Read Futuna-Aniwa 1Tesalonika 2 Bible Online

1Tesalonika 2 - Futuna-Aniwa bible

1Tesalonika 2

¹Nun kwityabwe e, nunda sun dam yanmoubwe ara talyi ati kum yanmoubwe. Erda, nunci nun Du Yesus deyok Teleb Uram etereransoubwe uca, sunci a uram diboka dib tenebmandau ara sunbabyi bikmarum.

²Nunci sun Tesalonika nang atei kabul yanganmaburyi, Filipi atei tuba kuamoubwe. Kuamoubwe ba, ninyi aryi nunsi malyi uram eboka malyi kubdeiansei ara sun bikmarum. Malyi kurdeiansei bok, nunci sun atei Tesalonika yanmoubwe ura, Teleb Uram eterena ara kum taklobmoubwe. Erda, nun Nai Imtamnyi biryi karebsou uca, nunci Teleb Uram eterebmasoubwe. Ara, sun atei nang kankan ton nang ababyi nunsi malyi kurdeiriransei ababyi, nunci ilil asa kum uca nun Nai Imtamnyi Uram etereransoubwe.

³Ati, nunci, “Nun Nai Imtamnyi bisi dib tenebmun ci, Er Uram kunubdarur,” ebibiryi, nunda ilil kum asa aryi kuboka ato enub. Ara, “Tola uram kum eterenub,” tenen bingdanub cok, “Dib en uram akwe eterenub,” tenen bingdanub deyok aryi, nunda ilil asa kum kuboka Teleb Uram enub. Tonda, nunci, “Co bok ilinto karebsiting,” tenen kanya kum bonub. Tonda, “Nun uram keken nang asi wanikminiktibyi,” tenen kanya ababyi kum bonub.

⁴Tonda, nunci, “Ninyi kanya teleb kubdeibtibyi,” tenen kanya kum bonub. Erda, nunci, “Nun Nai Imtamnyi kanya asi teleb kubdeibkwayeb,” tenen Teleb Uram eterenub. Nun Nai Imtamnyi bira ninyi kanya yuk-yuk lilirdeisurutnyi kurur ci. Nun kanya asi lilibmasou ura, Erci nunti, “Ni ebdeibkwan uram akwe eterebkwaming,” tenen bikoka Erci nunsi, “Teleb Uram eterebdarur,” eboka takubdeibsou. Ati, nun Nai Imtamnyi biryi nunsi takubdeibsou to akwe eterenub.

⁵Ati, nunci Er Imtamnyi Uram etereramib ci, nunci, “Ni kwit, ni kwit, wenena uram kum ebkwankin,” kum enub. Tonda, “Co bok ilinto karebsiting,” tenen Teleb Uram kum eterenub. Erda, teleb kanya boboka Teleb Uram eterenub. A dinyi ara tola kuma. Nun Nai Imtamnyi bibabyi bingsurur.

⁶Tonda, nunci ninyi aryi nun uram kekebingiryi nunsi, “Kisal daksiting,” tenen kanya kum bonub. Nunci sun Tesalonika atei nang ati ato kum tenesunung. Tonda, nunci, “Sun yuk atei-yuk atei nang aryi kisal daksiting,” ton kum tenenub.

⁷Nun Du Kristus biryi, “Teleb Uram eterebda bindarur,” eboka takubdeibsou ati, nunci sunsi, “Nunda nun Du Yesus Kristus wa irmilin nang kunub ati, sunci nun ebmabyi tok nirya kunuboka yina karebsindarur,” eboka arukdeibsitibiryok, nunci sunsi ikin dinyi kum takurdeiransoubwe. Erda, nunci namin kanya boboka sunsi dirniliransoubwe. Ara, er kwin biryi er mi alok asi kalikoka dirnilirande to, nunbabyi neiktoto sunda Tesalonika nang asi dirniliransoubwe.

⁸Nunda sunda Tesalonika nang asi boukwe weik kunub deyok aryi, nunci Teleb Uram etereransoubwe. Tonda, nunci sunti, “Una kuboka teleb kubdeibkwayeb do?” teneramoubwe. Ara, nunci kilkil kanya boramuburyi, bukman mabman nirya sunsi dirniliransoubwe. Ara, nunci sunti, “Nun kwityabwe,” teneramoubwe deyok aryi, ato kuramoubwe.

⁹Nun ab sun ab tonkwa kuramaburyi, nunci Teleb Uram akwe kum etereransoubwe. Erda, nunci, wa busul kuboka kitingtam lukunda nirya iramoubwe sirya wa ibibyi ura, nun yina yiramoubwe. Ara, nunci, “Nun kwityabwe Tesalonika nang asi ikin dinyi takubdeibibyei,” tenen nunci, “Yina ababyi ton karebsindarur,” eboka kum moloramoubwe. Erda, nunci wa diboka ibnaryok, nun yina yiramoubwe. Ara, nunci sunsi Teleb Uram etereransoubwe talak aryi ato kuramoubwe.

¹⁰Nun sunda Tesalonika atei kuboka dib tenen nang kankan kuramaburyi, nunda teleb dinyi akwe kuramoubwe. Ara, malyi kun dinyi bai donokoka, keresina kum uca teleb akwe kuramoubwe. A uram ara dib en uram akwe ati, sun nirya bikmarum. Tonda, nun Nai Imtamnyi bibabyi bingsurur.

¹¹Er nai biryi boukwe kiboka er mabwe yuk-yuk asi dirnilirande to, nunbabyi neiktoto boukwe weik kiboka sun yuk-yuk asi diboka dirniliransoubwe to ara sun nirya bikmarum.

¹²Ati, nunci sun kanya yuk-yuk asi katabum ebdeibmasoubwe. Tonda, nunci ato eboka sunsi ato ebdarabdeibmasoubwe. “Nun Nai Imtamnyi bira, ‘Ni erebdeibkwan nang,’ tenen namsurutnyi kurur. Ati, sunci nun Nai Imtamnyi biryi ebdeibsou to kunubdarur. Tonda, Erci sunti, ‘Nira Iya Erebdobnyi amwetam kun nang kubting,’ tenesurur.” Nunci ato eboka sun kanya katabum eboka ebdarabdeiansoubwe.

¹³Ura, sunda nun etereransoubwe uram diboka dobdobmandau ci, sunci, “Tukwetam nang aryi talyi eraming uram,” kum tenebmandau. Erda, sunci nun eterena uram ati, “Ei, a uram ara nun Nai Imtamnyi biryi lak esurur uram,” tenen ati, sunci Er Imtamnyi Uram diboka dobdobmandau. Ati, nunci nun Nai Imtamnyi bisi tuba-tuba, “Ei nun Nai,” enub. A uram ara talyi uram kuma. Erda, nun Nai Imtamnyi biryi karebmasou uca, a uram ara mikib kiboka karebmasou asi, sun dib tenen nang aryi Er Imtamnyi bisi milindarur ati ni bikmasin.

¹⁴Nun kwityabwe e, minob ura Yudea mutuk kuramwe to sun bikmarum. Ara, Yahudi yala nang ilinto aryi sun a mutuk kuramnyi dib tenen nang malyi kurdeiriramnyi. Ara, nun Du Yesus Kristus dam kun nang asi malyi kurdeiriramnyi. Ura, sunda Tesalonika nang ara sun Yudea mutuk kuboka dib tenen nang ato kurandau. Ara, sun atei kuraming nang aryi sunda dib tenen nang asi malyi kurdeiriramnyi. Ara, “Teleb Uram nun li,” tenen sun mutuk kuraming nang aryi sunda dib tenen nang asi malyi kurdeiriransei.

¹⁵Sun Yahudi yala nang kankan dib tenen kum nang ara nun Du Yesus bisi obmai. Tonda, Er Imtamnyi Uram ebdeibmaci to lak etereramnyi nang ababyi sunci minob obmai. Tonda, sunci nunda Teleb Uram eterebde ban nang asi yakdonokmasei. A nang ara ninyi nirya asi yu kanya boraming ci, malyi kun dinyi akwe ukuraming. Ato akwe kuraming ati, nun Nai Imtamnyi biryi sunti, “Ni li,” tenerur.

¹⁶A nang ara nunda Teleb Uram eteren nang ati, “Bisik sekminiktibyi,” tenesunung. Ara, “Sun yuk yala nang ara Yahudi yala kum nang ara Teleb Uram kekebingnyei,” tenen sunci nun Teleb Uram eteren nang ati, “Bisik sektibyi,” tenesunung. Ara, nunci, Teleb Uram sunsi eterebtibyi ba, “Nun Nai Imtamnyi biryi sunbabyi lebsute,” tenenub bok, sun Yahudi yala nang aryi, “Mem,” eboka bisik sengsunung. A nang ara tanglona kum uca malyi kuraming ati, nun Nai Imtamnyi biryi, “A nang aryi malyi kun dinyi ilinto kurur ati, a kunum dakbisikmar,” tenebmar ati, Erci sunsi ukuryok diba ati wenebkwande.

¹⁷Ura, nun kwityabwe, uki mitikanun mabmaburyi, nun ab sun ab tonkwa kum kuramoubwe deyok aryi, nun kanya mambul kuransir ba, nunci sunti tuba-tuba teneisunub. Ati, nunci, “Sun ab una kuboka ebdatibyi do?” tenebde kunub.

¹⁸Ati, nunci, “Tesalonika atei tamurbibyi ura, sun dib tenen nang ab ebdatibyi,” teneramoubwe. Ni Paulus bira liki bitinyi aryi, “Tesalonika atei tamurbinkun,” tenebmase. Ato tenebmasiryi, anabkoubwe bok, isa sienyi Iblis biryi nun bisik sekmasou. Ba, uki mikbaryi mabmoubwe ani, tubto anabkoubwe bok, isa sienyi biryi tubto bisik sekmasou.

¹⁹Nunci, “Sun ab tonkwa tubto ebdatibyi,” tenen sunda Tesalonika nang ati tuba-tuba teneisunub. Ara, sun ukurandum to deyok aryi, nun kanya kilkil weik kusurur ati ato ebmab. Ati, nunci, sunti, “Tanglona kum uca dib tenenung,” tenen aryi nun kanya kilkil kusurur. Nun Du Yesus imtam aryi kuboka tamuryankwande uki tum berekci ura, nunda nun Du Yesus urasintam aryi tikmabyi ura, nunci sunda Tesalonika nang erebdeiboka kisal dakwansib.

²⁰Sunda Tesalonika nang ara diboka kiklina ato nang kundarur ati ebman. Sunci katabum eboka dib tenerandum ati, nun kanya kilkil weik kuransir. Sunda nunci kisal dangsunub nang kundarur ati ebman.