Read Futuna-Aniwa 2Timotius 1 Bible Online

2Timotius 1 - Futuna-Aniwa bible

2Timotius 1

¹Teleb ni kwit Timotius. Ni Paulus biryi kansi boukwe kuboka, “Ni mi kobdob atonyi,” tenekunun ci, kerek sengna ton kerek sekeibmakin. Ni Paulus bira nun Du Kristus Yesus biryi bokdonoknounyi kunun ati ebman. Nun Du biryi nisi bokdonoknou uca, niryi Teleb Uram lak eboka eterebde banun. Ara, nun Nai Imtamnyi biryi niti teleb tenebnou to kunuboka nun Du biryi nisi nabsou uca, nira Er bokdonoknounyi to kuboka Teleb Uram eterebde banun. Nun Nai Imtamnyi biryi nunsi ato eboka ebdeibsou, “Sunda Ni Mi Kristus Yesus ab tonkwa antanibmunyi ura, Niryi sunsi iya kam bukeibkwansin,” ebdeibsou. Ati, niryi nun Nai Imtamnyi biryi ebdeibmasou to lak eboka eterenun ara iya kam kurdeirisin uram Teleb Uram asi eterebde banun. Ni kwit Timotius, nun Nai Imtamnyi ab nun Du Kristus Yesus ab aryi kansi kisal dangkina teleb. Tonda, nun Nai ab nun Du ab aryi kansi bico tenekina teleb. Tonda, nun Nai ab nun Du ab aryi antanibdeiboka kan kanya asi namin kurdeirikina teleb.

³Ni kwit Timotius, kanda nun Du Yesus bisi diboka dib tenerandim ati, niryi nun Nai Imtamnyi bisi, “Ei nun Nai,” enun. Ati, niryi yuk nang ababyi molormilinun ci, niryi kanbabyi tuba-tuba teneibde kukunun cok, tanglona kum uca molormilirkunun. Molormilirkunun ba, niryi nun Nai Imtamnyi bisi, “Ei ni Nai,” enun. Minob uca ni aibweyabwe aryi nun Nai Imtamnyi biryi takubdeibsou uram yuk-yuk asi kunuramnyi to, nibabyi neiktoto nun Nai Imtamnyi biryi takubdeibsou to kununun. Ati, nibabyi, “Malyi kun dinyi nirya asi bai donokmase,” tenen bingdanun ci, niryi nun Nai bisi milinun.

⁴Ni kwit Timotius, niryi nun Nai Imtamnyi bisi, “Ei nun Nai,” enun cok, niryi kanti, “Ni ab tonkwa tubto ebdatinimyi,” tenen tuba-tuba teneirirankin. Minob kan ab ni ab yuk-yuk bokdankwamanumwe talak aryi kanci, “Yuk-yuk bokdanimnyei,” tenen engena weik engebmumwe ara ni kanya tuba teneirirankin. Ura, “Ni ab kan ab tubto ebdatinimnyi uca, ni kanya ara kilkil weik kubkwanir,” tenekunun.

⁵Kanda nun Nai Imtamnyi bisi diboka dib tenerum dinyi ara ni tuba kanya teneirikunun ci, niryi a deyok aryi, nun Nai Imtamnyi bisi, “Ei ni Nai,” enun. Kan tat Lois ab, kan kwin Eunike ab aryi nun Du Kristus bisi yuma aryi dib tenerandei to, Timotius kanbabyi neiktoto nun Du bisi diboka dib tenenanyi kurum ara ni diboka bingkunun ati ebman.

⁶Kanda nun Du bisi dib tenerumnyi kurum deyok aryi, niryi kansi uram ton takubdeibkwinkin. Nun Nai Imtamnyi biryi kanti, “Dib en uram eterebkwandur,” tenen Er mikib karen dinyi asi kansi karebkou ati, kanci luba kibminyei. Ara, minob uca ni Paulus taruk aryi kan deici deibdongobmakise ba, ni taruk biriman aryi nun Nai Imtamnyi biryi Er mikib kansi karebkou asi diboka kanya teneibdenkwandum. Kanya teneibdeminyi ura, kanci ato tenena teleb. “Nun Nai biryi Er mikib aryi nisi karebnou ati, niryi busul kubtabakoka Erci takubdeibnou to kunubkwan,” teneboka abmin ci, kanci busul kuboka Er Imtamnyi biryi takubdeibkou to kunubdum.

⁷Ati, nun Nai Imtamnyi biryi Er Kanya Roh Kudus asi nun kanya dam asi karebdongobsou ara, nunsi ilil kusin kanya kum dongobmasou ati ebman. Erda, Er Imtamnyi Kanya Roh Kudus mikib ara nun kanya dam kusurur uca, nunci ilil kum asa aryi nun Nai biryi takubdeibsou to kununub. Tonda, Roh Kudus aryi nun kanya dam kusurur uca, nunci yuk nang asi boukwe weik kimnub. Tonda, Roh Kudus aryi nun kanya dam kusurur uca, nunci, “Malyi kun dinyi kunubibyei,” tenen nundamnyi kalingdanub.

⁸A deyok aryi, Timotius kanda nun Du Kristus Yesus uram dib en uram ati alyi kukina kum uca lak eterebkwandum. Ba, tonda ni Paulus bira nun Du biryi dib en uram asi lak etereranse deyok aryi, ninyi aryi nisi tabwe deboka abnei ci, kalingnunungnyi deyok ababyi, “Paulus bira ninyi aryi tabwe debinyi bica,” teneboka kan alyi kukina mem. Erda, kanbabyi Er Imtamnyi mikib dobdobmumwe deici aryi ilil kum asa aryi Teleb Uram asi lak eterebkwandum. Ati, niryi ilil asa kum kuboka Teleb Uram eterenun to, kanbabyi neiktoto, “Ninyi aryi mambul kubdeibningnyi ababyi, niryi Teleb Uram eterebkwan,” tenen kununa teleb.

⁹Nun Nai Imtamnyi biryi nunsi sirya lebdeibsou. Ara, nunda nun malyi kun dinyi takloboka Er dam kun nang kubkwamoubwe ati, Erci nunsi nabsou. Nun Nai biryi nunda malyi kuramoubwe nang asi leboka nabsou. Nunda malyi nang kuramoubwe ati, Erci nunsi lebdeibsou ara nun teleb kuramoubwe deici aryi Erci nunsi kum nabsou. Erda, nun Nai biryi nunti, “Lebkwan,” teneransou deici aryi Erci nunsi wibdeibsou. Ara, imtam tukwetam nirya asi kum kikniamuryok, nun Nai biryi nunti, “Ni Mi Kristus Yesus biriman aryi Niryi kisal dakwan,” teneransou.

¹⁰Minob uca, “Teleb kubdeibkwan,” teneransou ani, nun Nai biryi Erci nunti teleb tenesina asi ukuryok lak kibsou. Ara, nun Nai Imtamnyi biryi, “Ni Mi biriman aryi lebkwan,” tenen Erci nun Du Kristus Yesus bisi tukwetam bokwetebmasou. Nun Du bisi tukwetam bokwetebmasou biriman aryi nun Nai biryi Er minob uca, “Teleb kubdeibkwan,” teneansou kanya asi lak kibdeibsou ati ebman. Nun Du ninyi Lemsurutnyi bira tukwetam yuryanmou ura, Erci ninyi dina asi muna kibdongobmuryok, iya kam burdeirisina asi lak kibdeibsou. Ara, nun Du biryi Erdamnyi karebdanmou ci, dibmou ani, kam bukokmou deyok aryi, nunda dib tenen nang ara iya kum dibkwamib. Erda, nunda nun Nai Imtamnyi ab tonkwa kubibiryi, iya kam kubkwayeb. Nun Du bira tukwetam yuryanmou ci, Erci Teleb Uram biriman aryi iya kam burdeirisina asi nunti lak kibdeibsou ati ebman.

¹¹Ura, a Teleb Uram ati nun Du biryi nisi, “Lak eterebdum,” eboka takubdeibnou. Ati, niryi a Teleb Uram ermuruna ninyi nirya urasintam aryi lak eterebde binkwan ati, nun Du biryi ni Paulus bisi bokdonoknou.

¹²Teleb Uram ebmuruboka lak eterenun deyok aryi, ninyi aryi nisi malyi kurdeiriraning. Malyi kurdeiriraning bok, ni kanya ara kankana kum kuranir. Erda, niryi, “Nun Nai ab nun Du ab aryi erdeirisiringnyi uram asi tuba-tuba kunuranding ati nisi kum taklobkwaniring,” tenen bingnun. Nun Nai bira iya mikibnyi kurur ati, Erci miliranir ba, niryi lak eterenun Teleb Uram asi diboka kalikwante ati ebman. Ara, nun Nai biryi kalingdur uca, Teleb Uram asi tola uram aryi bisik sekmanto kum kubkwande. Teleb Uram ara bisik sekmanto kum kubkwande ani, sirya kobdob uki tum ara nun Du tamuryankwande uki tum berekwande.

¹³Ni kwit Timotius, ni Paulus biryi kansi eterebmakise dib en uram asi kanci kalingnamin ci, kanci niryi eterebmakise uram ati, “Dib en uram kurur ati nibabyi neik uram akwe eterebkwan,” teneboka eterenkwandum. Ati, kanda nun Du ab tonkwa antanirdana deici aryi, kanci nun Nai Imtamnyi bisi dib teneboka ninyi asi boukwe weik kuramin ci, a ebdeibmakin dib en uram asi diboka eterenkwandum.

¹⁴Er Imtamnyi Kanya Roh Kudus ara nun kanya dam kusurur ati kanci Roh Kudus aryi karebkou mikib deici aryi katabum eboka tingnamin ci, Er Imtamnyi biryi ebdeibkou dib en uram asi diboka kalingkwandum. Ati, “Ninyi aryi dib en uram asi dangubminikingnyei,” tenen kanci dib en uram asi diboka kalikdum.

¹⁵Ni kwit Timotius, sun ni ab tonkwa Asia mutuk aryi kuramoubwe nang ilinto ara ni taklobnei ara kan sirya bikmarim. Figelus babyi, Hermogenes babyi, nisi taklobnirei ara kan bikmarim. Ninyi aryi nisi tabwe debmanei ani, nisi iya kalingnunung deyok aryi, sun ni ab tonkwa kuramoubwe nang ara sun ilil aryi nisi taklobnei.

¹⁶A nang nirya aryi nisi taklobnei bok, nun kwit Onesiforus bira nisi kum taklobnou. Ati, nun kwit biryi niti, “Besi tabwe debinyi dirbana ati ni ilil,” kum teneranou. Erda, erci tabwe debsei nang dongon ai yandoka nira tabwe debneinyi bisi liki mikbaryi diryanou. Diryanou ati, ni kanya ara kilkil weik kuranir. Ati, nun kwit Onesiforus biryi nisi ato kuboka teleb kubdeibnou deyok aryi, nun Du Yesus biryi bico tenen nun kwit Onesiforus er mabwe silib asi teleb kimdeirina teleb.

¹⁷Ati, nun kwit bira Roma atei sirya yanmou ura, erci ilil kuna kum uca, “Ni kwit Paulus bisi dantam aryi kalingnung do?” tenen nisi ingkiringdoryanou. Nun kwit biryi busul kuboka Roma atei asi yibinkirikoka ingkiringdanou ani, nisi eibmanou.

¹⁸Nun Du Yesus tamuryankwande uki tum berekci ura, nun Du biryi bico tenen nun kwit Onesiforus bisi teleb kurdeirina teleb. Onesiforus biryi nisi teleb kubdeibnou ati ato ebman. Ura, minob ura nun kwit bira Efesus atei tuba kuramwe ababyi, erci busul weik kuboka ninyi tuba-tuba dirniliramwe ara kan sirya bikmarim.