Read Futuna-Aniwa 1Timotius 5 Bible Online

1Timotius 5 - Futuna-Aniwa bible

1Timotius 5

¹Timotius, kanci sun wise nang asi wenenmaminyi ura, yu uram eboka kerebminyei. Erda kanci, “Ni naiyabwe,” tenen namin uram aryi eboka abmin ci, yan memebkwandum. Tonda, sun kam nang ati kanci neiktoto, “Ni kwityabwe,” tenen namin uram eboka yan memebkwandum.

²Ba, sun wise nerabwe ara kanci, “Ni kwinyabwe,” tenebmin ci, yan memebkwandum. Tonda, sun kam nerabwe ara, “Ni malnerabwe,” tenen namin uram aryi eboka abmin ci, yan memebkwandum. Ara, “Kerebmanin kum to kubniryi, Er Imtamnyi biryi teleb tenen dinyi akwe kunubkwan,” teneramin cok, yan memebkwandum.

³Sun sulyi nerabwe ati, “Ni kwinyabwe,” tenebmin ci, sun ataranci tok kareboka dibnilibkwandum. Sun diboka ataranci nerabwe ara ersi kalikoka kubmanto mi iya ton kum nerabwe ati ato ebman.

⁴Bok, sun mabwe nermabwe ab tonkwa kuramingnyi sulyi nerabwe ara dibnilibminyei. Erda, sun sulyi nerabwe deiamingnyi mabwe nermabwe ara sun kwinyabwe wise dangnyi ura, sunci sun kwinyabwe asi dibnilibkwanung. Tonda, sun sulyi nerabwe mabwe aryi mabwe wise dangnyi ura, sunci sun tat bisi dibnilibkwanung. Kanda Timotius biryi sunsi ato etereboka, “Sunci sun kwinyabwe sun tatyabwe sun ataranci tok kareboka diboka dibnilibdarur,” eboka eterebdum. Ebmin ba, kanci ato eboka eterebdum. “‘Nun mitik talak ara nun kwinyabwe aryi nunsi dirniliransei ati, ukuryok ara sun wise sirya danmang ura, nunci sunsi dibnilibkwayeb,’ tenebkwandarur. Ato kubmunyi uca, Er Imtamnyi biryi sunsi, ‘Ei ni mabwe,’ tenebkwansurur.” Ato eboka eterebkwandum.

⁵Ba, sun kalikoka dibnilibmanto mabwe iya ton kum kuramingnyi sulyi nerabwe ara, “Unanyi biryi nisi kalikwanir do?” tenen Er Imtamnyi bikwe dibde bunung. Ato kun nerabwe ara, “Er Imtamnyi biryi yina karebsute,” tenen kitingtam lukunda nirya molonung. Ati, sun ato kuramingnyi sulyi nerabwe ara kanci, “Ni kwinyabwe,” tenen sun ataranci tok karebkwandum.

⁶Bok, sun Er Imtamnyi bisi dibde buna kum sulyi nerabwe ara sunci, “Ni kanya teleb teneranyi tok akwe kubkwan,” teneraming. Sun ato kuramingnyi sulyi nerabwe ara tukwetam dinyi akwe teneraming ati, malyi kuraming. Sun nong ara kam tuba kuramingnyi bok, sun kanya ara sirya diaminyi nerabwe kuramingiryi.

⁷Ati, Timotius, kanci sunsi ato eboka wenenkwandum. “Malyi dinyi tentok ababyi ukubmunyei. Erda, kerebmasin kum to kuboka teleb dinyi akwe kubdarur,” eboka wenenkwandum.

⁸Bok, unanyi-unaner aryi dib tenen nang ner sal sun dam kuramingnyi nang asi kum dirniliramingnyi nang ara malyi dinyi kuramingiryi. Tonda, unanyi-unaner aryi dib tenen ner sal sun mining ai ninyi asi kum dibnilibmingnyi ura, anyi kum a ner kum ara iya malyi kunung. Sun ato kun nang ara nun taleramib dib en uram asi bai donongnun ci, kunung ati ebman. Sun Er Imtamnyi Uram kum bingdamingnyi nang ara malyi kunung cok, sun mining mabwe ai ninyi asi dirnilinung. Bok, dib tenen nang aryi sun mining mabwe nermabwe asi kum dibnilibingyi nang ara bisibkaboka iya malyito dinyi kunung ci.

⁹Ura, “Sulyi nerabwe asi yina kareboka dibnilibkwayeb,” tenen sun si yuk-yuk kerek sengna teleb. Kerek sekwamamunyi ura, sulyi nerabwe ena atikwe sun si nirya kerek sekmunyei. Erda, sun ninyi tentok doamingnyi nerabwe asi sun kwalina ara enam puluh baryi sirya kwaliamingnyi nerabwe akwe kerek sekwandarur.

¹⁰Ara, ninyi nirya aryi, “A ner ara teleb dinyi kun akwe kurur,” ebingnyi ura, sun ato kuramingnyi nerabwe asi si sekoka abmun ci, dirnilina teleb. Ara, sun mabwe nermabwe diboka kalikoka nerdeiramingnyi nerabwe ab, sun yuk nang asi du dongoramingnyi nerabwe ab, sun luknubdob kanya boboka sun dib tenen nang yuk nang asi dirniliramingnyi nerabwe ab, sun mambul kun nang asi dirniliramingnyi nerabwe ab, sun teleb dinyi yuk-yuk diboka kuramingnyi nerabwe ab asi si sekoka dibnilibkwandarur. Sun ato kuramingnyi sulyi nerabwe ara sunsi kalingna mabwe kum kuramingnyi asi sun dib tenen nang aryi yina kareboka dibnilibkwanung.

¹¹Sun ninyi dobmanto sulyi nerabwe ara si dongoryangangnyi ababyi si kerek sengna mem. Sun ninyi dobmanto nerabwe ara ninyi ur dobkwanung. Ninyi kum dobmangnyi ura, sunci, “Ninyi kum dobkwan ati, nira nun Du Yesus bikwa milibkwan,” eamingiryok, tola ati ebloboka aminda ara sun kanya danguci ura, “Ninyi dobnute,” tenebkwanung ati si kerek sengna mem.

¹²A nerabwe ara, “Ninyi kum dobkwan,” eboka katabum uram ebmai ani, aminda aryi sun uram ebloboka sal doramingiryi deyok aryi Er Imtamnyi biryi karebkwande wenen dinyi dobdobkwaming.

¹³Tonda, ninyi dobmanto sulyi nerabwe ara ninyi kum dobingnyi ura, ninyi ai yubwa talyi wekirikingnyei. Ato kubkirikoka sunci talyi uram ebingnyei, tonda yuk nang ati talakdobingnyei. Sulyi nerabwe ara ai yubwa talyi wekirikingiryi, sunci sun yuk nang deyok asi dodeibdandoka, “Ato-ato kubdarur,” ebingnyei. Tonda, ebman kum dinyi asi ebkirikingnyei.

¹⁴A deyok aryi, niryi sun ninyi dobmanto sulyi nerabwe ati, “Ninyi ur dobkwanung,” ebman. Ura, ninyi doboka mabwe deibting ura, sunci sun mining mabwe silib kalingna teleb. Ato kubingnyi uca, sun nunti, “Malyi uram ebtibyi,” tenesunung nang aryi tatab-tatab kum ebsiting.

¹⁵Ton sulyi nerabwe ara dib uram asi deibloboka isa sienyi Iblis uram asi milibmai ci, sirya wanikminikdanmai.

¹⁶Sun dib tenen nerabwe ati ato ebdeibkwan. Sun duner kum, sun weitner kum asi ara sulyi ner kuranci ura, er ai ninyi aryi kwaning kareboka dibnilibkwanung. “Sun dib tenen nang yuk nang aryi ni kwin kum, ni duner kum, ni weitner kum asi dirnilina teleb,” teneboka ikin bobingnyei. Erda, er mining ai ninyi aryi dibnilibkwanung. Ba, sun dib tenen nang aryi dibnilibkwamingnyi sulyi nerabwe ara sun dibnilibmanto nang iya ton kum kuramingnyi sulyi nerabwe asi sun dib tenen nang aryi dibnilibkwanung.

¹⁷Sun dib tenen nang asi busul kuboka kalingnamingnyi nang ati sun dib tenen nang aryi, “Nun naiyabwe,” tenen dengna bitinyi dinyi tabakoka karebkwanung. Sun ninyi kalingna nang kankan asi dib uram etereraming nang ati adikum ebman.

¹⁸Er Imtamnyi Uram aryi ato eboka eteresurur. “Bisam sapi ara gandum du yan yanisitaboka kala longnande bisam ara gandum du ur yibkwandur. Er ungar ara aling kolo aryi tunirdeirin kum. A sapi ara wa irande ati, ur yibkwandur.” (Ulangan 25:4) Tonda, “Wa inanyi bira dengna kikib dorona teleb.” Ato kuboka sun dib tenen nang asi busul kuboka kalingnamingnyi nang aryi dengna kikib doronkwanung ati ebman.

¹⁹Ninyi tentok aryi kalingnanyi bisi tatab-tatab ebci asi kanci dib tenebminyei. Ninyi bitinyi kum winiryi kum “Dib,” eboka tatab-tatab ebingnyi uca, er deyok asi lilibkwandum.

²⁰Sun malyi kubmangnyi dinyi asi kum taklobmangnyi ura, kanci dib tenen nang ab dib tenen nang kalingna nang ababyi wenebkwandum. Ara, sun dib tenen nang bulubmangnyi urasintam aryi tikeiboka kanci a nang asi wenebkwandum. Sun dib tenen nang nirya aryi ilil kuboka, “Malyi dinyi nirya asi bai donokwan,” tenebkwaming ati ato kubkwandum.

²¹Kanda Timotius biryi a ebdeibman uram asi diboka kununa teleb. Nun Nai Imtamnyi ab nun Du Kristus Yesus ab aryi a ebdeibmakin uram asi kekebmaniring. Tonda, sun Imtamnyi Uram eryuryangan nang ababyi kekebmaning. Ati, kanci, “Er Imtamnyi biryi wenebnicei,” tenen a ebdeibmakin uram taklobminyei. Ati, kanci, “Ni kwit bica,” tenen kanya akwe boboka teleb kubdeibminyei. Tonda, kanci, “Malinyi bica,” tenen kanya akwe boboka wenebminyei. Erda, kanci, “Ninyi urasin kum wibkwan,” tenen kanya bobmin ci, sun dib tenen nang asi diboka kalikwandum.

²²“Sun dib tenen nang asi kaliktinyi,” ebmangnyi nang asi minola tikeibmunyei. Kanci bingna kum dinyi kubmin cok, malinyi bisi tikeibmunyi ura, ninyi aryi kanda ersi tikeibmaminyi bibabyi kerebkingnyei tenen ato ebman. Kanci tanglona kum uca, malyi tenen dinyi nirya bai donokmin ci, teleb dinyi akwe kununa teleb.

²³Ni kwit Timotius, kanda me sirik dem yina ara mem. Erda anggur du yung me ton mitikanun tabakdongobmin ci, yibkwandum. Ba, kan mundu u yirankir dinyi ab yuk yun talerankir dinyi ab asi kwetebkwankir ati anggur du yung me mitikanun tabakdongoboka yina teleb.

²⁴Sun malyi kun nang ati uram ton ebkwinkin. Ton nang malyi kun dinyi ara minola lak kubmar. Sun malyi deyok lilin nang aryi a nang deyok lilibmang kum uca, sun malyi kun dinyi laktoto kurur. Ura, yuk nang malyi kun dinyi ara aminda aryi lak kubkwande. Ara, sun malyi deyok lilin nang aryi sirya lilibmang ani, a nang malyi deyok lak kibwande.

²⁵Ato kuboka, ninyi aryi teleb kun nang neiktoto kurur. Ton nang aryi teleb kuramingnyi dinyi ara ninyi nirya aryi bingnaming. Ba, sun yuk nang aryi teleb kuramingnyi dinyi ara ninyi aminda aryi lak kubkwande. Lak kum kuranci teleb kun dinyi ababyi malyi kun dinyi ababyi iya inibmanto kum kurur. Erda aminda lak kibkwande.