Read Futuna-Aniwa Ibrani 13 Bible Online

Ibrani 13 - Futuna-Aniwa bible

Ibrani 13

¹Sunda nun Du Yesus bisi milin nang ara tanglona kum uca sun mamun boukwe kibdandarur.

²Sun yuk atei aryi yanmangnyi nang asi sunci du dongobdarur. Ton nang ara ato kubde baramiryok, Er Imtamnyi biryi bokwetebmou Er uram eryuryangan nang asi du dongobmai. Ara, “A nang ara Er Imtamnyi biryi bokwetebmar ba, yanmang nang,” tenen kum bikmai cok, du dongobmai ati, Er Imtamnyi biryi sunsi kisal dakmou.

³Sun malyi nang dongon ai dongobmangnyi nang ati sunci bico kiboka teneibdarur. Ati, sunci, “Sun malyi nang dongon ai dongoramingnyi nang mambul dinyi doraming ara nun bobmilibkwayeb,” tenen diboka dibnilibdarur. Tonda, sun ninyi aryi mambul kurdeiriramingnyi nang ababyi sunci, “A nang aryi doraming mambul dinyi nun bobmilibkwayeb,” tenen bico kiboka diboka dibnilibdarur.

⁴Sal ner dordona ati sunci diboka kalikdarur. Ati, sun akenyabwe ara sun ner dam akwe banung. Ba, sun nerabwe ara sun akenyi dam akwe banung. Sun, “Talyi yobdatinimnyi,” tenen kunun sal kum, ner kum asi Er Imtamnyi biryi diba ati wenebkwande. Tonda, sun alyi kun dinyi yuk dinyi kunun nang ababyi Er Imtamnyi biryi diba ati wenebkwande.

⁵Tonda, sunci, “Co bok ilinto tabakoka talebtinyi,” tenen kanya bobmunyei. Erda, “Er Imtamnyi biryi nisi karebnou to dinyi ara kikiman talenun,” tenena teleb. Nun Nai Imtamnyi biryi, “Milibkwankin,” eboka ebdeibsou ati sunci teneibdarur. Ati, nun Nai biryi ato ebmou. “Nira Imtamnyi biryi kansi kum taklobkwankin. Ni kan ab tonkwa iya kubkwanim,” ebmou. A deyok aryi sunci, “Er Imtamnyi biryi karebsici dinyi ara kikiman akwe,” tenen teleb kanya bobdarur.

⁶Nun Nai biryi, “Iya milibkwansin,” eboka ebdeibsou deyok aryi, nunci ilil asa kum uca ato eboka lak enub. “Nun Nai Iya Erebdobnyi bira ni milininanyi kurur. Ati, ni kanya ilil kum kubkwanir. Ninyi aryi niti, ‘Obkwayeb,’ teneranimingnyi ababyi ni ilil kanya kum bobkwan,” enub.

⁷Sun kankan kuramnyi menekoka bobasin nang ara Er Imtamnyi Uram ermururansing nang asi teneibde bindarur. Ara, “Dib tenena biriman aryi ato-ato kubde baramnyi ani, diamnyi,” teneramun cok, sunbabyi neiktoto katabum eboka dib tenebmurubde kubdarur.

⁸Nun Du Yesus Kristus bira lulungna kum uca Er iya mikibnyi kurur. Ara, ambutum aryi mikib kuramwe to, ukuryok ababyi neiktoto kurur. Tonda, aminda ababyi Erda iya mikibnyi kubkwande.

⁹Ura, “Malyi eterena yuk-yuk asi bowanikminiksicei,” tenen kalikdarur. Er Imtamnyi biryi, “Kisal dakwansir,” eboka eteren uram ara nun kanya katabum erdeirisina teleb. Ba, “Yina-yina yibmunyei,” eboka eteren uram ara malyito uram kurur. Ato eboka arungna uram ara ninyi dib tenen dinyi katabum ebdeibman kum kurur.

¹⁰Sun Er Imtamnyi ai si Kemah Suci ai kuboka wa iramnyi nang ara, “Er Imtamnyi biryi nun malyi kun dinyi kilibsute,” tenen Er Imtamnyi bisi ninyi dama deiriramiryi, sunci a dama deirin dinyi aryi kuboka sekdoba dinyi ton kum yiramnyi. Ura, nun Du Yesus biryi nun malyi kun dinyi kilibkwamasou ati Erdamnyi karebdandoka Er Imtamnyi bisi ninyi dama deibmou ara neiktoto kurur. Sun Kemah Suci ai wa irmiliramnyi nang ara a dama deirin dinyi ababyi, “Ur yibdarur,” en uram kum dobdobmai.

¹¹Sun tukwetam kuboka Er Imtamnyi kan ninyi kan noutam kuboka antanirdeirin sien nang ara domba ining sapi ining doboka Er Imtamnyi dam kuna Kobdob ai wengbaraming. Ara, “Nun malyi kun dinyi kilibsute,” tenen ato kunubde baraming. Ba, domba sapi ining wengbana kum kubingiryok, domba sapi nong asi uk aryi daraming. Ara, sun Israel yala nang kuraming atei aryi anaboka baitam bindoka uk daraming.

¹²Ura, nun Du Yesus bibabyi neiktoto Erdamnyi karebdandoka Er Imtamnyi bisi dama kubmou deyok aryi, ninyi aryi ersi baitam bobinmai ura, Yerusalem atei baitam kubmou asi dibmou. Ara, “Ni ining diksakwanir aryi malyi kun dinyi kilibkwan,” tenen nun Du Yesus bira Erdamnyi karebdandoka baitam dibmou.

¹³Ati, nunda nun Du Yesus bisi milin nang kunub ati nunbabyi neiktoto weik atei aryi anaboka baitam bina teleb. Ara, “Nun Du bisi alyi kubdeibmai to, nunbabyi alyi kubdeibsingnyi ababyi nunti teleb,” tenen baitam binkwayeb.

¹⁴Ati, nunci, “Nun dibde bunub atei ara tukwetam kurande atei kum kurur,” tenen, “Er Imtamnyi biryi louboka aminda kubkwayeb atei lak kibkwansir,” tenen dibde bukwayeb.

¹⁵Ato tenen dibde bunubiryi, nunci, “Nun kanya asi karebdandoka dama deibkwayeb,” tenen nun Du Yesus biriman aryi nun Nai Imtamnyi si weik ebkwayeb. Ati, nunci, “Nun Du bira nun molonubnyi,” lak ena biriman aryi Er Imtamnyi bisi dama deibkwayeb.

¹⁶Ati, sunci sun mamun asi dibnilibdandarur. Ato kubmunyi uca, Er Imtamnyi biryi, “Dama deirin dinyi kuraming to,” tenebciryok, Erci sunti, “Ni mabwe nermabwe,” tenebkwansir.

¹⁷Sunci sun kankan asi kuramingnyi bomenengsina nang uram kekeboka kunubdarur. A nang ara tanglona kum uca sun kanya yuk-yuk asi kalingnaming ati, sunci sun arungnansingnyi uram kekebdarur. Er Imtamnyi biryi sun bomenengsina nang asi, “Diboka kalikmarum do kum do?” eboka asibdenkwande ati, sunci a nang uram asi dokdonokmunyei. Sunci sun uram diboka kekebmunyi uca, sun bomenengsina nang aryi kilkil kanya boboka sun kankan asi wa ibkwaming. Ba, sunci, “Nun bomenengsina nang aryi uram kum kekebkwayeb,” tenebmunyi uca, sunci mambul kanya boboka wa ibkwaming ba, sunti du kum moubkwansir.

¹⁸Ura, sunci tanglona kum uca nunti molormilisina teleb. Nunci tuba-tuba, “Teleb dinyi akwe kunubkwayeb,” tenenub ati, nunci, “Manmalibmab,” tenen bingdan kanya kum bonub.

¹⁹Ati, sunci molormilibde basumun ci, sunci nira sun kwit biti, “Er Imtamnyi biryi tubto bokdonokci uca, nun dam minola tamuryankwande,” tenen molormilibde banindarur.

²⁰Ura, nun Nai Imtamnyi antanirdeirisurutnyi biryi sunsi kisal dangsina teleb. Nun Nai bira nun Du diksakmou ining ara iya mururdeirisurur ining biriman aryi nun Arungdeirisurutnyi Yesus bira domba kalingnanyi Iya Erebdobnyi bisi kam bukeibmou.

²¹Ati, nun Nai biryi kiknibminikoka karebsici uca, sunci nun Nai biryi, “Teleb,” tenesurur dinyi nirya asi kununa teleb. Ara, nun Nai biryi nun Du Yesus Kristus biriman aryi sun kanya dam yuk-yuk asi wa ibsici uca, sunci nun Nai urasintam aryi teleb dinyi akwe kunubdarur. A deyok aryi, nunci nun Du Yesus si iya weik ebkwayeb ati ebman. Amin.

²²Ura, ni kwityabwe. Niryi bumang uram eboka kerek sekmasin bok, niryi sunsi katabum erdeirisin uram kerek sekmasin. Ati, sunci, “Wenesina uram kerek sekmasir ara nun li se,” tenen kanya bobmunyei. Erda, sunci teleb kanya boboka a kerek sekeibmasin uram asi dobdobdarur.

²³Nun kwit Timotius bira malyi nang dongon ai dongobmai asi, “Ur birum,” eboka lobdeibmai ati ebman. Erda ni dam minola yaci ura, ni ab tonkwa anaboka sun dam yankwanim.

²⁴Sunci nun ebdeibmab uram ebmuruboka sun kankan kuboka menekoka bobasina nang nirya asi, “Ni kwityabwe, eboka kibmasir,” ebdarur. Sun dib tenen nang Italea mutuk kuraming nang ara sun nirya asi, “Nun kwityabwe,” eboka kibmasing.

²⁵Nun Nai Imtamnyi kisal dangsurutnyi bira sun nirya ab tonkwa kuna teleb.