Read Futuna-Aniwa 1Timotius 2 Bible Online

1Timotius 2 - Futuna-Aniwa bible

1Timotius 2

¹Yuma kobdob ebdeibkun uram asi kan kekerum. Sun dib tenen nang aryi Er Imtamnyi bisi moloramingiryi, sunci ninyi nirya ati diboka molormilina teleb. Ninyi nirya ati teneiboka molormiliramingiryi, sunci miliboka, “Ei nun Nai,” ena asi luba kibingnyei.

²Sun weik sien nang ati kanya teneiboka molormilina teleb. Tonda, sun ninyi kalingna nang yuk nang ababyi molormilina teleb. Ara, “Nun sien nang telebto kalingsitingnyi uca, nun nirya ara antaniboka teleb akwe kubtibyi,” tenebibiryi, nunci nun sien nang ati molormilina teleb. Ura, teleb akwe kubibiryi, nunci Er Imtamnyi biryi arungsurur to nirya kunuboka kerebmasin kum dinyi kununa teleb. Ato tenebibiryi, nunci nun sien nang ati molormilina teleb.

³Ato eboka molormilina ara teleb akwe kurur. Nun Nai Imtamnyi ninyi Lemsurutnyi biryi ato molona asi kekebmaci ura, Er kanya kilkil kubkwandur.

⁴Nun Nai Imtamnyi biryi, “Ninyi nirya asi lebdobtinyi,” tenesurur. Tonda, Erci, “Ninyi yuk-yuk aryi bikdobtingiryi, dib en uram dib tenebting,” tenesurur. A deyok aryi nunda dib tenen nang aryi ninyi nirya ati molormilina teleb.

⁵Nun Nai Imtamnyi bikwa iya mikibnyi kurur. Tonda, Nun Du Kristus Yesus bikwa ninyi kan Er Imtamnyi kan noutam kuboka mururdeirisurutnyi kurur. Nun Du tentoknyi bira ninyi kimdanmounyi biryi nunda tukwetam nang ab Er Imtamnyi ab asi antanirdeirisurur.

⁶Nun Du Kristus Yesus biryi, “Ninyi nirya leboka teleb kubdeibtinyi,” tenen, “Obningnyi ababyi ni teleb,” tenebmou ura, dibmou. Ara, Er Imtamnyi biryi takubdeibmou to, nun Du biryi, “Ninyi nirya lebtinyi,” tenen dibmou. Ura, nun Nai Imtamnyi biryi, “Ukuryok ara teleb uki tum kurur,” tenesurur ci, Er tenen kanya ara, “Ninyi nirya asi Er Kristus Yesus biriman aryi lebtinyi,” tenen kanya asi nunsi lak kimdeirisurur.

⁷Ninyi nirya a uram kekebwaming ati, Er Imtamnyi biryi ni Paulus bisi, “Ni uram ermuruboka lak eterebde barandum,” eboka tikeibnou. Ara, niryi sun Yahudi yala kum nang yuk-yuk asi eterebkwan ati, Erci nisi tikeibnou. Ara, niryi, “Nun Du Yesus bisi dib tenebdarur,” eboka, “Dib en uram diboka kekebdarur,” eboka eterebkwan ati, Erci nisi takubdeibnou. Tola kuma. Er Imtamnyi biryi ato eboka tikeibnou.

⁸Ura, sun dib tenen nang dantam-dantam kuramunyi nang aryi, “Er Imtamnyi si weik eboka molobkwayeb,” tenen atei yuk-yuk buluboka wekmamun ci, Er Imtamnyi bisi molobkwamamunyi ura, ato kubkwandarur. Sun sal nang aryi Er Imtamnyi bisi molobkwamangnyi ura, sunci, “Malyi dinyi kubkwan,” tenen kanya bobingnyei. Tonda, “Lulubtinyi,” tenen kanya bobingnyei. Erda, sunci, “Malyi kun dinyi ara sirya bai donokman,” teneboka sun taruk lakoka erebdeibingiryi, Er Imtamnyi si weik eboka molona teleb.

⁹Ura, “Sun dib tenen nerabwe ara una kuboka kubkwaming do?” tenen dinyi ara niryi uram ton ebkwan. Kweirya amuma-amuma dobingnyei ati ebman. Ara, emas aryi kiknin dinyi ton, dengna weik keil yuk dinyi ababyi kweirya dobingnyei. Tonda, dengna weik dekmai ci, ongon aling ababyi ongobingnyei. Tonda, “Ni kisok otong asi una kuboka bitabdeibkwan do?” tenen akwe kubingnyei. Ati, sun nerabwe ara, “Teleb-teleb kubibyi uca, sal nang kanya ara nunsi kanya nunungte,” tenebingnyei.

¹⁰Erda, sun nerabwe ara, “Er Imtamnyi bisi milinun,” eboka lak eramingnyi nerabwe kikniboka, “Er Imtamnyi biryi niti teleb tenebnuti,” tenen Er Imtamnyi biryi arungsurur to kununa teleb.

¹¹Sun nerabwe ara, “Bikdobtibyi,” tenebingiryi, sun sal nang ati, “Nun naiyabwe,” tenen sun sal nang aryi eterebkwamingnyi dib en uram asi kekena teleb.

¹²Ni Paulus bira, “Nerabwe ara sal asi dib en uram eterebingnyei,” ebmasin. Tonda, nerabwe ara sal asi, “Ato-ato kubdarur,” eboka arukingnyei. Nerabwe ara uram kilikoka dib en uram asi kekebde buna teleb.

¹³Er Imtamnyi biryi yuma kobdob talak aryi nun aibwe Adam ab nun tat Hawa ab asi kiknibmou. Ara, sal asi minob kiknibmou ura, ner ara aminda kiknibmou. A deyok aryi niryi, “Nerabwe ara sal asi dib en uram eterebingnyei,” ebman.

¹⁴Tonda, isa sienyi Iblis biryi, “Sakeibtinyi,” tenen tola uram ebmou ura, Adam biryi er uram minob kum dobdobmou. Erda, er ner Hawa biryi tola uram minob dobdobmou ci, Er Imtamnyi Uram ara yan yanibmou. A deyok aryi, niryi, “Nerabwe ara sal nang asi eteren uram eterebingnyei,” ebman.

¹⁵Ato kurur bok, nerabwe ara mi mundu boboka mi deibingnyi uca, Er Imtamnyi biryi sunsi lebkwande. Ara, tanglona kun uca Er Imtamnyi bisi dib tenebingiryi, sun yuk nang asi boukwe weik kubingnyi uca, Er Imtamnyi biryi nerabwe ababyi teleb kubdeibkwande. Ara, “Nidamnyi kalikdandobkwan,” tenebingiryi Er Imtamnyi biryi arungsurur to kunubingnyi uca, Er Imtamnyi biryi nerabwe ababyi teleb kubdeibkwande.