Read Futuna-Aniwa 2Korintus 13 Bible Online

2Korintus 13 - Futuna-Aniwa bible

2Korintus 13

¹Ni kwityabwe, niryi sunsi minob ura diryanmasise ara liki bitinyi diryanmasise. Ani, niryi sun dam aminda aryi tubto tamuryankwan ara liki winiryi tum diryankwansin. Niryi sun dam yanmanyi ura, niryi sun kankan aryi kuboka malyi kurmurun nang asi wenebkwan. Er Imtamnyi Uram umbura aryi ato eboka kerek sekeiamnyi. “Sun deyok lilin nang ara ninyi aryi tatab-tatab ebmangnyi nang asi, ‘Malyi dinyi kubmumwe ati wenebkwayeb, se,’ eranting ara talyi keken uram deib aryi uram minola sekwebingnyei. Erda, ninyi bitinyi kum winiryi kum aryi, ‘Anyi bira ato-ato kuboka malyi kubmou asi nun asing eibmoubwe,’ lak ebting ura, sun deyok lilin nang aryi deyok diboka lilibting ura, ‘Malyi kubmar ati wenebkwayeb,’ eboka uram dobdeibting kum, ‘Er deyok kum kubmar ati nunci wenen dinyi kum karebkwayeb,’ eboka uram dobdeibting kum.” (Ulangan 19:15)

²Ura, nibabyi neiktoto kunun. Niryi wenen dinyi karenun ara talyi keken uram deib aryi minola kum karenun. Ati, niryi sun kankan ton nang aryi malyi kun dinyi lak kimsunun ara liki tentok akwe lak kum kibmasise. Erda, ni ab sun ab tonkwa kuramoubwe liki bitinyi tum aryi niryi tamuboka ato ebmasise. “Sun kankan ton nang aryi malyi dinyi kuramnyi deyok aryi, niryi wenebkwan. Ara, ni tamuryanyi ura, a nang asi wenebkwan,” ebmasise. Tonda, “Yuk malyi kun nang ababyi wenebkwan,” ebmasise. Ni sun ab tonkwa kuramaburyok, liki bitinyi ato ebmasise. Ani, ukuryok sun ab tonkwa kum kuramibiryok, niryi kerek sengna deib aryi tamuboka ebmasin. “Ni sun dam tamuryanyi ura, sun kankan aryi malyi kurmurun nang asi mikib kuboka wenebkwansin.”

³Sun kankan ton nang aryi nisi dib kum teneranurum cok, sunci niti, “Nun Du Kristus Uram ermururandanyi diboka kurur do?” eranurum cok, “Una kuboka biktibyi do?” tenen, “Lak kibdeibsurum,” eboka moloranurum. Ura, niryi, “Nira nun Du Yesus Uram ermurunanyi diboka kunun,” tenen bingnun cok, sunbabyi lak kibdeibkwinsin. Nun Du biryi ni biriman aryi sun kankan dam wa iransou ara mitang kuboka sun kankan dam wa iransou do? Ato tenen kum. Erda, nun Du Yesus biryi ni biriman aryi sun kankan dam wa iransou ara mikib kuboka wa iransou cok, du mourdeiriransou. Ati, sunci, “Nun Du biryi Paulus biriman aryi wa iransou ara mikib kuboka wa iransou,” tenen bikdate deib aryi sunci niti, “Nun Du uram ermururandanyi diboka kurur,” tenen biknindate.

⁴Nun Du bira iya mikibnyi kurur bok, ninyi aryi Erda mitangnyi kibdanmounyi bisi doboka co lase deib aryi deibmai. Co lase deib aryi deibmai uca, dibmou. Sirya dibmou ani, Erda kam bukokmounyi bira Er Imtamnyi mikib deib aryi iya kam burur. Ura, nunda nun Du Yesus wa irmilin nang ara nun Du Yesus dam kun nang kunub cok, nunbabyi neiktoto mitang nang ato kunub. Ba, Er Imtamnyi biryi Er mikib deib aryi nunsi kam kurdeirisurur. Ara, Er Imtamnyi biryi nunsi kam kurdeirisurur uca, nunda nun Du Yesus dam kun nang kubmurubde binkwamibiryok, sunda dib tenen nang kankan aryi wa ibkwayeb.

⁵Ni kwityabwe, sunci sun kanya asi diboka lilibdandarur. Ara, “Nunda nun Du Yesus bisi diboka dib tenenub do kum do?” tenen sundamnyi lilibdandarur. Nun Du bira sun kanya dam kusurur ati sunci kum bikdanmarum do? Ba, sunda nun Du Yesus bisi diboka dib kum tenebdate uca, nun Du Yesus bira sun kanya dam kum kuransute.

⁶Ura, ni kwityabwe, nun Du bira nun kanya dam ababyi kusurur ati ebman. Ati, sunbabyi nunti, “Er Imtamnyi biryi kisal dangdur nang kunung,” tenen biksindate.

⁷Ni kwityabwe, nunci sunti, “Malyi dinyi kunubde bingnyei,” tenen Er Imtamnyi urasintam aryi Ersi molormilibde basunub. Molormilibde basunub cok, nunci, “Ninyi aryi nunti, ‘Nun Du wa irmilin nang diboka kunung,’ tenen biksiting,” tenen kum molonub. Erda, nunci sunti, “Er Imtamnyi urasintam aryi teleb dinyi kunubde bating,” tenen molormilibde basunub. Ati, sun kankan ton nang aryi nunti, “Nun Du wa irmilin nang diboka kum kunung,” tenebsiting ababyi, sunci Er Imtamnyi urasintam aryi teleb dinyi kunubde bindarur ati ebmasib.

⁸Dib en uram ara iya mikib kurur deyok aryi, ninyi aryi bisik sekmanto kum kurur. A deyok aryi, nunci nundamnyi kum ererdeirirdanub cok, Teleb Uram akwe ererdeirinub ati ebman. Ati, nunci, “Dib en uram bisik sektibyi,” tenen kum kunub. Erda, nunci, “Dib en uram erebdeiboka lak ebkwayeb,” tenen kunubde banub.

⁹Nunda mitang nang ato kuramib bok, sunda mikib nang ato kurandum deyok aryi, nun kanya kilkil weik kuransir ati ebmasin. Tonda, nunci sunsi Er Imtamnyi bisi molormilisunub ara, “Sunglona dinyi deibloboka sunglona kum uca teleb dinyi kunubting,” tenen molormilisunub.

¹⁰Ni sun ab tonkwa kum kuramibiryok, mikib uram eboka kerek sengdeirisunun. Ara, niryi sunti, “Sun dam yanmanyi ura, niryi mikib uram eboka wenebnyei,” tenen kerek sengna deib aryi mikib uram eboka kerek sengdeirisunun. Nun Du bira nisi mikib karebnou uca, niryi sunsi wenebsitinyi ati ebman. Ato ebman bok, nun Du Yesus bira nisi mikib karebnou ara, “Sun dib tenen nang kanya kum daneibkwande,” tenen mikib kum karebdeibnou. Erda, “Sun dib tenen nang kanya katabum ebdeibkwande,” tenen Erci nisi mikib karebnou.

¹¹Ura, sirya kobdob kerek sekeibkwinsin uram ara, “Ni kwityabwe teleb,” eboka kerek sekeibkwinsin. Sunci, “Sunglona kum uca Er Imtamnyi urasintam aryi teleb dinyi kunubde binkwayeb,” tenen ingkirikdarur. Tonda, niryi sunti ebkatabdeiboka, “Ato-ato kubdarur,” ebmasin uram asi sunci diboka kekebdarur. Tonda, sunci neik kanya boramun ci, antaniboka kubdarur. Ato kubmunyi ura, nun Nai Imtamnyi bira ninyi boukwe weik kusurutnyi ton ninyi kanya teleb kurdeirisurutnyi ton sun ab tonkwa kubkwandum.

¹²Nunda dib tenen nang aryi nun mamun irirdanub to, sunci sun mamun iribdandoka, “Nun kwityabwe teleb,” eboka kibdobdandarur. Sun Makedonia mutuk aryi kuboka dib tenen nang nirya ara sunti, “Nun kwityabwe teleb,” ebdeibmasing.

¹³Nun Du Yesus Kristus biryi kisal dakoka sun ab tonkwa kuna teleb. Tonda, nun Nai Imtamnyi boukwe kiboka sun ab tonkwa kuna teleb. Tonda, Er Imtamnyi Kanya Roh Kudus aryi antanibdeiboka sun nirya ab tonkwa kuna teleb.