Read Futuna-Aniwa 1Tesalonika 5 Bible Online

1Tesalonika 5 - Futuna-Aniwa bible

1Tesalonika 5

¹Ura, nun kwityabwe, “Nun Du Yesus tamuryankwande tum ara a tum aryi tamuryankwande,” eboka nunci sunsi kum kerek seksitibyi. Sunda a deyok ati diboka sirya bikmarum ati ebmab.

²Nun Du Yesus tamuryankwande uki berekwande tum ara ninyi nirya aryi kum bikwaming ara sun nirya bikmarum. Ukula donanyi bira lukunda aryi yuk nang dinyi asi lukdandoka dororande to, nun Du Yesus tamuryankwande tum ababyi neiktoto kubkwande. Ara, ninyi nirya aryi bingna kum kubmangnyi bok, nun Du Yesus bira lukdandoka tamuryankwande.

³Ara, sun dib tenen kum nang aryi, “Antanibdandobmab ati, teleb akwe kubdobkwamib,” ebingnyi ba, iya mambul dinyi sun dam lukdandoka yankwande. Ara, mi mundu boanci ani, deibkwanci ner ara lukdandoka mi deyok yirande to, sun dib tenen kum nang ara lukdandoka mambul weik dinyi dobdobkwaming. Ara, lebdandobman kum to mambul weik dinyi asi dobdobkwaming.

⁴Sunda dib tenen nang ara sun dib tenen kum nang kuraming to kum kurandum. Sun dib tenen kum nang kuraming to ara walwal kuboka kunuk dam ato kuraming bok, sun dib tenerandum nang ara diboka bingna nang kurandum ati, berengna dam kuraming nang ato kundarur. Ati, sunci, “Nun Du ara minola tamuryankur do?” tenen dibde bundarur aryi nun Du Yesus tamuryankwande uki tum berekci ura, sun kanya dam ara lungdana kum kubkwansir.

⁵Sun nirya ara berengna dam kun nang akwe kundarur ati ebman. Tonda, sun nirya ara kitingtam kubde ban nang kundarur. Nunda dib tenen nang ara malyi kun dinyi kum kuramib ati, kunuk dam kun nang ato kum kunub.

⁶A deyok aryi, nun dib teneramib nang ara sun dib tenen kum nang kuraming to kubibyei. Ati, nunci wi mabmamingiryi, utotoa kum bingnaming nang ato kubibyei. Erda, nunci wi mana kum uca dibde buramibiryi, “Malyi dinyi kubibyei,” tenen nundamnyi kalingdana teleb.

⁷Sun wi maraming nang ara lukunda aryi wi maraming. Tonda, sun anggur me ilinto yiraming nang ara lukunda aryi yibingnyi uca, luba talerande. Sun dib tenen kum nang ara berengna uram asi dib kum teneraming ba, walwal kuraming ati, wi mana nang ato kuraming. Tonda, luba talen nang aryi sundamnyi kum kalingdaming ati, sunci anggur me asi ilinto yiraming.

⁸Sun dib tenen kum nang ara ato kuraming bok, nunda dib tenen nang ara berengna dam kubde ban nang ato kunub. Ati, nunci, “Malyi dinyi ukubibyei,” tenen nundamnyi kalingdana teleb. Sun yin doun nang aryi kuraming to, “Nun ordana nang aryi bisik ebsingnyi ba, mar obsicei,” tenen, “Nun nong kisok nirya kalikdandobkwayeb,” tenebingnyi ura, sunci ting ongoboka yin doun nang kisok kaluna si helm kaluroraming to, nun dib tenen nang ababyi nundamnyi kalingdana teleb. Ara, “Malyi kun dinyi aryi nunsi sakdeibsicei,” tenen nundamnyi kalingdana teleb. Nunda dib tenen nang aryi kalingdana dinyi ara dib tenena ton, boukwe weik kimdana ton, nun Du Yesus bisi dibde buna ton kurur. Ati, nunci diboka dib teneboka yuk nang asi boukwe weik kibibiryi, “Nun Du Yesus biryi nunsi lebkwansir,” tenen dibde buna teleb. Ato kuboka nunci tanglona kum uca nundamnyi kalingdana teleb.

⁹Nun Nai Imtamnyi bira nunda dib tenen nang asi, “Ikin dinyi takubdeiboka iya wenebkwan,” kum tenebsou. Erda, Erci nunti, “Lebkwan,” tenebsou ara, nun Du Yesus Kristus biriman aryi Erci nunsi lebkwansir.

¹⁰Nun Du bira nun dib tenen nang ati dibmou. Ara, nun kam tuba kubkwamibyi nang ababyi, sirya dinung nang ababyi, Er tonkwa iya kam kubkwamib ati Er dibmou.

¹¹Ati, sunci a uram luba kum kuboka eterebdandoka sun kanya yuk-yuk katabum ebdeibdandarur. Sirya ukurandum ura, ni sirya bikmasin ati niryi sunsi, “Tanglona kum uca ato akwe tuba ukubdandarur,” tenen ati ebman.

¹²Ura, nun kwityabwe dib tenen nang. Sun kankan aryi busul kuboka Teleb Uram etereransingnyi nang asi sunci, “Nun naiyabwe,” tenena teleb. A nang ara nun Du Yesus dam kun nang kunung ci, sunsi weneransing ati ato ebman.

¹³A nang ara sunsi, “Ato-ato kuna teleb,” eboka busul kuboka kalingnansing ati, sunci sunsi boukwe weik kiboka, “Nun naiyabwe diba,” tenena teleb. Tonda, sun nirya ara antanibdandoka tonkwa kubdarur.

¹⁴Ura, nun kwityabwe, nunci ebdarab eboka, “Ato-ato kuna teleb,” en uram ton ebtabakwayeb. Ara, sunci sun, “Wa ina nun li,” tenen nang asi wenena teleb. Tonda, sunci sun mambul kanya boramingnyi nang kanya asi katabum erdeirina teleb. Sunci sun mitang nang ton yuk-yuk dinyi ataranci nang ton teleb kurdeirina teleb. Tonda, sunci sun dib tenen nang ton sun dib tenen kum nang ababyi yu uram minola kerebmunyei. Erda, sunci a nang asi boukwe kibwandarur.

¹⁵Ninyi aryi sunsi malyi kurdeiriransingnyi ababyi, sunci, “Tamuboka dekeibkwan,” tenen malyi kubdeibmunyei. Erda, sunci diboka teneibmunyi ura, sun mamun teleb kurdeirirdana teleb. Tonda, sun yuk nang ababyi teleb kurdeirina teleb.

¹⁶Bukman mabman nirya sun kanya ara kilkil kuna teleb.

¹⁷Tanglona kum uca nun Nai Imtamnyi bisi molobdarur.

¹⁸Tanglona kum uca sunci nun Nai Imtamnyi bisi, “Ei nun Nai,” ebdarur. Sunda nun Du Yesus Kristus dam kun nang kundarur ati, nun Nai Imtamnyi biryi sunti, “Ato dinyi kuna ara teleb,” tenesurur ati ebman.

¹⁹Er Imtamnyi Kanya Roh Kudus aryi karesurur berengna asi sunci tangabmunyei.

²⁰Er Imtamnyi Kanya Roh Kudus aryi sun dam asi lak kimdeiriranci uram asi sunci ina ngilikmunyei.

²¹Erda, yuk-yuk uram asi lilibdemun ci, “Er Imtamnyi Kanya Roh Kudus aryi karesurur uram ara dib en uram ebmang do? Tola uram ebmang do?” tenen diboka lilibdarur. Ba, sun kekebmamunyi uram ara dib en uram kubci ura, sunci a uram asi diboka kunubkwandarur.

²²Ba, malyi kun dinyi nirya asi bai donokmun ci, kunubmunyei.

²³Ura, nun Nai Imtamnyi bira antanirdeirisin deyoknyi biryi sun Tesalonika nang asi karebsici uca, sunda nun Nai Imtamnyi biryi wimna nang ato kuramun ci, teleb dinyi akwe ukuna teleb. Ara, Erci tanglona kum uca sunsi diboka kaliksici ura, sun tenen kanya nirya ab sun nong ab kerebmasin kum to kuna teleb. Ara, nun Du Yesus Kristus imtam aryi kuboka tamuryangaci ura, Erci sunda Tesalonika nang ati, “Kerebman kum to kunung,” esina teleb.

²⁴Nun Nai Imtamnyi bira sunsi, “Ni mabwe nermabwe,” eboka nabsounyi bira Er Uram diboka kunurandanyi kurur. Ati, Erci sunsi kum taklobkwansir.

²⁵Nun kwityabwe e, sunci ni Paulus ab nun kwityabwe ni ab tonkwa kunub nang ati molormilisina teleb.

²⁶Sun dib tenen nang yuk nang ab ebdanmunyi ura, sunci sun yuk-yuk asi iribdanmun ci, ato eboka ebmurubdarur. “Paulus ab nun kwityabwe er ab tonkwa kunung nang ab aryi teleb ebmasing,” ebkarebdarur.

²⁷Sun dib tenen nang yuk nang ababyi ni kerek sekmasise kerek sengna asi kekebkwaming ati, sunci a kerek sengna asi nukeibdarur. Uram ebdarab eboka, niryi sunsi ato ebkwinsin. “A kerek sengna asi kum nukeibibyi ura, nun Du Yesus biryi sunsi wenebsicei.”

²⁸Nun Du Yesus Kristus biryi tanglosina kum uca sunsi teleb kurdeirisina teleb.