Read Futuna-Aniwa Efesus 6 Bible Online

Efesus 6 - Futuna-Aniwa bible

Efesus 6

¹Ura, mabwe nermabwe, sunci sun naiyabwe sun kwinyabwe uram asi diboka kekebdarur. Ara, nun Du Yesus bisi milibmun ci, sun naiyabwe sun kwinyabwe uram asi kunubdarur. Ato kuna ara kikib.

²Sunci sun naiyabwe ab sun kwinyabwe ab asi, “Nun naiyabwe nun kwinyabwe,” tenen sun uram kunubkwandarur. Nun Nai Imtamnyi biryi a uram eboka takubdeibsou to ara bikdob uram kurur. Bikdob uram kurur ati, nun Nai biryi uram ebtabakoka, “Kisal dakwan,” erdeirisin uram ton ebtabakmou. [3]

³Ati, nun Nai Imtamnyi biryi sun naiyabwe sun kwinyabwe uram keken nang ati ato ebdeibsou. “Niryi kisal dakwansin ati, sun tukwetam kubkwandum ara uki weik kubde baramunyi ani, wau loboka dibkwandarur.”

⁴Ura, sunda naiyabwe ara wise nang kikniboka sun mabwe asi bimsa yarina mem. Sun uram wise deyok aryi sun mabwe nermabwe aryi sunsi yu kibdeibmunyei. Erda, sunci namibdeiboka sun mabwe nermabwe asi nun Du Yesus biryi bikdob en uram asi eterebmurubdarur.

⁵Ura, sunda ikin wa borandum nang ara sun wa takurdeiriransing nang uram asi, “Sulbalyi nang ara wenebkwaming,” tenen ilil kanya boboka sunci sun wa takurdeiriransing nang, “Nun naiyabwe,” tenen sun uram asi diboka kunubdarur. Ati, sunci sun wa takurdeirisina nang ati, “Nun Naiyabwe,” tenebmun ci, “Sulbalyi nang ara wenebkwaming,” tenen ilil kanya bobmun ci, sunci sun wa tukurdeiriransing nang uram asi diboka kunubdarur. Ara, sundamnyi karebdandoka busul weik kuboka sun wa ibdarur. Ati, sunci nun Du Yesus Kristus wa irmilin nang kurandum ci, nun Du Yesus Uram asi diboka kunurandum to, sunsi sun tukwetam aryi kuboka wa takurdeirisin nang uram ababyi diboka kunubdarur.

⁶Sunsi wa takurdeiriransing nang aryi asing dinmasingnyi babyi, asing kum dinmasingnyi babyi, sunci sun ebmasingnyi uram asi busul kuboka kunubkwandarur. Ati, sunci, “Nun wa takurdeiriransing nang kanya asi teleb kibdeibkwayeb,” teneboka sun dinmasingnyi talak akwe er uram kununa teleb. Tonda, asing kum dinmasingnyi talak ababyi sunci sun wa takurdeiriransing nang aryi uram ebmangnyi to asi kunubkwandarur. Ati, sunci, “Nunda Kristus wa irmilin nang kunub,” tenen Er Imtamnyi teleb tenebmaci to kunubmun ci, busul kubmun ci, sun wa takurdeiriransing nang uram ebmangnyi to asi kununa teleb.

⁷Ba, sunci kilkil kanya bobmun ci, wa ibdarur. Sunci sundamnyi karebdandoka wa diboka iramun ci, “Nun Du biryi arukmasou ati, nunci nun wa takurdeiriransing nang aryi arukansingnyi to diboka kunubkwayeb,” tenena teleb. Ato kuramunyi ura, sunsi ninyi aryi arukansingnyi dinyi akwe kununa kum kunuramunci. Erda, nun Du Yesus biryi arukansici dinyi kunuramunci.

⁸Ninyi yuk-yuk aryi teleb kuramingnyi ura, nun Du Yesus biryi sunsi teleb dinyi yuk-yuk tamubkarebkwande. Ara, sun wa takurdeirin nang ton sun wa irmilin nang ton aryi teleb kuramingnyi to, nun Du Yesus biryi sunsi teleb dinyi karebkwande. Ati, sunci, “Nun Du biryi nunda wa irmilin nang ab sun wa takurdeirisin nang ab asi antaniboka teleb dinyi tamubkarebkwansir,” tenen bikmarum ati, niryi sunsi, “Busul kuboka wa ibdarur,” ebmasin.

⁹Ba, sun wa takurdeirin nang ababyi neiktoto kuna teleb. Ara, sunci sun wa irmilin nang asi teleb kurdeirina teleb. Ati, sunci, “Diboka kulabkwansin,” eboka wenena mem. Erda, sunci, “Nun Nai Imtamnyi bira nunbabyi sunbabyi asi arungnansiranyi kurur ati, Erci nunsi wenebsicei,” tenena teleb. Nun Nai Imtamnyi bira ninyi urasin kum wimsurur ati, Erci sunda wa takurdeirin nang teleb kuna nang asi teleb kubdeibkwansir. Ba, sun wa takurdeirin nang malyi kun nang asi nun Nai biryi wenebkwande.

¹⁰Ura, sirya kobdob ebkwinsin uram ara ato. Sunci nun Du Yesus bisi dib tenebmun ci, katabum ebtabakoka mikib kubdarur. Nun Du bira iya mikibnyi kurur ati, sunci Er mikib deici katabum eboka dib tenebdarur.

¹¹Isa sienyi Iblis biryi, “Bowanikminiktinyi,” tenen nun dib tenen nang asi ukurderansir. Isa aryi ukurderansir ati, sunci, “Er Imtamnyi mikib deici aryi bisik sekwayeb,” tenen kiknibminikdobdarur. Ati, nunci nun Nai Imtamnyi biryi karebsou ting asi kinikoka yin mar douboka kiknibminikwayeb.

¹²Ati, nunsi mar isunung ara ninyi sirik aryi nunsi mar isununga kuma. Erda, isa aryi arungnande nang sien nang aryi nun dib tenen nang asi mar isunung. Tonda, isa aryi arungnande mikib nang mar isunung. Tonda, malyi kuna deyok nang aryi nunsi mar isunung. Tonda, yuk isa-yuk isa nang aryi mikib kuboka mar isunung. Ara, “Sakeibtibyi, obminiktibyi,” tenen mar isunung. Ati, nunci yin mar kikniraming to kubkwayeb.

¹³A deyok aryi, sunci Er Imtamnyi biryi karebsou ting kinikoka yin mar kiknibdobdarur. Ba, isa mer iyangasingnyi ababyi sunci katabum eboka tikoka, “Nun Nai Imtamnyi mikib deici aryi nunci Iblis ab er milin nang ab asi bisik sekwayeb,” tenen kiknibminikdobdarur.

¹⁴Ati, sunci katabum eboka tikdarur. Ara, ting kinikoka ting tankalya moubmun ci, mar ngang kwatina ababyi kwatibdobdarur. Ting sirik ati, kum ebman. Tonda, ngang kwatina sirik ati kum ebman. Erda, Er Imtamnyi biryi karebsou mikib aryi Iblis bisik sengna dinyi ati ebman. Dib en uram lak eterena ara ngang kwatina ato dinyi kurur ati ebman. Tonda, nun Nai Imtamnyi urasintam kikib dinyi kununa ara ting ato dinyi kurur ati ebman. Ati, nunci dib en uram asi ebibiryok, nun Nai Imtamnyi urasintam aryi kikib dinyi kunubibyi ura, isa mer aryi nunsi orminingsina kum kubkwansunung.

¹⁵Tonda, yin doun nang ara, “Cung binkwayeb,” tenen yan karuk ongoraming to, sunbabyi neiktoto ukuna teleb. Ati, sunci, “Cung bindoka Teleb Uram eterebde binkwayeb,” tenen Teleb Uram eterebde bindarur. Ara, kilkil kanya bobmun cok, Teleb Uram ara ninyi antanirdeirisin uram asi eterebde binkwandum ati ato ebman.

¹⁶Tonda, mar uw lilina doubdarur. Mar uw lilina sirik ati kum ebman. Erda, nun Du Yesus bisi dib tenena ati ebman. Ati, sunci nun Du Yesus bisi dib tenebmunyi ura, a dib tenena aryi lilibkwansir ati, isa mar urub ara sunsi kum bisik ebkwansir.

¹⁷Tonda, yin doun nang kisok kaluna si helm kalubdobdarur. Tonda, ninyi on ya doubdarur. Helm sirik ton ninyi on ya sirik ati kum ebman. Erda, nun Nai Imtamnyi biryi karebmasou mikib aryi Iblis bisik sengna dinyi ati ebman. “Nun Du biryi nunsi lebsou,” tenena ara helm kaluna ato dinyi kurur. Tonda, Er Imtamnyi Uram ara mikib kurur ati, Er Imtamnyi Kanya Roh Kudus aryi dourur ninyi on ya ato kurur ati ebman.

¹⁸Ura, sunci ato kuboka kiknibminikmun ci, nun Nai Imtamnyi bisi, “Milibsurum,” eboka tuba-tuba molona teleb. Ati, Er Imtamnyi Kanya Roh Kudus milibsir ba, sunci nun Nai bisi molobmurubdarur. Tanglona kum uca kalikdamun ci, sunci nun Nai Imtamnyi dam kun nang nirya ati, tuba-tuba molobmilibdandarur.

¹⁹Molobmilibdamun ci, sunci ni Paulus bibabyi molobmilibnindarur. Ara, niryi Teleb Uram eterenmanyi ba, nun Nai Imtamnyi biryi milibnici uca, kikib uram akwe ebkwan ati, sunci molobmilibnindarur. Ara, niryi ilil kuna kum uca Teleb Uram ara, “Naie,” tenen dinyi, ninyi aryi minob kum bikamoubwe uram asi lak eterebkwan ati, sunci niti molormilibnindarur.

²⁰Ni Paulus bira ninyi urasintam aryi a Teleb Uram lak eterenanyi kunun deyok aryi, ninyi aryi nisi besi tabwe aryi deboka kalingnunung. Ati, sunci niti molormilinmanumunyi ura, “Erci ilil kum asa aryi lak eterebdur,” tenen molobmilibnindarur. Ara, nun Du Yesus biryi nisi takubdeibnou to, niryi ilil kum asa aryi Teleb Uram eterebkwan ati, molobmilibnindarur. Ato eboka molobmasin.

²¹Ba, nun kwit Tikhikus bira sun dam yaci ura, ni kunun to ab ni wa inun to ab nirya ara sun dam nukwande ba, sunci kekeboka bikwandum. Tikhikus bira dib tenenanyi kurur ati nun boukwe kunubnyi kurur. Erda nun Du Yesus bisi milirur ci, busul kuboka Teleb Uram eterermilisurur.

²²A deyok aryi, niryi ersi, “Nun kwityabwe dam birum,” eboka bokdonokman. Ati, “Nun kuramib to nukdiryok, nun kwityabwe kanya yuk-yuk asi katabum ebdeibkwande,” tenen niryi ersi bokdonokman.

²³Ura, nun Nai Imtamnyi ab nun Du Yesus Kristus ab aryi sun nirya asi antanirdeirisina teleb. Tonda, nun Nai ab nun Du Yesus ab aryi sunsi boukwe weik kibdeiboka tanglona kum uca dib tenen dinyi karesina teleb.

²⁴Sunci nun Du Yesus Kristus bisi tanglona kum uca boukwe kun nang nirya asi nun Nai Imtamnyi biryi sunsi kisal dangsina teleb. Ni Paulus biryi a kunum sirya kerek sekeibmasin.