Read Futuna-Aniwa Ibrani 12 Bible Online

Ibrani 12 - Futuna-Aniwa bible

Ibrani 12

¹Ati, nunda ukuryok talak kubde baramib dib tenen nang aryi tanglona kum uca dib tenebkwayeb. Ati, nunci, “Nun aibweyabwe minob kuramnyi dib tenen nang nirya aryi dib tenermururamnyi to, nunbabyi neiktoto dib tenebmurubkwayeb,” tenena teleb. Ati, nunci, “Dib tenena ati bisik sekmanto dinyi nirya bai donokwayeb,” tenen nunci malyi kun dinyi nun tabwe ola debmanto dinyi ab yuk bisik sekmanto dinyi ab bai donokmabyi uca, tanglona kum uca dib tenebkwayeb. Cukoka ban nang ara, “Cungbana bisik sirya kobdob dam minola bitinyi,” tenen ikin dinyi bobana kum kuraming to, nunbabyi neiktoto ikin dinyi ab, bisik sekmanto dinyi ab, bai donokoka cung bankwayeb.

²Ati, nunci, “Dib tenebmurubkwayeb,” tenen nun Du Yesus bisi diboka teneibkwayeb. Nun Du bira dib tenena deyoknyi kurur cok, dib tenena katabum erdeirisinanyi kurur ati ebman. Nun Du bira tukwetam tuba kuramuryi, “Co lase deici aryi ur deibkwaning,” tenen, “Ninyi aryi nisi ina ngilikwaning,” teneboka bingnamuryi, Erci tanglona kum uca Er Imtamnyi bisi dib teneramwe. Nun Du bira tanglona kum uca Er kanya Er Imtamnyi bisi deiriramwe ura, Er Imtamnyi biryi Ersi erebdeibmou ura, Erda Er Imtamnyi erebdob sokon siriktam asi burbinmou.

³Ati, sunci, “Nun Du bira iya mambul dinyi boramwe,” tenebdarur. Ara, malyi kun nang aryi nun Du Yesus bisi dumderamnyi uca, nun Du Yesus bira tanglona kum uca Er Imtamnyi bisi dib tenermururamwe. Ati, sunci nun Du Yesus biti tenebmunyi uca, sun kanya ara mitang kum kubkwansir.

⁴Nun Du bira, “Malyi kun dinyi kum daneibkwan,” teneramuryi, mambul weik kuboka Er ining diksakmou ati sunci tenebdarur. Ati, sunbabyi, “Malyi kun dinyi taklobkwayeb,” tenen nun Du Yesus bito mambul kanya boboka sun ining diksakmarum do? Ato tenen kum.

⁵Ati, sunci mambul kanya bona kum. Er Imtamnyi biryi sunti, “Bitabdeibkwan,” tenen wenebmasici ababyi sunci mambul kanya bobmunyei. Er Imtamnyi biryi katabum erdeirin uram asi luba kibmarum do? Er Imtamnyi biryi sunti, “Ni mabwe nermabwe,” teneirisurur ati luba kibmunyei. Ati, nun Nai Imtamnyi biryi ato eboka esurur, “Ni mi, kekebdum. Nun Nai biryi kansi yan memebkici ba, kanci, ‘A uram kum kekebkwan,’ tenebminyei. Ba, Er Imtamnyi biryi kansi wenebkici ba, kan mambul kanya bobminyei.

⁶Nun Nai bira Er boukwe kurur nang asi bitardeirirur. Tonda, sun, ‘Ni mabwe kibdeibkwan,’ tenen nang asi wenesurur. A deyok aryi Er Imtamnyi biryi wenekina uram asi kanci teleb kanya boboka dobdobdum,” ebmou. (Amsal 3:11-12)

⁷Ati, sunci, “Er Imtamnyi biryi nisi mambul kubdeibmanir,” tenen kurandum cok, sunci, “Er Imtamnyi biryi bitabdeibkwande ati wenebmanir,” tenena teleb. Er Imtamnyi biryi sunti boukwe kiboka, “Ni mabwe nermabwe,” tenen bitardeirisurur. Nunda tukwetam kuramib naiyabwe ababyi nun mabwe nermabwe ati, “Bitabdeibkwan,” tenen weneramib to, nun Nai Imtamnyi biryi neiktoto nunda Er mabwe nermabwe asi wenesurur.

⁸Er Imtamnyi biryi sunsi kum wenebsici uca, sunda Er Imtamnyi mabwe nermabwe diboka kum kurandum. Er Imtamnyi biryi Er mabwe nermabwe nirya asi bitabdeiboka wenesurur ati ebman.

⁹Ura, nun naiyabwe tukwetam kun nang ara nunsi weneransingnyi bok, nunci, “Nun nai,” tuba teneramib. Ura, nun Nai Imtamnyi biryi nunsi wenebsici ba, nunci, “Nun li,” ebkwayeb do? Ato tenen kum.

¹⁰Nun naiyabwe tukwetam kun nang ara nunsi tiya weneransingiryi, sun teleb tenebmangnyi to weneransing. Ba, nun Nai Imtamnyi biryi, “Bitabdeibnyi uca, ni kunun to kiboka malyi kun dinyi utotoa tuba kum kunubkwaming,” tenen nunsi weneransir.

¹¹Wenesina talak ara nunci kilkil kanya kum boramib. Erda, mambul kanya boramib. Ura, wenesina asi sirya boramibyi uca, nunci du mouboka Er Imtamnyi urasintam aryi teleb dinyi kunubkwamib. Tonda, teleb dinyi kubmabyi uca, nunda kilkil kanya bobkwamib.

¹²Ati, sunda wenesina deyok aryi, mambul weik kurandum cok, sunci tamuboka busul kubdarur. Ati, sunci sun taruk erebdeiboka sun kutam ikiboka busul tubto kubdarur.

¹³Tonda, sunci udikum bisik akwe bindarur. Ara, “Nun kankan aryi kuboka yan malyi kuanci nang sakingnyei,” tenen, “Erda, lobdobting,” tenen udikum bisik akwe bindarur. Ati, sun malyi kun dinyi kubtabakmunyei. Erda, sunci sun malyi kun dinyi takloboka bitabdeibdandarur.

¹⁴Ura, sunci busul kuboka, “Yuk nang ab tonkwa antanibdobkwayeb,” tenen kubde bindarur. Tonda, “Malyi kun dinyi nirya bai donokwayeb,” tenen Er Imtamnyi dam kun nang kubdarur. Malyi kun dinyi bai donongna kum kuramibyi uca, nunda Er Imtamnyi ai asi wengna kum kubkwayeb ati ebman.

¹⁵Nun Nai Imtamnyi biryi boukwe weik kuboka sunti, “Ni mabwe nermabwe,” tenen dobdobmasou ati, sunci danguboka, “Malyi kun dinyi tamuboka kunubkwayeb,” tenena kubmunyei. Sun Er Imtamnyi bisi tangloramingnyi nang ara sik yala ato nang kuraming. A nang ara yuk nang ilinto asi dangdongoraming ba, ninyi ilinto aryi Er Imtamnyi bisi taklobkwaming.

¹⁶Sun kankan aryi kuboka ninyi tentok ababyi nun aibwe Yakub er du Esau bitonyi kibcei. Esau bira ner talyi yoramunyi kuramuryi, Er Imtamnyi Uram diboka kum kekeramwe. Ati, sunci er kuramwe to kubmunyei. Er nai Ishak biryi Esau bisi kisal dakante bok, erci a kisal dangna dinyi ati, “Malyi dinyi aca,” teneramuryi, er weit Yakub bisi kareblobmou. Ati, erci, “Ni weit aryi kiknibmar yina asi yibtinyi se,” tenebmuryi, erci er nai Ishak biryi ersi karebmote kisal dangna dinyi asi kareblobmou.

¹⁷Ura, kisal dangna dinyi sirya kareblobmou ura, erci, “Ni nai biryi nisi kisal daknute,” tenen kuramwe. “Kisal daknurum,” eboka molonmou uca, er nai Ishak biryi ersi kisal kum dakmou. Ati, Esau bira mambul kuboka engenmou cok, erci kisal dangna udikum dinyi kum dobdobmou.

¹⁸Sunda ukuryok talak kubde barandum dib tenen nang ara ninyi kanya ilil kurdeirin ai dam kum yanmarum ati ebman. Minob talak aryi sun Israel yala nang yanmai mutuk ara Sinai mutuk kon yanmai. A mutuk kon ara Er Imtamnyi biryi Erdamnyi minob lak kibdanmou ai ara ninyi kanya ilil kurdeirin ai kuramwe. Ati, Er Imtamnyi biryi Erdamnyi lak kibdanmou ba, kunuk weik dakmou ba, a mutuk kon deici uk buk weik abmou. Tonda, ibalya weik dobmou.

¹⁹Ura, buena uram weik uram ebmou cok, imtam aryi kuboka uram weik enmou. Uram weik enmou ba, sun Israel yala nang aryi ilil weik kuboka, “A uram tuba kekebibyei,” eboka molobmai.

²⁰A kekebmai uram ara ninyi kanya ilil weik kurdeirin uram kubmou deyok aryi sunci, “A uram tuba kekebibyei,” eboka molobmai. Ara, imtam aryi kuboka uram ara ato eboka arukmou. “A mutuk kon ara iya mem ai kurur ati, ninyi ababyi bisam ababyi welebingnyei. Ninyi kum, bisam kum, welebmaci ura, sunci keil doboka obdarur,” ebmou. (Keluaran 19:12-13)

²¹Ura, Er Imtamnyi biryi uk buk dam kunuk dam kubmuryi, Erdamnyi lak kibdanmou ba, nun aibwe Musa bibabyi ilil weik kubmou. Ura, nun aibwe biryi ilil aryi, “Ni kanya sirim talebmanir,” ebmou.

²²Ura, sunda ukuryok talak kubde barandum dib tenen nang ara ninyi kanya ilil kurdeirin mutuk kon si Sinai kum yanmarum. Erda, mutuk kon si Sion dam sirya yanmarum. A mutuk kon ara Er Imtamnyi iya kam kurutnyi atei kurur. Akatei si ara imtam kuboka atei si Yerusalem kurur. Akatei kunung nang ara Er Imtamnyi Uram eryuryangan nang seribu baryi yubwa-yubwa ilinto kunung. A nang ara kilkil kanya weik boboka akatei asi tonkwa bulunung.

²³Sun yanmarum dam ara Er Imtamnyi bisi milin nang buluboka kunung dam asi yanmarum. A nang ara Er Imtamnyi biryi deyok kouboka nabmou nang aryi bulun dam asi yanmarum. Ba, sunci nun Nai Imtamnyi kurur dam yanmarum. Nun Nai bira ninyi kanya nirya lilisurutnyi kurur dam sirya yanmarum. Tonda, sun dib tenen nang diamnyi kanya bulun ai dam yanmarum. A nang ara tukwetam tuba kuramiryi, Er Imtamnyi urasintam aryi teleb dinyi kunuramnyi nang kunung. Sirya diamnyi ani, Er Imtamnyi biryi sunsi bitabdeibmou uca, iya teleb dinyi akwe kununung.

²⁴Tonda, sunci nun Du Yesus iya kurur sokon dam yanmarum. Nun Du bira ukuryok Er Imtamnyi kan ninyi kan noutam kuboka mururdeirina uram deyoknyi kurur ati ebman. Nun aibwe Habel er ining diksakmou aryi Er Imtamnyi biryi yu kanya boboka, “Habel bisi obmunyi bisi wenebkwan,” teneramwe. Ba, nun Du Yesus Er ining diksakmoua aryi Er Imtamnyi biryi, “Wenebkwan,” tenen kanya kum borur. Erda, nun Du Yesus Er ining diksakmou aryi Er Imtamnyi biryi nunsi sirya lebdeibmasou. Ati, Habel er ining diksakmoua ara malyi to dinyi kurur bok, nun Du Yesus Er ining diksakmoua ara iya teleb dinyi kurur.

²⁵Ati, sunci sundamnyi kalikdandoka, “Nun Du uram asi dokdonokibyei,” tenen kunubdarur. Minob uram sun Israel yala nang aryi Musa Uram dokdonokde kuramnyi uca, Er Imtamnyi biryi sunsi wenebde binmou. Ba, ukuryok ara Er Imtamnyi biryi tukwetam kunanyi biriman aryi uram kum esurur. Erda, Er Mi imtam kurutnyi biriman aryi Erci nunsi eteresurur. Ati, nunci Er Imtamnyi Mi kobdob aryi esurur uram asi dokdonoktibyi uca, Er Imtamnyi biryi sunsi kum wenebsute do? Ato tenen kum. Erda, weik wenena tabakoka erci nunsi iya wenebsute.

²⁶Minob talak ara Er Imtamnyi biryi Sinai mutuk kon kuramuryi, Erci Erdamnyi sun Israel yala nang asi lak kibdanmou ba, mutuk eimna dobmou ci, Er Imtamnyi biryi tukwetam nirya asi luluksinibmou. Ura, ukuryok talak aryi Er Imtamnyi biryi nunsi ato ebdeibdou. “Aminda kubde binkwayeb talak ababyi niryi tukwetam tubto liki tentok ton lulukeibniryi, imtam ababyi lulukeibkwan,” ebmou. (Hagai 2:6)

²⁷Ati, nun Nai biryi, “Tubto lulukeibkwan,” ebmou ati, erci minob kikniamwe dinyi nirya asi lulukoka kum daneibkwande. A talak ara asing eirinub dinyi nirya asi kum daneibdiryi, asing kum eirinub dinyi asi iya kubkwaming.

²⁸Asing kum eirinub dinyi ara lulungna kum uca iya kubkwaming. Ara, nunda Er Imtamnyi amwetam kubkwayeb dinyi ara tiya kum kubkwande. Erda, iya kubkwande. A deyok aryi, nunci nun Nai bisi, “Ei nun Nai,” ena kikib. Tonda, nunci ilil kanya boboka nun Nai biryi teleb tenerur to, nun Nai Imtamnyi bisi si weik ebkwayeb.

²⁹Ati, nunci, “Nun Nai Imtamnyi bira uk buk weik arande atonyi kuboka malyi kun nang nirya asi wenesurutnyi kurur,” tenen nun Nai uram diboka kekebkwayeb.