Read Futuna-Aniwa 2Timotius 2 Bible Online

2Timotius 2 - Futuna-Aniwa bible

2Timotius 2

¹Ni kwit Timotius, ni boukwe weik kukunun mi. Kekebnurum. Nun Du Kristus Yesus biryi kansi teleb kubdeiboka mikib karekurur deici aryi kanci, “Tabakdongoboka teleb kubdeibnute,” tenen katabum eboka kubdum. Ato kuboka kanci nun Du biryi takubdeibkou wa asi kunuboka ibdum.

²Minob ura ninyi ilinto kekeramnyi kankan aryi ni Paulus biryi Teleb Uram lak etereransise. Timotius kanbabyi kekeramumwe. Ba, ninyi ilinto aryi ni etereranse uram ati, “Dib en uram aca,” eboka lak eramnyi ba, kanci ni eterena uram asi kekeramumwe. Ura, kanci ni eterena uram kekeramumwe to yuk nang asi eterebdum. Ati, kanci ni eterena uram asi ermuruna tanglona kum uca dib tenen nang yuk nang asi eterena ati, diboka bingdoramingnyi nang asi eterebdum. Ara, “A nang ara ermuruna yuk nang asi dib en uram eterebting,” tenen kanci a nang asi eterebdum.

³Ni Paulus bira nun Du Kristus bisi wa irmilinunyi kunun ati, ninyi aryi nisi mambul weik kimdeirinunung. Ura, kanda Timotius bibabyi nun Du bisi wa irmilirandimnyi kurum ati, kanbabyi, “Ninyi aryi mambul kubdeibningnyi ababyi, nun Du biryi takubdeibnou to kunubkwan,” tenena teleb. Yin doun nang teleb nang ara mar ordana ati mambul kuramingnyi ababyi, sun mar nunungnanyi biryi takurdeirirande to tanglona kum uca kunuraming. Ati, ninyi aryi mambul kubdeibkingnyi ababyi, kanci neiktoto tanglona kum uca nun Du biryi takubdeibkou uram asi kunubdum.

⁴Yin doun nang ara, “Mar nunungnanyi biryi aruksou to diboka kunubkwayeb,” tenena dinyi akwe kuramingiryi, sunci, “Yuk wa utotoa nirya ara udikum deiboka wa ibkwayeb,” kum teneraming. Ati, kanda Timotius bibabyi neiktoto nun Du Kristus biryi arukmakou to asi udikum deibminyi ura, “Yuk wa utotoa nirya ara udikum deiboka kunubkwan,” tenebminyei. Erda, kanci, “Nun Du kanya asi teleb kubdeibkwan,” tenen nun Du biryi arukmakou to asi udikum deiboka kunubkwandum.

⁵Tonda, cukoka olahraga donanyi bira ola cukmari bok, sun olahraga deyok nang aryi etereramingnyi to asi diboka kum kunubmaci ura, sun olahraga deyok nang aryi ersi cukoka menengbisina dengna kira si piala kirdeirin moyok asi kum kareraming. Erda, sun eramingnyi uram asi kunuboka cukoka menekbisimarinyi bisi dengna kira kareraming. Ati, kanda Timotius bibabyi neiktoto, “Nun Du biryi nisi karebkwanou dengna kira wanikminiknicei,” tenen nun Du biryi takubdeibkou uram asi diboka kununa teleb.

⁶Tonda, sun kwaning wa iramingnyi nang ara kwaning yongobmangnyi tum ara er wa damnyi biryi diranci uca, er wa irmilin nang ara busul weik kuboka wa iraming ura, sunsi kwaning yuma bongdeirirande. Ba, yuk nang ara aminda karerande. Ati, Timotius kanbabyi neiktoto nun Du bisi wa irmilinanyi kurum ati, kanci, “Busul kuboka nun Du Yesus Uram asi kunubkwan,” tenebmin ci, kununa teleb. Ato kuraminyi uca, nun Du biryi dekoka kansi teleb kubdeibkwankir ati ebman.

⁷Ura, niryi kansi eterebmakin to, kanci diboka teneibdum. Ba, nun Nai Imtamnyi biryi kansi utotoa nirya bingna dinyi karebkici ba, kanci ni eterebmakin uram deyok diboka bikwandim ati ato ebman.

⁸Nun Du Yesus Kristus bira dibmou ani, kam bukokmou. Kanci a uram asi tuba-tuba teneiboka abmin ci, nun Du bisi tanglona kum uca iya milibkwandum. Nun Du bira weik sienyi si Daud yalanyi kurur ati ebman. Niryi eterenun Teleb Uram ara a deyok asi eboka lak eterenun.

⁹Nira ato eboka Teleb Uram eterenun deyok aryi, ninyi aryi, “A uram asi bisik sektibyi,” tenen nisi mambul kurdeiriraning. Ara, niryi a nang asi malyi dinyi ton kum kurdeirinun bok, sunci nisi, “Malyi dinyi kurandanyi,” besi tabwe debmanei. Sunci nisi, “Bisik sektibyi,” tenen tabwe debmanei bok, Er Imtamnyi Uram eterena ara bisik sekmanto kum kurur deyok aryi, nirya Er Imtamnyi Uram tuba eterenun ati ebman.

¹⁰Teleb Uram ara bisik sekmanto kum kurur deyok aryi, niryi, “Mambul weik dinyi utotoa kubdeibningnyi ababyi, niryi tanglona kum uca Teleb Uram eterebkwan,” tenena akwe kununun. Ara, “Nun Nai Imtamnyi biryi wibdeibmou nang asi Teleb Uram kum bingnung ati, sunci Teleb Uram asi kekebting ba, nun Du Kristus Yesus biryi lebdeibte,” tenenun ci, niryi Teleb Uram eterenun. Tonda, “Nun Nai biryi wibdeibmou nang ara nun Du ab tonkwa antanibdobingiryi, Er ab tonkwa iya erebdob ai tuba-tuba kubkwaming,” tenenun ci, niryi Teleb Uram eterenun.

¹¹A ebkun uram ara dib en uram kurur ati kanci diboka teneibdum. Nunda dib tenen nang ara nun Du Yesus ab tonkwa antanirdan nang kunub ati, nun Du biryi nunti dibmasou uca, Erci nun malyi kun dinyi nirya asi kum daneibsou. Nunda ato kuboka nun Du ab tonkwa dibmoubwe nang ato sirya kibmoubwe ati, nun Du biryi karebsici uca, nunci aminda aryi neiktoto nun Du ab tonkwa iya kam kubkwayeb. Tonda, ninyi aryi mambul dinyi ilinto kurdeiriransingnyi ababyi nunci tanglona kum uca nun Du uram asi kununub ati, nun Du bira iya weik sienyi kiboka laktoto kalikwande tum berekci ura, nun Du biryi nunsi erebdeibsici ura, nunda Er ab tonkwa utotoa nirya asi kalikwayeb. Ba, nunci nun Du bisi, “Anyi bira ni li,” ebibyi ura, nun Du bibabyi neiktoto nunti, “A nang ati ni li,” eboka dokdonokwansir. Ba, nunda nun Du bisi miliramibiryok, tiya taklobtibyi ababyi, nun Du biryi nunsi kum tanglonglosurur. Erda, nun ab tonkwa iya kunub. Nun Du bira Er minob teneransou dinyi kum t(...)

¹²

¹³

¹⁴Ati, Timotius kanci sun dib tenen nang asi, “A uram nirya asi luba kubmunyei,” eboka tuba-tuba etereramin ci, ebdarab eboka eterebdum. Ara, “Nun Nai Imtamnyi biryi sun kanya yuk-yuk asi bingsurur ati, sunci Er Uram asi diboka kunubdarur,” eboka eterebdum. Ato kuboka Er Imtamnyi urasintam aryi etereramin cok, kanci, “Talyi uram ati lulurdana mem,” ena teleb. Ati, kanci, “Talyi uram lulurdana ara ninyi teleb kum kubdeibkwansir,” ebdum. Erda, “Talyi uram ati lulurdana ara malyi kurur deyok aryi, a uram ara sun kekeramingnyi nang kanya asi dangubminikoka bowaningminingdur,” eboka eterebkwandum.

¹⁵Ura, Timotius kanda busul kuboka Er Imtamnyi biryi arukdeibkou to kunubkwandum. Ara, Er Imtamnyi biryi kansi, “Ni takubdeibse wa ara erci diboka kunurur,” tenebkwankir ati ato kubdum. Ati, kanci busul kuboka Teleb Uram etereraminyi ba, nun Nai Imtamnyi biryi kansi, “Ni takubdeibse wa ara sulbalyi kum kurur ci, telebto kuboka irur,” tenen ati, “Niryi ersi alyi kum kubdeibkwan,” tenebkwankir. Tonda, kanci ato kubminyi ba, nun Nai biryi kanti, “Dib en uram asi diboka lak etererandimnyi kurur,” tenen bikwankir.

¹⁶Ura, malyi uram ab, talyi uram ab, sisingna ara kisibdobkwandum. Sun nun Nai Imtamnyi biryi, “Malyito enmang,” tenesurur uram asi sisingmangnyi nang ara sundamnyi malyi kun dinyi tabangdongordaraming ati ato ebman.

¹⁷Ninyi ukli yirande ara ninyi tub ai asi nebdongoboka loke yibde barande to, a malyi uram ababyi neiktoto ninyi kanya dam asi weik nebdongoboka malyi kimdongorande. Himeneus ab Filetus ab ara malyi uram sisingnanding ci, nun Nai biryi, “Malyito enmang,” tenesurur uram asi sisingna nang kankan kururung ati ebman.

¹⁸A nang ara dib en uram asi takloboka sundamnyi waningminingdaranding. A nang ara tola ati ninyi kam burdeirin deyok ati ato eboka etereranding. “Sun diamingnyi nang ara aminda aryi kam kum bukokwaming. Erda, asing kum eirinub bok, nun dib tenen nang nirya ara kam sirya bukokmab,” eranding. Nun Nai Imtamnyi biryi ninyi nong kanya nirya bukeibkwande asi, a nang ara tola ati ato eboka eterenung. “Er Imtamnyi biryi ninyi nong asi takloboka ninyi kanya akwe kam burdeirisurur,” eboka etererurung. Tola ati ato eboka etererurung uca, sunci dib tenen ton nang asi dangubminikoka bowanikminingdurung.

¹⁹A nang ara tola ati ato eboka etererurung bok, Er Imtamnyi biryi dib en uram ara katabum eboka tingdur aryi bisik sekminikmanto kum kurur. Er Imtamnyi biryi dib en uram ara ninyi aryi dakman kum ai ato kurur. Abyokomna keil ab co ab ara katabum eboka tingdur to, Er Imtamnyi Uram ababyi neiktoto lulungna kum uca daraboka tingdur. Nun Nai biryi dib en uram ara deyok bitinyi kurur ati ebman. Deyok yuma dinyi ara ato, “Nun Nai Imtamnyi biryi Er dam kun nang ara diboka bingsurur.” Ba, deyok bitinyi dinyi ara ato, “Sun nun Du Yesus bisi miliboka Ersi weik eboka lak eramingnyi nang ara Er Imtamnyi biryi malyi tenesurur dinyi ara tanglona teleb.” A dib en uram deyok bitinyi ara diboka tingdur ati, ninyi aryi kilibman kum uram kurur.

²⁰Ura, ni kwit e, kiklina uram ton ebtabakwinkin. Sun weik ai deyok nang ara moyok amuma ab, buna yangabde yina amuma ab, yuk dinyi amuma deiriraming. Ton dinyi ara dengna weik dinyi si emas aryi kiknin dinyi ton, perak aryi kiknin dinyi ton deiriraming. Ba, yuk dinyi ara dengna mitik dinyi ton deiriraming. A dinyi ara co aryi kiknin moyok ab, tukwe asi iniboka uk daboka kikniraming moyok ab deiriraming. Ura, moyok piring dengna weik dinyi ara, “Weik kwalin tum aryi deibkwayeb,” tenen iya taleraming. Ba, moyok piring dengna mitik dinyi ara, “Ur tum aryi deibkwayeb,” tenen minola bai donongnaming.

²¹Ato kuboka sun tola uram taleramingnyi nang ara moyok piring dengna mitik dinyi ato kuraming. Ba, sun tola uram asi takloboka malyi kun dinyi tangloramingnyi nang ara dengna weik moyok ab, dengna weik piring ato nang kuraming. Er ai damnyi biryi dengna weik moyok ati, “Ni kanya teleb kuranir ati iya talebkwan,” tenerande to, nun Nai Imtamnyi biryi sun tola uram tangloramingnyi nang ati, “Malyi kun dinyi taklobmang ati, Ni dam kun nang kunung,” tenerur. Ato tenerur ci, nun Nai biryi a nang ati, “Niryi takubdeibkwan wa teleb asi diboka nirya kununkwaming,” tenesurur.

²²Ura, ni kwit Timotius, kanda kwitnyi kurum ati, sun kwit nang aryi, “Malyi kubtibyi,” teneramingnyi to dinyi ara kanci kisibdobkwandum. Kisibdobmin ci, kanci busul kuboka, “Er Imtamnyi urasintam aryi teleb dinyi akwe kunubkwan,” tenen dinyi asi kunubkwandum. Tonda, kanci tanglona kum uca nun Du biryi takubdeibsou wa kunubkwandum. Tonda, busul kanya boboka kanci ninyi boukwe kiboka dirnilirandum. Tonda, kanci namin kanya boramin ci, sun Er Imtamnyi si diboka namnamingnyi nang ab antaniboka kubdarur. Ara, sun, “Malyi kun dinyi nirya bai donokmoubwe,” tenen Er Imtamnyi si namnamingnyi nang ab antaniboka kubdarur ati ebman.

²³Ba, talyi uram sisingna ab, uram walwal sisingna ab ara kanda kisibdobkwandum. Ara, “Ato uram sisikibiryi asi tatabdandoka mar ibdabyei,” teneboka kisibdobkwandum.

²⁴Ba, nun Du bisi wa irmilinanyi bira tatabdandoka mar irdananyi kuma. Erda, namin kanya boboka ninyi nirya ab antanirdananyi kimna teleb. Tonda, nun Du bisi wa irmilinanyi bira yuk nang asi eterena ati kikib kuna teleb. Tonda, ninyi aryi, “Bisik sektibyi,” teneramingnyi ababyi, malyi kurdeirisingnyi ababyi, nun Du bisi wa irmilin nang ara tanglona kum uca namin kanya bormururamibiryok, nun Du biryi takubdeibsou wa kununa teleb.

²⁵Ba, nun Du bisi wa irmilinanyi bira namin kanya boboka sun, “Teleb Uram asi bisik sekminiktibyi,” tenen nang asi Teleb Uram eterena teleb. Ba, ato kuramingnyi ati Er Imtamnyi biryi sun malyi kun dinyi takloboka Teleb Uram keken uki ton louanci ura, sunci sun malyi kun dinyi taklobingnyi ba, nun Du wa irmilinanyi biryi Teleb Uram eterena teleb.

²⁶Ba, nun Du wa irmilinanyi biryi wenebci uca, “Er Imtamnyi Uram asi bisik sekminiktibyi,” teneramingnyi nang aryi, “Nun Nai malyito kunub,” tenebkwaming. Ara, isa sienyi Iblis biryi er tenebdanci to kuboka tabwe deanci asi tabwe lobdeibmaci deyok aryi ato tenebkwanung.