Read Futuna-Aniwa 1Timotius 4 Bible Online

1Timotius 4 - Futuna-Aniwa bible

1Timotius 4

¹Sirya kobdob talak ara ninyi ton nang aryi dib uram dib teneramingnyi ani, dib tenena dinyi taklobkwaming. A nang ara tola uram taleboka isa aryi kikniboka eterena uram akwe milibkwaming. Er Imtamnyi Kanya Roh Kudus ara a dinyi minob bingdurnyi biryi ebdaraboka ato eteresurur.

²A nang ara wiliboka kanya bobingiryi, tola uram akwe eterebkwaming. Dib en uram nirya asi singirdeiriramingnyi uca, sunci, “Tola uram eterenub ababyi malyi dinyi kum kunub,” tenebde kunung.

³A nang ara, “Ner dona mem,” eboka etereraming. Tonda, “Yuk-yuk yina yina mem,” eboka etereraming. Nun Nai Imtamnyi biryi yina nirya kiknibmou ura, ninyi karebsou asi, a nang aryi, “Yina mem,” eboka etereraming. Ato eboka etereraming bok, nunda dib tenen nang aryi Er Imtamnyi biryi karebsou yina utotoa asi ur yibkwanub ati ebman. Nun Nai Imtamnyi biryi dib en uram diboka bingnub ci, dib tenenub nang ati, “Yina-yina ur yinub,” tenesurur. Ara, nunci Ersi, “Ei nun Nai,” eboka kibdobibyi ura, ur yinkwamoubwe ati, nun Nai biryi yina-yina nirya karebmasou.

⁴Er Imtamnyi biryi kiknibmou dinyi nirya ara teleb dinyi akwe kiknibmou. Erci kiknibmou dinyi ara ninyi aryi “Yina mem,” ena mem. Er Imtamnyi bisi “Ei nun Nai,” eboka kibdobibiryi, yina-yina nirya asi yin dinyi ara mem ton kum kurur.

⁵Er Imtamnyi biryi, “Yina ur yibdarur,” ebmou deyok aryi, yina-yina nirya ara ur yibkwanub. Tonda, nunci yibkubyi ura, Er Imtamnyi bisi, “Ei nun Nai,” enub deyok aryi yina nirya ara mem dinyi ton kum kusurur.

⁶Ni kwit Timotius, kanci a ebdeibman uram asi ebmurubmin ci, ner dona deyok ton, yina-yina ur yina deyok ton ati, “Ato-ato kubdarur,” eboka kanci nun kwityabwe dib tenen nang asi wenebdum. Ato kubminyi uca, kanda nun Du Kristus Yesus Er wa irmilinanyi diboka kubkwandum. Nun dib teneramib Teleb Uram ara kanbabyi diboka kunurandim eterena uram asi kanci tuba-tuba teneiriramin ci, nun Du Yesus wa ibmilibdum.

⁷Ura, nunung uram ab ninyi wise kikniramnyi kwemdina uram ab ara kekebminyei. Erda, kanci busul kuboka Er Imtamnyi Uram tuba-tuba teneibdeboka kununkwandum.

⁸Sun olahraga don nang ara olahraga tuba-tuba doramingnyi uca, sun nong mikib kurande. Ato kuboka nunda dib tenen nang kuramib to ara neiktoto kunub. Nunci Er Imtamnyi Uram asi tuba-tuba teneibdeboka kunuramibyi uca, nun dib tenen kanya ara mikib kubkwansurur. Ura, olahraga kimna ara teleb dinyi kurur bok, Er Imtamnyi Uram asi tuba-tuba kununa ara iya teleb dinyi kurur. Ara, Er Imtamnyi Uram asi tuba-tuba kunuramibyi ura, ukuryok talak ababyi teleb akwe kuramibyi ani, aminda diamibyi talak ababyi teleb akwe kubkwamib.

⁹A ebne uram ara dib en uram asi ebman ati, ninyi nirya aryi a uram asi dib teneboka dorona teleb.

¹⁰A deyok aryi a uram asi teneibibiryi, nunci tanglona kum uca Er Imtamnyi arungsurur to asi kununub. Ara, “Er Imtamnyi diboka kam kurutnyi biryi teleb kubdeibkwansir,” tenen nunci busul kuboka, “Er Imtamnyi Uram diboka kunubtibyi,” tenen wa ina weik iramib. Nun Nai Imtamnyi bira ninyi nirya ati, “Lebtinyi,” tenerur ci, Erci nunda sun Ersi dib tenen nang asi yuma udikum deiboka lemsurur.

¹¹Ni kwit Timotius, kanci a ebdeibmakin wenena uram nirya asi lak eboka etererandum.

¹²Ninyi tentok ababyi kansi ina ngilikicei. Ninyi tentok ababyi kanti, “Kamnyi bica,” tenen kan eterebkwandim uram bai donokcei. Erda, kan teleb ukuraminyi to asing eibkingiryi, sunci, “Nunbabyi miliboka teleb dinyi ukubkwayeb,” ena teleb. Ati, kanci uram ton ebkwamaminyi ura, teleb uram akwe ebkwandum. Tonda, kanci sun yuk nang asi teleb akwe kubdeibkwandum. Tonda, kanci busul kuboka Er Imtamnyi biryi arungsurur to kunubkwandum. Tonda kanci utotota malyi tenen dinyi bai donokoka teleb dinyi akwe teneibde ukunkwandum.

¹³Ni kum yanmanyi talak ara kanci ato kunkwandum. Sun dib tenen nang aryi kekeraminyi ura, Timotius kanda tanglona kum kuboka Er Imtamnyi Uram minob kerek sekamnyi uram asi nukmurubde barandum. Kanci sun dib tenen nang asi tuba-tuba yan memeramin ci, “Ato-ato kuna teleb,” eboka etererandum.

¹⁴Er Imtamnyi biryi Er uram ebdeibmou to, sun dib tenen nang kalingna nang aryi ebmuruboka Timotius kanti, “Er Imtamnyi wa ibkwandum,” ebmakei. A ebmurubmakei uram ara kanci luba kibminyei. Tonda, sun kalingna nang aryi kanti, “Er Imtamnyi biryi Er mikib karebkwande,” tenebmai ci, sun taruk kan deici deibdongoboka kisal karebmakei dinyi ara luba kibminyei. Ati, kanci, “Er Imtamnyi biryi Er mikib karebnou,” tenen Er Imtamnyi biryi takubdeibnou wa asi diboka kunubkwandum.

¹⁵Kanci a nirya bita dibniliboka busul kuboka a ebmanto nirya kunubkwandum. Ba, ninyi nirya aryi kanti, “Er Imtamnyi wa telebto irmilirur,” tenen ato bikwanking ati kubkwandum.

¹⁶Ni kwit Timotius, kanci, “Teleb dinyi akwe kubkwan,” tenen kandamnyi kalikdarum. Tonda, “Dib en uram akwe eterebkwan,” tenen kan silalum kalikdarum. Tanglona kum uca ato kuraminyi ura, kanci kandamnyi ababyi lebdandoka kan eterena uram asi kekebkwamingnyi nang ababyi lebdeibkwandim.