Read Futuna-Aniwa Filipi 3 Bible Online

Filipi 3 - Futuna-Aniwa bible

Filipi 3

¹Ura, ni kwityabwe, nun Du Yesus bira nun dam kunanyi kurur deyok aryi, sun kanya kilkil kuna teleb. Niryi sunsi sirya kerek sekeibmasin cok, neik dinyi ati tubto kerek sekeibkwansin ara nisi mambul kum kubdeibkwanir, erda sunti teleb kubkwansir. Ati, niryi, “Wanikminikingnyei,” tenen neik dinyi tubto eterebkwansin.

²Ati, sunda, “Sun malyi kanya bon nang aryi eterena uram ara milibibyei,” tenen kalikdandobkwandarur. A nang ara malyi kun dinyi akwe teneibmangiryok, kunuraming dinyi ara, “Den bama sekdandarur,” eboka eterebde baraming. Ati, sunci tola ati ton ato eboka eterenung. “Den bama kum seksingnyi ura, Er Imtamnyi biryi sunti, ‘Ni mabwe,’ kum tenebkwansir,” eboka eterebde baraming nang ara Er Imtamnyi bisi diboka kum milinung. Erda, sunci den bama sengna bikdob dinyi ati dongtam kiminingnung ci, sunci ninyi bowanikminikoka abingiryi, “Den bama sekdandarur,” eboka eterebde baraming.

³A nang ara ato erdaraming, “Nunda den bama sekmasei uca, Er Imtamnyi mabwe kunub,” erdaraming cok, Er Imtamnyi mabwe diboka kum kunung. Erda, nun dib tenen nang asi dib ati Er Imtamnyi mabwe nermabwe kunub. Ati, nunda kebdeiboka den bama sengsina nang ato kunub. Ara, Er Imtamnyi Kanya Roh Kudus milibde baransir uca, nunci nun Nai Imtamnyi uram diboka kununub ati, nunda den bama sengsina nang ato kunub ati ebman. Tonda, nunci, “Musa Uram kununub uca, Er Imtamnyi biryi nunsi dororansir,” kum tenenub. Erda, nunci ato tenenub. “Nun Du Kristus Yesus biryi nunsi lebdeibsou uca, nun Nai Imtamnyi biryi nunti, ‘Ni mabwe nermabwe,’ tenesurur.” A deyok aryi, nunci nun dam nang ati kisal kum dangdanub. Erda, nun Du Yesus bikwe kisal dangnub.

⁴A nang ara katabum kanya boboka, “Nunci Musa Uram kunubde banub ati, Er Imtamnyi biryi nunsi dobdobmasou,” eboka sundamnyi kisal dangdaraming. Ba, niryi iya katabum kanya boboka sun erdaraming to eboka nidamnyi kisal dakdandobtinyi ura, ato ebdatinyi, “Yuk nang aryi sunbabyi busul kuboka Musa Uram kunuraming bok, nira tabakoka busul weik kuransiryi, Musa Uram kunubde baranse.” A deyok aryi, niryi tabakoka erebdeibdandoka nidamnyi kisal dakdanmatinyi.

⁵Nira Israel kobdobanyi, Benyamin yalanyi kunun. Ni kwin biryi ni deibmanou ura, uki inbaryi tum ara den bama sekmanei. Ati, nira Ibraninyi kobdobanyi kunun ati ebman. Tonda, nira Farisi nang milinanyi kuransiryi, iya busul kuboka Musa biryi, “Ukubdarur-Ukuna mem,” arungdeirisurur uram kunubde baranse.

⁶Nira busul weik kuboka Musa Uram kunubde baranse ura, sun Kristus bisi dib tenen nang ara, “Obkaboktinyi,” tenen domkiringnanse. Ara, “Musa Uram kum kunuraming nang ara ni li,” tenen deyok aryi, niryi sunsi domkiringnanse. Ato kuboka Musa arungdeirin uram kunubde baranse ati, nira Musa Uram deici aryi tatab-tatab ebmanin kumnyi kuranse.

⁷Ba, nira minob talak kuranse ura, “Musa Uram kununa ara iya bikdob dinyi,” tenenanyi kuranse ani, ukuryok ara niryi Musa Uram kununa ara, “Talyi dinyi aca,” tenenun. Minob kuranse ura, “Musa Uram kunubtinyi uca, Er Imtamnyi biryi nisi dobdobkwanir,” teneranse ani, ukuryok ara ato tenen dinyi bai donokoka absiryi, “Nun Du Kristus dam kunanyi kubnyi uca, Er Imtamnyi biryi nisi dobdobkwanir,” tenenun.

⁸Ni Du Kristus Yesus dam kunanyi kiboka Ersi diboka bingdona ara iya bikdob dinyi kurur ati ebman. Ba, imtam tukwetam kurande dinyi nirya ara niryi, “Iya bikdob dinyi ton kum kurur. Erda, bai donongna dinyi ato kurur,” tenen aryi, “Ni Du dam kunanyi kibdobkwan,” tenen a dinyi nirya asi bai donokmase. Yuk dinyi nirya ara ninyi kum lemdeirisurur ati, niryi, “Dei ato kurur,” tenenun.

⁹Ba, niryi, “Nun Du dam kunanyi kibtinyi uca, Er Imtamnyi biryi nisi dobdobkwanir,” tenena akwe kunun. Ura, “Musa arungdeirisurur uram kunubmanyi uca, Er Imtamnyi biryi nisi dobdobkwanir,” tenena tuba kum kunun. Erda, niryi ato tenenun. “Nun Nai Imtamnyi biryi karebsici uca, nunda nun Du Yesus Kristus bisi dib tenenub deyok aryi, nun Nai Imtamnyi biryi nunsi dororansir,” tenenun.

¹⁰Ati, niryi, “Nun Du Kristus dam kunanyi cok, niryi Ersi tabakoka bikdobtinyi,” tenenun. Tonda, “Nun Du Kristus kam bukokmounyi mikib weik aryi ni kanya dam aryi wa ibnici uca, nira kam bukeibmounyi bitonyi kuboka Er Imtamnyi urasintam aryi teleb dinyi kunubde binkwan,” tenenun. Tonda, “Ninyi aryi nun Du Yesus Kristus bisi mambul weik takubdeibmai to, nira er milinanyi bibabyi neiktoto mambul dinyi ur takubdeibnunung,” tenenun. Tonda, “Ninyi aryi nun Du Yesus bisi obmai to, nira Er milinanyi bibabyi neiktoto ur da obnunung,” tenenun.

¹¹Niryi ton ato tenenun, “Ninyi aryi nisi sirya obningnyi ba, dibmanyi asi nun Du Yesus biryi ni Er milinanyi bisi kam bukeiboka iya kam kun dinyi karenina teleb,” tenenun ati ato ebman.

¹²Ni kwityabwe, nira, “Er Imtamnyi Uram asi manmalina kum-kum teleb kuboka kunubde banun ci, sirya Nun Du Kristus bitonyi kibdanman,” kum ebdanman. Tonda, “Nira sirya langdeiboka nun Du Kristus bitonyi kibdanman,” kum ebman. Erda, nirya ni kanya asi darabdongobdandoka abniryi, Nun Du Kristus Yesus biryi niti, “Nitonyi kibkwande,” tenen wibdeibmanou to, “Nun Du bitonyi langdeiboka kibtinyi,” tenen ingkiringnun. Ato kubkwande tenen Erci nisi leboka abnou ci, Er dinyi kibdeibnou ati, niryi, “Nun Du bitonyi kibdandobtinyi,” tenen ingkirikde banun.

¹³Ni kwityabwe, niryi, “Nun Du bitonyi langdeiboka kibtinyi,” tenen busul weik kuboka ingkirikde banun bok, niryi langdeiboka nun Du Yesus bitonyi kubkwan ara kabul. Cungnanyi bira, “Yuk nang asi muna kibdongoboka piala dengna weiktonun ara ni dobdobtinyi,” teneboka dongtam kurande dinyi dirtamurdena kum uca, urasintam kurande dinyi akwe dibliliboka cung barande. Ato kuboka nibabyi neiktoto ato kunubde banun. Ati, niryi dongtam kurande dinyi dirnilina kum uca, “Nun Du Kristus milibde baranse,” tenena ababyi kum kunun. Erda, ni urasintam kurande dinyi akwe diblilibde banun cok, “Nun Du bitonyi langdeiboka kibtinyi,” tenen ingkirikde banun.

¹⁴Nira cungnanyi kurande to kuboka kunubde banun ati ebman. Cungnanyi bira “Piala ni kum dobnyei yuk nang dobdobingnyei,” tenen er kanya kinibdakde cung barande to, nibabyi neiktoto ato kunubde banun. Ara, Nun Nai Imtamnyi biryi niti “Ni Mi Kristus Yesus dam kunanyi kibkwande,” tenen nabmanou to, niryi ni kanya kinibdakde, “Nun Nai biryi ebdeibnou to iya kam kun dinyi diboka dobdobkwan,” tenen ingkirikde banun.

¹⁵Ura, nunda nundamnyi ati, “Bikdob dinyi milibde banub,” tenen bingdanub nang nirya ara ato tenena teleb, “Nun kanya kinibdakoka abibiryi, langdeiboka nun Du Yesus bito nang kibdandobkwayeb.” Ba, niryi eterebmasin uram asi ton sunci, “Nun tenen kanya yukto kurur,” teneramunyi ura, nun Nai Imtamnyi biryi sunsi a deyok ati bitabdeiboka anmalakoka lak eterebkwansir.

¹⁶Ba, nun Nai Imtamnyi biryi nunsi sirya lak kibdeibsou ba, bingdonub to ara nunci a dinyi akwe ingkirikoka kunubde binkwayeb.

¹⁷Ni kwityabwe, sunbabyi ni kuranto asi miliboka abnumun ci, kunubde bindarur. Tonda, ni kunubde baran to miliraningnyi nang kunubde baraming to dibliliboka abmun ci, sunbabyi miliboka kunubde bindarur.

¹⁸Ninyi ilinto aryi, “Nunda Kristus milin nang kunub,” erdanung cok, nun Du Yesus kunubde baramwe to kum kunung. A nang ara nun Du Yesus co lase bing dakmainyi biti, “Erci nun malyi kun dinyi kilibmasou ara nun li,” tenenung. Ato tenenung ci, sunci malyi kun dinyi kubde baraming. A nang ara nun Du Yesus ab ordana nang ato kunung ati ebman. Ati, niryi sunsi minob uca eterebde baransise to, ukuryok ababyi engen kanya boboka abniryi, tamuboka sunsi, “A nang ara nun Du Yesus ab ordana nang kunung,” tamuboka ebmasin.

¹⁹A nang ara malyi dinyi akwe kuraming ati nun Nai Imtamnyi biryi sunsi kum daneibkwande. A nang ara “Yina ilinto yibtibyi,” tenen kuraming. Tonda, “Ner talyi yobtibyi,” tenena kuraming ci, Er Imtamnyi biryi arungdeirisurur uram ara bai donongnung. A nang ara alyi dinyi ara iya kum bingnung ci, sunci sun dam nang ati kisal dakdandoka sun malyi kunung to ninyi urasintam asi lak eraming. Tonda, a nang ara tukwetam nang dib tenena kum nang aryi tenebde baraming to akwe tenebde baraming.

²⁰Ba, nun dib tenen nang sokon ara tukwetam kum kurur. Erda, nun Nai Imtamnyi biryi lobdeibmasir sokon ara imtam ai kurur ati ebman. Ati, sunci, “Imtam ai asi sokon lobdeibsou,” tenen, “Nun Du Kristus bito nang kibdobkwayeb,” tenen ingkiringna teleb. Ura, nunda dib tenen nang ara, “Nun Lemsinanyi bira imtam aryi kuboka minola yuryate se,” tenen nun Du Yesus Kristus bisi dibde bunub.

²¹Nun Du bira iya mikibnyi kurur deyok aryi, imtam tukwetam dinyi utotoa nirya kalingdur. Nun Er milin nang ababyi kalingsurur ci, Erci Er mikib weik aryi nun nong asi milil dinyi kareboka dangubdeibkwansir. Ati, nun Du Yesus biryi karebsici ura, nun nong milil kum kuransir dinyi ara nun Du Yesus nong milil dinyi ato kubkwansir.