Read Futuna-Aniwa 2Tesalonika 2 Bible Online

2Tesalonika 2 - Futuna-Aniwa bible

2Tesalonika 2

¹Ura, ni kwityabwe, Nun Du Yesus Kristus tamuryankwande tum deyok ati ni uram ton ebkwan. Tonda, “Nun Du bira nun dib tenen nang asi Er dam aminda bulubdeibkwansir,” tenen uram ton ebkwan.

²Sunci sun kanya dam ola kankana kusina mem. Ara, ninyi aryi, “Asing kum dinmab bok, nun Du Yesus sirya tamuryanmar,” ebingnyi ura, sunci a uram diba tenena mem. Ati, ninyi aryi, “A uram ara dib en uram. Er Imtamnyi Kanya Roh Kudus aryi ato eboka eterebnou,” ebingnyi ababyi, sunci a uram asi diba tenena mem. Tonda, ninyi aryi, “A uram ara dib en uram. Ninyi aryok ato eboka eterebmasing,” ebingnyi ababyi, sunci diba tenena mem. Tonda, ninyi aryi, “Er Paulus biryi ato eboka kerek sekmou,” ebingnyi ababyi, sunci diba tenena mem. Nira Paulus biryi, “Nun Du Yesus kum tamuryau,” ebmasin. Nunci Ersi tuba dibde bunub.

³Ba, ninyi aryi ebingnyi tola ati yuk-yuk uram enmangnyi ura, sunci diba tenebmunyei. Nun Du Yesus kabul kum tamuryanmaci talak ara ninyi ilinto aryi sun diba teneramingnyi ara taklobkwaming. Tonda, iya malyi kunanyi bira Iblis milin nang bomenengnanyi yuma menengyaci ura, nun Du Yesus bira aminda tam tamuryankwande. Anyi bira iya malyi kunanyi bisi nun Du Yesus biryi kum daneibkwande. A dinyi ara bisik sekmanto kum.

⁴Nun Du bira kum yanabde bok, a iya malyi kunanyi biryi dub erebdeibdandoka ato ebkwande. “Nira ninyi molonung dinyi nirya outam kiboka eitotonyi kunun ati, yuk molon dinyi kum molobkwan,” eboka erdamnyi erebdeibdankwande. Tonda, erci Er Imtamnyi Uram malyi kiboka abdiryi, Bait Allah ai wengbindoka erebdob sokon burbindoka ato ebkwande. “Nira Allah a kunum. Ati, ninyi nirya aryi nisi molobnindarur.” ebkwande.

⁵Ni Paulus ab sun Tesalonika nang ab tonkwa kuramoubwe ba, niryi a dinyi nirya asi eterebmasise. Sunci a eterebmasise uram asi tuba teneibdarur do?

⁶A iya malyi kunanyi bira ukuryok talak aryi lak kum kibdanmar. Ara, nun Nai Imtamnyi biryi karebci uca, bisik sengna dinyi ton aryi, anyi bisi bisik sengdur. Unato dinyi ersi bisik sengnande ara sun sirya bikmarum. Niryi sunsi a deyok ati minob eterebmasise ati ato ebman. Ani, nun Nai Imtamnyi biryi kiknibkwande uki tum berekci uca, a iya malyi kunanyi lak kibdankwande.

⁷Iya malyi kunanyi ukuryok lak kum kibmar bok, ukuryok ababyi isa sienyi si Iblis ab, er milin nang ab, iniboka malyi dinyi ilinto kuraming. Malyi kunanyi bisik sengnanyi bira tanglona kum uca bisik sekwande.

⁸Ura, aminda aryi iya malyi kunanyi bisi bisik sengnanyi bisi kisibdobci uca, iya malyi kunanyi lak kibkwande. Anyi sirya lak kibdaci bok, nun Du Yesus tamuryankwande. Er milil weik kunanyi kuboka tamuryangaci tum aryi nun Du biryi anyi bisi uram dem aryok oboka kum daneibkwande.

⁹Iya malyi kunanyi lak kibkwande ara ato kuboka lak kibkwande. Isa sienyi Iblis biryi karebci uca, anyi bira mikib kuboka ilil tenen dinyi ilinto kiknibkwande. Ara, erci, “Ninyi nirya aryi nisi miliboka ni uram asi kunubniting,” tenen ilil tenen dinyi mitik kum kiknibkwande. Ara, ninyi ilinto wanikminikwande ati, erci ilil tenen dinyi utotoa kiknibkwande.

¹⁰Tonda, anyi biryi malyi dinyi utotoa kiknibkwande. Ato kuboka erci ninyi ilinto asi wanikminikwande. Sun iya malyi kunanyi biryi wanikminikwande nang asi nun Nai Imtamnyi biryi kum daneibkwande. A nang ara nun Nai biryi karebsou dib en uram ati, “Nun li,” teneraming ati, nun Du Yesus biryi sunsi kum lebkwande. Erda, Erci sunsi kum daneibkwande.

¹¹Tonda, a nang ara dib en uram ati, “Nun li,” teneraming deyok aryi, nun Nai Imtamnyi biryi, “Wenebkwan,” tenen a nang asi wanikminikmou. Ara, Erci sunti, “Dib en uram dib tenebingnyei,” tenen, “Niryi sunsi lebnyei,” tenerande. Uca, nun Nai Imtamnyi biryi karebmou uca, a nang ara katabum eboka tola uram dib tenenung.

¹²Ato kubingnyi ba, sun dib en uram, “Nun li,” tenen nang asi, “Wenebkwan,” tenen Er Imtamnyi biryi sunsi wanikminikwande. Tonda, sun, “Malyi kun dinyi akwe ukubkwayeb,” tenen nang asi nun Nai Imtamnyi biryi kum lebkwande. Erda, Erci, “Dib en uram bikingnyei,” tenen sunsi wanikminikwansir.

¹³Ura, nun kwityabwe, sunda nun Du Yesus biryi boukwe kusurur nang kundarur. Nun Nai Imtamnyi biryi, “Lebkwan,” tenen sunsi minob wibsou ati, nunci nun Nai bisi tuba-tuba, “Ei nun Nai,” eboka kimnub. Ara, Er Imtamnyi biryi, “Ni Kanya Roh Kudus asi ninyi kanya dam dongobnyi uca, Erci sun kanya asi danguboka bitabdeibci uca, teleb akwe kubkwaming,” tenen sunsi wibsou. Tonda, Erci, “Dib en uram deici aryi Niryi sunsi lebkwan,” tenen sunsi wibsou.

¹⁴Nun Nai Imtamnyi biryi, “Lebkwan,” tenen sunsi nabmasou. Ara, Teleb Uram deib aryi sunsi nabsou ati ebman. Ati, Erci, “Ni Mi Yesus Kristus borur milil ato dobdobkwaming,” tenen sunsi nabsou.

¹⁵Ati, nun kwityabwe, sun kanya katabum eboka nun etereransoubwe uram asi diboka talebnurubdobdarur. Ara, uram deib aryi etereransoubwe dinyi ab, kerek sengna umbura kerek sengnansoubwe dinyi ab, diboka talebdarur.

¹⁶Nun Du Yesus Kristus ab, nun Nai Imtamnyi ab aryi sun kanya yuk-yuk asi katabum erdeirisina teleb. Nun Nai Imtamnyi bira nunsi boukwe kimsurutnyi kurur. Erda tanglona kum uca nun kanya iya teleb kimdeirisurutnyi kurur. Erda teleb kanya borutnyi biryi karebsou uca, nunci, “Teleb dinyi karebkwansir,” tenen Ersi dibde bunub. Ati, sunci, “Nun Nai ab, nun Du Yesus ab aryi nun kanya katabum ebdeiriransiring,” tenen katabum ebdeibdandarur. Tonda, sunci teleb dinyi akwe ukubmun ci, Teleb Uram akwe ebdarur.