Read Futuna-Aniwa Filemon 1 Bible Online

Filemon 1 - Futuna-Aniwa bible

Filemon 1

¹Nun kwit Filemon teleb! Nun Paulus ab Timotius ab aryi kanti, “Nun wa irmilisurutnyi,” tenen nun boukwe weik kukununum ci, kanti kerek sekeibmakinim. Ni Paulus bira nun Du Kristus Yesus bisi milinanyi kunun deyok aryi, ninyi aryi nisi tabwe deboka tuba kalingnunung ati ebman.

²Filemon, kan kikwe kum kerek sekeibmakinim. Erda, nun Du Yesus bisi dib tenen ner Apfia bibabyi kerek sekeibmanim. Tonda, nun kwit Arkhipus bibabyi kerek sekeibmanim. Arkhipus bira katabum kanya boboka nun ab tonkwa wa irmilisurur ci, Teleb Uram lak etererutnyi biti ebmanim. Tonda, kanda Filemon ai aryi bulurandum dib tenen nang nirya ababyi kerek sekmasinim.

³Nun Nai Imtamnyi ab, nun Du Yesus Kristus ab aryi sunsi kisal dangsina teleb. Tonda, nun Nai ab, nun Du Yesus ab aryi antanibdeiboka sun kanya namin kurdeirisina teleb.

⁴Ni kwit Filemon, Ni Paulus bira nun Nai Imtamnyi bisi molonun cok, kansi tuba-tuba teneinmakiniryi nun Nai Imtamnyi bisi, “Ei ni Nai,” enun.

⁵Kanda nun Du Yesus bisi dib tenerumnyi kurum ati, niryi nun Nai Imtamnyi bisi, “Ei ni Nai,” enun. Tonda, kanci sun dib tenen nang yuk nang asi boukwe weik kimnandim ati, niryi nun Nai Imtamnyi bisi, “Ei ni Nai,” enun. Ninyi aryi kanti, “Teleb dinyi akwe kurur,” eboka nukmang asi kekebmakin ati ato enun.

⁶Niryi Filemon kanti molormilibkunun ara ato eboka molormilibkunun, “Nai Imtamnyi, Kanci nun kwit Filemon bisi milibminyi ba, erci yuk nang asi, ‘Sunbabyi nun Du Yesus bisi dib tenebdarur,’ eboka eterebkwande teleb. Ato kuboka etereranci uca, nun kwit erbabyi tabakdongoboka-tabakdongoboka Kan Imtamnyi biryi kisal dangna ara nun Du Kristus deyok aryi, karebsumwe dinyi nirya asi bikdobkwandur,” eboka ni Paulus biryi kan Filemon biti molormilikunun.

⁷Ni kwit, kanci sun dib tenen nang yuk nang asi boukwe kimnandim uca, sun kanya asi teleb kibdeibmarim. A deyok aryi, ni kanya ababyi kilkil weik kuboka katabum enurur.

⁸Ni kwit Filemon, kanda ninyi boukwe kimnanyi kurandim ati, niryi kansi molona ton molobkwinkin. Ara, “Kan wa irmilirankounyi Onesimus biryi kansi takloankou asi, kanci ersi tubto dobdobdum,” eboka molobkwinkin. Nira nun Du Kristus biryi bokdonoknounyi kunun ati, niryi ilil asa kum uca kansi kanya luknubdongoboka, “Onesimus bisi tubto dobdobdum,” eboka arukmakitinyi. Ni Paulus biryi kanda Filemon bisi ato eboka arukmakitiniryok, niryi arukoka ato kum ebkwinkin. Erda, kan ab ni ab boukwe weik kimdanunum deyok aryi, niryi kansi, “Ni molona kunubdum,” eboka molobkwinkin. Ati, ni Paulus kan nai bitonyi wisinyi kunun ati, kanci nisi bico tenebnimin ci, ni molobkwinkin uram asi kunubdum. Tonda, nira nun Du Kristus Yesus deyok aryi, tabwe debneinyi kunun ati, kanci nisi bico tenebnimin ci, ni mi Onesimus bira tubto dobdobdum ati molobkwinkin. Onesimus bira kansi takloboka bindobmou ani, ni dam yanmou. Yanmou ura, erci ni tabwe debneinyi bisi teleb kurdeirirur ati ebman. A deyok aryi, ni Paulus biryi Onesimus bit(...)

¹¹Minob ura Onesimus bira kan wa irmilirankou talak ara, erda sulbalyi asa akwe kuramwe ba, kanci erti, “Wa teleb kuboka kum irutnyi, talinyi bica,” teneramumwe. Bok, ukuryok ara erbabyi nun Du Kristus bisi milinanyi kibdobwe ati, erci kan Filemon ab, ni Paulus ab asi teleb kurdeisurur ci, busul kuboka nun wa irmilisurur.

¹²Onesimus bira ni Paulus bisi diboka dirniliranou ati, niryi ersi boukwe weik kunun. Ati, ukuryok ara niryi ersi kan dam bokdonokman ati, kanci ersi, “Ni kwit Paulus boukwe weik kurutnyi sirya yanmar,” tenen kibdobkwandum.

¹³Ati, ni Paulus biryi ato teneransise, “Ni kwit Filemon atam kum kurur ati, erci nisi dibnilibman kum. Ba, nun kwit er wa irmilinanyi Onesimus ni dam kurur ati, erci er nai Filemon bisi unubdiryi, nisi dibnilibnute.” Ati, ni Paulus biryi Onesimus biti ato tenebmase. “Ni ab tonkwa kubnimiryi, Onesimus biryi dibniliboka nira Teleb Uram deyok aryi, tabwe debneinyi bisi tuba dibnilibnute.” Ato tenen kuranse.

¹⁴Ato tenebmasiryok, niryi Onesimus bisi, “Kan nai dam tamurbirum,” eboka bokdonokmakise. Ati, kan Filemon bira Onesimus arungdeirinanyi kurum ati, niryi Onesimus bisi, “Ni ab tonkwa kubnimiryi, nisi dibnilibnurum,” kum ebmase. Kanda Filemon biryi, “Paulus bisi tuba dibnilibdum,” kum ebmarim ati, niryi Onesimus bisi, “Niti tuba dirnilirandum,” eboka kum arukmatinyi. Kanda Filemon biryi ni Paulus biti, “Teleb kubdeibkwan,” tenebnimin ci, Onesimus bisi, “Ni kwit Paulus bisi tuba dibnilibdum,” ebtum uca, ni kanya ara teleb kubnute. Ato ebtum uca, ni kanya ara teleb kubnutiryok, niryi kansi, “Ato-ato kubdum,” eboka kum arukmatinyi. Ba, kanci kan kanya aryi, “Onesimus biryi ni kwit Paulus bisi dibnilibdur,” tenebminyi uca, niryi kansi, “Ei ni kwit,” ebkitinyi.

¹⁵Onesimus bira kan ab tonkwa tiya kum kurandurumwe asi, ukura er ab kan ab antaniboka iya kubkwanturum ati ebman. Nun kwit bibabyi nun Du Yesus bisi milinanyi kibwe deyok aryi, niryi ato ebman.

¹⁶Onesimus bira kan dam tamuryaci ura, erda kan wa irmilirkurutnyi tuba kurur cok, erda tabakoka kan kwit bitonyi ton, kan boukwe weik kurumnyi kurur cok, tamuryankwamar. Erbabyi nun Du Yesus bisi milinanyi kibwe ati, niryi ato ebman. Ni Paulus biryi erti, “Ni boukwe weik kununyi,” tenenun. Ba, kanda er dam kunanyi biryi tabakdongoboka ersi iya boukwe weik kibkwandim ati ebman. Onesimus bira nun Du Yesus bisi diboka milirur aryi busul kuboka kan wa irmilibkwankir ba, kanci erti, “Ni iya boukwe weik kununyi,” tenebkwandim ati ebman.

¹⁷Ati, kan Filemon biryi ni Paulus biti, “Ni kwit,” teneranirim to, kanci nun kwit Onesimus bibabyi, “Ni kwit,” teneboka dobdobdum. Ara, kanci nisi, “Ni kwit, ni kwit,” eboka kibdobnutum to, Onesimus bibabyi neiktoto dobdobdum.

¹⁸Onesimus biryi kansi malyi kibdongoankici ura, niryi kansi dekoka unubkwankin. Tonda, erci dekoka unubkwankici dinyi suklobmaci ura, niryi kanti dekoka unubkwankin.

¹⁹Ni Paulus taruk kobdob aryi kerek sekoka deibmakin ara, “Onesimus biryi dekoka karebkici dinyi asi ni Paulus biryi unuboka dekwankin.” Ato eboka kerek sekmakin asi, Filemon kanci, “Unuboka dekniminyei,” ebmanutum. Kanci ni eterena uram deib aryi nun Du Kristus bisi milinanyi kibmumwe ati, kanci nisi dirnilinina teleb. A deyok ati, kanci nisi, “Unuboka dekniminyei,” ebmanutum.

²⁰Ni kwit Filemon, niryi kanti, “Nun Du Yesus Kristus dib tenena deici du moubkwandur,” tenen ato eboka molobmakin. Ati, kanci Onesimus bisi, “Ni kwit,” eboka dobdobdum. Ato kubminyi uca, ni kanya ara teleb kubkwanir.

²¹Ni molobmakin uram asi kanci tanglona kum uca, “Kunubkwamar ca,” tenen ni bikmakin ci, kerek sekeibmakin. Ba tonda, ni kum eboka molobmanyi to ababyi, “Kunubkwamarim,” tenen ni bikmakin.

²²Ura, sunci nun Nai Imtamnyi bisi, “Paulus bisi besi tabwe debyi ara lobdeibdum,” eboka molobmilibmanindau ara, “Nun Nai Imtamnyi biryi kunubdeibkwanir,” tenebman. Kunubdeibnici ba, sun nisi kalingdaning nang aryi tabwe lobdeibningnyi ura, nibabyi sun dam yanyi ura, kan ai mabkwan ati kiknirminingdanurum.

²³Nun kwit Epafras biryi kansi, “Teleb,” eboka kibmakir. Nun kwit bira ni ab tonkwa nun Du Kristus Yesus deyok aryi, besi tabwe debsei ba, tonkwa kununum ati ebman.

²⁴Tonda, nun kwityabwe yuk nang ababyi kansi, “Teleb,” ebmaking. Ara, nisi wa irmilinunung nang si Markus ab, Aristarkhus ab, Demas ab, Lukas ab aryi, “Teleb,” ebmaking.

²⁵Nun Du Yesus Kristus bira kisal daksiriryok, sun ab nirya tonkwa iya kuna teleb.