Read Futuna-Aniwa Ibrani 1 Bible Online

Ibrani 1 - Futuna-Aniwa bible

Ibrani 1

¹Nun aibweyabwe yuma talak kuramnyi nang asi nun Nai Imtamnyi biryi, “Nidamnyi lak kibdankwan,” tenen Erci sun Er uram ebdeibmaci to lak etereramnyi nang biriman aryi Erdamnyi lak kimdaramwe. Ati, uram yuk-yuk ebdeiboka nun Nai biryi Er uram ebdeibmaci to ebmuruboka lak etereramnyi nang biriman aryi nun aibweyabwe asi tuba-tuba lak etereramwe.

²Ani, ukuryok ara sirya kobdob talak berekmar ati, nun Nai biryi Er Mi kobdob biriman aryi nunsi dib en uram lak eteresurur. Nun Nai Imtamnyi biryi yuma kobdob talak aryi imtam tukwetam nirya kikniamwe asi Er Mi biriman aryi kikniamuryi. Tonda, nun Nai biryi nun Du Yesus bisi tikeibmou ci, imtam tukwetam dinyi nirya asi Er taruk dam karebmou. Ati, nun Du bira imtam tukwetam talena deyoknyi kurur ci, Erci Er Imtamnyi Uram ebmuruboka nunsi lak kimsurur.

³Nun Du bira Er Imtamnyi kurur to diba kurutnyi kurur ba, Erda Er Imtamnyi mikib iya weik mikib talerur ci, Er Imtamnyi berengna berengdeirisurur. Nun Du bira iya mikibnyi kurur ci, Erci imtam tukwetam nirya asi Er uram mikib biriman aryi baribdeiboka kalingsurur. Ura, nun Du bira tukwetam yuryanmou ani, nun malyi kun dinyi nirya sirya kilibkabmou ura, Erci imtam welebindoka er Imtam Sienyi siriktam aryi iya erebdob sokon burbinmou.

⁴Nun Du bira imtam ai kuboka iya erebdob sokon burbinmou ura, iya erebdob si dobdobmou ati, Er Imtamnyi Uram eryuryangan nang ababyi er amwetam kun nang kunung. Er Imtamnyi Uram eryuryangan nang ara Er Imtamnyi bisi arungna nang kunung ati, Er Imtamnyi biryi sunsi iya erebdob si kum karebmou. Ba, Erci nun Du Yesus biti, “Ni Mi,” tenen iya erebdob si karebmou.

⁵Er Imtamnyi biryi nun Du Yesus bisi ato ebmou, “Kanda Ni Mi kurum. Arub aryi Ni Imtamnyi biryi Kanti, ‘Ni Mi kurur,’ eboka lak ebman,” ebmou. (Mazmur 2:7) Tonda, “Ni Imtamnyi bira Er Nai iya kubkwan ba, Erda Ni Mi iya kubkwande,” ebmou. (2 Samuel 7:14) Er Imtamnyi biryi nun Du Yesus Kristus biti ato eboka erebdeibmou cok, Erci Er uram eryuryangan nang asi ato ebmou do? Ato tenen kum.

⁶Ura, Er Imtamnyi biryi Er Mi tentok asi tukwetam bokwetebmou ci, Erci ato ebmou. “Er Imtamnyi Uram eryuryangan nang nirya aryi kutam ikdongoboka Er si weik ebkwanung,” ebmou.

⁷Ba, Er uram eryuryangan nang ati nun Nai biryi ato ebmou, “Nira Imtamnyi biryi arukmanyi uca, Ni Uram eryuryangan nang ara kumwe ato kuboka Ni uram minola erbanung. Uk buk ara lengkerekoka mikib yirande to, ni arungna nang ara mikib kuboka ni uram erbanung,” ebmou. (Mazmur 104:4)

⁸Ba, Er Mi kobdoba asi Er Imtamnyi biryi, “Ni arungnanirimnyi,” kum ebmou. Erda, Erci Ersi erebdeiboka ato ebmou. “Kanda Imtam Sienyi kurum ati, Kan erebdob sokon ara iya tikwande. Kanda iya weik sienyi kubkwandim ci, teleb dinyi udikum kuboka kibkwandim ci, mikib kuboka kalikwandim.

⁹Teleb kunun dinyi ati kanci, ‘Teleb,’ tenerum cok, malyi kun dinyi ati, ‘Ni li,’ tenen wenerandim. Kanda iya telebnyi kurum deyok aryi, nun Nai Imtamnyi biryi Kanda Imtamnyi Mi asi wiboka tikeibkou. Ara, yuk nang kankan aryi wibdeibkou cok, Erci kansi tikeibkou. Tikeibkou cok, Erci kilkil weik kanya bobmou cok, zaitun du yung tong teleb dinyi kweboka kansi dikdongobkou,” ebmou. (Mazmur 45:6-7)

¹⁰Tonda, Er Imtamnyi biryi nun Du Yesus bisi ato eboka ebtabakmou. “Kanda Iya Erebdobnyi biryi yuma kobdob talak aryi kuramumwe, Kanci imtam tukwetam nirya asi minob kikniamumwe.

¹¹Im dangna tukwe dangna nirya kum dankwande bok, Kanda iya kubkwandim. A dinyi nirya ara ongon aling kwilingnande to nirya lubkwande bok, kanda iya kubkwandim.

¹²Ongon aling ara tiya ongoboka kwiriboka unuraming to, Kanci im dangna tukwe dangna deibloboka akubdeibmin cok, ukuryok dinyi unubkwandim. A dinyi nirya tiya akwe kurande bok, Kanda Imtamnyi bira dangurdana kum uca neiknyi kuramin ba, iya kam kubmurubkwandim,” ebmou. (Mazmur 102:25-26)

¹³Ura, nun Nai Imtamnyi biryi nun Du Yesus bisi ato ebmou, “Kanci Nira Imtamnyi siriktam buryarum. Burum ba, Niryi Kan mar ordana nang asi muna kibdongobnyi uca, Kanci yanisitabkwandim nang kibdeibkwan,” ebmou. (Mazmur 110:1) Er Imtamnyi biryi Er Mi kobdoba asi erebdeiboka ato ebmou bok, Erci Er uram eryuryangan nang asi ato kum ebmou.

¹⁴“Ati, ‘Er Imtamnyi Uram eryuryangan nang ara unato nang kunung,’ tenebtibyi do? A nang ara Er Imtamnyi arungna nang kunung ati ebman. Nun Nai Imtamnyi biryi a nang ati, ‘Sun dib tenen nang, iya kam kun dinyi dobdobkwaming nang asi dibnilibting,’ tenen tukwetam bokwetesurur,” ebmou.