Read Futuna-Aniwa Galatia 6 Bible Online

Galatia 6 - Futuna-Aniwa bible

Galatia 6

¹Ni kwityabwe dib tenen nang e, sun Er Imtamnyi Kanya Roh Kudus aryi eteresurur nang kankan kuboka sal nang kum nerabwe kum aryi malyi dinyi kunmangnyi asi asing eibmunyi ura, sunci a nang asi etereboka katabum ebdeibdarur. Sunci ato kunmangnyi nang asi eterebkwamamunyi ura, namin kanya bobmun cok, sunci a nang asi, “Ato-ato kunubdarur,” eboka eterebkwandarur. Tonda, sunci eterenmamunyi ura, “Nibabyi malyi dinyi kuboka saknyei,” tenen sundamnyi kalikdandobkwandarur.

²Sun mambul kanya bon nang ati, sunci boukwe kiboka dibnilibdarur. Ato kuboka dibnilibdamunyi uca, sunci nun Du Yesus Kristus biryi takubdeibsou uram asi kunubkwandarur.

³Sun wingdaboka ererdaraming nang ara talyi ati wingdaraming ati, sunbaramnyi tola erdaraming.

⁴Nunda nun ukuramib to nirya asi diboka lilibdankwayeb. Ati, nunci yuk nang ukuraming to lilina mem. Ara, nunci wingdandoka yuk nang asi liliboka, “Nira telebnyi, erda malinyi,” tenerdana mem. Erda, nunci nundamnyi lilibdabibiryi, “Nun Nai Imtamnyi biryi karebsou ci, takubdeibsou to kununub,” tenen bikdabibiryok, kilkil kanya bona teleb.

⁵Nun Nai Imtamnyi biryi ninyi nirya yuk-yuk asi, “Teleb dinyi kum malyi dinyi kum kunubde baramumwe do?” eboka lilibkwansir deyok aryi, nun ninyi yuk-yuk aryi nundam nang lilirdana teleb. “Yuk nang kanya asi liliboka wenebibyei,” tenen ato ebman.

⁶Tonda, sun Er Imtamnyi Uram keken nang ara Er Imtamnyi Uram eteren nang asi dibniliboka Er taruk dam kubmaci dinyi karena teleb.

⁷Sunci sun dam nang bowanikdamunyei. Ninyi aryi malyi kun yala kouamingnyi ura, aminda ara nong ababyi malyi dinyi kiroraming. A deyok aryi nun Nai Imtamnyi bira malyi kun dinyi diba ati wenebkwandanyi kurur. Ati, sunci, “Malyi kubmabyi ababyi Er Imtamnyi biryi nunsi kum wenebkwansir,” tenebmunyei.

⁸Ati, nunci nun kanya malyi tenen dinyi asi kuramibyi ura, nun Nai Imtamnyi biryi wenebsiriryi, iya kum daneibkwansir. Bok, nunci Er Imtamnyi Kanya Roh Kudus aryi eteresurur to kunuramibyi ura, Er Imtamnyi Kanya Roh Kudus aryi nunsi iya kam bukeibkwansir. Ato kuboka nunci nun kouamibyi to, aminda aryi kibdobkwayeb.

⁹Ati, nunci mambul li kum asa aryi iya teleb dinyi akwe ukuna teleb. Nun Nai Imtamnyi biryi teleb uki tum karebsici ura, Erci nunsi dengna teleb dinyi karebkwansir. Ara, tanglona kum uca teleb ukubibyi uca, nun Nai Imtamnyi biryi nunsi dengna teleb kareboka teleb kubdeibkwansir.

¹⁰A deyok aryi, nunci “Teleb ukuna ati uki tuba loubmasir,” tenen yuk nang nirya asi teleb kurdeirina teleb. Ara, dib tenen kum nang ababyi teleb kubdeibibiryi, nunci nun kwityabwe dib tenen nang mamun asi udikum kimdeirina teleb.

¹¹Ni kwityabwe, kekendarur. A kerek sengna ara yuk nang taruk biriman aryi kum sekeibmasin. Erda, ni Paulus taruk kobdoba aryi weik huruf aryi a kerek sengna kerek sekeib sekeibmasin. Ati, sunci, “A kerek sengna ara nun nai Paulus biryi kerek sekeibmasou,” tenen bikwandum ati, ni taruk kobdoba aryi kerek sekeibmasin.

¹²Sun, “Den bama sekdandarur,” eboka etereransing nang ara, “Ninyi kanya asi teleb-teleb kibdeibkwayeb,” tenen ati ato eboka eteresunung. A nang ara, “Sun Yahudi yala nang aryi nunsi domkirikoka mambul kubdeibsingnyei,” tenen aryi, “Den bama sekdandarur,” eboka eteresunung. Tonda, a nang aryi tenen dinyi ara ato, “‘Kristus bisi co lase deici labdeibmai uca, nun Nai Imtamnyi biryi nunsi lemsurur,’ eboka eterebibyi asi, ninyi aryi nunsi mambul kubdeibsingnyei,” teneraming.

¹³Ura, sun den bama sengdaramingnyi nang ababyi Musa biryi takubdeibsou uram ara diboka kum kununung bok, sunci sun Yahudi yala kuma nang asi, “Den bama sekdandarur,” eboka eteresunung. Ara, sunci, “Sun Yahudi yala kuma nang asi den bama sekmab,” eboka sundamnyi erebdeibdankwaming ati, a nang aryi, “Den bama sekdandarur,” eboka eteresunung.

¹⁴Nira Musa Uram kununa deyok aryi, nidamnyi kum erebdeibdatinyi. Erda, nun Du Yesus Kristus co lase deici labdeibmainyi bikwe ererdeirinun. Nun Du Yesus Kristus co lase deici dibmou deyok aryi, malyi tenen dinyi aryi nisi tabwe tuba kum denurur ati ebman.

¹⁵Den bama sengna ara bikdob dinyi kum kurur. Tonda, den bama sengna kum ababyi ara bikdob dinyi kum kurur. Erda, Er Imtamnyi teleb tenerur to kununa ara bikdob dinyi kurur. Ara, nun Nai Imtamnyi biryi kiknibdeibmasir ati ukuryok kanya bona asi bikdob dinyi kurur.

¹⁶Sun a eterena uram tuba-tuba miliraming nang nirya asi niryi, “Ni kwityabwe,” ebmasin. Nun Nai Imtamnyi biryi antanibdeibdoka kilkil kanya karesina teleb. Tonda, Erci bico tenen teleb kurdeirisina teleb. Tonda, sun Israel yala nang kobdob asi minob wibmou nang ababyi nun Nai Imtamnyi biryi neiktoto bico tenen teleb kurdeirina teleb.

¹⁷Sirya kobdob ara ni Paulus biryi ato ebkwinsin. “Ninyi tentok ababyi nisi mambul kubdeibnicei.” Ninyi aryi nisi nun Du Yesus deyok ati dilaka sangdeiranei dilaka ara lak kunurur ati, nira nun Du Yesus bisi milinanyi kunun.

¹⁸Ni kwityabwe, a kunum sirya kerek sekmasin. Nun Du Yesus Kristus bira sun ab tonkwa kuramun ci, sun kanya yuk-yuk asi kisal dangsina teleb. Amin.