Read Futuna-Aniwa Titus 3 Bible Online

Titus 3 - Futuna-Aniwa bible

Titus 3

¹Kanci sun dib tenen nang asi ato eboka eterebkwandum, “Sunsi kalingnansingnyi sien nang aryi takurdeirisin uram ab sun erebdob nang yuk nang aryi sunsi takurdeirisin uram ab asi diboka kekebdarur.” Ara, “Teleb dinyi utotoa asi busul kuboka kunubkwayeb,” tenen sunci a nang aryi takurdeiriransingnyi uram asi kunubkwanung. “Ato dinyi kununa ara luba kibingnyei,” tenen kanci sunsi ato eboka tubto eterena teleb.

²Eterebmin ci, kanci ato ena teleb, “Yuk nang asi malyi uram ebmunyei.” Tonda, “Sun mamun kerebdamunyei. Erda, sun kanya luknubdongobmun ci, sun nirya asi namin kanya boboka yuk nang ab tonkwa antanibdandarur.” Kanda Titus biryi ato eboka eterebkwandum.

³Minob ura, nunda Er Imtamnyi bisi kum miliramoubwe talak ara nunbabyi walwal nang kuramaburyi, Er Imtamnyi Uram kum kunuramoubwe. Ninyi aryi nunsi tola uram etereransei uca, nunsi bowaningminingnansei. Ba, nunci malyi kanya boboka nun kanya teleb tenebne tok malyi kun dinyi akwe kuramoubwe. Malyi kun dinyi akwe kurmururamoubwe uca, nunda tabwe demna nang ato kuramoubwe. Ara, lebdandobman kum aryi nunci yu kanya bobdandoka bimsa yarirdandoka nun mamun kererdaramoubwe.

⁴Ato kuboka kubde baramoubwe asi, nun Nai Imtamnyi biryi boukwe kiboka nunsi teleb kubdeibsou ati ebman. Ara, Erda ninyi Lemsurutnyi biryi nunsi teleb kubdeibsou ati ebman.

⁵Ati, nunci telebto kuramoubwe dinyi deib aryi nun Nai biryi nunsi lebsou do? Ato tenen kum. Erda, nun Nai biryi nunti bico teneransou deib aryi Erci nunsi lebsou. Ara, Er Imtamnyi Kanya Roh Kudus biriman aryi Erci nunsi tamuboka deibsou. Er Imtamnyi Kanya Roh Kudus ara nun malyi tenen dinyi asi dobkaboka ukuryok tenen kanya unuboka karebsou ara teleb dinyi tenen kanya asi unuboka karebsou ati ebman.

⁶Roh Kudus ara nun Nai Imtamnyi biryi nunsi langdibdeiboka karebmasou. Ara, nun Lemsurutnyi Yesus Kristus biriman aryi nun Nai biryi Er Kanya Roh Kudus asi langkirdeiboka karebsou.

⁷Ati, nun Nai Imtamnyi biryi nunsi teleb kubdeibmasou ci, nunda dib tenen nang ati, “Sun malyi kun dinyi asi tuba kum teneibkwan,” tenen erda, “Ni mabwe nermabwe,” tenen Erci nunsi dobdobmasou. Dobdobmasou ura, nun Nai biryi Er Kanya Roh Kudus asi nun kanya dam karebdongobmasou. Ati, nunci nun Nai biryi kisal dangsina nirya asi dobdoubwe ara, “Nun Nai Imtamnyi ab tonkwa iya kam kubkwayeb,” tenen dibde bukwamoubwe ati, nun Nai biryi Er Kanya Roh Kudus nun kanya dam karebdongobsou.

⁸Ni kwit Titus, a ebmakin uram ara dib uram asi ebman. Ati, kanci a ebman uram asi ebdarab eboka eterebdum. Ba, sun Er Imtamnyi bisi dib tenen nang ara teleb dinyi asi busul kuboka kunubkwaming ati, kanci ato eboka eterebdum. Niryi eterebmakise uram ara bikdob uram asi eterebmakise ati, ato dinyi kununa ara ninyi nirya asi teleb kubdeibkwansir.

⁹Ba, talyi uram ati lulurdana ara kanda kisibdobkwandum. Tonda, “Unanyi bira Erebdobnyi kurur,” tenen ninyi yala yuk-yuk lilibdandoka talyi tam lulurdana ababyi kanda kisibdobkwandum. Tonda, Musa ebdeibmou uram ati talyi tam lulurdana ababyi kanda kisibdobkwandum. Ato dinyi ukunung ara talyi tam kunung ati, nunda teleb kum kubsute.

¹⁰Ura, dib en uram asi takloboka yuk uram asi eterebingnyi nang ati niryi uram ton ebkwinsin. Kanci sun ato kuramingnyi nang ara ninyi kanya bowaningminingnamingnyi nang asi, “Tola uram eterebmunyei,” eboka wenebdum. Sirya wenebmaminyi bok, kan uram asi kum kekebingnyi ura, kanci sunsi tubto wenebkwandum. Ba, liki bitinyi wenebmaminyi bok, kan uram asi tuba kum kekebkingnyi ura, kanci a nang asi, “Sun dib tenen nang asi tubto eterebmunyei,” eboka bisik sekwandum.

¹¹A nang ara wenena uram asi kum kekebingnyi nang ara, “Dib en uram nun li,” teneraming deyok aryi, sundamnyi diba ati waningminingdaraming ati ebman. Ba, sun ato kuramingnyi nang ara, “Tola uram eterenub,” tenen bingdaramingiryok, tanglona kum uca tola uram eterenung. Ati, kanci a nang ati, “Malyi nang,” teneramin ci, sun etereramingnyi tola uram asi bisik sengkwandum.

¹²Ni kwit Titus, niryi nun kwit Artemas kum Tikhikus kum kan dam bokdonokwan. Ba, Artemas kum Tikhikus kum kan dam sirya yaci ura, kanda anaboka ni dam yarum teleb. Nira Nikopolis atei asi kunun ati ebman. Niryi, “Murya li tuba kurande ba, Nikopolis atei kubkwan,” tenen uram dodeibse ati ato ebman. Ati, kanci ukurlona kum uca ni dam yangana teleb.

¹³Tonda, kanci wenena uram liliboka bingnanyi si Zenas ab nun kwit Apolos ab dibniliboka milibkwandum. A bitinyi nang ara Kreta mutuk aryi anaboka binkwanding ati, kanci, “Bisik kona kum yuk dinyi kum atabcei,” tenen sunsi milibkwandum.

¹⁴Ura, nun kwityabwe dib tenen nang ara sundamnyi bitabdeibdandoka teleb dinyi akwe kununa teleb. Ati, kanci sunsi ato eboka eterebdum. Ara, talyi ati kum kubkwaming ba, nun Nai Imtamnyi urasintam aryi du moubde bok, teleb dinyi akwe kunubkwaming. Teleb dinyi akwe kunubkwamingiryi, sunci sun yuk-yuk dinyi ati ataranci nang asi dirniliboka milina teleb.

¹⁵Ni Paulus ab ni ab tonkwa kubmab nang ab nirya aryi kan Titus bisi, “Nun kwit,” ebmakib. Ba, tonda kanci neiktoto sun dib tenena deici aryi nunsi boukwe kimsunung nang asi, “Paulus biryi teleb eboka kindobmasir,” ebdum. Kan ab tonkwa kurandum dib tenen nang asi, “Teleb ebmasir,” ebdum. Nun Nai Imtamnyi biryi sunsi kisal dangsina teleb!