Read Futuna-Aniwa Titus 2 Bible Online

Titus 2 - Futuna-Aniwa bible

Titus 2

¹Ura, Titus kanci ninyi eterebkwandim to ara nunda dib tenen nang nirya aryi dib tenenub dinyi akwe ebmin ci, eterebdum.

²Sun wise nang asi weneboka, “Sundamnyi kalikdandarur,” eboka eterebdum. Tonda, yuk nang aryi sun wise nang asi, “Nun naiyabwe,” tenebkwaming ati, kanci sun wise nang asi, “Tola uram ara nirya bai donokmunyi ura, dib en uram asi diboka talebdarur,” eboka eterebdum. Tonda, kanci sunsi ato eboka eterebtabakdum, “Sun yuk nang asi boukwe weik diboka kibdarur.” Tonda, “Ninyi aryi tola uram eterebsingnyi ababyi, sunci sun dib tenena asi taklobmunyei.” Ato eboka kanda Titus biryi sun wise nang asi eterebkwandum.

³Ura, sun wise nerabwe ababyi kanci ato eboka eterebkwandum, “Sunda Er Imtamnyi dam kun nerabwe kundarur ati, sunci teleb kanya bobmun ci, bikdob dinyi akwe kunubdarur,” eboka eterebdum. Tonda, “Sun yuk nang ati malyi uram ebmunyei,” ebmin ci, “Anggur me ilinto yibmunyei, erda teleb dinyi akwe eterebdarur,” eboka wenebdum.

⁴Sun wise nerabwe aryi sun ninyi dobdob kam nerabwe asi, “Ato-ato kubdarur,” eboka eterebkwanung. Ara, sun ninyi dobdob kam nerabwe aryi sun akenyabwe yuk-yuk ab sun mabwe nermabwe ab asi boukwe weik kiboka dibnilibkwaming ati, sun wise nerabwe aryi sunsi eterebkwanung.

⁵Tonda, “Sunci sundamnyi kalikdandoka teleb dinyi akwe kunubdarur,” eboka eterebkwanung. Tonda, “Sun akenyabwe yuk-yuk asi tanglona kum uca milibdarur,” eboka eterebkwanung. Ato eboka eterebingnyi uca, sun ninyi dobdob nerabwe aryi teleb kanya boboka sun mabwe silib yuk-yuk asi diboka dirnilina teleb. Tonda, sun nerabwe ara sun akenyabwe uram asi diboka kekeboka sunci ato tenena teleb, “Nunda Er Imtamnyi bisi milin nerabwe aryi malyi kubtibyi ura, yuk nang aryi Er Imtamnyi Uram ati, ‘Malyi uram,’ ebingnyei.” Sunda ninyi dobdob kam nerabwe ara ato tenebmun ci, ninyi asi talyi kerena kum ci, teleb to akikwe kuna teleb.

⁶Ura, sun kam nang ababyi kanci ebdarab eboka ato eterena teleb. “Sunci sundamnyi kalikdandoka teleb dinyi asi tanglona kum uca ukubdarur,” ebdum.

⁷Ura, Titus kanda kiklina atonyi kurandim. Ati, kanci ato tenebkwandum, “Niryi teleb kunun to asi yuk nang ababyi milibkwanining,” tenen teleb dinyi akwe ukuna teleb. Kanci eterebmin ba, dib en uram akwe eterebdum. Ara, bikdob uram akwe eterebmin ci, talyi uram nirya asi bisik sekdum.

⁸Bikdob uram ab Teleb Uram ab akwe eterebmin ba, sunci nunda dib tenen nang ati, “Bisik sektibyi,” tenesingnyi nang ara alyi asa kubkwaming. Ara, nun malyi deyok kum kubmabyi ura, a nang aryi nunsi kerebmasin kum. Erda, tola ati, “Malyi kun nang,” ebsiting ati ebman.

⁹Ura, sun ikin wa bon nang ara sun wa takurdeirisin nang yuk-yuk aryi ebingnyi uram asi tuba-tuba kunubkwanung. Ara, sunci, “Nun wa takurdeirisinanyi biryi takubdeibnou wa ina ati ni li,” tenebingnyei. Erda, sunci, “Nun wa takurdeirisinanyi kanya teleb kubdeibkwayeb,” tenen erci takubdeibsou wa asi busul kuboka wa ina teleb.

¹⁰Tonda, sunci sun wa takurdeirinanyi boranci bona asi ukula dobingnyei. Erda, sunci, “Yuk nang dinyi asi ukula dona mem,” tenebingiryi, busul kuboka wa ina teleb. Ato kubingnyi uca, sun wa takurdeiriransing nang aryi sunti, “Sun wa yuk-yuk asi diboka kunun nang,” tenen bikwansing. Sunda Er Imtamnyi bisi milin nang aryi teleb kuboka wa iramunyi ura, sun wa takurdeiriransing nang aryi Er Imtamnyi Uram ati, “Teleb Uram,” tenebkwaming. Ara, “Sun Er Imtamnyi Uram milin nang ara teleb nang akwe kunung,” eboka sunci nun Nai Imtamnyi bira ninyi Lemsinanyi bisi kisal dakwaming.

¹¹Nun Nai Imtamnyi bira, “Ninyi yuk-yuk asi lebdeibkwan,” tenen Er Mi Yesus bisi tukwetam bokwetebsou. A deyok aryi, nun ninyi nirya asi, “Teleb dinyi kunubdarur,” eboka eterena teleb.

¹²Ati, nun Nai Imtamnyi biryi nunsi lak kibsou ci, ebsou uram ara nunsi ato eboka eteresurur. “Sunci Er Imtamnyi urasintam aryi malyi kun dinyi asi takloboka sun, ‘Malyi dinyi kunubtinyi,’ tenerandum dinyi nirya asi deibloboka sundamnyi kalikdandarur. Ara, sunci sun malyi kun nang kankan asi kubde baramun ci, sunci teleb dinyi akwe ukuboka Er Imtamnyi biryi arungsurur uram asi kununa teleb.” Nun Nai Imtamnyi uram aryi ato eboka eteresurur.

¹³Nunci ato kubibiryi, kilkil kanya boboka nun Du Yesus Kristus bisi dibde bunub. Nun Du bira nun Imtam Sienyi kurur. Tonda, Erda ninyi Lemsurutnyi kurur. Ati, nun Du Yesus bira milil weik kuboka imtam aryi kuboka yuryangaci ura, nunda dib tenen nang aryi Er si weik ebkwamib. Ara, “Nun Imtam Sienyi, ninyi Lemsurutnyi sirya tamuryanmasir,” eboka nun nirya ara nun Du Yesus si weik ebkwamib.

¹⁴Nun Du bira Erdamnyi karebdanmou ci, co lase deici aryi dibmou ara nun malyi kun dinyi nirya asi kilibkwansou ati, Erci Erdamnyi karebdanmou. Ara, Erci nunsi Er dam kun nang kibdeibkwansou ati, Erci Erdamnyi nunti karebdanmasou. Tonda, nunci busul kuboka teleb dinyi akwe kubkwamoubwe ati, nun Du Yesus biryi nunsi lebsou.

¹⁵Ni kwit Titus, kanci a dinyi nirya asi eboka sun dib tenen nang asi eterebkwandum. Ati, kanci ebdarab eboka sun dib tenen nang kanya yuk-yuk asi katabum ebdeibkwandum. Tonda kanci, “Nira Er Imtamnyi Uram ermurusunun ati, ni ebmasin dinyi asi sunci diboka kekebdarur,” eboka ninyi yuk-yuk asi wenebkwandum. Ninyi tentok ababyi kanti, “Kamnyi bica,” tenebkingiryi, “Er uram kekena nun li,” tenen kansi ina ngilikingnyei.