Read Futuna-Aniwa 2Timotius 3 Bible Online

2Timotius 3 - Futuna-Aniwa bible

2Timotius 3

¹Ni kwit Timotius, kanda minob bikwandum. Sirya kobdob berekwande talak ara mambul weik dobkwandum talak kubkwande ati ebman.

²Sirya kobdob berekwande talak ara ninyi ilinto aryi yuk nang asi kum dirnilibdankwaming. Erda, sundamnyi akwe boukwe kibdandoka, “Co bok ilinto dobdobtibyi,” tenen dinyi akwe ingkirikwaming. Tonda, sundamnyi ererdankwaming. A nang ara nun Nai Imtamnyi babyi, yuk nang babyi, ina ngilikwaming. A nang ara sun naiyabwe sun kwinyabwe uram asi kum kekebkwaming. Yuk nang aryi sunsi teleb kubdeibingnyi ababyi, teleb kubdeibmangnyi nang asi, “Ei nun nai, ei nun kwin,” eboka kum kibdobkwaming. Tonda, a nang ara Er Imtamnyi dam kum kubingiryi, Er Imtamnyi urasintam aryi malyi kun dinyi akwe kubkwaming.

³A nang ara sun dam kuramingnyi nang ababyi boukwe kum kibwaming. Ninyi bimsa yarin kanya akwe boboka, “Yuk nang ab antaniboka kuna ara nun li,” tenen to akwe kubkwaming. A nang ara yuk nang asi talyi tatab-tatab en nang kubkwaming. A nang ara sundamnyi kum kalikdankwaming. Tonda, yuk nang asi malyi kubdeibkwaming. Tonda, “Teleb dinyi ukuna ati nun li,” tenebkwaming.

⁴Sirya kobdob talak berekci ura, ninyi ilinto ara iya malyi kubingiryok, sun kwityabwe ati, “Obkwayeb,” tenen kikibkwaming. A nang ara kanya teneina bukam kum teneibkwaming. A nang ara kat kanya bobingiryok, malyi dinyi akwe kunubmurubkwaming. A nang ara wingdaboka sundamnyi erebdeibdandoka bingna nang kibdandobkwaming. Tonda, Er Imtamnyi teleb tenesurur to ara dongtam kibdeiboka sun kanya teleb teneramingnyi dinyi akwe kunubkwaming.

⁵A nang ara sibambol dem aryok Er Imtamnyi si namnung cok, sun kanya dam ara Er Imtamnyi bisi diboka kum milinung. A nang ara Er Imtamnyi biryi teleb tenesurur to kum kununung ati, dib tenena mikib ara, “Nun li,” tenenung. Ati, Timotius kanda a nang dam ara kisibdobdum.

⁶A malyi kun nang kankan asi ton nang ara yuk nang ai-yuk nang ai yibinkirikoka sun kanya wisirona kum nerabwe asi iniboka tola uram eterebingnyi uca, dib en uram asi bingdona kum nerabwe asi bowaningminingnaming. A nerabwe ara kanya wisiron kuna kumci, “Malyi kun dinyi ilinto kuramoubwe,” tenerdana aryi mambul weik kuramingiryok, malyi kun dinyi kurmururaming. A nerabwe ara dib en uram asi taklobmai cok, “Nun kanya teleb kubmaci dinyi utotoa kunubtibyi,” tenena akwe kunung ati ebman.

⁷A nerabwe ara busul kuboka, “Yuk dinyi-yuk dinyi utotoa eterebsurum,” eboka moloramingiryok, dib en uram deyok asi diboka kum bikwaming. Ara, sun malyi kun dinyi asi tanglona kum kuramingiryi, sun tola uram eteren nang uram asi talermurunung deyok aryi, Er Imtamnyi Uram ara diboka kum bingnung.

⁸A tola uram eteren nang ara dib en uram asi, “Bisik seksinibtibyi,” tenenung ati ebman. Minob ura, er Musa biryi sun Mesir nang weik sienyi si Firaun urasintam aryi tikoka Er Imtamnyi mikib deici aryi ilil tenen dinyi kiknibmou ba, tola uram eteren sien nang bitinyi si Yanes ab Yambres ab ara er Musa biryi uram ati, “Bisik sektinimnyi,” tenen ukubdenmarei. Ura, ukuryok ababyi tola uram eteren nang aryi neiktoto dib en uram asi, “Bisik sektibyi,” tenen bisik ingkiringnaming bok, ukubman kum. A tola uram eteren nang sun kanya ara dangubminikwe ba, iya malyi kurur. A nang ara dib en uram asi diboka kum taleraming ati ebman.

⁹A tola uram eteren nang ara dib en uram asi, “Bisik seksinibtibyi,” tenena nang aryi tola uram tuba akwe etereraming asi, sun eterena uram ara takabdongon mikib ton kum kubkwande. Erda, ninyi nirya ara. “A nang ara dib en uram ati walwal akwe kunung,” tenen bikdobwaming ati, a nang aryi tola uram tuba kum kekebkwaming. Ati, sun tola uram eteren nang minob kurandei nang asi kuramwe to, sun ukuryok kuramingnyi tola uram eteren nang ababyi neiktoto kubkwande.

¹⁰Bok, Timotius kanda ni eterena uram asi diboka talernururamumwe ani, ukuryok ababyi tuba talernururum. Tonda, niryi teleb kununun to kanbabyi miliboka kunurum. Tonda, niryi, “Ato-ato kubkwan,” tenenun to, kanbabyi neiktoto, “Ato-ato kubkwan,” tenerum. Tonda, niryi nun Du Yesus bisi tanglona kum uca milinun to, kanbabyi tanglona kum uca nun Du bisi milirandim. Tonda, niryi mambul tenen dinyi bonun to, kanbabyi neiktoto mambul tenen dinyi borandim. Tonda, niryi ninyi boukwe kiboka dirnilinun to, kanbabyi neiktoto boukwe kiboka ninyi dirnilirandim. Tonda, ninyi aryi mambul kibdeibsingnyi ababyi, niryi, “Kum taklobkwan,” tenenun to, kanbabyi neiktoto, “Kum taklobkwan,” tenerandim.

¹¹Tonda, ninyi aryi ni Paulus biti, “Obtibyi,” tenen dobkirikoka mambul dinyi ilinto takurdeiriranei ba, ni mambul doranse ara Timotius kanbabyi tanglonina kum uca neiktum mambul doranumwe. Tonda, Antiokhia atei kuranse ababyi, ninyi aryi nisi mambul dinyi takurdeiriranei. Tonda, Ikonium atei ab, Listra atei ab kuranse ba, niryi aryi nisi neiktoto mambul dinyi takurdeiriranei. Mambul weik kurdeiriranei bok, nun Nai Imtamnyi biryi nisi lebnin baranou.

¹²Diba. Sun nun Du Kristus Yesus bisi milin nang kuramingiryi, “Nun Nai Imtamnyi urasintam aryi teleb akwe kubkwayeb,” tenen nang nirya asi ninyi aryi mambul dinyi kubdeibkwansing.

¹³Ba, sun malyi kun nang ab, ninyi kanya bowaningminingna nang ab ara tabakoka malyi kun dinyi kunubkwaming. A nang ara yuk nang ababyi bowaningminingnaming ci, sundamnyi ababyi bowaningminingdaraming.

¹⁴Sunda ato kunung bok, Timotius kanda kan minob kekeramumwe dib en uram asi tanglona kum uca talernurubdobdum. Tonda, kanci kanya kankana kum uca a uram ati, “Dib en uram aca,” tenena teleb. Ara, kanci nunda a uram asi etereankoubwe nang ati, “Dib en uram asi eterebmanei,” tenen bingnandim deyok aryi, kanci a uram asi talernuruna teleb.

¹⁵Ati, kan, “Ni mitik uca Er Imtamnyi Uram asi kekebse,” teneirandim ci, dib en uram asi talernuruna teleb. Er Imtamnyi Uram ara mikib kurur uca, kanci a uram deici nun Nai biryi ninyi lemsina deyok ati diboka bikdobkwandum. Ati, kanci a uram asi liliboka nukminyi ura, kanci, “Nun Du Yesus bisi dib tenena deici nun Nai biryi nunsi lebkwansir,” tenen bita bikwandim.

¹⁶Er Imtamnyi Uram umbura kerek sekeibmou uram nirya ara Nun Nai Imtamnyi biryi karebsou uca, nun Nai biryi eteresurur uram asi lak kimdeirisurur. Ara, Er Imtamnyi Uram deici aryi dib en uram etererdan dinyi kurur. Tonda, a uram deici aryi ninyi aryi malyi kun dinyi asi weneboka lak kimdeirirdan dinyi kurur. Tonda, Er Imtamnyi Uram deici aryi ninyi wenena ababyi kurur. Tonda, Er Imtamnyi biryi karebsou uram deici aryi, nunci, “Ato-ato kubmun ci, Er Imtamnyi biryi teleb tenesurur to kunubkwandum,” etererdan dinyi kurur.

¹⁷Ati, nunci, “Er Imtamnyi Uram asi kekena deici aryi sun Er Imtamnyi dam kun nang ara sundamnyi kiknibminikdamingnyi uca, mikib kubingiryok, Er Imtamnyi urasintam aryi teleb dinyi utotoa kunubkwaming,” tenen Er Imtamnyi Uram deici aryi eterena teleb.