Read Futuna-Aniwa Ibrani 10 Bible Online

Ibrani 10 - Futuna-Aniwa bible

Ibrani 10

¹Er Imtamnyi biryi Musa biriman aryi minob ebdeibsou uram ara kiting ula ato dinyi kurur ati, dib dinyi asi lak kum kimsurur. A uram ara dib dinyi aminda kubkwamwe dinyi lak kimnamwe ati, dib dinyi kobdob kum kurur. Kiting ula ato dinyi kuramwe deyok aryi, Musa Uram biriman aryi ninyi kanya asi teleb kubdeibman kum kurur. Ara, kwalina tuba-tuba kwalibde baramingiryok, domba sapi bisam asi oboka Er Imtamnyi bisi tuba-tuba dama deibde baramingnyi ababyi, ato dama deirin dinyi ara sun Er Imtamnyi bisi moloryankwamingnyi nang kanya asi teleb kubdeibman kum kubsute.

²Domba sapi asi oboka dama deirin dinyi ara nun malyi kun dinyi kilibman kum kubsute. Ato dama deirin dinyi ara nun malyi kun dinyi diboka kilibsute uca, ninyi kanya ara, “Malyi kuramoubwe,” tenen bingdana tuba kum kurantibyi. Uca, nunci, “Nun malyi kun dinyi sirya kilibmasou,” tenen bikdatibyi uca, nunci, “Sapi ab kambing ab oboka dama deirina ara taklobkwayeb,” ebmatibyi.

³Minob mururdeiriramnyi talak ara, “Nun malyi kun dinyi kilibsute,” tenen Er Imtamnyi bisi dama deiriramiryok, a dama deiriramnyi nang ara tanglona kum uca, “Nun malyi dinyi kubmoubwe se,” teneirdaramnyi.

⁴Sapi ining ab kambing ining ab ara nun malyi kun dinyi kum kilibmasute ati ato ebman.

⁵A deyok aryi, nun Du Yesus Kristus ninyi kibdandoka tukwetam yankou cok, Er Imtamnyi bisi ato ebmou. “Kanda Imtamnyi biryi, ‘Sapi oboka kambing oboka dama deirin dinyi ati ni li,’ tenerandim. Erda, Kanci niti nong kiknibdeiboka ninyi kibdeibmanumwe.

⁶Kan dama deirin dam asi uk dabde baramingnyi sapi to domba ton kambing ton ara kan kanya kilkil kum kubdeibkwankir. Tonda, ‘Malyi kun dinyi kilibsute,’ tenen dama deibde baramingnyi yuk dinyi ababyi Kanci, ‘Ni li,’ tenerandum.

⁷Uca, niryi, ‘A kunum yanman,’ ebmakise. ‘Nai Imtamnyi, Niryi kan teleb tenesurum to kunubdeibkwan,’ ebmakise. Ara, ‘Musa Uram umbura aryi Niti kerek sekeibmanou to, Niryi kunubkwan,’ ebmakise,” ebmou. (Mazmur 40:6-7)

⁸Ati, nun Du Yesus biryi yuma kobdob ebmou dinyi ara ato. “Kanda Imtamnyi biryi, ‘Sapi oboka kambing oboka dama deirin dinyi ati Ni li,’ tenerandim. Kan dama deirin dam asi uk dabde baramingnyi sapi to domba ton kambing ton ara kan kanya kilkil kum kubdeibkwankir. Tonda, ‘Malyi kun dinyi kilibsute,’ tenen dama deibde baramingnyi yuk dinyi ababyi kanci Ni li tenerandum,” ebmou. A dama deirin dinyi nirya ara Er Imtamnyi biryi Musa biriman aryi arukmou to deiriramnyi bok, Er Imtamnyi biryi a dinyi nirya ati, “Ni li,” teneramwe.

⁹Ato sirya ebmou ura, nun Du Yesus biryi ato ebmou. “Nai Imtamnyi, Ni Kan teleb tenerum to kunubkwan tenen a kunum sirya yanmase,” ebmou. Ati, Er Imtamnyi biryi minob dama deiriramnyi dinyi nirya asi dongtam deibmuryok, nun Du Yesus biryi Erdamnyi karebdandoka dama deirin dinyi asi unubdeibmou.

¹⁰Nun Du Yesus Kristus biryi Er Imtamnyi teleb tenesurur to diboka kunuramwe deyok aryi, nunda nun Du Yesus milin nang malyi kun dinyi sirya kilibmasou. Ara, liki tentok tum aryi Erdamnyi karebdanmou uca, nun Du Yesus biryi nun malyi kun dinyi nirya asi kilibmasou.

¹¹Sun tukwetam kuboka Er Imtamnyi kan ninyi kan noutam kuboka antanirdeirin nang ara uki-uki tuba dama deibde baramingnyi bok, Er Imtamnyi biryi a dama deirin dinyi deici aryi nun malyi kun dinyi kum kilibsute.

¹²Ba, nun Du Yesus Kristus yandoka liki tentok aryi Erdamnyi karebdanmou uca, Er Imtamnyi biryi nun malyi kun dinyi nirya asi iya kilibmasou. Ati, nun Du Yesus biryi iya teleb dama deibmou ura, Er Imtamnyi sokon siriktam asi burbinmou.

¹³Er Imtamnyi siriktam burur cok, erci, “Er Imtamnyi biryi karebnici uca, Ni ordana nang nirya asi muna kibdongobkwan,” tenen dibde burur.

¹⁴Ati, nun Du Yesus biryi Erdamnyi karebdandoka iya teleb dama deibmuryi, Erci nunda Er Imtamnyi biryi kilibde basurur nang asi iya teleb nang kibdeibwe.

¹⁵Tonda, Er Imtamnyi Kanya Roh Kudus aryi a uram ati, “Dib en uram aca,” tenen lak esurur. Ara, Er Imtamnyi Uram deici aryi Erci ato esurur.

¹⁶“Aminda kubde bankwayeb talak ara Nira Imtamnyi biryi a nang asi ukuryok mururdeirina uram ebkwan. Niryi arukwan uram lak ebniryi, sun kanya dam aryi diboka kerek sekeibkwan. Sun kanya dam asi kerek sekeibkwan ati, sunci Ni uram asi luba kum kibkwaming. Nira Imtamnyi biryi ato ebmase,” ebmou.

¹⁷A kunum sirya ebmou ura, Erci ato eboka ebtabakmou. “Ura, Nira Imtamnyi biryi sun malyi kun dinyi asi tamuboka kum teneibkwan,” ebmou. (Yeremia 31:33-34)

¹⁸Ati, nun malyi kun dinyi sirya kilibmasou deyok aryi, nunci, “Nun malyi kun dinyi kilibsute,” tenen Er Imtamnyi bisi dama tuba kum deibkwayeb.

¹⁹Ati, ni kwityabwe. Nunci, “Er Imtamnyi biryi nun malyi kun dinyi sirya kilibmasou,” tenebibiryi, nunci nun Du Yesus Er ining deici aryi ilil kum asa aryi kubibiryi, Er Imtamnyi dam kobdob kun ai ara imtam ai asi ur wengbinkwayeb.

²⁰Ati, nunci, “Nun Du dibmou ba, Erci ukuryok bublan kukeibsou uca, nunci ukuryok bisik bindoka Er Imtamnyi iya kam kurutnyi dam binkwayeb,” tenena teleb. Nun Du Er nong ara Er Imtamnyi dama deirin ai umbura ai kuramwe wilimna aling ato kuramwe ati ebman. Nun Du dibmou ba, Erci ninyi kan Er Imtamnyi kan wilimna aling ato dinyi asi kwilikoka kum daneibmou uca, nunda Er Imtamnyi dam kobdob kun ai ur wengbinkwayeb.

²¹Nun Du bira Er Imtamnyi kan ninyi kan noutam tikoka antanirdeirisin sienyi kurur. Erda, Er Imtamnyi dama deirin ai deyoknyi diboka kurur.

²²A deyok aryi, nunci, “Er Imtamnyi bisi diboka milibkwayeb,” tenebibiryi, katabum eboka dib tenebibiryi, Er Imtamnyi dam binkwayeb. Ati, nunci, “Nun malyi kun dinyi nirya sirya kilibmasou,” tenebibiryi, “Malyi kun dinyi kuramoubwe,” tenen bingdana tuba kum bingdamibiryi, “Er Imtamnyi biryi dobdobmasou nang kunub,” tenen bingnamibiryi, Er Imtamnyi bisi molorbinkwayeb.

²³Ati, Er Imtamnyi biryi ebdeibsou to diboka kunubkwansir deyok aryi, nunci Er ebdeibsou to katabum eboka talebnurubde binkwayeb. Ara, nun lak eramib dibde bun dinyi asi taklobibyei.

²⁴Ura, nunci nun mamun kalikdana teleb. Ara, mamun milibdandoka nunci boukwe kibdandoka dibnilibdankwayeb.

²⁵Ninyi ton nang ara, “Dib tenen nang aryi bulubmangnyi bok, nunda kum milibkwayeb,” tenen kuraming. Sunci ato tenen kubmunyei. Erda, sun dib tenen nang yuk nang bulubmangnyi ba, sunbabyi buluboka yandarur. Sun nirya tonkwa bulubmamunyi uca, sunci, “Nun Du imtam aryi kuboka tamuryankwande uki tum dam kibmar,” tenen sun mamun katabum ebdeibdandarur.

²⁶Sun teneiboka, “Malyi kun dinyi kunubmurubde binkwayeb,” tenen nang asi Er Imtamnyi biryi kum kilibkwande. Ati, sun nun Du Yesus deyok ati dib en uram sirya kekebingnyi nang ara nun Du Yesus bisi takloboka malyi kun dinyi kunubde baramingnyi uca, Er Imtamnyi bisi dama deirin dinyi yuk dinyi kum kubkwande ati, sun malyi kun dinyi ara kilibman kum kubkwande.

²⁷Sun ato kuboka malyi kuramingnyi nang asi Er Imtamnyi biryi diba ati wenebkwande. Sun ato kuramingnyi nang asi Er Imtamnyi biryi, “Ni ordana nang kunung,” tenen ilila uk buk angdur mekwan ai donokde uca, a uk ara a nang nirya asi iya yibkwande.

²⁸Sun Musa Uram asi yan yaniramnyi nang ara bico tenena kum uca diboka oramnyi. Ara, ninyi bitinyi kum winiryi kum aryi asing eibmai ci, “Ato-ato kuboka malyi kubmar,” lak ebmai ura, a malyi deyok lilirdeirinanyi biryi, “Musa Uram yan yanibmar ati anyi bisi obdarur,” eboka uram dobdeibmou uca, diboka oramnyi.

²⁹Ura, nunci sun Er Imtamnyi Mi kobdob uram asi ina ngilingnamingnyi nang ati unato dinyi ebkwayeb do? Er Imtamnyi biryi sun ato kun nang asi wenena kum kubkwande do? Ato tenen kum. A nang ara Er Imtamnyi mururdeirin ining ara malyi kun dinyi aryi kilibmasou ining ati, “Talyi dinyi aca,” tenenung ati, Er Imtamnyi biryi sunsi tabakoka wenebkwande. Tonda, sunci Er Imtamnyi Kanya Roh Kudus nun kisal dangsurutnyi bisi ina ngilingnaming ati, Er Imtamnyi biryi sunsi wenebkwande wenena ara ikin weik kubkwande.

³⁰Ara, Er Imtamnyi biryi a deyok ati ato ebmou. “Nira Imtamnyi bira wenena deyoknyi kunun. Niryi malyi kun nang asi dekeiboka wenebkwan,” ebmou. Tonda, “Nira Imtamnyi biryi Ni dam kun nang asi wenebkwan,” ebmou. (Ulangan 32:35-36)

³¹Nun Nai iya kam kurutnyi biryi, “Weik wenena aryi wenebkwan,” tenerande ati, sun Ersi ina ngilingna nang ara mambul weik kubkwaming.

³²Ati, ni kwityabwe. Sunci minob kurandau to tamuboka teneibdarur. Ara, Er Imtamnyi biryi sunsi berekeibmasou uca, dib tenerandau cok, mambul dinyi ilinto borandau. Ninyi aryi sunsi mambul dinyi ilinto takurdeiriransei bok, sunci tanglona kum uca dib tenermururandau.

³³A kubde barandau talak ara ninyi urasintam aryi ina ngilikde baransei. Tonda, mambul kurdeiriransei. Tonda, yuk nang asi ina ngilikde baramnyi bok, sunci, “Nunbabyi neiktoto ato kuboka malyi kubdeibsingnyi bok, nunci nun Du Yesus bisi dib tenebmurubkwayeb,” tenen kurandau.

³⁴Ura, malyi nang dongon ai dongoramingnyi nang asi mambul kurdeiriraming to sunbabyi malyi kurdeiriransei. Tonda, sun ai dam kurande dinyi nirya asi arabde baramnyi bok, sunci kilkil kanya boboka nun Du Yesus bisi milibmurubde barandau. Ara, “Nun Nai biryi nunsi imtam dinyi iya karebkwansir ati, nun tukwetam bona bon dinyi ara tiya dinyi akwe kurande asi ur arabkwaming,” tenen kurandau.

³⁵Ati, sunci ilil kuna kum kanya borandau to, ukuryok ababyi ilil kuna kum kanya bobmurubdarur. Ara, “Er Imtamnyi biryi nunsi kisal dakwansir,” tenebmun ci, ilil kanya bobmunyei.

³⁶Ati, sunci namin kanya boboka dibde buramun cok, Er Imtamnyi teleb tenesurur to kunuramunyi ani, Er Imtamnyi biryi ebdeibsou to kunubkwansir.

³⁷Er Imtamnyi Uram umbura aryi ato esurur, “‘Er Imtamnyi lemyankwansir,’ tenen dibde bukdarur. Uki-uki mitikanun bisibci ura, Erda lemyankwandanyi biryi ukurlona kum uca lemyankwamasir.

³⁸Sun Nira Imtamnyi urasintam aryi teleb kunun nang ara dib tenena biriman aryi kam kubkwaming. Ba, sun Niti, ‘Dib tenena nun li,’ tenen nang ati Nira Imtamnyi biryi dokdonokwan,” ebmou. (Habakuk 2:3-4)

³⁹Ura, nunda Er Imtamnyi biti, “Dib tenena nun li,” tenena nang kum kunub. Ati, Er Imtamnyi biryi nunsi iya kum wenebkwansir. Erda, nunda Er Imtamnyi bisi diboka dib tenenub nang kunub. Ati, Er Imtamnyi bira nunsi iya lebdeibkwansir.