Read Futuna-Aniwa Filipi 2 Bible Online

Filipi 2 - Futuna-Aniwa bible

Filipi 2

¹Ura, nun Du Yesus Kristus bira nun dam kuboka nun kanya katabum ebdeibde baransir deyok aryi, sun nirya aryi a dinyi diboka teneibmun cok, neik kanya boboka kubdarur. Tonda, nun Du Yesus biryi boukwe kiboka nun kanya yuk-yuk teleb kurdeiriransir deyok aryi, sunci a dinyi diboka teneibmun cok, antanibdandoka kubdarur. Tonda, Er Imtamnyi Kanya Roh Kudus ara nun dam kunanyi kurur deyok aryi, sunci a dinyi teneibmun cok, sunci antanibdandoka kubdarur. Tonda, sunci sun mamun asi bico tenebdamun ci, namin kanya boboka teleb kimdarandum deyok aryi, sunci neik kanya boboka kubdarur.

²Ati, sunci neik kanya boboka boukwe weik kibdamun cok, antanibdandoka neik dinyi akwe tenebdarur. Sunci ato kuboka neik kanya boramunyi uca, ni kanya ara langdeiboka sunti kilkil weik kubkwanir.

³Ba, sunci, “Nidamnyi erebdandobkwan,” tenen dinyi kunubmunyei. Erda, sunci sundamnyi luknubdongoboka yuk nang ati, “Ni naiyabwe ni kwinyabwe,” tenebdarur.

⁴Sun nirya ara, “Nibi yuk dibnilibdankwan,” tenena mem. Erda, yuk nang ababyi dibnilibdandarur.

⁵Sunbabyi nun Du Kristus Yesus teneiboka kunuramwe to neik dinyi akwe teneiboka kununa teleb.

⁶Nun Du bira Er Imtamnyi bito Iya Erebdobnyi kuramuryok, Erci, “Nira Iya Erebdobnyi kunun ati, Er Imtamnyi bitonyi iya kubdobkwan,” kum tenebmou.

⁷Erda, Erci Erdamnyi luknubdongobdanmou cok, Erci Er Imtamnyi wa irmilinanyi kibdanmou. Ara, ninyi diba tukwetam nang atonyi kibdandoka Er Imtamnyi wa irmilinanyi kibdanmou.

⁸Ura, ninyi diba kuramuryok, Erci Erdamnyi luknubdongobdanmou. Erci Er Nai Imtamnyi uram asi diboka kunubde baramwe. Ani, “Co lase deici aryi dibkwan ababyi,” tenen Erci Erdamnyi luknubdongobdanmou.

⁹Nun Du biryi Erdamnyi luknubdanmou ci, dibmou deyok aryi, nun Nai Imtamnyi biryi Ersi iya erebdeibmou. Ara, iya erebdob sokon karebmou ci, Erci nun Du Yesus bisi iya erebdob si dobmou.

¹⁰Ara, “Sun imtam tukwetam nang nirya aryi sun kutam ikdongoboka nun Du Yesus si weik ebkwaming,” tenen, Er Imtamnyi biryi Ersi erebdeibmou.

¹¹Ba, “Ninyi nirya aryi, ‘Nun Du Kristus bira Iya Erebdobnyi kurur,’ eboka lak ebkwaming,” tenen nun Nai biryi nun Du Yesus bisi erebdeibmou. A deyok aryi, ninyi nirya aryi nun Nai Imtamnyi si weik ebkwaming.

¹²Ura, ni kwityabwe boukwe weik kusunun nang, nun Du Yesus biryi Er Imtamnyi Uram kunuramwe to, sunbabyi Er Imtamnyi Uram kunubde bindarur. Ara, sunci Er Imtamnyi Uram asi yuma aryi ni sun dam yanmase ba, tonkwa kunmoubwe talak aryi kunurandau to, ukuryok ababyi iya kunubde bindarur. Ni sun ab tonkwa kunmabyi talak akwe kunubkwandarura kuma, erda ni sun ab tonkwa kuna kum talak ababyi sunci Er Imtamnyi Uram tanglona kum uca busul kubtabakoka kunubde binkwandarur. Ara, “Er Imtamnyi biryi lemdeirisina asi wanikminiksicei,” tenen ilil kanya bobmun ci, sunci busul weik kuboka Er Imtamnyi biryi lebdeibsou nang aryi kunuraming to kunubde bindarur.

¹³Nun Nai Imtamnyi biryi nun kanya dam wa iransir uca, nunci nun kanya dam aryi, “Nun Nai biryi arungdeiriransir dinyi kunubkwayeb,” tenenub. Tonda, nun Nai biryi nunti teleb teneransou to, Erci karebsici uca, nunci Er arungdeiriransir uram asi kununub.

¹⁴Sunci utotoa-utotoa kubde baramun ci, sunci nun Nai Imtamnyi uram kunuramun ci, sun kalingdansing nang uram kekeboka kunuramun cok, “Sun uram kununa nun li se,” ebmunyei. Tonda, sun mamun lulurdana mem. Erda, ur dem teleb akwe antaniboka kuronkwandarur.

¹⁵Ato kuramunyi uca, ninyi aryi sunsi tatab-tatab ebman kum kubsingnyi ba, sunci, “Malyi kun dinyi nun li,” tenen kanya bobkwandum ati ebman. Sunda Er Imtamnyi mabwe nermabwe ara iya malyi kun nang kankan kuramun ci, lulurdana kum uca teleb dinyi akwe kunubde binkwandarur. Ba, a malyi kun nang ara iya malyi dinyi kunuraming deyok aryi, lukunda kunuk ato kuraming. Ba, sun Er Imtamnyi mabwe nermabwe ara ninyi urasintam aryi teleb dinyi kunubde barandum deyok aryi, im dangna tukwe dangna nang urasintam aryi lukunda kurya nalirande milil ato kurandum.

¹⁶Sun Filipi nang aryi ato kuramun ci, sunci ninyi urasintam aryi iya kam kurdeirin uram asi lak kimdeirirandum. Ati, sunci berengdeirin nang ato kuramun ci, teleb dinyi akwe kunuramunyi ura, ni Paulus kanya kilkil weik kubkwanir ba, niryi sunsi kisal dakwansin. Nun Du Kristus tamuryankwande uki tum berekci ura, niryi sun du mousurur nang ati kisal dakwansin. Ati, niryi, “Sun Filipi nang kankan dam wa iranse ara talyi ati kum iranse,” tenen kisal dakwansin ati ebman.

¹⁷Sun Filipi nang ara nun Du Yesus bisi dib tenerandum nang ara nun Nai Imtamnyi ai wa in nang ato kuboka Er Uram asi kunurandum ci, sunci sun kanya asi Er Imtamnyi bisi dama ato deirirandum. A deyok aryi, sun kanya kilkil weik kuransir. Ba, ni kanya ababyi sun ab tonkwa kilkil weik kuranir. Ura, ninyi aryi nira nun Du Yesus wa irmilinanyi bisi wenebningnyi uca, dibmanyi ababyi, ni kanya ara teleb kubkwanir. Niryi sunsi dirnilisunun ba, ni ining diksaknici ababyi niryi Er Imtamnyi bisi, “Ei ni Nai,” eboka abniryi, ni ining karebdandoka Er Imtamnyi bisi dama deirin dinyi ato karebkwan.

¹⁸Ati, sunci sun dam nang ati, “Nun kanya ara nun Nai Imtamnyi taruk dam karebdanmab,” teneboka kilkil kanya bona teleb. Tonda, sunci ni Paulus biti, “Paulus bira er kanya ara nun Nai Imtamnyi taruk dam karebdanmar,” teneboka kilkil kanya bona teleb.

¹⁹Ura, ni kwityabwe, nun Du Yesus biryi karebsici uca, niryi nun kwit Timotius bisi sun dam ola bokdonokwaman. Ba, nun kwit biryi sun Filipi nang kurandum to bikmaci ura, ni dam tamuryandoka, “Teleb akwe kunung,” en uram boyankwande ati bokdonokwaman. “Teleb akwe kunung,” en uram boyaci ura, ni kanya katabum ebkwanir ati ebman.

²⁰Yuk nang ni ab tonkwa kunub nang ara nun kwit Timotius bito nang ton kum kunub. Nun kwit bira sun kurandum to ati, “Ur kunung do kum do?” teneboka dirnilisinanyi kurur.

²¹Sun dam asi yuk nang bokdonokmatinyi ura, nun Du Kristus wa ati dirnilina kum kubting, erda sun dam nang ati dibnilibdating.

²²Ba, nun kwit Timotius bira busul kuboka nun Du Yesus ab yuk nang ab asi dirnilirande ara sun bikmarum. Ara, ni Paulus biti, “Ni Nai bitonyi,” teneboka ni mi bitonyi kuramuryok, erda ni wa irmilinanyi kuramuryok, nun Du Yesus uram Teleb Uram etereramwe.

²³Ati, niryi ersi sun dam olong bokdonokwaman tenebman. Ara, nisi tabwe lobdeibkwamaningnyi to asi bikmanyi ura, niryi nun kwit bisi sun dam bokdonokwan.

²⁴Ba, nira ni kanya katabum eranir bok, niryi ato tenenun, “Nun Du biryi karebsici uca, tabwe lobdeibningnyi ura, nibabyi sun dam ola yatinyi,” tenenun.

²⁵Ura, nun kwit Epafroditus deyok ati uram ton ebkwan. Sun Filipi nang ara nun kwit bisi ni dam bokdonokmandau ci, sunci, “Nun nai Paulus dam bindoka nun kuramibto nukwandum,” eboka bokdonokmandau. Tonda, sunci, “Nun nai bisi dibnilibkwandum,” eboka ni dam bokdonokmandau. Ba, nun kwit bira ni wa irmilinanyi kurur ci, katabum en kanya boboka nun Du Yesus uram Teleb Uram lak eterermiliramwe. Ati, erci nisi sirya dibnilibde banurur ba, niryi ersi sun dam tamuboka bokdonokwan.

²⁶Nun kwit bira sun Filipi atei kurandum nang ati, “Filipi nang ab ebdatibyi se,” tenena akwe kurur. Tonda, nun kwit bira nakina taleramwe dinyi ara sunci sirya kekebmandau. Ura, erci, “Ni kwityabwe Filipi nang aryi ni nakina yiranou dinyi ara sirya kekebnei,” tenen bikmar ci, er mambul kanya borande.

²⁷Nun kwit bisi nakina weik yiramwe uca, er dibmanto kubmou bok, nun Nai Imtamnyi biryi bico tenen ersi kwetebmou. Tonda, nun Nai biryi ni Paulus bira Epafroditus er nai bitonyi bibabyi bico tenebnou. Ara, niryi nun kwit nakina deyok aryi, mambul weik tuba kum bobkwanse ati, nun Nai biryi nibabyi bico tenen nun kwit bisi kwetebmou.

²⁸A deyok aryi, niryi nun kwit Epafroditus biti, “Ukurlona kum uca, ola Filipi nang dam tamuboka bokdonokwan,” tenenun. Ara, “Sun Filipi nang ab nun kwit ab tonkwa ebdanmangnyi uca, sun kanya kilkil weik kubkwande,” tenen niryi ersi tamuboka bokdonokwan. Tonda, niryi, “Nun kwit bira ur kubkwande do kum do?” tenen mambul kanya tuba kum bobmurubkwan ati, niryi ersi tamuboka bokdonokwan.

²⁹Ati, sunci Epafroditus bisi, “Nun kwit,” eboka kibdobkwandarur. Ara, nun Du Yesus dib tenen nang mamun kimdaramib to kuboka sunci kilkil kanya boboka nun kwit bisi kibdobkwandarur. Tonda, sun ato kuboka yuk nang dirniliraming nang yuk nang ababyi sunci, “Nun naiyabwe,” tenen kibdobkwandarur ati ebman.

³⁰Nun kwit bira nun Du Yesus Kristus wa irmiliramwe bok, nakina talebmou uca, dibmanto kuramwe. Ara, sun Filipi nang aryi ni dam kum kurandau ci, nisi kum dibnilirandau bok, nun kwit biryi unuboka nisi dirniliranou. Erda iya busul kuboka dirniliranou bok, dibmanto kuramwe. A deyok aryi, sunci nun kwit biti, “Nun nai,” tenen ersi kibdobkwandarur.