Read Futuna-Aniwa Efesus 1 Bible Online

Efesus 1 - Futuna-Aniwa bible

Efesus 1

¹Teleb ni kwityabwe! Ni Paulus biryi sun nun Du Yesus Kristus bisi dib tenerandum nang ati uram ton kerek sekeibmasin. Ara, niryi sun Efesus atei nang kankan asi nun Nai Imtamnyi dam kun nang ati kerek sekeibmasin. Ni Paulus bira nun Du Yesus Kristus biryi bokdonoknounyi kunun. Ara, nun Nai Imtamnyi biryi teleb tenebnou to, nun Du Yesus biryi, “Teleb Uram eterebde barandum,” eboka bokdonoknou.

²Nun Nai Imtamnyi ab nun Du Yesus Kristus ab aryi sunsi kisal dangsina teleb. Tonda, nun Nai ab nun Du Yesus ab aryi antanibdeiboka sun kanya namin kimdeirisina teleb.

³Nunci nun Nai Imtamnyi bisi si weik ena teleb. Ara, nun Du Yesus Kristus Er Nai bisi si weik ena teleb. Nun Nai biryi nun Du Yesus Kristus biriman aryi nunsi imtam aryi kuboka kisal dangna dinyi kareboka kisal daksou ati, ato ebman. Ara, nun Du Yesus imtam kurutnyi biriman aryi kisal dangna dinyi imtam dinyi utotoa nirya asi karebsou ati, nun dib tenen nang aryi nun Nai Imtamnyi si weik ena teleb.

⁴Nun Nai Imtamnyi bira imtam tukwetam kum kikniamuryok, Erci nunti, “Ni dam kun nang kibdeibkwan,” tenen wibdeibsou. Ara, nun Nai biryi nun Du Yesus biriman aryi nunsi wibdeibsou ara, “Ni urasintam aryi utotoa malyi kun dinyi kuna kum kun nang ato kibdeibkwan,” tenen wibdeibsou. Nun Nai Imtamnyi bira boukwe weik kiboka nunti, “Ni Mi Yesus Kristus biriman aryi lebdeibniryi, Ni mabwe nermabwe kibdeibkwan,” tenen Erci nunsi minob wibdeibsou. Ara, nun Nai biryi nunti teleb tenebsou to, Erci nunsi dobdobsou ci, nunsi kisal dangsurur.

⁶Ara, nunci, “Ei, nun Nai biryi teleb kubdeibsou,” eboka nun Nai si asi weikanun erebkwamoubwe ati, nun Nai biryi nunsi dobdobsou. Nun Nai Imtamnyi biryi nunsi teleb kubdeibsou ara Er boukwe kurur Mi biriman aryi teleb kubdeibsou.

⁷Nun Du biriman aryi nun Nai biryi nunsi lebdeibsou ati, ato ebman. Ara, nun Du Yesus Er ining sakmou biriman akiryi, nun Nai Imtamnyi biryi nunsi lebdeibsou. Tonda, nun Du Yesus biriman aryi nun Nai biryi nun malyi kun dinyi nirya asi kilibmasou. Nun Nai Imtamnyi bira langdeiboka teleb kurdeirisurutnyi kurur aryi, Erci ato kuboka nun dib tenen nang asi langdeiboka kisal dakmasou. Ara, Erci nunsi dib en uram deyok aryi diboka iya bikdob dinyi utotoa nirya asi eterebsou ci, teleb kubdeibsou.

⁹Nun Nai Imtamnyi bira minob uca nunti, “Teleb kubdeibkwan,” teneransou. Teneransou cok, a dinyi asi lak kum kibdeiansou ani, ukuryok aryi nun Nai biryi, “Teleb kubdeibkwan,” teneransou dinyi nunsi lak sirya kibdeibsou. Ara, minob uca nun Nai Imtamnyi biryi, “Ni Mi Kristus biriman aryi teleb kubdeibkwan,” tenebmou ura, uram dobdeibmou to, nun Nai biryi ukuryok lak kibdeibsou.

¹⁰Ara, nun Nai biryi minob uca ato teneransou, “Im dangna tukwe dangna dinyi nirya asi Kristus biriman aryi antanibdeibkwan. Antanibdeibnyi ba, Kristus biryi im dangna tukwe dangna dinyi nirya asi kalikwande ati, Ni Imtamnyi biryi Ersi Iya Weik Sienyi kibdeibkwan.” Ati, nun Nai Imtamnyi biryi minob uca, “Utotoa nirya asi antanibdeibkwan,” teneansou ara, “Sirya kobdob berekwande tum aryi Kristus biriman aryi kunubdeibkwan,” teneansou.

¹¹Nun Nai Imtamnyi biryi nun dib tenen nang asi wibdeiboka, “Kristus biriman aryi antanibdeibkwan,” tenen minob wibdeibsou ati, ato ebman. Nun Nai Imtamnyi biryi minob uca nunti teleb teneransou to, Erci nunsi wibdeibsou. Nun Nai biryi minob uca teleb teneransou dinyi utotoa nirya ara nunsi teneansou to yuk-yuk asi diboka wa iboka kunurdeisurur ati ebman.

¹²Ara, nun deyok kouboka nun Du Yesus Kristus bisi dibde buramoubwe nang aryi nun Nai Imtamnyi si asi diboka weik ebkwamoubwe ati, Erci nunsi wibdeibsou.

¹³Sun Efesus atei kurandum dib tenen nang ababyi nun Du Yesus Kristus ab antaniboka Er dam kun nang kundarur ati ebman. Ara, sunci yuma talak aryi dib en uram ara ninyi lemsina ati Teleb Uram asi sirya kekerandau ci, dib teneboka nun Du Yesus Kristus ab tonkwa antanibmandau. Antanibmandau ci, nun Nai Imtamnyi biryi ebdeibsou to, Erci Er Imtamnyi Kanya Roh Kudus aryi sun kanya dam yuk-yuk asi karebdongobmasou. Ura, sunci, “Nun Nai biryi nunsi Kristus ab tonkwa wibdeibsou,” tenen katabum eboka dib tenebkwandum ati, nun Nai biryi Er Kanya asi nunsi dongobmasou.

¹⁴Nun Nai Imtamnyi biryi Er Kanya Roh Kudus asi nun kanya dam yuk-yuk dongobmasou ara, nunci, “Nun Nai Imtamnyi biryi deyok kouboka nunsi Er Kanya karebsou to, Erci aminda aryi nunda Er mabwe nermabwe asi Er kisal dangsina nirya langkibdeiboka karebkwansir,” tenen bingnub ati, Erci Er Kanya asi karebmasou. Tonda, nun Nai Imtamnyi biryi nun Er dam kun nang asi lebdeibkwansou ati, Erci Er Kanya asi karebmasou. Tonda, nunda Er Imtamnyi mabwe nermabwe aryi nun Nai Imtamnyi bisi si weik ebkwamoubwe ati, Erci Er Kanya Roh Kudus asi nun dam karebdongobmasou.

¹⁵“Sun Efesus atei kurandum dib tenen nang ara nun Du Yesus bisi diboka dib teneraming,” ena ara ni kekebmasin. Tonda, “Sunci nun Nai Imtamnyi dam kun nang yuk nang nirya asi boukwe kimnaming,” ena ara ni kekebmasin. A deyok aryi, niryi tanglona kum uca nun Nai Imtamnyi bisi, “Ei, ni Nai,” enun. Tonda, niryi nun Nai Imtamnyi bisi molonmangnyi ura, niryi sunti teneiboka, “Nai, Kanci ni kwityabwe dib tenen nang asi milibdum,” eboka molormilisunun.

¹⁷Ara, niryi nun Du Yesus Kristus Er Nai bisi moloboka, “Nai, Kanda ilil tenen dinyi kiknirumnyi biryi Kan Kanya Roh Kudus sun kanya dam karebdongobminyi ba, sunci Kan Imtamnyi bisi diboka bikwanking,” eboka, “Kanci Kan Kanya Roh Kudus karebdongoboka iya bikdob uram yuk-yuk asi eterebmin ci, laktoto kum kuansou dinyi nirya asi lak kibdeibdum,” eboka molormilisunun. Ati, sun Efesus atei nang aryi nun Nai Imtamnyi bisi diboka bikwandum ati, ato eboka molormilisunun.

¹⁸Tonda, “Kan Imtamnyi biryi ni kwityabwe sun kanya yuk-yuk asi berekeibminyi ba, kanci sunsi karebkwandim kisal dangna imtam dinyi nirya asi diboka bikwaming,” eboka molormilisunun. Ara, sunci, “Nun Nai Imtamnyi biryi nun Er dam kun nang asi nabsou to, Erci nunsi erebdeibsiriryi, langdeiboka kisal dakwansir,” tenen diboka bikwandum ati, niryi ato eboka molormilisunun.

¹⁹Tonda, sunci nun Nai Imtamnyi iya mikib asi diboka bikwandum ati, niryi ato eboka molormilisunun. Nun Nai mikib ara kiklibmanto kum kurur ati ebman. Nun Nai bira iya mikibnyi kurur ati, Erci iya mikib kuboka nunda dib tenen nang asi, “Naie,” tenen dinyi ilinto kiknisurur.

²⁰Nun Nai biryi Er iya mikib deici aryi nun Du Yesus Kristus bisi kam bukeibmou. Kam bukeibmou ura, Erci Er mikib aryi nun Du Yesus bisi imtam ai asi erebdeiboka, “Ni siriktam bukokmin ci, iya weik sienyi kiboka im dangna tukwe dangna nirya asi kalikdum,” ebmou.

²¹Yuk sien nang ton, erebdob nang ton, malaikat sien nang ton, isa sien nang ton, ninyi kalingna nang yuk nang ton ara erebdob nang kuraming bok, nun Du Yesus bira erebkaboka Iya Erebdobnyi kurur ati, Erda iya erebdob sokon burur. Ara, ukuryok talak ababyi aminda kubkwamib talak ababyi nun Du Yesus Kristus bira iya weik sienyi kurur. Sun imtam ton tukwetam aryi kuramingnyi sien nang mikib ara mitikto kurur. Bok, nun Du Yesus bira iya mikibnyi kurur.

²²Nun Nai Imtamnyi biryi nun Du Yesus bisi iya erebdeibmou ci, imtam dinyi tukwetam dinyi nirya ara nun Du Yesus amwetam kibdeiboka nun Du Yesus bisi karebmou. Karebmou ba, nun Nai biryi nun Du Yesus bisi tikeibmou ara erci sun Ersi dib tenen nang asi kalikwansir ati, iya weik sienyi kibdeibmou.

²³Nun Ersi dib tenen nang nirya ara nun Du Yesus Er nong ato kunub. Ba, nun Du mikib aryi langdeiboka im dangna tukwe dangna nirya dib tenen nang dam asi kalingsurur. Nun Du mikib ara utotoa nirya asi langdeiboka kalingdur ci, wa yuk-yuk asi irur Erci nun Ersi dib tenen nang asi nukoka langdeiboka kalingsurur.