ara sundamnyi ati, “Nunda Israel yala nang ara Er Imtamnyi biryi nunukeiboka wibdeibsou nang kunub,” erdaraming. Erdaraming bok, nibabyi Israel yala nang kunun ati ebman. Tonda, a nang ara sundamnyi erebdeibdandoka, “Nunda Abraham er mabwe kunub,” erdaraming. Erdaraming bok, nibabyi nun aibwe Abraham yalanyi kunun ati ebman.

²³A nang ara sundamnyi erebdeibdandoka, “Nunda Kristus wa irmilin nang kunub,” erdaraming. Erdaraming bok, nibabyi Kristus wa irmilinanyi kunun ati ebman. Niryi a nang asi bisibkaboka nun Du Yesus Kristus wa irmilinanyi kunun ati ebman. Niryi lub nang en uram ato ebmasin cok, talyi uram kum ebmasin. A nang ara wa irmiliraming bok, niryi sunsi bisibkaboka iya busul kuboka wa irmiliranse ani, ukuryok tuba wa irmilinun. A nang ara sundamnyi erebdeibdandoka, “Ton tum ara ninyi aryi nunsi wenen ai dongobmasei,” eraming bok, niryi, “Ninyi aryi nisi wenen ai dongoranei ara uki mitik kum dongoranei,” ebtiniryok, sunsi bisibkaboka erebdeibdatinyi. A nang aryi, “Ninyi aryi tabwe taleboka nunsi kulab-kulab ebmasei,” eraming bok, niryi, “Ninyi aryi tabwe taleboka nisi kulab-kulab eranei ara uki mitik kum kulab-kulab eranei,” ebtiniryok, sunsi bisibkaboka erebdeibdatinyi. A nang ara sundamnyi ati, “Ton tum ara dibmanto kuramoubwe,” eraming bok, niryi, “Uki-uki nirya asi ninyi aryi obmaninto kunun,” ebtinyi.

²⁴Sun Yahudi yala nang aryi niti, “Wenebtibyi,” tenen nisi tabwe aryi litukmanei. Ara, uki amubaryi yuk-yuk aryi liki tiga puluh sembilan baryi litukmanei.

²⁵Tonda, uki winiryi yuk-yuk ara sun Roma nang aryi, “Wenebtibyi,” tenen co bala doboka nisi yongobmanei. Tonda, uki tentok tum aryi ninyi aryi keil doboka nisi yongobmanei. Tonda, weik co ngun-ngun deici aryi baranse ba, ibalya aryi weik dobmou uca, co ngun-ngun dakmou uca, ilil mekwan me wekmase. Ni baranse co ngun-ngun yuk-yuk ara uki tentok akwe kum dakmou. Erda, uki winiryi yuk-yuk ara co ngun-ngun dakmou. Liki tentok ara lukunda tentok ababyi kitingtam tentok ababyi ilil mekwan noutam aryi me wekoka kubmase ati ebman.

²⁶Niryi tanglona kum uca atam bina otam bina yibarkiringnanse. Me onmou me ababyi kouranse ba, me wekoka dibmanto kuranse. Bisik noutam ara ukula don nang mer ab ebdanmoubwe uca, obmaninto kuranse. Sun Yahudi yala nang ara ni mining yala nang kunung cok, marmun yiramnyi uca, ni obmanin to kuranse. Sun Yahudi kum yala nang ababyi niti, “Obtibyi,” tenen domkiringnansei. Sien atei bina kuranse ba, obmaninto kuranse. Tonda, atei yuk-yuk bina kuranse ababyi obmaninto kuranse. Tonda, ilil mekwan deici yibaranse ba, dibmanto kuranse. Sun dib tenen nang ab tonkwa kuramoubwe ba, sun kankan aryi dib tenen kum nang aryi marmun yiranei uca, obmaninto kuranse.

²⁷Tonda, niryi, “Teleb Uram eterebde binkwan,” teneransiryok, busul weik kuboka wa irmiliranse. Lukunda tum ababyi wi mana kum kuranse ba, kwaning atan ababyi me atan ababyi kuranse ba, niryi tanglona kum uca wa irmiliranse. Arum weik kunmanina ababyi tin ongon aling kum ongonmanina ababyi wa irmiliranse.

²⁸Tonda, niryi ato mambul kurdeirin dinyi nirya bonun cok, niryi sun dantam-dantam aryi kuboka buluraming dib tenen nang ati mambul kanya bonun. Ara, “Katabum eboka dib tenenung do kum do?” tenen iya mambul kanya tuba-tuba bonun.

²⁹Ninyi ton nang ara sakoka malyi dinyi kuraming deyok aryi, niryi mambul kanya bonun. Tonda, ninyi ton nang ara yuk nang asi sangdeiriraming deyok aryi, ni kanya lungdaranir ati ebman.

³⁰Ura, niryi, “Nidamnyi kisal dakdankwanun,” tenebman cok, niryi, “Nira yuk nang bisibkaboka iya mikibnyi kunun,” kum ebkwan. Erda, “Nira yuk nang asi bisibkaboka iya mitangnyi kunun,” eboka lak kibdeibkwan.

³¹Tola uram kuma. Nira iya mitangnyi kunun. Nun Nai Imtamnyi bira nun Du Yesus Er Nai kobdob aryi niti, “Diboka ebmar,” tenen bingnurur ati ebman. Nun Du Er si ara tuba-tuba iya erebdeibmana kurur ati ebman.

³²Nira sien atei Damsyik bina kuranse ba, weik sienyi Aretas amwetam buramunyi biryi niti, “Talebkwan,” tenebmou. Ato tenebmou uca, erci er miliramnyi yin doun nang aryi ato ebmou. “Damsyik atei aknardongon lika bublan nirya asi kalikmun ci, Paulus bisi talebdarur.”

³³Ato eboka arukdeibmou bok, ni kwityabwe dib tenen nang ara nisi inibdeiboka atei aknardongon lika dam bobinmanei. Lika aryi kuboka baitam dirkweten bis bobinmanei ura, sunci nisi win aling umbura dongobmanei asi takdongo-takdongo kiboka dobkwetebmanei ura, tukwe ai yurbinmase. Ato kuboka niryi Damsyik atei aryi anaboka lebdandobmase.