Read Futuna-Aniwa Efesus 5 Bible Online

Efesus 5 - Futuna-Aniwa bible

Efesus 5

¹Sunda Er Imtamnyi biryi boukwe kusurur mabwe nermabwe kundarur ati, nun Nai Imtamnyi biryi teleb dinyi kiknirur to, sunbabyi neiktoto teleb dinyi akwe kununa teleb.

²Tonda, sunci boukwe weik kibdandoka kubdarur. Ara, nun Du Yesus Kristus biryi nunsi boukwe weik kibsou to, sunbabyi neiktoto boukwe weik kurdana teleb. Ati, nun Du Yesus biryi nunti, “Lebkwan,” tenen Erdamnyi karebdandoka co lase deici dibmou. Nun Du biryi, “Ni dibkwan ara Ni Nai Imtamnyi bisi Nidamnyi dama ato deibdankwan,” tenen Erci Erdamnyi karebdanmou. Ara, nun Nai Imtamnyi bira nun Du Yesus biryi karebdanmou dama asi asing eiboka Er kanya teleb kubkwamwe ati, nun Du Yesus biryi Erdamnyi karebdandoka co lase deici dibmou.

³Ni kwityabwe, sunda Er Imtamnyi dam kun nang kundarur ati, sunci malyi kun dinyi ara kisibdobdarur. Ara, “Ner talyi yobtinyi,” tenen ab, “Nerabwe ara talyi yobniting,” tenen dinyi nirya sunci bai donokdarur. Tonda, “Bona asi weikanun talebtinyi,” tenena dinyi ababyi sunci kisibdobkwandarur. Nunda Er Imtamnyi dam kun nang kunub ati, ato dinyi kununa ara kikib kuma.

⁴Tonda, sunci malyi uram ebdamunyei. Ara, talyi yordana uram ton, alyi tenen dinyi ton, sunci ebdamunyei. Tonda, talyi uram yuk-yuk asi ebdamunyei. Tonda, alyi tenen dinyi ebmunyei. Ato dinyi ara kikib kuma. Erda, sunci sun malyi kun dinyi bai donokmunyi ura, sunci, “Ei, nun Nai,” eboka nun Nai Imtamnyi si weik ena teleb.

⁵Ura, sun ner talyi yon nang ton, “Talyi yobkwan,” tenen nang ton, “Bona-bona talebtinyi,” tenen nang ton ati niryi uram ton ebdeibkwinsin. Nun Du Kristus ab nun Nai Imtamnyi ab tonkwa iya weik sien nang kuboka kalikwansing ba, sun ato kuboka malyi kun nang ara nun Du Yesus amwetam kun nang kum kubkwaming. Erda, nun Du Yesus biryi a malyi kun nang asi yakdonokwande. “Bona-bona talebtinyi,” tenen nang ababyi malyito kuraming ati ebman. Sun ato tenen nang ara nun Nai Imtamnyi bisi diboka kum teneinung ati, kwemdina molon nang ato kunung.

⁶Ninyi tentok ababyi talyi uram eterebsingnyi ba, sunsi bowanikminiksicei. Nun Nai Imtamnyi bira talyi eterena uram ara, “Ni li,” tenen yu weik kurur ci, Er Uram dib en uram asi kununa kum nang asi diboka wenerur.

⁷Ati, ni kwityabwe! Nun Nai Imtamnyi biryi sun malyi kuramingnyi nang asi wenebkwande ati, sunci sun malyi kun nang aryi malyi kuraming to miliboka kunubmunyei.

⁸Minob talak ara sunbabyi kunuk dam aryi kun nang ato kurandau ci, malyi dinyi kurandau ati, ato ebman. Ato kurandau bok, nun Du Yesus biryi karebsou uca, sunda ukuryok berengna dam kuraming nang ato kuboka nun Du Yesus bisi milindarur. A deyok aryi, sunci, “Kunuk dam dinyi malyi kun dinyi nirya bai donokmoubwe,” tenen sunci berengna dam kun nang ato kubmun cok, teleb dinyi akwe kunubdarur.

⁹Sun berengna dam kun nang ara du mouboka teleb dinyi yuk-yuk kunuraming ati ato ebman. Ara, yuk nang asi teleb kurdeiriraming dinyi ton, Er Imtamnyi urasintam aryi kikib dinyi kununung dinyi ton, ara dib en uram asi lak eraming dinyi ton kunuraming.

¹⁰Tonda, a nang ara, “Nun Nai kanya asi una kuboka teleb kubdeibtibyi,” tenen dibliliboka nun Nai Imtamnyi biryi teleb tenerur to kununung. Ati, nunci du mouboka ato kununa teleb.

¹¹Ura, sun malyi kun nang aryi malyi kuramingnyi to sunci miliboka kubmunyei. A nang aryi malyi kuramingnyi to ara kunuk dam dinyi akwe kuraming. Ato dinyi ara talyi dinyi akwe kurur. Sunci a malyi kun dinyi kunubmunyei. Erda, sunci, “A dinyi ara malyi to,” eboka malyi kun nang asi wenebdarur.

¹²Sun malyi kun nang aryi iniboka malyi kuraming dinyi ara iya alyi tenen dinyi kurur ati, a nang aryi malyi kuraming dinyi asi lak ena ababyi ara kikib kum kubsute.

¹³Ba, Er Imtamnyi Uram ara berengna ato kurur ati, utotoa nirya asi lak kimdeirirur.

¹⁴Berengna aryi utotoa nirya ara lak kimsurur ati ato ebman. A deyok aryi, nunda dib tenen nang aryi ato eramib, “Ni kwit wi marandimnyi, bukokdum se! Din nang ato kurandimnyi, kam bukokdum se! Bukokminyi ura, nun Du Yesus Kristus biryi kansi berekeibkwankir.”

¹⁵Ura, ni kwityabwe! Sunci sundamnyi diboka kalikdamun ci, “Una kuboka teleb dinyi kunubtibyi do?” tenen lilibmun ci, teleb dinyi akwe kununa teleb. Ati, sunci ninyi kanya bon kum nang ato kubmunyei. Erda, bikdob uram bingna nang ato kibdamun ci, teleb dinyi akwe kunubdarur.

¹⁶Ukuryok talak ara ninyi ilinto malyi kun dinyi kuraming ati, sunci tanglona kum uca, “Nun Nai biryi nunsi Teleb Uram lak ena kikib tum karebmasir do?” tenen tenebmun ci, sunci Teleb Uram asi tuba-tuba lak ebdarur.

¹⁷Ati, sunci ninyi kanya bon kum nang ato kubmunyei. Erda, nun Nai Imtamnyi biryi teleb tenesurur to asi sunci bikoka teneiboka kunubdarur.

¹⁸Tonda, sunci anggur me yibmun ba, walina talebsicei. Anggur me ilinto yibmunyi uca, sunci, “Ner talyi yobtinyi,” tenen kanya bobmunyei ati, sunci anggur me yibmunyei. Erda, sunci walina talen dinyi nirya asi takloboka Er Imtamnyi Kanya Roh Kudus aryi sun kanya dam asi langdeirisina teleb.

¹⁹Sunda dib tenen nang mamun ebdamunyi ura, Er Imtamnyi biti si weik en mot asi semna teleb. Ara, sun kanya kilkil kubsir bok, Er Imtamnyi si ererdeirin mot amuma-amuma semna teleb.

²⁰Sunci tuba-tuba, “Ei nun Nai,” eboka nun Nai Imtamnyi si weik ena teleb. Ara, nun Nai biryi nunti karebmasici dinyi nirya ara Nun Du Yesus Kristus si deici aryi nunci nun Nai Imtamnyi si weik eboka, “Ei nun Nai,” ena teleb.

²¹Tonda, sunci nun Du Yesus Kristus biti, “Nun iya weik sienyi kurur,” tenen ilil kusina teleb. Nun Du bisi ilil kubsiri bok, sunci Er Uram asi kunuboka sun kanya luknubmun ci, sun mamun ati, “Ni naiyabwe,” tenen sun wenena uram asi kekebdandarur.

²²Sun ninyi doansingnyi nerabwe ara nun Du Kristus Yesus Uram kekeboka kunubninto kuboka sun akenyabwe uram kekeboka kununa teleb.

²³Nun Du Kristus bira nun weik sienyi kurur ci, nun dib tenen nang asi leboka dibniliboka kalingsurur. Ato kuboka, sun ner don nang ababyi neiktoto sun doamingnyi nerabwe asi dibniliboka kalingna nang kunung ati, sun nerabwe aryi sun akenyabwe uram asi diboka kekena teleb.

²⁴Ati, nun dib tenen nang aryi nun Du Yesus Kristus Uram asi kekeboka diboka kunuramib to, sun ninyi don nerabwe ara sun akenyabwe uram asi diboka kekeboka kununa teleb.

²⁵Ba, sun ner don nang ara sun nerabwe asi boukwe kimna teleb. Nun Du Kristus biryi nun dib tenen nang asi boukwe weik tenen Erdamnyi nunti karebdanmou to kuboka sun sal nang ara sun nerabwe yuk-yuk asi boukwe kiboka sundamnyi karerdana teleb.

²⁶Nun Du Kristus bira Erdamnyi karebdandoka co lase deici dibmou ba, Erci nun dib tenen nang ati, “Sun malyi kun dinyi kiliboka Ni dam kun nang kibdeibkwan,” tenen Erdamnyi karebdanmou. Ara, nun Du Yesus biryi nun malyi kun dinyi kilibsou ara Er dib en uram deib ab me dongon deib ab aryi Erci nunsi kilibsou.

²⁷Ati, nun Du Yesus biryi nunda malyi dinyi kilibsou nang ati ato teneransou. “Sun malyi kun dinyi kilibnyi ura, Ni urasintam aryi tikeibkwan ba, nining mitik ababyi kuna kum nang ato kibdeibkwan,” teneransou. Ara, malyi kun dinyi mitik ababyi nun dam tuba kum kubkwansou ati, nun Du Yesus bira Erdamnyi biryi nunti karebdanmou ci, co lase deici dibmou.

²⁸Ato kuboka neiktoto, sun sal nang ara sun nerabwe asi boukwe kiboka kalingna teleb. Ninyi aryi sun nong asi dirnilirdaraming to, ner er akenyabwe ababyi neiktoto sun ner ati, “Ni mining tub ato,” tenen dirnilina teleb. Unanyi biryi er ner asi boukwe kimdanci ura, er mining tub asi boukwe kimdarandiryi ati ebman.

²⁹Ninyi tentok ababyi sun mining nong asi bimsa ton kum yarirdanung. Erda, ninyi nirya aryi sun mining nong asi dirnilirdaraming. Ato kuboka nun Du Kristus bibabyi neiktoto nun dib tenen nang asi, “Ni nong ato nang kunung,” tenen diboka dirnilisurur.

³⁰Nun dib tenen nang ara nun Du Yesus Kristus ab antanibdeibsou nang ara Er ab tonkwa nong tentok ato kunub ati, ato ebman.

³¹“A deyok aryi, sal aryi er nai ab er kwin asi takloboka er ner dobdiryi, sun bitinyi ara antaniboka tub tentok ato kuna teleb.” (Kejadian 2:24) Ato eboka Er Imtamnyi Uram aryi nunsi eteresurur.

³²A dinyi ara minola bikdobman dinyi kum kurur. Ara, er akenyi ab er ner ab antanirdana ati, ato kum ebman. Erda, uram kikliboka nun Du Yesus Kristus ab nunda dib tenen nang ab antanirdana ati ebman.

³³Ba, sun ner doamingnyi nang ara sundamnyi boukwe kimdarandum to, sun nerabwe asi boukwe weik kimna teleb. Tonda, sun nerabwe ara, “Ni akenyi,” tenen sun akenyabwe uram yuk-yuk asi kekeboka kununa teleb.