Read Futuna-Aniwa Ibrani 2 Bible Online

Ibrani 2 - Futuna-Aniwa bible

Ibrani 2

¹Nun Du bira Iya Erebdobnyi kurur deyok aryi, nunci Er ebdeibsou uram asi diboka kekebibiryi, milibkwayeb ati ebman. Ati, nunci nun Du Yesus Uram asi kekebmab deyok aryi, nunci, “Dib en uram talermuruna kum kurantibiryi, bisik wanikminiksici uca, lemsin dinyi ara waniksicei,” tenen Er uram asi diboka kekebkwayeb.

²Yuma talak Er Imtamnyi biryi Er uram eryuryangan nang biriman aryi Er uram erdeiriramuryi, a uram ara dib en uram kuramwe asi Erci kunurdeiriramwe. Ara, sun a uram yan yaniramnyi nang ab sun a uram kununa kum nang ab asi Er Imtamnyi biryi weik wenena aryi weneramwe.

³Ani, ukuryok ara nun Du Yesus Iya Erebdobnyi biryi weik lemsina uram asi lak kibmasir ati, nunci ato uram asi dokdonoktibyi do? Nun Nai Imtamnyi biryi sun a lemsina uram asi kum kekebingnyi nang asi, “Kum wenebkwan,” tenebkwande do? Ato tenen kum. Erda, Erci sun ato kun nang asi iya weik wenena aryi diba ati wenebkwande. A weik lemsina uram ara nun Du Yesus biryi deyok kouboka eterebkalibsou ura, er uram kekeboka milin nang aryi katabum eboka, “Dib en uram aca,” eboka eterermururamnyi.

⁴Ba, Er Imtamnyi biryi, “Ukuryok lemsina uram diboka tenebting,” tenen ilil tenen dinyi yuk-yuk tabakdongoboka kikniramwe. Tonda, nun Nai biryi teleb tenerur to, Erci Er Imtamnyi Kanya Roh Kudus aryi mikib yuk-yuk asi ninyi kanya dam dongobde basurur. Ara, “Ukuryok lemsina uram diboka tenebting,” tenen nun Nai biryi a dinyi nirya tabakdongoboka karebmasou.

⁵Nun Nai Imtamnyi biryi Er uram eryuryangan nang asi nun enmab dinyi ara aminda kubkwande dinyi kum karebmou. Erda, Erci nun Du Yesus bisi karebmou. Ara, “Aminda kubkwande dinyi im dangna tukwe dangna dinyi nirya asi talena mikib karebmakin,” ebmou ci, a dinyi nirya Er taruk dam karebmou.

⁶Er Imtamnyi Uram umbura aryi a deyok ati ato esurur, “Naie! Nunda tukwetam nang ara mikib kum bok, Kanda Imtamnyi biryi nunsi teneiboka dirnilisurum. Naie! Nunda tukwetam bun nang kunub bok, Kanci nunsi boukwe weik kimsurum.

⁷Kanci karebsumwe uca, nunda tukwetam nang ara uki mitikanun Er Imtamnyi Uram eryuryangan nang amwetam bun nang ato kuramoubwe. Ato kuramoubwe ani, Kanci nunsi erebdob si doboka erebdeibmasirim.

⁸Im dangna tukwe dangna dinyi nirya asi Kanci ninyi taruk dam karebmasirim. Utotoa nirya ara ninyi yan amwetam kibdeibmasirim.” (Mazmur 8:4-5) Er Imtamnyi Uram umbura aryi ato ebmou ara Er Imtamnyi biryi utotoa nirya ninyi taruk dam karebkwamuryi, ninyi yan amwetam kun kum dinyi ton kum kubkwamwe ati ebmou bok, nun ukuryok aryi asing kum eirinub.

⁹Erda, nun asing eirinub to ara nun Du Yesus iya erebdeibmounyi kurur ati eirinub. Nun Du bira nun malyi kun dinyi kilibkwamasou ati, mambul weik dinyi bobmou ba, dibmou. Nun Du bira nunti dibmou deyok aryi, Er Imtamnyi biryi ersi erebdeibmou. Ara, uki mitikanun Er Imtamnyi Uram eryuryangan nang amwetam kunanyi kibmou ani, Er Imtamnyi biryi kam bukeiboka nun Du Yesus bisi erebdeibmou. Nun Du dibmou ara nun Nai biryi, “Kisal dakwan,” tenena aryi nunsi lebkwansou ati dibmou.

¹⁰Nun Du bira mambul dinyi ilinto boramwe uca, ninyi ilinto ati lemsina bublan kukeibsou. A nang ara Er Imtamnyi biryi, “Ni mabwe nermabwe,” tenen nang asi nun Du Yesus biryi menekoka ererdeirin dam bobaransir. Ati, nun Nai Imtamnyi bira utotoa nirya kikninanyi tonda utotoa nirya talenanyi biryi kikib tenebmou to, Erci nun Du Yesus bisi mambul dinyi takubdeibmou biriman aryi ninyi lemsina ati kikibnyi kibdeibmou.

¹¹Er malyi kun dinyi kilisurutnyi ab sun malyi kun dinyi kilisurur nang ab ara takdanman kum kunung ati, neik yala nang ato kunung. A deyok aryi, nun Du Yesus biryi nunda dib tenen nang ati alyi asa kum uca, “Ni weityabwe,” esurur.

¹²Ati, Erci nunti ato esurur. “Niryi Kanda Imtamnyi si weik erebdeibniryok, Ni weityabwe asi nukarebkwan. Sun bulubmangnyi dib tenen nang kankan asi niryi kanti mot sebkwankin,” esurur. (Mazmur 22:23)

¹³Tonda, “Niryi Er Imtamnyi bisi Ni kanya deibkwan.” Tonda, “Ni ab Er Imtamnyi biryi Ni dam karebnou nang ab a tingnub. ‘Er Imtamnyi Uram kunubkwayeb,’ tenen a tingnub,” ebmou. (Yesaya 8:17-18)

¹⁴Nun Du biryi menekoka lemdeirisin nang ara tukwetam nang akwe kunub deyok aryi, nun Du Yesus bibabyi tukwetam nang atonyi kiboka ninyi nong bol minob dobdobmou. Ara, ninyi dirminingna sienyi si Iblis bisi muna kibdongobkwamwe ati, nun Du Yesus biryi ninyi nong bol dobdobmou ura, dibmou.

¹⁵Tonda, sun kam kun talak nirya aryi ilil kuboka, “Iya dibibyei,” tenen nang asi lebdeibkwansou ati, nun Du Yesus biryi dibmou.

¹⁶Diba. Nun Du bira sun Er Imtamnyi Uram eryuryangan nang asi kum lemdur. Erda, Erci nunda dib tenen nang ara Abraham yala nang asi lemsurur.

¹⁷Ati, nun Du Yesus biryi nunda tukwetam nang asi lebkwansou ati, Er ninyi diba kibdanmou. Erda, “Er Imtamnyi takubdeibmanou wa kunubkwan,” tenen Er Imtamnyi kan ninyi kan noutam tikoka erebdoba antanirdeirisurutnyi kibkwamwe ati, nuntonyi kibdanmou. Nuntonyi kibdanmou ara Erci nunsi boukwe kiboka Er Imtamnyi biryi takubdeibmou wa asi dirnilirlona kum uca ibkwamwe ati, ninyi kibdanmou. Ato kuboka wa ibkwamuryi, Er Imtamnyi biryi wibdeibmou nang sun malyi kun dinyi kilibkwansou ati, ninyi kibdanmou.

¹⁸Ura, Iblis biryi, “Sakeibtinyi,” tenen ukurderamwe ba, nun Du Yesus bira mambul weik dinyi boramwe. Nun Du bira Iblis ukurden dinyi deyok aryi mambul weik dinyi boramwe deyok aryi Erci nun Iblis biryi tuba ukurderansir nang asi lemsina ati mikib kurur.