Read Futuna-Aniwa 1Timotius 6 Bible Online

1Timotius 6 - Futuna-Aniwa bible

1Timotius 6

¹Sun ikin wa bon nang kankan asi dib tenebingnyi nang ara sun wa arungdeirisingnyi nang asi ina ngilina mem. Erda, sunci sun arungdeirisina nang yuk-yuk asi, “Nun nai,” tenen er uram kunubkwanung. Ba, “Nun arungdeirisinanyi bisi ina ngilikeibyi ura, sun dib tenena kum nang aryi Er Imtamnyi si ina ngilikingnyei,” tenebkwanung. Tonda, sun ikin wa bon nang ara, “Sun dib tenena kum nang aryi dib eterena uram ati malyi uram ebingnyei,” tenen sun arungdeirisina nang uram asi diboka kekebkwanung.

²Sun arungdeirisinanyi bibabyi nun Du Kristus Yesus milinanyi kuranci ura, sun er uram kekeboka kunubde wa iramingnyi nang aryi ersi ina ngilikingnyei. Ara, “Nun arungdeirisinanyi bibabyi nuntonyi kurur ati, nunci erti, ‘Nun nai,’ tenebibyei,” ebingnyei. Erda, sunci boukwe weik kiboka, “Nun nai bibabyi Kristus milinanyi kurur ati, nunci kilkil kuboka er wa asi ibmilibkwayeb,” tenena teleb. Dib tenenanyi wa irmilinung ati, sunci busul dinyi tabakoka wa ibkwanung. A ebne uram ara Timotius kanci weneboka eterebkwandum.

³Ura, unanyi-unaner aryi ninyi etereramingiryi, nun Du Kristus Yesus biryi eteresurur Teleb Uram to kum etereramingnyi ura, anyi-aner ara wingdana akwe kurur. Unanyi-unaner aryi nun dib teneramib eterena uram asi deibloboka yuk uram asi eterebci ura, walwal akwe kurur. Sun ato kuramingnyi nang ara, “Yuk nang ab talyi deyok asi liliboka lulurdana uram ebdatibyi,” tenen malyi kuraming. Lulurdana uram etereramingnyi uca, sun uram kekebmangnyi nang ara sun kanya dam yu bobdandoka sun mamun lulurdaraming. Tonda, tonyi biryi yuknyi bisi, “Malinyi,” tuba-tuba tenerdaraming. Tonda, talyi ati, “Malinyi,” ebdandoka tatab-tatab ebdaraming.

⁵A nang ara lulurdana akwe kuramingiryi, iya malyi kanya boboka tola uram akwe taleraming. A nang ara, “Er Imtamnyi bisi milinub,” ebingiryok, “Ninyi aryi co bok ab yuk bona bon dinyi ab ilinto ton dekoka karebsiting,” teneraming.

⁶Er Imtamnyi biryi teleb tenesurur to diboka kunubibyi ura, Er Imtamnyi biryi nunsi iya teleb dinyi ara ninyi kanya kilkil kurdeirin dinyi karesurur. Ato ebman asi tukwetam bona asi kum ebman.

⁷Nun kwinyabwe aryi nunsi yuk-yuk asi mundu boboka deibmasei ura, nunda nong dem deibmasei ara bona bon dinyi utotoa ara ton kum boyanmoubwe. Ani, aminda dibkwamibyi talak ababyi neiktoto kubkwamib. Nun dibmabyi ura, tukwetam bona utotoa ara ton kum bobinkwayeb.

⁸A deyok aryi nunci, “Bona labtalebtibyi,” tenebibyei. Erda, nun ataransici tok yina ab ongon aling ab sirya nun taruk dam kuransici ura, nunci, “Nun kanya kilkil kubmasir,” tenena teleb.

⁹Nunda ato tenebkwamab bok, sun “Bona ilinto labtalebtinyi,” tenebmangnyi nang ara ola sakwaming. Ara, “Bona bon dinyi labtalebtinyi,” tenena akwe kuramingiryi, bikdob dinyi ara kanya kum teneirdena kum uca, sunci sundamnyi iya mambul dinyi boyankwaming.

¹⁰“Co bok labtalebtinyi,” tenena deyok aryi, malyi kun dinyi yuk dinyi ilinto anarur. Ton ninyi mikbaryi nang ara, “Co bok labtalebtinyi,” tenebmai uca, dib en uram asi deibloboka wanikminikdanmai. Ura, sunci sundamnyi mambul weik dinyi bobminikdanmai.

¹¹Sun yuk ara ato kunung bok, Timotius kan Er Imtamnyi bisi milinanyi kurum ati, kanci a nang aryi malyi kuraming to ara ukubminyei. Erda, kanci, “Malyi kun dinyi bai donokwan,” tenebmin ci, busul kuboka Er Imtamnyi kanya teleb kurdeirin dinyi akwe kunubdum. Tonda, Er Imtamnyi biryi aruksou uram asi kunubdum. Tonda, kanci nun Du Yesus bisi dib teneramin ci, sun yuk nang asi boukwe kimnandum. Tonda, mambul dinyi kan dam yangakici ababyi, kanci katabum kanya boboka abmin ci, tanglona kum kubkwandum. Tonda, kanci namin kanya tuba-tuba bonkwandum.

¹²Ati, kanci mikib weik kuboka nun dib tenenub uram asi diboka talebnurubdobkwandum. Olahraga donanyi bira, “Piala kirdeirin moyok karebniting,” tenen mikib kuboka cung barande to, kanci, “Er Imtamnyi biryi iya kam kun dinyi karebnute,” tenen Er Imtamnyi Uram asi mikib kuboka kunubkwandum. Ato kuraminyi ura, nun Nai Imtamnyi biryi kansi ebdeibmakou to, kanci iya kam kun dinyi dobdobkwandim. Ara, ninyi ilinto kekenmai bok, Timotius kanci, “Nira Kristus milibkwan,” eboka lak ebmumwe ba, Er Imtamnyi biryi kansi, “Iya kam kun dinyi karebkwankin,” ebdeibmakou. Ati, ukuryok kanci, “Er Imtamnyi ab tonkwa iya kuna teleb,” tenen dib en uram asi diboka talebnurubdobkwandum.

¹³Ni kwit Timotius, kanci nun Nai Imtamnyi biryi arukdeibmasou uram asi diboka teneibde kunuboka abmin ci, malyi kun dinyi nirya asi bai donokwandum. Kerebmakin kum to kuboka kuraminyi ba, nun Du Kristus Yesus tamuryankwande. Nun Nai Imtamnyi bira ninyi ton, bisam ton, yuk dinyi nirya asi, kam kurdeirisurutnyi biryi ni ebdeibmakin uram sirya kekebmanir ati, kanci, “Er Imtamnyi biryi wenebnicei,” tenen Er uram asi diboka kekebdum. Tonda, nun Du Kristus Yesus bira Pontius Pilatus urasintam tikmou ci, dib en uram asi lak ebmunyi bibabyi kekebmanir. Ati, kanci, “Nibabyi neiktoto katabum eboka abniryi, dib en uram asi talebnurubkwan,” tenen ni ebdeibmakin uram kunubkwandim.

¹⁵Nun Du Kristus Yesus tamuryankwande uki tum ara nun Nai Imtamnyi biryi teleb tenebci tum ara kunubkwande. Ara, nun Nai Imtamnyi biryi karebsici ura, nun Du Yesus tamuryankwande. Utotoa nirya ara Ersi kum atarande bok, Nun Nai bira teleb akwe kurutnyi kurur. Nun Nai Imtamnyi bira iya erebdob sienyi kurur ati, sun weik sien nang nirya ara Er amwetam kun nang ato kunung. Erda, Iya Erebdobnyi kurur ati, sun erebdob nang nirya ara luknubdob nang ato kunung.

¹⁶Er Imtamnyi bikwa iya dibman kumnyi kurur. Er kurur ai ara milil weik berengna dam kurur. Ninyi tentok ababyi a berengna asi asing kum eirinung. Akai ara iya milil ai kurur ati, ninyi asing aryi eibman kum. Nun Nai Imtamnyi si weik ena teleb. Erda iya mikibnyi kurur ati, ninyi aryi Er si tuba-tuba weik ena teleb. Amin.

¹⁷Timotius, kanci sun tukwetam bona ilinto boramingnyi nang asi ato eboka wenebkwandum. “Sunci wingdana mem. Tukwetam bona talena ara tiya talen dinyi akwe kurur. Arub aryi taleramibyi bona ara ambutum ara wanikminiksicei. A deyok aryi, sunci, ‘Tukwetam bona talenub aryi teleb akwe kubkwamib,’ tenebmunyei. Erda, sunci Er Imtamnyi bisi dibde buna teleb. Ara, ‘Nun Nai Imtamnyi bira utotoa nirya langdeiboka karesurutnyi biryi nun kanya teleb kubkwansir,’ tenen Ersi dibde bukdarur.” Timotius, kanci a nang asi ato eboka wenebdum.

¹⁸Ebmin cok, kanci ton ato eboka eterebkwandum. Sun bona bon nang ara, “Busul kuboka co bok ilinto tabakoka labtalebkwan,” tenebmunyei. Erda, sunci, “Teleb dinyi asi langdeiboka ukubkwan,” tenen busul kubdarur. Sun bona bon nang ara te ol nang ato kuboka abmun ci, sun ataranci nang asi muna langdeiboka karebokdarur.

¹⁹Ba, sunci ato kuramingnyi ura, Er Imtamnyi biryi sunsi aminda aryi iya kam bukeibkwande. Ati, sun bona bon nang aryi, “Nun bona ara talyi karebibyei,” tenebingnyei. Erda, sunci, “Er Imtamnyi biryi nunsi iya teleb kubdeibkwansir,” tenen sun ataranci nang asi diboka teleb kurdeirina teleb.

²⁰Timotius, Nun Nai Imtamnyi biryi kansi ebdeibmakou to ara kanci diboka kalikwandum. Tola ati eterena uram asi kanci bai donokwandum. Ninyi aryi a uram ati, “Bikdob uram,” eraming asi, a uram ara tola uram akwe kurur ati ebman. A uram ara talyi uram ton lulurdana uram akwe kurur ati, kanci bai donokwandum.

²¹Ninyi ton nang ara a tola uram dib tenebmai ci, “Bikdob uram talebmab,” eboka lak ebmai ura, sunci Er Imtamnyi dib en uram ara deiblobmai. Timotius, Nun Nai Imtamnyi biryi kan ab kan ab tonkwa kuboka dib teneraming nang ab asi, “Ni mabwe,” tenen sunsi teleb kurdeirisina teleb. Ni Paulus biryi a kunum kerek sekeibmakin.