Read Futuna-Aniwa Filipi 4 Bible Online

Filipi 4 - Futuna-Aniwa bible

Filipi 4

¹A deyok aryi, ni kwityabwe ni boukwe weik kusunun nang ton, “Sun ab tonkwa ebdatibyi se,” tenesunun nang ton, sun ni kanya kilkil kurdeiriranurum nang ton, ni kisal dangsunun nang ton, sunci nisi kekenindarur. Sunci ni eterebmasin uram asi teneibmunyi ura, katabum eboka nun Du Yesus bisi dib teneramun ci, Ersi milibmurubdarur.

²Ura, Euodia ab Sintikhe ab ara uram talermururdana mem. Erda, sunci, “Nun Du bisi milin nerabwe kununum ati, neik kanya bobkwanim,” tenen antaniboka kubdobkwandururum. Ara, niryi uram ebdarab eboka ato molobmasin.

³Ura, ni kwit Sunsugos kanda ni ab tonkwa tanglona kum uca Er Imtamnyi wa irmiliranimnyi se. Niryi kansi ato eboka molobmakin. Kanci a nerabwe asi milibminyi ba, sun antanibdobdingiryi, neik kanya bona teleb. Ara, ninyi aryi nunsi, “Teleb Uram kekena nun li,” tenen bisik sengnansei bok, a nerabwe aryi, “Teleb Uram libkwayeb,” tenen tanglona kum uca nisi wa irmiliranirei. Tonda, nun kwit Klemens ab ni wa irmilin nang yuk nang ababyi nisi miliboka nun Du Yesus Kristus uram Teleb Uram lak etereramoubwe. Nun Nai Imtamnyi biryi sun si yuk-yuk kerek sekeiboka iya kam kubdeibkwansir nang kerek sengna umbura aryi dongoamwe nang ati ato ebman.

⁴Sunci, “Nun Du dam kun nang kunub,” teneboka abmun ci, sun kanya ara tuba-tuba kilkil kuna teleb. Niryi tubto ebtabakwinsin, “Sun kanya kilkil kuna teleb.”

⁵Yuk nang dam urasintam asi namin kanya boboka abmun ci, tuba-tuba teleb kubdarur. Nun Du Kristus bira nun dam kurur ati ato ebman.

⁶Sunci yuk dinyi-yuk dinyi ati teneiramun ci, mambul kiringna kanya bobmunyei. Erda, sunci sun ataransici tok nun Nai Imtamnyi bisi lak ena teleb. Ati, sunci sun ataransici dinyi nun Nai urasintam asi lak eboka abmun ci, “Nai, Kanci nun milibsurum,” eboka molona teleb. Tonda, sunci moloramun ci, nun Nai bisi, “Ei nun Nai,” eboka kina teleb.

⁷Sunci ato kuramunyi ura, nun Nai Imtamnyi biryi sun kanya teleb akwe weik kubdeibkwansir. Ba, sunda nun Du Yesus Kristus dam kun nang kurandum ati, nun Nai biryi sunsi teleb kanya kareboka kalikwansir. Ninyi aryi mambul dinyi kurdeiriransingnyi ababyi, nun kanya ara teleb akwe weik kuransir. Nun Nai biryi nun kanya teleb akwe kurdeiriransir ara iya teleb dinyi ton, ninyi aryi kanya teneibdenman kum dinyi kurur ati ebman.

⁸Ura, ni kwityabwe, sirya kobdob uram ebsiniryok, ato ebdeibkwinsin. Sunci, dib en uram asi teneibde bindarur. Tonda, bikdob dinyi asi teneibde bindarur. Tonda, udikum tenen dinyi asi teneibde bindarur. Tonda, iya teleb dinyi kunubde ban dinyi asi teneibde bindarur. Tonda, ninyi kanya kilkil kimna dinyi asi teneibde bindarur. Tonda, ninyi aryi kisal dangna dinyi asi teneibde bindarur.

⁹Ba, sunsi niryi etereransise uram ab, kekerandum uram ab, dororandum uram ab, niryi kunuran ba, asing eirirandum dinyi ab asi kunubde bindarur. Ba, ato kubmunyi uca, nun Nai Imtamnyi biryi ninyi nirya teleb akwe kurdeiriransiranyi bira sun ab tonkwa kuna teleb.

¹⁰Ni kwityabwe, sunci minob uca niti bico teneboka yina deibmanindau to, ukuryok tubto bico teneboka yina deibmanindau. A deyok aryi, ni kanya kilkil weik kuranir ba, niryi nun Du Yesus bisi, “Ei nun Du Yesus,” enun. Sunci niti tuba-tuba bico teneranindau cok, uki weik nun kum dirniliranindau. Ara, uki teleb ton kum kuransou uca, uki weikanun yina kum deibmanindau. Ani, ukuryok ara uki teleb tum kubmasir ba, sunci nisi yina tubto deibmanindau.

¹¹Niryi, “Utotoa-utotoa dinyi nisi atanmanir,” tenen mambul kiringna kanya kum bonun ati ebman. Atan kurana ababyi, atan kum kurana ababyi, ni kanya teleb kuranir ati ebman. Ni kubde baranse uca, atan kurana talak ababyi kilkil kanya boranse ati bingdoranse.

¹²Ton tum ara kwaning atanmanici ani, yuk tum ara kwaning langdeiboka kuranir. Uki-uki nirya kuraniryok, kilkil kanya bonun ati bingdoran. Ara, kwaning boubmanici talak ababyi, kwaning atabnici talak ababyi, ni kanya tuba-tuba kilkil kuranir.

¹³Nun Du biryi nisi mikib kubdeiboka milinurur deyok aryi, niryi katabum kanya boboka kwaning atana ab, mambul kurdeirin dinyi yuk dinyi ababyi bonun ati ebman.

¹⁴Ato ebman bok, sun Filipi nang aryi bico tenen ni mambul dinyi bobmilibmanindau ci, yina deibmanindau deyok aryi, niryi sunsi, “Ei ni kwityabwe,” eboka kibdobmasin.

¹⁵Tonda, sun Filipi nang ababyi bikmarum ara, sunci minob ura nun Du Yesus uram Teleb Uram dobdobmandau ura, niryi, “Makedonia mutuk aryi anaboka yuk atei nang asi Teleb Uram eterebde binkwan,” tenen kuranse. Ura, sun yuk atei kunung dib tenen nang aryi nisi yina kum kareranei bok, sun Filipi atei nang akwe nisi yina deibmanindau. Ara, sunci, “Yuk nang asi Teleb Uram eterebde bananyi bisi milibkwayeb,” tenen yina deibmanindau.

¹⁶Tonda, Tesalonika atei kuranse ababyi, sun Filipi atei nang aryi liki bitinyi nisi yina deibmanindau.

¹⁷Ato kunindarur bok, niryi sunsi, “Utotoa karen dinyi asi karebniting,” tenena kum kunun. Erda, niryi, “Nun kwityabwe aryi nisi dibnilibningnyi uca, nun Nai Imtamnyi biryi tabakoka sunsi kisal dangkwansir,” tenenun.

¹⁸Sunci nisi dibniliboka muna karen dinyi langdeiboka ilinto karebmanindau uca, utotoa kum ataranir. Ara, Epafroditus biriman aryi niti deibmanindau uca, ni taruk dam ara langdeibmanir. Ura, sunci nisi karebmanindau dinyi ara nun Nai Imtamnyi bisi dama tong teleb en dinyi ato deibmanindau deyok aryi nun Nai Imtamnyi biryi asing eibmou ura, Er kanya kilkil kurur.

¹⁹Nun Nai Imtamnyi ni milinunyi bira sun Filipi nang ataransici tok nirya langdeiboka kunubdeibkwansir. Nun Nai bira langdeiboka kisal dangsurutnyi kurur to, Erci nun Du Yesus Kristus biriman aryi langdeiboka kisal dangsina teleb.

²⁰Ati, nunci nun Nai Imtamnyi si weik ena teleb. Ukuryok ababyi, aminda kubde binkwayeb talak ababyi, nirya nunci nun Nai si erebkwayeb. Amin.

²¹Ura, sunci nun Du Yesus Kristus bisi dib tenen nang nirya asi ato ebdarur. “Nun nai Paulus biryi sun nirya asi, ‘Ni kwityabwe teleb,’ ebmasir.” Tonda, sun ni ab tonkwa kunub dib tenen nang ababyi sun nirya asi “Teleb,” ebmasing.

²²Sun akatei kuraming dib tenen nang nirya aryi sunsi “Teleb,” ebmasing. Sun weik sienyi Kaisar milin nang kankan aryi dib tenenung nang nirya aryi nunukoka sunsi, “Teleb,” ebmasing.

²³Nun Du Yesus Kristus biryi sun kanya asi kisal dangmurusina teleb.