Read Futuna-Aniwa 2Korintus 3 Bible Online

2Korintus 3 - Futuna-Aniwa bible

2Korintus 3

¹Ura, sun kankan asi ton nang aryi nunti ato teneransing. “A nang ara nun Du Yesus biryi bokdonokmou nang diboka kum kunung ati, sunci sundamnyi ati, ‘Nunda nun Du biryi bokdonoksou nang kunub,’ erdaranding se. Ati, unato ati a nang aryi, ‘Nunda nun Du biryi bokdonoksou nang kunub,’ eboka tamuboka ebkalibmasing do?” Ninyi ton nang ara ato teneransing bok, nunci nundamnyi erebdeibdandoka talyi uram kum esunub. Nunda nun Du biryi bokdonoksou nang diboka kunub ati sunbabyi sirya bingsindarur deyok aryi, nunci nundamnyi kum ererdeirirdanub. Yuk nang ababyi etererbarkiringnamingiryi, kerek sengna bobaraming. A kerek sengna umbura aryi kerek sengdeirin dinyi ara, “A nang ara nun Du Yesus biryi bokdonokmou nang kunung ati sunci dobdobdarur,” eboka kerek sengdeiriraming. Ati, nunbabyi, “Ninyi aryi nunsi dib teneboka dobdobsiting,” tenen ato kerek sengna borantibyi uca, sunsi karebkwanub do? Ato tenen kum. Tonda, nunci sunti, “Ato kerek sengna sekeibsumunyi uca, yuk nang aryi nunsi dib teneboka dobdobsiting,” ebok(...)

²Sun Korintus nang ara nun eteresina uram deib aryi dib tenen dinyi ton du moun dinyi ton dobdobmarum deyok aryi, sunci nunti kerek sengna kelakuan baik ato dinyi kurandum ati ebman. Nunci sunsi Teleb Uram etereransoubwe uca, du moubsou deyok aryi, sunda nunti kisal dangsina kerek sengna ato kurandum. Ara, ninyi nirya ara sun kankan kuboka du mousin dinyi asi asing eiriransing uca, sunci nunti, “Nun Du biryi bokdonokmou nang diboka kunung,” tenen bingsunung. Nunci sunsi boukwe weik kusunub deyok aryi, nunci sunti, “Nun taram tam deiboka bobanub kerek sengna kelakuan baik,” tenesunub.

³Sunda Korintus nang ara nun lak etereransoubwe uram deib aryi dib tenerandau ani, ukuryok ababyi dib tenerandum. Ati, sunbaramnyi ara kikliboka nun Du Yesus Kristus biryi kerek sekeibsou kerek sengna ato kurandum. A kerek sengna ara tinta deib aryi kum kerek sekeibsou. Erda, Er Imtamnyi iya Kam kurutnyi Er Kanya Roh Kudus deib aryi sun kanya dam asi kerek sekeibsou. Ba, nun Du Yesus biryi kerek sekeibsou ara keil ila dam aryi kum kerek sekeibmou. Erda, sun kanya dam kerek sekeibsou ara Teleb Uram nun eterenub uram asi sun kanya dam kerek sekeibsou.

⁴Ura, nunci kankana kum uca, “Nun Teleb uram etereramoubwe ba, nun Du biryi sun Korintus nang asi dib tenen dinyi ab du mourdeirin dinyi ab karebde baramwe,” tenen bingsunub. Ato tenen bingnub deyok aryi nunci sun Korintus nang ati kankana kum uca, “Nun kerek sengna kelakuan baik kunung,” tenen bingsunub. Ara, yuk nang aryi sun dib tenen dinyi ab du moun dinyi ab eibmangnyi uca, nunda Teleb uram eteren nang ati, “Nun Du biryi diboka bokdonokmou nang kunung,” tenen bikwansing. Nun Du Yesus Kristus sunsi du mourdeiriransounyi biryi nunsi a dinyi lak kibdeibsou deyok aryi, nun kankana kum uca Er Imtamnyi urasintam aryi kuboka ato enub.

⁵Nunda nundamnyi ati, “Mikib nang kunub uca, nun yuk aryi du mourdeirin dinyi wa iboka karebkwayeb,” tenerdana kum kunub. Erda, nunci, “Nun Nai Imtamnyi biryi mikib karebde basurur deib aryi nunci mikib kuboka wa irmilinub,” tenen bingdanub.

⁶Nun Nai Imtamnyi biryi karebsou uca, nun mikib kuboka wa irmilinub ci, “Er Imtamnyi biryi karesurur mururdeirisin dinyi ukuryok dinyi asi dobdobdarur,” eboka lak kimdeirinub. Minob uram ara, “Ukubdarur-Ukuna mem,” en uram deib aryi Er Imtamnyi biryi, “Sun malyi kun dinyi kurandum deyok aryi wenebmasinto nang kundarur,” eboka lak eransou. Ba, ukuryok mururdeirisin uram deib aryi Er Imtamnyi Kanya Roh Kudus aryi nunsi kam kurdeirisin dinyi karebde basurur.

⁷Er Imtamnyi biryi Musa biriman aryi mururdeirisin dinyi yuma kobdob dinyi karebsou ara ninyi kum lebdeibsou. Erda, wenen dinyi ara din dinyi boyansou. A mururdeirisin uram ara, “Ukubdarur-Ukuna mem,” en uram asi Er Imtamnyi biryi keil deici aryi kerek sekeibmou. Kerek sekeibmou ci, Erci milil weik dinyi karebmou ci, a uram asi Musa bisi karebmou. Uca, Musa urasin ababyi milil weik tiya abkarabmou ba, sun Israel yala nang asing imum kunmou uca, Musa urasin asi dibdenmana kum kubmou. Musa urasintam aryi kuboka milil ara kum danabdoro banmou bok, sun Israel yala nang aryi, “Musa urasintam ara milil weik,” tenebmai.

⁸Ura, mururdeirin dinyi minob kerek sengdeirin dinyi ara weneboka din dinyi boyansou ara milil weik dinyi kuramwe bok, ukuryok dinyi ara Er Imtamnyi Kanya Roh Kudus aryi wa iboka karebde basurur dinyi ara bisibkaboka iya milil dinyi kurur ati ebman.

⁹Mururdeirin dinyi minob dinyi ara ninyi wenesin dinyi boyangaramwe bok, milil weik dinyi kuramwe. Ba, mururdeirin dinyi ukuryok dinyi deib aryi Er Imtamnyi biryi, “Ni mabwe nermabwe,” tenen ninyi dorosurur deyok aryi, bisibkaboka iya milil tenen dinyi kurur.

¹⁰Ukuryok mururdeirisin dinyi ara bisibkaboka iya milil dinyi kurur deyok aryi, nunci kiklibdeibtibyi uca, “Minob mururdeirin dinyi milil ara kum dandobwe,” ebtibyi.

¹¹Minob mururdeirin dinyi ara tiya dinyi akwe kuramwe bok, milil kuramwe. Ba, ukuryok mururdeirin dinyi ara tanglona kum uca iya kun dinyi kurur deyok aryi, bisibkaboka iya milil dinyi kurur.

¹²Ati, Ni kwityabwe. Nunci, “Mururdeirin dinyi ukuryok karebsou ara iya kubkwande,” tenen dibde bunub deyok aryi, nunci kankana kum uca a ukuryok mururdeirisin uram lak ebde banub.

¹³Minob ura Musa biryi mururdeirin dinyi minob dinyi dobdobmou ura, erci aling doboka er urasintam asi libdanmou. Ati, erci, “Milil dinyi kum danabdoro banmar ati, sun Israel yala nang asing eiboka bikingnyei,” tenen er urasintam asi libdanmou. Ba, nunda ukuryok mururdeirin dinyi doronub nang ara nun urasintam asi limdana kum kunub. Erda, nunci, “Er Imtamnyi biryi mururdeirin dinyi ukuryok dinyi ara iya kubkwande,” tenen bingnub ci, Er Imtamnyi biryi mururdeirin uram lak enub.

¹⁴Ba, sun Israel yala nang minob kuramnyi nang ara mururdeirin dinyi minob dinyi milil asi asing eiriramiryok, sun kanya ara kat weik kuramwe deyok aryi, dib kum teneramnyi. Ara, minob aryi kuboka ukuryok ababyi Musa Uram asing eiboka nukde banung cok, sunci dib en uram asi asing kum eirinung. Asing limdeirin aling ara sun asing limdeiriramwe ani, ukuryok ababyi limdeirirande. Ara, nun Du Yesus Kristus dam kun nang kum kuraming deyok aryi, asing kum eibkatabmang ati ebmasin.

¹⁵Ba, ukuryok ababyi sun Israel yala nang aryi Musa Uram asing eiboka nukeibingiryok, sunci asing eibkatabman kum nang ato kuraming ci, sun kanya dam aryi nun Du Yesus deyok ati dib en uram kum bingnung.

¹⁶Ba, unanyi-unaner ara nun Du Yesus bisi dib tenebingnyi nang ara asing eibkatabman ato kiboka dib en uram bikwaming.

¹⁷Ura, nun Du Yesus bira nun kanya dam wa isurutnyi kurur. Ura, nun Du Yesus ninyi kanya wa isurutnyi nun dam kuransici uca, nunda tabwe lobdeibsou nang ato kimnub.

¹⁸Ura, nunda dib tenen nang nirya ara urasin limdana kum libdandobmabiryi, nun Du Yesus Iya Telebnyi milil asi asing eiriranub ba, nun urasintam ababyi milil arabde basurur. Ara, nun Du Yesus ninyi kanya wa isurutnyi aryi kuboka iya milil dinyi asi asing dibdongo-dibdongo banub ba, nun Du Yesus biryi karesurur uca, nunci tabakdongo-tabakdongo nun Du Yesus Iya Telebnyi bito nang kiboka Er Imtamnyi urasintam aryi teleb dinyi kunubde banub.