Read Futuna-Aniwa 2Korintus 8 Bible Online

2Korintus 8 - Futuna-Aniwa bible

2Korintus 8

¹Ura, Ni kwityabwe dib tenen nang. Nun Nai Imtamnyi biryi sun Makedonia mutuk kuboka dib tenen nang buluna yuk-yuk asi kisal dakmou uca, du mourande. Ara, sun Yerusalem atei kuboka kwaning atan nang ati co bok bulubdeiboka deibmai ati ato ebman. Niryi sunti, “A dinyi bikting,” tenen lak ebmasin.

²Ara, sun Makedonia mutuk kuboka dib tenen nang ara mambul weik kimna dinyi ilinto boramingiryi, langdeiboka kilkil kanya boraming. Tonda, bona bon dinyi ton, co bok ababyi mitik akwe boramingiryi, sunci sun taruk kuramwe dinyi asi doboka sun atan nang asi langdeiboka bokoka kareraming.

³Ara, sunci sun taruk dam kuramwe dinyi akwe kum kareramnyi. Erda, bisibkaboka kareramnyi. Yuk nang aryi sunti, “Co bok ilinto karebdarur,” eboka kum arukdeibmai. Erda, sunci sun kanya yuk aryi, “Sun atan nang asi miliboka karebkwayeb,” teneramnyi tok, kareramnyi.

⁴Sun Makedonia mutuk kuboka dib tenen nang ara uram ebkatabdeibmasei ci, “Nunbabyi sun Yerusalem atei aryi kuboka atarande dib tenen nang asi miliboka karebtibyi,” eboka molobmasei ura, co bok langdeiboka bulubdeibmai.

⁵Ara, nunci a nang ati, “Bona bon kum nang kunung ati co bok mitik akwe karebkwaming,” tenebmoubwe bok, sunci co bok mitik kum bulubdeiboka karebmai. Ati, yuma ara sunci sun kanya asi nun Du Yesus bisi deibmai ura, aminda ara sun kanya nunsi deibmasei. Ara, Er Imtamnyi biryi nunti teleb tenesurur to, sunci sun kanya asi nunda nun Du Yesus wa irmilin nang ababyi deibmasei.

⁶Uca, nunci nun kwit Titus bisi sun dam bokdonokmaburyi, nunci ersi ato eboka ebkatabdeibmoubwe. “Kanci sun Korintus atei nang dam biminyi ura, ato ebdeibdum, ‘Niryi minob uca ebdeibmasise uca, sunci deyok kouboka co bok bulubkalibmandau ani, ukuryok aryi kum bulubdeiamunci dinyi nirya bulubdeibdarur. Ati, sunci deyok kouboka yuk nang asi teleb kubdeibmandau ani, sunglona kum uca kunubsekdarur.’” Ati, nunci Titus bisi takubdeiboka, “Ato ebdeibdum,” ebmoubwe.

⁷Sunda Korintus nang ara dib tenen nang yuk nang ilinto asi bisibkaboka iya teleb nang kurandum. Ara, sunci yuk nang asi bisibkaboka katabum eboka dib tenerandum. Tonda, sunci langdeiboka dib en uram lak erandum. Tonda, sunci langdeiboka bikdob dinyi bingnandum. Tonda, sunci busul kanya langdeiboka borandum. Tonda, nunci sunsi langdeiboka boukwe weik kusunub to, sunbabyi neiktoto yuk nang asi boukwe weik kundarur. Ati, sunci yuk dinyi-yuk dinyi nirya asi langdeiboka kunubde barandum to, sunci, “Sun kwaning atan nang asi co bok karebkwayeb,” tenebmunyi ababyi, langdeiboka karebdarur.

⁸Niryi sunsi, “Kwaning atan nang asi co bok karebdarur,” eboka kum arukdeibkwinsin. Erda, niryi, “Sun kwaning atan nang diboka boukwe weik kunung do kum do?” tenen ukubdenmasin deyok aryi, ato ebmasin. Yuk nang ara busul kuboka kareraming deyok aryi, niryi kikliboka, “Sun Korintus nang ababyi busul kuboka karebting,” tenen kusunun.

⁹Nun Du Yesus Kristus bira imtam tukwetam dinyi nirya talerutnyi kurur cok, Erda boukwe deyok aryi, ninyi kiboka bona bon kumnyi bitonyi kibdanmou. Ati, nun Du Yesus biryi sunda bona bon kum nang ati lebdeiboka imtam dinyi langdeiboka karebkwansou ati, Erda bona bon kumnyi bitonyi kibmou. A deyok aryi, sunbabyi neiktoto boukwe tenen deyok aryi, yuk nang asi langdeiboka karena teleb.

¹⁰Ati niryi sunsi a deyok ati, “Ato-ato kuna teleb,” en uram ebkwinsin. Min kwalina ara sunci deyok kouboka, “Sun kwaning atan nang ati co bok bulubdeibkwayeb,” ebmandau ani, bulubkalibmandau. Ani, ukuryok ara sunci sun, “Ato-ato kubkwayeb,” en uram kunubde bana teleb. Ati, sunci busul kuboka, “Co bok bulubdeibkwayeb,” ebmandau tok, sunci busul kubmun ci, kunubde bana teleb ati ebman. Ara, sun taruk kubmaci tok karebmun ci, sun kwaning atan nang ati co bok bulubdeibdarur.

¹¹

¹²Sunci sun kanya dam aryi, “Sun kwaning atan nang asi co bok bulubdeibkwayeb,” tenerandum ara telebto tenerandum. Sun taruk kubmasici dinyi ara mitikanun kubsici ura, co bok mitikanun karena teleb. Ba, sun taruk kubmasici dinyi ara mitik kum kubsici ura, co bok ilinto karena ababyi teleb. Co bok ilinto kum, mitikanun kum karena ara bikdob dinyi kuma. Erda, “Karebkwayeb,” tenen kanya bona ara bikdob dinyi kurur ati ebman. A deyok aryi, niryi, “Sun taruk kubmasici tok karebdarur,” ebmasin.

¹³Ati, nunci sunti, “Co bok ilinto karebting uca, yuk nang aryi kum karebkwaming,” tenen kum kusunub. Tonda, nunci sunti, “Co bok bulurdeina deyok aryi, mambul weik kubting,” tenen kum kusunub. Erda, nunci, “Sun dantam-dantam kuramingnyi dib tenen nang ara sun taruk kubmaci tok kikiman bulubdeibkwanung,” tenen kunub.

¹⁴Sunda Korintus nang ara ukuryok aryi co bok langdeiboka talerandum ati, sun kwaning ataranci nang asi langdeiboka karebdate. Ura, aminda aryi sunbabyi kwaning atabsute ura, sun Yerusalem atei aryi dib tenen nang aryi sunti tamuboka karebsiting. Ato kubdate ura, sun ab yuk dib tenen nang ab aryi sun mamun dirnilirdandate.

¹⁵Ato kubdate ura, sunci Er Imtamnyi Uram umbura aryi kerek sekeiamnyi to kunubdate. Ara, Er Imtamnyi Uram ara ato esurur. “Sun Israel yala nang ara ninyi kun kum mutuk kuramiryi, imtam roti si Mana buluramiryi, ninyi nirya ara kikiman yiramnyi uca, bouramwe. Ara, sun Mana du ilinto bulubdeibmai nang ara yina kikiman bulubdeiboka yiramnyi. Ba, sun Mana du mitikanun bulubdeibmai nang ababyi yina kikiman bulubdeiboka yiramnyi,” ebmou. (Keluaran 16:18)

¹⁶Ni kwityabwe, niryi sunti boukwe weik kuboka, “Busul kuboka dibnilibtinyi,” tenesunun to, nun kwit Titus bibabyi neiktoto sunti boukwe weik kuboka, “Busul kuboka dibnilibtinyi,” tenesurur. A deyok aryi, niryi nun Nai Imtamnyi bisi, “Ei, ni Nai,” enun.

¹⁷Nun kwit bira er kanya dam yuk aryi, “Korintus atei bitinyi se,” tenesurur ati erda kilkil kanya boboka sun dam yankwande. Ura, niryi ersi, “Korintus atei birum,” ebmase ba, erci kilkil kanya boboka, “Ni binkwan,” ebmanou.

¹⁸Ura, nun kwit Titus bitikwe kum bokdonokmasin. Erda, dib tenenanyi yuknyi bibabyi bokdonokmasin ara Titus ab tonkwa sun dam yankwanding. Anyi bira Teleb Uram busul kuboka eteresurur deyok aryi, sun dantam-dantam kuboka dib tenen nang aryi ersi kisal dangnaming.

¹⁹Anyi bisi sun dantam-dantam kuboka dib tenen nang aryi sirya wibdeibmai. Ara, sunci, “Sun Yerusalem atei kuboka atan nang asi co bok bulubdeiboka bobinkwande,” tenen wibdeibmai. Anyi bisi wibdeibmainyi bira nisi miliboka co bok bulubdeiboka Yerusalem atei bobinkwanim. A co bok bulurdeiboka bobinkwanim ara, “Ninyi aryi asing eibtingiryi, nun Du Yesus si weik ebting,” tenen bobinkwanim. Tonda, nunci, “Busul kuboka sun dib tenen nang dibnilibtinimnyi,” tenen bobinkwanim.

²⁰Nunci a co bok ara langdeiboka deiriraming dinyi bobinkwanim ara, “Manmalina kum uca bulubdeiboka Yerusalem atei bobitinimnyi,” tenen bobinkwanim. Ati, nunci, “Ninyi aryi tatab-tatab ebsingnyei,” tenen a co bok asi manmalina kum uca bobinkwanim.

²¹Ati, nunci busul kuboka, “Nun Du urasintam aryi teleb dinyi kubkwanim,” tenen, “Ninyi urasintam ababyi manmalin dinyi kum kubtinimnyi,” tenen a co bok bulubdeiboka bobinkwanim.

²²Tonda, nun kwit Titus ab nun kwit yuknyi ab nun wa irmilisununyi yuknyi bibabyi bokdonokmasin. Anyi bira busul weik kuboka nunsi wa irmiliransou deyok aryi, nunci erti, “Nun kwit,” tenenub. Anyi bira sunti er kanya deibmasir deyok aryi, erci tabakoka, “Dibnilibtinyi,” tenesurur.

²³Nun kwit Titus bira ni wa irmilininanyi kurur ci, sun kankan kuboka wa isurutnyi kurur. Ba, nun kwityabwe yuk nang bitinyi ara sun dib tenen nang buluna yuk-yuk aryi wibdeiboka bokdonokmarei nang kururung. A nang nirya ara nun Du Yesus Kristus si weik en nang kunung ati ebman.

²⁴A nang ara sun dam yankwaming deyok aryi, sunci a nang urasintam aryi co bok asi bulubdeibdarur. Ato kubmun ci, sunci, “Nunbabyi kwaning atarande nang asi boukwe weik kunub,” tenen lak kibdankwandum. Tonda, niryi sunti kisal dangsunun ara talyi ati eboka kisal kum dangsunun ati bikting ati, sunci sun kwaning atan nang ati co bok deibdarur. Ara, sun dantam-dantam kuboka dib tenen nang ababyi, “Teleb kun nang,” tenen biksiting ati, sunci a nang asi kibdobmun ci, co bok bulubdeibdarur.