Read Futuna-Aniwa 1Timotius 3 Bible Online

1Timotius 3 - Futuna-Aniwa bible

1Timotius 3

¹“Sun dib tenen nang kalingna wa ara teleb wa kurur. Unanyi biryi, ‘Sun dib tenen nang asi kalingnanyi kibtinyi,’ tenebdinyi bira teleb wa ingkiringdur.” A dib en uram ara tola uram kuma.

²A deyok aryi sun dib tenen nang asi kalikwamingnyi nang ara teleb kun nang akwe wibdeibkwanung. Ner tentok don nang akwe sun dib tenen nang asi kalikwanung. Tonda, yu uram minola kum eramingnyi nang akwe tikeibkwanung. Tonda, “Nidamnyi bibabyi kalikdankwan,” tenen nang aryi sun dib tenen nang asi kalingna teleb. Ara, sun yuk nang aryi sunti, “Nun naiyabwe,” tenen nang akwe sun dib tenen nang asi kalingna teleb. Sun dib tenen nang asi kalikwamingnyi nang ara ninyi du dongon nang kubingiryi, dib en uram eterena ati diboka bikting. Sun ato kuramingnyi nang akwe tikeibkwanung.

³Anggur me ilinto yirandinyi bira tingdeina mem. Tonda, “Yu uram ebtinyi,” tenen kanya borandinyi bibabyi tikeibmunyei. Erda, namin kanya bon nang ab, ninyi lemdeirin nang ab akwe tingdeirina teleb. Tonda, “Co bok ilinto talebtinyi,” tenen kum nang asi tingdeirina teleb.

⁴Sun ner mabwe kobdob asi diboka kalingnamingnyi nang ara sun dib tenen nang asi kalingna teleb. Sun mabwe nermabwe aryi, “Nun nai,” teneboka sun nai uram diboka kekeramingnyi nang asi tingdeirina teleb.

⁵Sun ner mabwe kobdob asi diboka kum kalingnamingnyi nang ara sun dib tenen nang asi kalikwaming do? Ato tenen kum. Sun ner mabwe kobdob asi diboka kalingna kum kuramingnyi nang ara Er Imtamnyi mabwe ababyi diboka kum kalingkwanung ati ebman.

⁶Tonda, Nun Du Kristus Yesus bisi ukuryok dib tenebmarinyi bibabyi tingdeina mem. Ara, “Ukuryok milibmarinyi bisi tikeibibyi asi windaranci uca, isa sienyi Iblis biryi minob sakeibmou to tubto minola sakeibcei,” tenen ukuryok dib tenebmarinyi bira tingdeina mem.

⁷Sun dib tenen nang ab sun dib tenen kum nang ababyi sunti, “Nun nai,” eramingnyi nang akwe tikeibkwandarur. Ara, “Sun dib tenen kum nang aryi, ‘Anyi malinyi,’ eboka tatab-tatab ebing uca, Iblis biryi minola sakeibcei,” tenebmun cok, ninyi nirya aryi sunti, “Nun naiyabwe,” eramingnyi nang akwe tikeibkwandarur.

⁸Ara, sunci, “Sun utotoa kum nang asi bongkaren nang asi tikeibkwayeb,” ebdamunyi ura, sunci neiktoto teleb kun nang akwe wibdeibmun ci, tikeibkwandarur. Ara, yuk nang aryi sunti, “Nun naiyabwe,” teneramingnyi nang akwe tingdeirina teleb. Wiliboka kanya bon nang asi tikeibmunyei. Tonda, anggur me ilinto yin nang ababyi tikeibmunyei. Tonda, “Co bok ilinto labtalebtinyi,” tenen nang ababyi tikeibmunyei.

⁹Erda, dib en uram asi diboka taleramingnyi nang asi tikeibkwandarur. Ara, minob ura kum bingnamoubwe uram ara nun Nai Imtamnyi biryi ukuryok lak kibsou uram asi diboka taleramingnyi nang asi wibdeiboka tikeibkwandarur. A nang ara sun kanya aryi, “Malyi kun dinyi bai donokman,” tenebdandoka teleb dinyi akwe kuramingnyi ura, ur wibdeiboka tikeibkwandarur.

¹⁰Sun utotoa kum nang asi bongkaren nang asi tingdeirina kabul talak ara sun dib tenen nang aryi sun tikeibkwamingnyi nang kuramingnyi to diblilibkwanung. Sun malyi deyok ton kum ura, sun dib tenen nang aryi sunti, “Nun kalingna nang wa ur irmilibnung,” ebingnyi ura, a nang asi tingdeirina teleb.

¹¹Sun utotoa kum nang asi bongkaren nang nerabwe neiktoto ara yuk nang aryi, “Nun kwin,” teneramingnyi nerabwe akwe kubkwanung. A nerabwe ara, “Yuk nang asi sakeibtibyi,” tenen talakdona mem. Erda, sundamnyi kalikdandoka busul akwe kuboka milibkwanung.

¹²Sun utotoa kum nang asi bongkaren nang ara ner tentok doamingyi nang akwe kubkwanung. Ner bitinyi don nang asi tikeibmunyei. Tonda, a nang ara, “ato-ato kubdarur,” eboka sun mining ner mabwe asi diboka kalikwanung.

¹³Sun busul kuboka dirnilina nang ati ninyi nirya aryi, “Teleb kun nang,” ebkwaming. Sun ato kuramingnyi nang ara alyi kum kubkwande. Erda, sunci yuk nang asi, “Nun Du Kristus Yesus bisi dib tenenun,” eboka abingiryi, ilil kum asa aryi Teleb Uram eterebkwaming.

¹⁴Ni kwit Timotius, “Nira kan dam minola yatinyi,” tenebman ci, niryi kansi, “Ato-ato kubdum,” eboka a kerek sengna biriman aryi ebdeibmakin.

¹⁵Ara, ni ola kum yanyi ura, Timotius kanci ni ebdeibkwaman uram bikoka abmin ci, “Sun dib tenen nang kankan asi una kuboka kubkwanub do?” tenen bikwandim ati, kerek sekeibmakin. Nunda nun Du Yesus Kristus bisi dib tenen nang ara Er Imtamnyi ai ato kunub. Er Imtamnyi bira nun kankan asi iya kurur ati ato ebman. Nunda er iya kam kurutnyi biryi nabsou nang ara Er Imtamnyi ai ato kunub. Nunda Er Imtamnyi biryi karebsou dib uram asi erebdeiboka diboka talenub ati ebman.

¹⁶Ura, nun dib tenenub uram deyok ara diboka, “Naie,” tenen dinyi kurur. A uram deyok ara minob talak ara kum bingdamoubwe asi, Er Imtamnyi biryi ukuryok aryi lak kibdeibsou. Ara, nun Du Kristus Yesus deyok ati Erci nunsi lak kibdeibsou. Nun Du deyok ati lak kibdeibsou uram ara ninyi tentok ababyi, “Tola uram aca,” ebman kum. Erda, dib en uram akwe kurur. Nun dib tenena uram deyok ara ato eboka lak enub, “Nun Du bira ninyi kibdandoka Erdamnyi lak kibdanmou. ‘Erda malyi kun kumnyi kurur,’ eboka Er Imtamnyi Kanya Roh Kudus aryi lak kibdeibsou. Erda Erdamnyi lak kibdamunyi bisi sun Imtamnyi Uram eryuryangan nang aryi asing eibmai. Nun Du uram Teleb Uram eterebde baramnyi ba, sun im dangna tukwe dangna nang nirya kekeramnyi. Ba, nun Du bisi sun im dangna tukwe dangna nang aryi dib tenenung. Nun Du bisi nun Nai biryi boweleboka imtam ai erebdeibmou,” enub.