Read Futuna-Aniwa Galatia 2 Bible Online

Galatia 2 - Futuna-Aniwa bible

Galatia 2

¹Ura, kwalina kisok lubaryi kuramoubwe ura, nira Yerusalem atei tubto tamurbinmase. Ura, nun kwit Barnabas ab tonkwa binmanumwe. Tonda, nun kwit Titus bibabyi tonkwa milibmasou ba, Yerusalem atei binmoubwe.

²Nun Nai Imtamnyi biryi, “Yerusalem atei birum,” eboka lak kibdeibmanou ba, nunda Yerusalem atei binmoubwe. Yerusalem atei binmoubwe ura, niryi sunsi, “Ato-ato eboka niryi sun Yahudi yala nang kuma asi Teleb Uram eterenun,” ebmase. Ninyi nirya bulubmai asi niryi a uram asi lak kum ebmase. Erda, sun dib tenen nang aryi, “Erebdob nang,” tenen nang akwe niryi a uram asi lak etereranse. Ara, “Sun erebdob nang asi kum molobmanyi ura, ‘Bisik sektibyi,’ tenebningnyei. ‘Bisik sektibyi,’ tenebniting ati, niryi talyi ati Teleb Uram eterebnyei.” Tonda, “Bisik sektining uca, Teleb Uram minob etereranse uram ara talyi kibcei,” tenen ato kubmase. Niryi ato tenebmasiryi, sun erebdob nang asi eterebmase. Ati, niryi sunsi, “Ato-ato eboka sun Yahudi yala kuma nang asi Teleb Uram eterenub,” eboka nukmase.

³Ato eboka nukmase ba, sun Yerusalem atei kuboka Teleb Uram eterebde ban nang aryi nunsi teleb kiboka dobdobmasei. A nang aryi, “Teleb Uram eterebmin ci, ‘Musa Uram ababyi kunubdarur,’ ebtabakdum,” eboka kum takubdeibmanei. Tonda, nun kwit Titus bira Yahudi yala nang kuma nang kuramwe bok, sunci erbabyi, “Nun kwit,” tenen dobdobmai. Ati, sunci, “Kan kwit Titus bira Yahudi yala nang kuma nang kurur ati, er den bama sekdum,” kum ebmanirei.

⁴Sun Teleb Uram eterebde ban nang ara, “Kan kwit Titus bisi den bama sekdum,” kum ebmanirei bok, ninyi ton nang ara nun Du Yesus bisi diboka kum miliramiryi, tola uram akwe etereramnyi. A nang ara, “Sun Yahudi yala nang kuma ara den bama sekdangiryok, nun Du Yesus bisi milina teleb,” eboka tola ati ato etereramnyi. A nang ara nun Du Yesus milin nang diboka kum kuramiryok, “Sun Yesus bisi dib tenen nang asi una kuboka ikin dinyi takubdeibkwayeb do?” teneboka dirliliryanmai. Nunda dib tenen nang ara, “Nun Du Kristus Yesus biryi nunsi lebdobmasou,” tenen bingnub ati, Musa biryi takubdeibsou uram kununa asi sirya taklobmoubwe. Sirya taklobmoubwe bok, a tola uram eteren nang ara, “Er Musa biryi takubdeibsou uram kununa asi taklobingnyei,” tenen yanmai. Ati, sunci nun dib tenen nang ati, “Musa Uram asi kunuboka den bama sekdangiryok, mambul weik tuba kubting,” tenen yanmai.

⁵A nang ara tola ati ato eboka eterebmai ati, nunci sunsi, “Dib ebmarum,” ton kum ebmoubwe. Erda, sunci ebmai tola uram asi bisik sekmabuburyok, nunci dib en uram akwe lak eterebmoubwe. Sun Galatia mutuk kurandum nang ara, “Teleb Uram ara dib en uram akwe kurur,” tenen, Teleb Uram asi tuba-tuba talebkwandau ati, nunci ato kubmoubwe.

⁶Ura, sun dib tenen nang aryi, “Erebdob nang,” tenen nang ara nunsi teleb kiboka dobdobmasei. Tonda, sunci, “Teleb Uram eterebmin ci, ‘Musa Uram asi kunubdarur,’ ebtabakdum,” eboka kum arukmanei. Niryi a, “Erebdob nang,” tenen nang ati ato tenenun, “Sun dib tenen nang asi diboka menengnaming kum, diboka kum menengnaming kum, nisi neiktoto kuranir.” Nun Nai Imtamnyi bira ninyi urasin meiboka kum dorosurur. Ati, nibabyi neiktoto, “Sun erebdob nang uram dobdobkwan, sun talyi nang uram bai donokwan,” kum tenenun. Ato teneranse bok, sun dib tenen nang kankan kuboka erebdob nang ara nunsi teleb kiboka dobdobmasei. Dobdobmasei ura, sunci nisi, “Teleb Uram eterebmin ci, ‘Musa Uram ababyi kunubdarur,’ ebtabakdum,” eboka kum takubdeibmanei.

⁷Erda, sunci nunsi teleb kiboka dobdobmasei. Ara, sunci ni Paulus biti, “Nun Nai Imtamnyi biryi takubdeibmou uca, erci sun Yahudi yala kuma nang asi Teleb Uram etererur,” tenen bikdobmai ura, sunci nunsi dobdobmasei. Ara, sunci, “Nun kwit Petrus bira sun Yahudi yala nang asi Teleb Uram etererur to, nun kwit Paulus bira sun Yahudi yala kuma nang asi Teleb Uram etererur,” tenen sunci bikdobmai.

⁸Tonda, sunci ato tenebmai. “Er Petrus bira sun Yahudi yala nang asi Teleb Uram eterebde binkwande ati, nun Nai Imtamnyi biryi ersi mikib kibdeiboka milirur. Ba, nun Nai biryi nun kwit Paulus bibabyi neiktoto milirur. Ara, er Paulus biryi sun Yahudi yala kuma nang asi Teleb Uram eterebde binkwande ati, nun Nai Imtamnyi biryi Paulus bisi mikib kibdeiboka milirur.”

⁹Ura, sunci ni Paulus biti, “Nun Nai Imtamnyi biryi ersi dobdobmou,” tenen bikmanei ura, sunci, “Nun kwityabwe,” eboka taruk talebdanmoubwe. Ara, Yakobus ab, Petrus ab, Yohanes ab aryi ni ab Barnabas ab asi taruk taleboka, “Nun kwityabwe,” ebdanmoubwe. A nang ara sun dib tenen nang kankan asi erebdob nang kuramiryi, ato ebmasei. “Nun kwityabwe teleb! Sunci sun Yahudi yala kuma nang asi bindoka Teleb Uram ur eterebmunyi ba, nunda sun Yahudi yala nang asi bindoka Teleb Uram eterebkwayeb,” ebmasei.

¹⁰Ebmasei cok, sunci uram tentok ebtabakoka ato takubdeibmasei. “Sun utotoa ataranci nang dirnilina ara luba kibdumunyei,” eboka takubdeibmasei to, nunci, “Sun ataranci nang asi dibnilibkwayeb,” tenen diboka kuramoubwe. Sirya ebdanmoubwe ura, ni ab Barnabas ab anaboka Antiokhia atei binmanumwe.

¹¹Uki-uki kuramoubwe ani, Petrus Yerusalem atei aryi anaboka Antiokhia atei yanmou. Ura, erci nun minob ebdanmoubwe to takloboka yuk uram ebmou. Ara, erci, “Sun Yahudi yala kuma nang ara Musa Uram kunubkwanung,” eboka eterebmou. Petrus biryi ato eboka eterebmou ati, niryi ersi, “Malyi uram ebmarim. Ato eboka eterebmunyei,” eboka erekdobmase.

¹²Minob ura er Petrus ab sun Yahudi yala kuma nang ab antaniboka yina tonkwa yibde kuramnyi asi, nun kwit Yakobus er miliramnyi nang yanmai ura, er Petrus biryi, “Ni kerebningnyei,” tenen ilil ati sun Yahudi yala kuma nang ara kisibdobmou. Ara, “Den bama kum sekamnyi nang ab tonkwa yinub ati, ni kwityabwe Yahudi yala nang den bama sirya sekyi nang aryi nisi kerebningnyei,” tenen ilil kuramwe.

¹³Ura, sun yuk Yahudi yala nang ababyi Petrus biryi ukubmou to milibmai ci, sun Yahudi yala kuma nang dam aryi kisibdobmai. Ura, ni kwit Barnabas bibabyi er Petrus biryi ukubmou to milibdobmou. Ara, wingdana kanya bobmai ati, sunci sun Yahudi yala kum nang dam aryi kisibdobmai ati ebman.

¹⁴Ato kubmai bok, niryi dinmase uca, sun kubmai dinyi ara Teleb Uram to aryi eteresurur to kum kubmai bikmase. Ura, niryi ninyi ilinto buluboka wekmaia urasintam aryi nun kwit Petrus bisi ato eboka erekdobmase. “Kanbabyi Yahudinyi kurum bok, sun Yahudi nang aryi kuramingnyi to kum milirandim. Ati, kanda unatoa ati nun kwityabwe den bama sengna kum nang asi, ‘Nun Yahudi yala nang kuramib to sunbabyi kunubdarur,’ eboka takubdeibmarim do?” eboka wenebmase.

¹⁵Wenenmase obura, niryi ato ebmase. “Nun naiyabwe nun kwinyabwe ara Yahudi yala nang aryi nunsi deibmasei ati, nunbabyi neiktoto Yahudi yala nang akwe kunub. Nunda yuk yala nang aryi Musa Uram sun kum bingnung to kum kunub,” ebmase.

¹⁶Nunda ato nang kuramib bok, Er Imtamnyi biryi nunsi dobdobmasou ara Musa Uram kununa deib aryi Erci nunsi kum dobdobmasou. Erda, nunci nun Du Yesus Kristus bisi dib tenenub deyok aryi, nun Nai biryi, “Ni dam kun nang kibdeibkwan,” tenen nunsi dobdobmasou. Ninyi tentok ababyi Musa Uram kununa biriman aryi erdamnyi kum lebdandobte ara nun nirya bingnub. Nun Nai Imtamnyi bira sun Musa Uram kunubtibyi tenen nang ati, “Ni dam kun nang kibdeibkwan,” kum tenerur. Erda, sun nun Du Yesus bisi dib teneramibyi nang akwe nun Nai Imtamnyi biryi, “Dobdobkwan,” tenesurur.

¹⁷Ati, nunci, “Nun Du Kristus bisi dib tenebibyi ura, nun Nai Imtamnyi biryi nunsi dobdobkwansir,” tenenub ati, nunci Musa Uram tuba kum kununub. A dinyi ara lak kibmar. Ura, nunda dib tenen nang aryi Musa Uram tuba kum kununub ati, nunci nun Lebsounyi Kristus bisi, “Malyi kun dinyi kiminingsurutnyi,” ebtibyi do? Ato tenen kum.

¹⁸Ara ato ati ebman. Nira minob kuranse ura, “Musa Uram kununa deici aryi nun Nai Imtamnyi biryi dobdobkwanir,” teneranse ani, ukuryok ara niryi, “Musa Uram ara diboka kum kunuranse,” tenen bikdanman. Ati, niryi, “Musa Uram kunubkwan,” tenena asi bai donokmase. “Musa Uram kununa deici nidamnyi lebdankwan,” tenen dinyi bai donokmase ati, niryi una kuboka Musa Uram tubto udikum deibtinyi do? Niryi ato kubmatinyi uca, nira Musa Uram asi diboka yan yanibmatinyi ati ebman.

¹⁹Niryi, “Musa Uram asi kunubkwan,” tenen busul kuboka ukurderansiryok, diboka kum kunuranse ani, “Musa Uram ara kunubman kum,” tenen bikdanmase. Ati, niryi, “Musa Uram kununa deib aryi nun Nai Imtamnyi biryi nisi dobdobkwanir,” teneranse dinyi nirya asi taklobmase. Musa Uram deib aryi niryi, “Musa Uram kununa deici aryi nidamnyi lebdandobkwan,” teneranse dinyi ababyi sirya taklobmase. Erda, nun Du Yesus bisi dib tenena deici aryi nun Nai Imtamnyi biryi nisi dobdobmanou. Musa Uram diboka kununa ati, kunubman kum kunun ati, nira dibmounyi bitonyi kibdobse. Ba, nun Nai Imtamnyi bisi milina ara mikib kunun ati, nira kam bukokmounyi bitonyi kibse.

²⁰Nira nun Du Yesus Kristus ab tonkwa dibmanumwe ati ebman. Ara, nun Du Yesus biryi Erdamnyi karebdandoka co lase deici dibmou ba, Erci ni malyi tenen dinyi nirya boboka kum daneibmou. Kam tuba kunun cok, niryi ni teleb tenebmanyi tok tuba kum kunun. Erda, nun Du Yesus Kristus bisi ni kanya dam kurur aryi niryi Erci teleb tenebmaci tok kununun. Ni ukuryok kam kunun ara Er Imtamnyi Mi ati, “Ni lemnurutnyi,” tenenun. Nun Du bira nisi boukwe weik kunurur ati, Erci niti, “Lebkwan,” tenen Erdamnyi karebdanmou.

²¹Nun Nai Imtamnyi biryi nunsi teleb kurdeirisurur ati, niryi bai donokman do? Ato tenen kum. Erda, niryi Er Imtamnyi biryi teleb kurdeirisurur asi udikum deibman. Nunci, “Musa Uram asi kunubtibyi ura, nun Nai Imtamnyi biryi nunsi dobdobkwansir,” ebtibyi ura, nun Du Yesus Kristus diamwe ara talyi ati diante ati ebman. Nun Du dibmou ara, “Er Imtamnyi biryi sunsi dobdobkwande,” tenen nunti dibmou ati, ato ebman.