Read Futuna-Aniwa Titus 1 Bible Online

Titus 1 - Futuna-Aniwa bible

Titus 1

¹Teleb, ni kwit Titus! Ni Paulus biryi a kerek sengna kerek sekeibkwinkin. Nira Er Imtamnyi wa irmilinanyi kunun ba, nun Du Yesus Kristus biryi nisi bokdonoknou. Nun Du biryi nisi bokdonoknou uca, niryi Teleb Uram ermuruboka lak eterebde banun. Ara, “Sun nun Nai Imtamnyi biryi wibdeibmou nang dib tenen dinyi katabum ebdeibkwan,” tenen niryi Teleb Uram lak eterebde banun. Tonda, “Sunci dib en uram asi bikingiryi Er Imtamnyi Uram asi diboka kunubting,” tenen Teleb Uram eterebde banun.

²Tonda, nun Nai Imtamnyi biryi wibdeibmou nang ara nun Nai biryi minob ebdeibsou to asi dibde bukingiryi iya kam kun dinyi asi dobdobkwaming ati, niryi Teleb Uram eterebde banun. Ara, “A iya kam kun dinyi ati dibde bunub deici aryi Er Imtamnyi biryi wibdeibmou nang aryi dib en uram bikingiryi, Er Imtamnyi Uram kunubkwaming,” tenen niryi Teleb Uram eterebde banun ati ebman. Nun Nai Imtamnyi bira tola en kumnyi kurur ati, Erci erdeirisin uram asi Erci tuba-tuba kunusurur ati ebman. Ura, nun Nai Imtamnyi biryi nunda dib tenen nang asi ebdeibmasou uram ara, “Iya kam kun dinyi karebkwansin,” eboka lak ebdeibmasou. Ara, nun Nai biryi imtam dinyi tukwetam dinyi nirya asi kum kikniamuryok, Erci nunsi ato eboka ebdeibsou.

³Ura, nun Nai Imtamnyi biryi wibmou ci, “Iya kam kun dinyi karebkwansin,” ebdeibmasou tum sirya berekmou ura, Erci minob ebdeibsou uram asi lak kibdeiboka kunubdeibmou. Ara, nun Nai ninyi Lemsurutnyi biryi Er Uram ara Teleb Uram lak kibdeiboka Erci ni Paulus bisi, “Kanda Teleb Uram eterebde barandum,” eboka takubdeibnou. Ba, ni eterermurunina deici aryi nun Nai biryi ninyi nirya asi Teleb Uram lak kimdeirisurur.

⁴Ni kwit Titus, ni Paulus biryi kanti, “Ni mi kobdob atonyi,” tenekunun ci, “Teleb,” ebmakin. Kanci nun dib tenen nang aryi antaniboka dib teneramib to asi diboka dib tenerandim ati, niryi kanti, “Ni mi kobdob atonyi,” tenerankin ati ebman. Nun Nai Imtamnyi ab nun Du Yesus Kristus ninyi Lemsurutnyi ab aryi kanda Titus bisi kisal dangkina teleb. Tonda, nun Nai ab nun Du Yesus ab aryi kansi antanibdeiboka namin kanya karekina teleb.

⁵Ni kwit Titus, niryi kansi Kreta mutuk asi takdongobmakise ara, “Nun tonkwa kunmanumwe talak aryi kum kunubmanumwe dinyi asi kunubkwandur,” tenen takmakise. Ara, niryi kansi ebdeibmakise to kuboka, “Titus biryi eikatei-okatei nirya yibinkirikoka sun dib tenen nang kalikwamingnyi nang tikeibkwandur,” tenen niryi kansi takdongobmakise.

⁶Ati, kanci, “Sun dib tenen nang kalikwamingnyi nang asi tikeibkwayeb,” tenebminyi ura, kanci ato teneina teleb. Teleb kun nang ara ninyi talyi kerena kum nang asi tingdeirina teleb. Tonda, ner tentok dobmangnyi nang akwe tingdeirina teleb. Tonda, sun mabwe nermabwe ara sun nai uram kekeramingnyi ura, sunci a mabwe nermabwe sun nai bisi tingdeirina teleb. Ara, sun mabwe silib ara tatab-tatab ebman kum kuramingnyi ura, sunci a mabwe nermabwe sun nai bisi tingdeirina teleb. Tonda, sun mabwe nermabwe ara malyi kun nang kum kuramingiryi, “Nun Nai Imtamnyi biryi nun malyi kun dinyi ati wenebsicei,” tenen kanya boramingnyi ura, sunci a mabwe nermabwe sun nai bisi tingdeirina teleb. Tonda, sun mabwe nermabwe ara sun nai sun kwin uram asi diboka kekeramingnyi ura, kanci a mabwe nermabwe sun naiyabwe asi, “Sun dib tenen nang asi kalikwaming,” tenen tingdeirina teleb.

⁷Sun dib tenen nang asi kalikwamingnyi nang ara Er Imtamnyi wa irmilin nang kunung ati ebman. A deyok aryi, sun dib tenen nang asi kalingna nang ara kerebman kum to kuna teleb. Ara, sundamnyi ererdeirdana nang asi tikeibmunyei. Tonda, minola yu wengna nang ababyi tikeibmunyei. Tonda, anggur me ilinto yin nang ababyi tikeibmunyei. Tonda, yu kanya boboka yuk nang asi kulabde on nang ababyi tikeibmunyei. Tonda, “Co bok ilinto talebtinyi,” tenen malyi kun nang ababyi tikeibmunyei.

⁸Erda, ninyi du dongon nang akwe tikeibdarur. Tonda, “Teleb dinyi ukuna ara nunti teleb,” tenen nang akwe tikeibdarur. Tonda, sundamnyi kalingdaramingnyi nang akwe tikeibdarur. Tonda, Er Imtamnyi urasintam aryi teleb dinyi kunun nang akwe wibdarur. Tonda, nun Nai Imtamnyi bisi dam kun nang ara, “Nun Nai Imtamnyi biryi eterebsou to teleb dinyi akwe kunubkwayeb,” tenen nang akwe tikeibdarur.

⁹Sun tikeibkwamunyi nang ara nun Du Yesus deyok ati etereramib dib en uram asi diboka talebkwanung. Ara, sun kalingna nang aryi, “Teleb Uram asi diboka talebdarur,” eboka sun dib tenen nang kanya asi katabum ebdeibkwanung ati, sunbabyi dib en uram asi diboka talebkwanung. Tonda, sun kalingna nang aryi, “Dib en uram nun li,” en nang asi bitabdeiboka wenebkwanung ati, sun kalingna nang ababyi dib en uram asi diboka talebkwanung.

¹⁰Ninyi ilinto ara, “Dib en uram asi kekena nun li,” teneraming ati ebman. A nang ara talyi nunung uram akwe eraming. Tonda, sunci tola uram etereboka yuk nang asi bowaningminingnaming. Ninyi yuk-yuk kankan asi tola uram eteren nang ilinto kuramingnyi bok, sun, “Den bama sengna deici aryi nun Nai Imtamnyi biryi ninyi dosurur,” tenen nang kankan ara bisibkaboka ninyi kanya bowaningminingna nang ilinto kunung ati ebman.

¹¹Nunci a nang ati, “Bisik sekwayeb,” tenen ati, “Uram kilikdarur,” ebkwayeb. A nang ara tola uram etereraming uca, ninyi mabwe silib ilinto malyi kiminingnaming. Ara, “Ninyi aryi yuk-yuka karebsiting,” tenen a nang aryi sun uram kekebingnyi nang kanya yuk-yuk asi teleb kimdeiriramingiryi, alyi kimdeirin uram etereraming, se!

¹²Kreta nang ninyi tentok ara bikdob uram asi diboka bingnamunyi biryi sun Kreta nang asi weneboka minob uca ato ebmou, “Nunda Kreta nang ara iya tola uram en nang kunub. Nunda bai bisam aryi yu weik kurande ato nang kunub. Wa ina ara sulbalyi kanya boramibiryi, ‘Wam liboka yibtibyi,’ tenena akwe kuramib.”

¹³A lakena uram ati anyi biryi ebmou to ara dib ebmou ati ebman. A deyok aryi, Titus kanda a nang asi diba ati wenebdarabkwandum. Ara, “Dib en uram asi diboka dobdobkwaming,” tenen kanci sunsi diba ati wenebkwandum.

¹⁴Tonda, kanci Kreta nang asi, “Sun Yahudi yala nang aryi etereraming nunung uram asi taklobting,” tenen wenebkwandum. Tonda, “Dib en uram asi, ‘Nun li,’ teneraming nang aryi Kreta nang asi, ‘Ato-ato kubdarur,’ eboka eteraming uram ababyi taklobting,” tenen kanci sun Kreta nang asi wenebkwandum.

¹⁵Sun, “Malyi kun dinyi nirya bai donokmab,” teneraming nang ara utotoa nirya ara teleb to akwe kusurur ati ebman. Ba, sun malyi kanya bon nang ton sun dib tenen kum nang asi utotoa nirya ara malyi kurur. A nang sun tenen kanya nirya ara malyito kurur. Tonda, a nang ara malyi kun dinyi ilinto kuraming bok, sunci, “Se, malyi dinyi kubmoubwe,” tenen kum bingdanung.

¹⁶Ato kuraming nang ara, “Nun Nai Imtamnyi bisi dib tenenub ci, Er dam kun nang kunub,” eboka lak eramingiryok, sunci malyi dinyi akwe kuraming. Ato eboka tola ati eraming ati, Er Imtamnyi bisi diboka kum bingnaming. A nang ara iya malyi nang kuraming ati ebman. Sunci dib en uram diboka kum kekeramingiryi, teleb dinyi mitik tentok ababyi ton kum kubting.