Read Futuna-Aniwa 2Timotius 4 Bible Online

2Timotius 4 - Futuna-Aniwa bible

2Timotius 4

¹Ni kwit Timotius, niryi kansi takubdeibkwinkin uram asi kekebmin ci, dib en uram asi tuba-tuba eterebmurubkwandum. Ati, niryi kansi, “Ni takubdeibkwan uram asi diboka kunubte,” tenekunun ci, nun Nai Imtamnyi urasintam aryi uram ton takubdeibkwinkin. Tonda, nun Du Kristus Yesus urasintam aryi uram ton takubdeibkwinkin. Ati, kanci, “Dib en uram asi kum eterebnyi ura, nun Nai ab nun Du ab aryi nisi wenebniringnyei,” teneboka ni takubdeibkwinkin uram asi kunubdum. Ura, nun Du Kristus Yesus bira tamuryandoka sun din nang ab, kam nang ab aryi teleb kuamingnyi to malyi kuamingnyi to nirya asi lilibkwansir ara kan bikmarim. Sirya lilibci ura, nun Du bira iya erebdob sienyi kiboka utotoa nirya asi kalikwansir. Ati, kanci, “Nun Du tamuryaci ura, nunda dib tenen nang nun Du ab tonkwa weik sien nang kibibiryi, Er ab tonkwa utotoa asi kalikwayeb,” tenena teleb. Ato teneramin ci, kanci katabum eboka ni takubdeibkwinkin uram asi kunubdum.

²Ati, niryi kansi takubdeibkwinkin uram ara ato eboka takubdeibkwinkin. Kanci dib en uram asi tuba-tuba lak eterebmurubdum. Ara, teleb tum kubmaci ababyi, teleb kum tum kubmaci ababyi, kanci tanglona kum uca dib en uram eterebdum. Tonda, kanci malyi kun dinyi lak kibdeiboka, “Mem,” eboka malyi kun nang wenebkwandum. Tonda, kanci sun dib tenen nang kanya asi katabum ebdeibmin ci, sunsi eterebkwandum. Ara, ninyi aryi kansi mambul kurdeirirankingnyi ababyi, kanci tanglona kum uca dib en uram asi eterebdum. Tonda, kanci, “Ato-ato kubdarur,” en uram yuk-yuk asi eterenkwandum.

³Aminda mabde binkwayeb talak ara ninyi ilinto aryi, “Dib en uram kekena ara nun li,” tenebkwaming deyok aryi, ato ebman. A kubkwayeb talak ara ninyi ilinto aryi sun kanya aryi malyi teneramingnyi to kunuboka abniryi, tola uram eteren nang uram akwe kekebkwaming. Ati, sunci tola uram eteren nang ilinto asi nabingnyi ura, “Nun kekebtibyi talyi uram asi eterebsindarur,” eboka nabkwaming.

⁴A kubde bankwayeb talak ara ninyi ilinto aryi, “Dib en uram asi kekena ara nun li,” tenen amol kinikdobongnyi ura, sunci, “Nunung uram akwe kekebtibyi,” tenen amol erekoka kekebkwaming.

⁵A nang ara ato kubkwaming bok, Timotius kanda kandamnyi tuba-tuba kalingdana teleb. Tonda, ninyi aryi kansi malyi kubdeibkingnyi ababyi, kanci lamakdongoboka mambul dinyi asi takubdobkwandum. Tonda, kanci sun Er Imtamnyi Uram walwal nang asi Teleb Uram eterebdum. Tonda, nun Nai Imtamnyi biryi kansi wa takubdeibkou to, kanci busul kuboka a wa nirya asi diboka kunubdum.

⁶Ni Paulus dibkwan tum ara dam sirya kubmar ati ato ebman. “Ninyi aryi nisi obkwaning uca, ni ining sakwanir,” tenebman. Ninyi aryi nisi obkwaning ba, niryi nidamnyi karebdaniryok, “Ei nun Nai,” eboka ni tub ining nirya asi Er Imtamnyi taruk dam karebkwan. Ara, ninyi aryi Er Imtamnyi bisi, “Ei nun Nai, nun dama kan taruk dam karebkib,” eboka yung me dikdongoboka dama deiriraming to, nibabyi neiktoto ni tub ining nun Nai taruk dam karebkwan. Ninyi aryi obkwaning uca, dibkwan talak dam sirya kubmar ati ebman.

⁷Nira Er Imtamnyi biryi takubdeibnou wa asi busul kuboka wa iranse ani, sirya kunubsekman ati ebman. Cukoka olahraga kimnanyi biryi cung bindoka sungban ai sirya bisirande ato, nibabyi neiktoto Er Imtamnyi biryi nisi takubdeibnou wa kunubsekman. Sirya kunubsekman ci, nira tanglona kum uca nun Du bisi dib teneranse ani, tuba dib tenenun ati ebman.

⁸Ati, ukuryok nira menekoka cungnanyi dengna kira si piala dobdobkwan. Menekoka cungnanyi dengna kira diba ati kum ebman. Erda, nun Du biryi nisi iya kam kun dinyi karebkwanir ati niryi kikliboka ato ebman. Ara, nun Du tamuryankwande uki tum berekci ura, nun Du bira ninyi kanya diboka bingsurutnyi biryi, “Anyi telebnyi bisi dobdobkwan,” eboka “Onyi malinyi bisi wenebkwan,” eboka uram dodeibkwande. Ato eboka kikibto uram dodeibkwansir ba, nun Du biryi nisi iya kam kun dinyi karebkwanir. Ara, a tum berekci ura, nun Du biryi minob niti kiknibminikanou iya kam kun dinyi asi karebkwanir. Ni kikwa iya kam kun dinyi kum karebkwanir. Erda, sun Ersi boukwe kiboka dibde bunub nang nirya asi nun Du biryi iya kam kun dinyi karebkwansir.

⁹Ni kwit Timotius, kan ukurlona kum uca ni dam minola yarum ati ebman.

¹⁰Er Demas bira ni ab tonkwa kuranumwe ani, erci, “Sun malyi kun nang aryi kuramingto malyi kubkwan,” tenen nisi takloboka Tesalonika atei bindobwe. Tonda, ni wa irmilinurutnyi Kreskes bira Galatia mutuk biu. Ba, nun kwit Titus bira Dalmatia mutuk biu.

¹¹Ba, nun kwit Lukas bikwe ni ab tonkwa kuranim. Ati, Timotius kanci nun kwit Markus bisi inibdobminyi ura, kan ab tonkwa ni dam yarurum. “Nun kwit Markus bira nunsi wa irmilibsute,” tenen niryi ato ebman.

¹²Ura, niryi nun kwit Tikhikus bisi, “Efesus atei birum,” eboka sun dam sirya bokdonokse.

¹³Timotius ni kwit, kan ab Markus ab ni dam yangarumunyi ba, Troas atei asi ni alib ongon aling nun kwit Karpus ai ara deiblobse boyarurum. Tonda, ni deiblobse kerek sengna yuk-yuk ababyi boyarurum. Ara, sapi kala aryi kiknin kerek sengna kitim-kitim en dinyi asi nunukoka boyarurum.

¹⁴Aleksander bira dengna weik keil si tembaga aryi doboka utotoa kikninanyi biryi nisi mambul weik bordeiriranou. Erci nisi malyi dinyi ilinto kurdeiriranou ati, nun Du biryi kikliboka ersi ilinto wenena teleb.

¹⁵Tonda, kanda Timotius biryi kalikdandobmin cok, Aleksander bisi kebdobkwandum. Aleksander bira nun eterenub dib en uram ati, “Bisik sekwan,” tenena to akwe kurur ati ato ebman.

¹⁶Ura, ninyi aryi deyok kouboka nisi tabwe debmanei ci, tatab-tatab enmanei bok, niryi nidamnyi yuma libdandobmase ura, nun kwityabwe nirya ara ilil aryi nisi takloboka binsekdobmanei. Ba, ni dam tingyangananyi iya ton kum tikmai ati ebman. Taklobmanei bok, niryi nun kwityabwe ati yu kanya kum bonun. Erda, niryi sunti, “Nun Nai Imtamnyi biryi sunci nisi taklobmanei deyok aryi, wenebcei,” tenenun.

¹⁷Nun kwityabwe nirya aryi takmanei bok, nun Du Yesus biryi ni dam tingyandoka tanglona kum uca ni ab tonkwa kuranumwe. Tonda, nun Du biryi ni kanya asi katabum ebdeibnou. Ba, ni Paulus biriman aryi Teleb Uram lak eterena ninyi nirya asi laktoto kubkwande ati, nun Du biryi nisi katabum ebdeibnou. Tonda, sun Yahudi yala kum nang nirya ababyi Teleb Uram kekebwaming ati, nun Du biryi ni dam tingyandoka lebnou uca, ninyi aryi nisi kum obmanei.

¹⁸Ura, aminda ababyi ninyi aryi nisi, “Malyi kubdeibtibyi,” tenen ukubdenkwaning bok, nun Du biryi nisi lebde binkwanir. Ara, nun Du biryi nisi kalingnurur ati, Erda iya Erebdob Sienyi biryi nisi erebdeiboka Erci kalingdur ai imtam ai asi bobinkwanir. Nun nirya ara nun Du si tuba-tuba weik ena teleb. Amin.

¹⁹Ni kwit Timotius, ni Paulus biryi Priska ab er akenyi Akwila ab asi, “Teleb,” eboka kibdobman. Tonda, Onesiforus mabwe silib ababyi teleb ebman.

²⁰Nun kwit Erastus bira Korintus atei tuba kurur. Tonda, nun kwit Trofimus bira u yinmou ati, niryi, “Minola kibdobkwande,” tenen ersi Miletus atei asi takse.

²¹Ura Timotius, muryi a kum dobmaci bok, kan ab Markus ab ni dam minola yarurum. Nun kwityabwe Ebulus ab Pudes ab Linus ab aryi kansi, “Teleb,” eboka kibdobmaking. Tonda, nun Du bisi dib tenen ner Klaudia ab sun dib tenen nang yuk nang ababyi kansi, “Teleb,” eboka kibdobmaking.

²²Nun Du biryi kan ab tonkwa kuna teleb. Nun Du biryi kan ab, kan ab tonkwa kundarur nang ab, sun nirya asi kisal dangsina teleb. Amin.