Read Futuna-Aniwa Ibrani 11 Bible Online

Ibrani 11 - Futuna-Aniwa bible

Ibrani 11

¹Dib tenena ara katabum en tenen dinyi kurur. Dib tenena biriman aryi nunci Er Imtamnyi ebdeibsou uram dibde bunub ati, “Diboka kunubkwansir,” tenen bingnub. Tonda, dib tenena biriman aryi nunci asing kum eirinub dinyi ati, “Dib kurur,” tenen bingnub.

²Sun minob kuramnyi nang ara Er Imtamnyi bisi dib teneramnyi deyok aryi, Er Imtamnyi biryi sunsi kisal dangnamwe.

³Dib tenena biriman aryi nunci, “Im dangna tukwe dangna nirya ara Er Imtamnyi Uram biriman aryi kiknibmou,” tenen bingnub. Ati, dib tenena biriman aryi nunci, “Asing eirinub dinyi ara asing eibman kum dinyi aryi kuboka kubkalibmou,” tenen bingnub.

⁴Dib tenena biriman aryi nun aibwe Habel biryi Er Imtamnyi bisi dama deibmou ba, Er Imtamnyi biryi er dama dobdobmou. Ba, Habel er du Kain bibabyi dama deibmou bok, Er Imtamnyi biryi a dama ati, “Ni li,” tenebmou. Nun aibwe Habel bira Er Imtamnyi bisi dib teneramwe deyok aryi, Er Imtamnyi biryi erti, “Ni urasintam teleb kunanyi,” eboka, “Er dama deibmanir asi dobdobkwan,” eboka kisal dakmou. Nun aibwe Habel sirya dibmou bok, ninyi aryi ersi tuba teneiriraming. Ara, er dib teneramwe deyok aryi, ninyi aryi ersi tuba teneiriraming.

⁵Dib tenena biriman aryi nun aibwe Henokh bira kum dibmou. Erda, Er Imtamnyi biryi ersi nabmou ura, erda kam kibmaning imtam tomobwelebmou. Ati, ninyi aryi, “Henokh bira dantam binmar do?” tenen ingkirikmai bok, er nong asi kum eibmai. Nun aibwe Henokh bira tukwetam tuba kuramuryi, Er Imtamnyi urasintam aryi teleb dinyi kunuramwe ati, Er Imtamnyi biryi ersi kisal dakmou. [2]

⁶Sun dib tenena kum kuramingnyi nang ati Er Imtamnyi biryi kum dobdobkwande. Sun Er Imtamnyi dam binmangnyi nang ara nun Nai bisi dib tenebkwanung. Ara, “Er Imtamnyi diboka kurur,” tenebkwanung. Tonda, “Er Imtamnyi bira sun Ersi ingkiringnamingnyi nang asi lebkwansir,” tenebkwanung. Sun ato dib tenebmangnyi nang asi Er Imtamnyi biryi kisal dakwande.

⁷Dib tenena biriman aryi nun aibwe Nuh biryi Er Imtamnyi Uram asi kekeramwe. Ara, Er Imtamnyi biryi, “Ilila on me karebnyi uca, im dangna tukwe dangna nang nirya me isin dakoka dibkwaming,” ebmou asi Nuh biryi dib teneramwe. Ara, ilila on me asi asing kum eiriramuryok, erci ilila co ngun-ngun doramwe. Ura, Er Imtamnyi biryi ilila on me karebmou ba, Nuh ab er mabwe silib ab aryi ilila co ngun-ngun wekmai ura, lemdarbinmai. Ato kuboka Er Imtamnyi biryi sun im dangna tukwe dangna kuramnyi nang nirya asi wenebmou cok, Erci Nuh bisi lebmou. Ati, Nuh bira Er Imtamnyi bisi teneramwe deyok aryi, Er Imtamnyi biryi erti, “Ni urasintam aryi teleb kunanyi kurur,” eboka kisal dakmou.

⁸Dib tenena biriman aryi nun aibwe Abraham biryi Er Imtamnyi Uram asi kekeramwe. Ara, Er Imtamnyi biryi, “Kan kurandim atei aryi anabdobmin ci, yuk mutuk birum,” eboka nabmou uca, Abraham biryi er kuramwe atei aryi anaboka Er Imtamnyi biryi ersi ebdeibmou mutuk binmou. Ara, “Dan mutuk asi bobinkwanir do?” tenen kum bingnamuryok, erci Er Imtamnyi biryi ersi ebdeibkwamwe mutuk binmou.

⁹Dib tenena biriman aryi er Abraham Kanaan mutuk sirya yanmou ura, tingyangananyi bitonyi kuramwe. Ara, Er Imtamnyi biryi ersi, “A mutuk ara aminda aryi karebkwankin,” ebmou bok, erda Kanaan mutuk kum taleramwe. Ati, Abraham bira keis ol ai akwe kuramuryi, Kanaan mutuk kum taleramwe. Tonda, er mi Ishak ab Ishak mi Yakub ababyi neiktoto kurandei. Er Imtamnyi biryi sunbabyi, “Kanaan mutuk asi aminda aryi karebkwansin,” ebdeibmou bok, sunbabyi neiktoto Kanaan mutuk kum talerandei.

¹⁰Nun aibwe Abraham bira Er Imtamnyi karebkwamwe iya teleb atei dibde buramwe ati ebman. Akatei ara ninyi aryi dobman kum. Erda, Er Imtamnyi biryi, “Ato-ato kuboka dobkwan,” tenen dobkwamwe asi Abraham biryi dibde buramwe. Akatei ara Er Imtamnyi biryi dobmou atei ara iya kubkwande.

¹¹Dib tenena biriman aryi nun aibwe Abraham biryi er mi Ishak deibmou. Ati, Abraham ab er ner Sara ab aryi, “Er Imtamnyi bira tola uram en kumnyi biryi nunsi, ‘Mi deibkwandurum,’ eboka ebdeibsou to diboka kunubkwansir,” tenen Er Imtamnyi bisi dib tenerandei. Ara, nun aibwe wise danmou bok, er ner Sara mi deibman kum ner kuramwe bok, nun aibwe ab nun tat ab aryi sun mi Ishak deibmarei.

¹²Ati, nun aibwe Abraham iya wise dandobmunyi kuramuryok, er mi Ishak bisi deibmou. Ura, nun aibwe er yala nang ara yal daknin baramnyi. Imtam aryi kuboka kurya ara nukman kum kunung to, nun aibwe yala nang ara ilinto kubmai. Tonda, ilila mekwan katum dam kuboka me wininga du ara ilinto kurur to, nun aibwe yala nang ababyi neiktoto ilinto kunung.

¹³A minob kuramnyi nang ara dib teneramnyi ba, sirya dibmai. Ara, Er Imtamnyi biryi sunsi, “Ato-ato kuboka karebkwansin,” eboka erdeiriramwe bok, sunci Er Imtamnyi biryi a dinyi nirya kunubkwamwe talak asi kum eiriramnyi. Ati, sunci, “Er Imtamnyi biryi aminda aryi kunubkwande,” tenen bingnamiryok, “Minola kunubkwandur,” tenen dibde buramnyi. Dibde buramiryi, sunci, “Nunda tukwetam kuramib ara tingyangana nang ato kunub,” eboka lak eramnyi.

¹⁴Sun ato eboka lak eramingnyi nang ara, “Iya kubkwayeb atei ingkiringnub,” tenena akwe kuraming.

¹⁵Ati, sunci, “Nun anabdobmoubwe Ur Kasdim atei asi tamurbinkwayeb,” tenena kum kuramnyi. Ato tenebmatingnyi uca, sunci ur tamurbinmatingnyi.

¹⁶Erda, sunci, “Iya teleb mutuk bitibyi,” tenen, “Imtam ai wengbitibyi,” tenen dibde buramnyi. A deyok aryi, nun Nai Imtamnyi biryi a nang minob kuramnyi nang ati alyi kum kurur. Erda, nun Nai biryi sunbabyi iya teleb atei doboka kiknibminikmou. A deyok aryi Erci sunti, “Ni Imtamnyi sun dam kunanyi iya kubkwan,” eboka lak erur.

¹⁷Dib tenena biriman aryi nun aibwe Abraham biryi er mi Ishak bisi doboka Er Imtamnyi bisi dama deirirbinmou. Ara, Er Imtamnyi biryi Abraham bisi, “Ni uram diboka kekerur do kum do?” tenebmou ci, “Kan mi bisi oboka dama deibnurum,” eboka ukubdenmou ba, Abraham biryi Er Imtamnyi biryi ebdeibmou to kunubmou ci, er mi tentok deibmounyi bisi dama deirirbinmou.

¹⁸Ara, Er Imtamnyi biryi Abraham bisi uram ebdeiboka, “Ishak biriman aryi kan yala nang ara ilinto kubkwaming,” ebmou. (Kejadian 21:12) Ato ebmou bok, er Abraham biryi er mi Ishak bisi dama deirirbinmou.

¹⁹Ati, Abraham biryi, “Ishak bisi dama deiboka obtinyi ababyi Er Imtamnyi biryi ersi kam bukeibman ati mikib kurur,” teneramuryi, Er Imtamnyi bisi dib tenebmou. Dib tenebmou ba, Er Imtamnyi biryi, “Kan mi obminyei,” ebmou ci, Ishak bisi leboka er nai Abraham bisi tamuboka karebmou. Ara, Ishak bira diboka obkwamunyi kubmou bok, Er Imtamnyi biryi, “Diba obminyei,” ebmou deyok aryi erda kikliboka kam bukeibmounyi bitonyi kubmou asi Abraham biryi tamuboka dobdobmou.

²⁰Dib tenena biriman aryi nun aibwe Ishak biryi, “Er Imtamnyi biryi sunsi kisal dakwande,” eboka er mabwe Yakub ab Esau ab asi kisal dakmou.

²¹Dib tenena biriman aryi nun aibwe Yakub dibkwabmuryi, er mi Yusuf mabwe bitinyi asi kisal dakmou. Ara, er yiban kama talebmuryi, erci Er Imtamnyi si weik ebmuryi, Yusuf er mabwe kisal dakmou. [3]

²²Dib tenena biriman aryi nun aibwe Yusuf dibkwabmuryi, er mabwe asi aminda kubkwamwe dinyi asi minob eboka lak kibmou. Ara, “Nun Israel yala nang ara aminda aryi Mesir mutuk aryi anaboka Kanaan mutuk tubto binkwaming,” eboka lak kibmou. Lak kibmuryi, erci sunsi ato ebdeibmou, “Kanaan mutuk tamuboka binkwandum ba, sunci ni nong asi doboka Kanaan mutuk bobindoka tukwe dongobdarur,” ebmou.

²³Dib tenena biriman aryi nun aibwe Musa er nai ab er kwin ab aryi sun mi Musa bisi deibmarei ura, inibdeibmarei. Ara, “Mesir weik sienyi arungna nang aryi nun mi obingnyei,” tenen sun nang bitinyi aryi sun mi asi inibdeibmarei ura, wala winiryi kubde baramnyi. Ati, sunci sun mi ukuryok deibmarei asi asing eibmarei ci, “Teleb mi kurur ati ninyi obingnyei,” tenerandei. Tonda, Mesir weik sienyi biryi, “Sun Israel yala nang aryi ukuryok deibmang mabwe asi obdarur,” eboka arukmou bok, sun nang bitinyi ara ilil kuna kum uca sun mi inibdeibmarei.

²⁴Dib tenena biriman aryi nun aibwe Musa biryi nebdobmou ura, “Mesir weik sienyi nebnyi biryi kwaknanse mi tuba kuna ni li,” tenebmou ura, Mesir weik sienyi ai tuba kum kuramwe.

²⁵Ati, erci, “Mesir nang ara malyi dinyi akwe kuraming ati, ni sun ab tonkwa mitik talak ababyi tuba kubmurubibyei,” teneramwe. Tonda, nun aibwe biryi ato teneramwe. “Sun Mesir nang ara ni yala nang Israel yala nang asi mambul weik dinyi takurdeiriraming bok, niryi ni yala nang ara Er Imtamnyi dam kun nang ab tonkwa kubibiryi, nibabyi mambul dinyi borantinyi,” teneramwe.

²⁶Ati, nun aibwe biryi ato teneramwe. “Mesir mutuk kuboka bona bon dinyi ilinto kurur asi ni kum dobtalebtinyi. Erda, ni yala nang ab tonkwa kubibiryi, nira kilkil kanya boboka nun Du Yesus aminda lemyankwansiranyi deyok aryi mambul dinyi ababyi bobtinyi,” teneramwe.

²⁷Dib tenena biriman aryi nun aibwe Musa biryi ilil kun kum kanya boboka sun Israel yala nang asi Mesir mutuk aryi kuboka bobinmou. Ati, erci, “Mesir mutuk weik sienyi biryi nisi obnicei,” tenen kum kuramwe. Erda, erci er Imtam sienyi asing eibman kumnyi bisi er kanya deibmou ura, erci, “Mesir mutuk tamurbinkwayeb,” tenena kum kuramwe.

²⁸Dib tenena biriman aryi nun aibwe Musa biryi, “Weik kwalina si Paskah kwalibdarur,” eboka arukmou. Ati, erci, “Er Imtamnyi biryi sun Mesir nang asi wenebkwande ati er arungnanyi ninyi onanyi bisi bokwetebkwande,” tenen bikmou. Ato tenen bikmou ati, erci, “Ninyi onanyi nun Israel yala nang ai ababyi wekoka nun kankan aryi du deibmoubwe nang ababyi obcei,” tenen erci sun Israel yala nang asi ato eboka arukmou. “Domba mi obmunyi ura, domba mi ining asi doboka sun ai bublan dam lubdarur. Ara, ‘Er Imtamnyi bokwetebkwandanyi nun ai wekoka nun kankan kuboka mabwe du deibmoubwe mabwe ababyi obcei,’ tenen domba mi ining asi bublan dam lubdarur,” ebmou.

²⁹Dib tenena biriman aryi sun Israel yala nang ara Mesir mutuk aryi anabmai ura, ilila mekwan si Ina mekwan asi kourbinmai. Ara, Er Imtamnyi biryi a mekwan me asi bokoka ninyi kourbin bisik karebmou uca, sun Israel yala nang ara ilim bisik bindoka kourbinmai. Ura, sun Mesir nang aryi domkiringmai cok, “Nunbabyi kourbinkwayeb,” tenen ukubdenmai bok, Ina mekwan me aryi sun nirya siklibmou.

³⁰Dib tenena biriman aryi sun Yerikho atei aknabdongon lika mikib asi yuk sakmou. Ati, uki tabaryi kubmai cok, sun Israel yala nang aryi Yerikho atei aknabdongoboka binmai. Binmai ani, Er Imtamnyi biryi karebmou uca, Yerikho lika mikib dinyi asi sakmou ura, sun Israel yala nang aryi akatei wekoka muna kibdongobmai.

³¹Dib tenena biriman aryi talyi yortamne ner si Rahab biryi sun Israel yala nang aryi bokdonokmai Yerikho atei minob diryanmarei nang bitinyi asi du dongobmou. Du dongobmou ati, sun Israel yala nang aryi sun Yerikho atei nang malyi kuramnyi asi onmai ura, Rakab bisi kum obmai.

³²Ura, niryi dib teneramnyi nang yuk nang si siboka ebtabakwan do? Gideon dib teneramwe to nuktabakwan do? Barak biryi dib teneramwe to nuktabakwan do? Tonda, nun aibweyabwe si Simson ab, Jefta ab, Daud ab, Samuel ab aryi dib teneramnyi to nuktabakwan do? Tonda, sun Er Imtamnyi Uram ebdeibmaci to ebmuruboka lak etereramnyi nang aryi dib teneramnyi to nuktabakwan do? Niryi cang uram kum ebtinyi uca, a nang aryi dib teneramnyi deyok yuk-yuk liliboka kum ebkwan.

³³Dib tenena biriman aryi sun minob kuramnyi dib teneramnyi nang aryi weik sien nang asi muna kimdongoramnyi. Dib tenena biriman aryi sunci Er Imtamnyi urasintam aryi teleb dinyi akwe kunuramnyi. Tonda, dib tenena biriman aryi sunci Er Imtamnyi biryi ebmou kisal dangna dinyi dororamnyi. Tonda, yu bisam si singa kankan kuramnyi asi oyibkwamai bok, sunci dib tenena biriman aryi, “Oyibsumunyei,” eramnyi uca, singa aryi sunsi oyina kum kuramnyi.

³⁴Ura, ninyi aryi sunti, “Nun li,” tenen uk dongoramnyi bok, sunda dib tenena biriman aryi ur tuba kuramnyi. Tonda, ninyi aryi, “Ninyi on ya doboka obkwayeb,” tenen ukurderamnyi bok, sunci dib tenena biriman aryi lemdandobde baramnyi. A nang ara mitang kuramwe bok, dib tenena biriman aryi mikib kibde baramnyi. Ati, sunci mikib kuboka sun ordana nang yuk mutuk aryi kuboka oryangaramnyi nang ab obdandoka muna kimdongoramnyi.

³⁵Nerabwe ara dib tenena biriman aryi Er Imtamnyi bisi molobde baramnyi uca, Er Imtamnyi biryi karebmou uca, sun akenyabwe dibmai nang asi tubto kam bungdoramnyi. Ba, yuk dib tenen nang ara ninyi aryi, “Obkwayeb,” tenebmai ci, “Dib tenena kum taklobmunyi ura, obkwayeb,” ebmai bok, sunci, “Er Imtamnyi bisi tanglona kum uca dib tenebkwayeb,” ebmai. Ara, ninyi aryi sunsi mambul kubdeiboka obkwamai bok, sunci “Er Imtamnyi biryi nunsi iya kam bukeibkwansir,” tenen tanglona kum uca dib tenermururamnyi.

³⁶Ton dib teneramnyi nang asi ninyi aryi ina ngilingnamnyi. Yuk dib tenen nang asi ninyi aryi kulab-kulab eramnyi. Yuk dib teneramnyi nang ara ninyi aryi tabwe deboka ninyi wenen ai dam dongobde baramnyi.

³⁷Ton nang ara keil aryi doboka obde baramnyi. Yuk dib teneramnyi nang ara gergaji aryi sekoka oramnyi. Yuk dib teneramnyi nang ara ninyi on ya aryi ya sekoka oramnyi. A dib teneramnyi nang ara bona bon nang kum kuramiryi, malyi ongon aling akwe ongororamnyi. Domba otong aling totoa kambing otong aling totoa aryi kiknibmai ongon aling asi ongororamnyi asi ninyi aryi sunsi domkirikoka mambul weik kurdeiriramnyi.

³⁸A dib teneramnyi nang nirya ara Er Imtamnyi urasintam aryi teleb dinyi akwe kunuramnyi deyok aryi, tukwetam kuraming malyi nang kankan asi kurmuruna kikib kum kurur. A nang ara ninyi kun kum mutuk lemdarbindoka mutuk kon keil umbura dam ton siling um bisik asi kuramnyi.

³⁹A minob kuramnyi nang nirya ara nun Nai bisi dib teneramnyi deyok aryi, Er Imtamnyi biryi sunsi kisal dakmou. Ati, sunci Er Imtamnyi biryi ebdeibsou to dibde buramiryok, sunci kununa dinyi kum dobde baramnyi.

⁴⁰Ati, nun Nai Imtamnyi biryi, “Aminda kunubdeibkwan,” teneramwe ati, Erci sun minob kuramnyi dib tenen nang asi kum kunubdeibmou. Erda, Erci nunda aminda kubde binkwamoubwe nang talak aryi kunubdeibkwamwe. Ati, nun Nai biryi, “Sun minob kuramnyi dib tenen nang ab sun aminda kubkwamingnyi dib tenen nang asi antaniboka teleb kubdeibkwan,” teneramwe ati, Erci Er minob ebdeibsou uram asi ukuryok kunurdeirisurur.