Read Futuna-Aniwa Ibrani 3 Bible Online

Ibrani 3 - Futuna-Aniwa bible

Ibrani 3

¹Ati, ni kwityabwe dib tenen nang ton Er Imtamnyi biryi nabsou nang ton, sunci nun Du Yesus biti diboka teneibde bindarur. Nun Du bira Er Imtamnyi biryi bokwetebmou uca, Teleb Uram etereryangamunyi biti teneibde bindarur. Erda Er Imtamnyi kan ninyi kan noutam tikoka antanirdeirin sienyi kurur ati nun lak eramib.

²Nun Du bira tanglona kum uca Er Imtamnyi biryi Ersi takubdeibmou wa isurur. Minob talak aryi Musa biryi Er Imtamnyi mabwe nermabwe asi kalingnamuryi, Er Imtamnyi biryi takubdeibmou wa asi tanglona kum uca wa iramwe to, nun Du Yesus bibabyi neiktoto tanglona kum uca Er Imtamnyi wa isurur ci, Er Imtamnyi mabwe nermabwe asi kalingsurur.

³Nun Du bira Iya Erebdobnyi kurur ba, Musa bira er amwetam bunanyi kuramwe. Nun Du bira ai deyoknyi ato kurur ati, Er Imtamnyi biryi Ersi erebdeibmou. Ba, Musa bira ai umbura aryi wa irmilinanyi ato kuramwe ati, amwetam bunanyi kuramwe.

⁴Ai yuk-yuk ara ninyi aryi doraming. Ba, ukuryok ebmab ai ara ninyi aryi dobman kum. Erda, akai ara nun Nai Imtamnyi utotoa nirya kiknirutnyi biryi minob dobmou ati ebman.

⁵Ura, Musa bira arungnanyi kuramuryi, tanglona kum uca Er Imtamnyi wa irmiliramwe. Ati, erci aminda kubkwamwe dinyi ati minob eboka lak kimnamwe.

⁶Ba, Kristus bira Er Imtamnyi Mi kobdob kurur ci, Er Imtamnyi ai kalikoka wa isurur. Nunda dib tenen nang ara Er Imtamnyi ai ton Er Imtamnyi wa ton kunub ati ebman. Ati, nunci tanglona kum uca ilil kum asa aryi kuboka nun Du Yesus bisi dibde bukibyi uca, nunda Er Imtamnyi ai dam nang kunub.

⁷A deyok aryi, sunci nun Du Yesus Uram asi diboka teneibde bindarur. Ara, Er Imtamnyi Kanya Roh Kudus aryi Er Imtamnyi Uram umbura ato esurur. “Ukuryok ara sunci Er Uram kekebmunyi ura,

⁸sunci sun kanya kat aryi, ‘Nun li,’ tenena mem. Ati, sun aibweyabwe aryi minob ninyi kun kum mutuk kuramiryok, Nira Imtamnyi biti, ‘Nun li,’ tenen ukurderanei to, sunci ukubmunyei.

⁹Nira Imtamnyi biryi sun aibweyabwe urasintam aryi ilil tenen dinyi ilinto kikniranse bok, sunci niti, ‘Nun li,’ teneramnyi.

¹⁰Kwalina empat puluh baryi ato kuramnyi deyok aryi, niryi ato ebmase, ‘A nang kanya kat aryi teleb bisik tuba-tuba bowaningdaraming. Ni erdeirin uram asi kum kununung.’

¹¹A deyok aryi, ni yu weik kuranou ba, Niryi a nang ati ato eboka ebkatabmase, ‘Niryi kiknibminikwan ai taruk louboka bun ai asi diboka kum wekwaming.’ (Mazmur 95:7-11) Ato eboka Niryi sunsi ebkatabmase,” ebmou.

¹²Ati, ni kwityabwe, sunci kalikdobdarur. Ara, “Nun kankan dam aryi ninyi tentok ababyi malyi kanya bobcei,” tenen kalikdandobdarur. Ati, sunci Er Imtamnyi biti, “Nun li” tenen kanya bobmunyei. Tonda, “Er Imtamnyi iya kam kurutnyi taklobkwayeb,” tenen kanya bobmunyei.

¹³Erda, sunci, “Nun Du bisi tuba-tuba milibkwayeb,” eboka sun mamun tuba-tuba katabum ebdandarur. Ara, “Ukuryok talak” tuba kurur ba, sunci ato kubdarur. “Malyi kun dinyi kununa aryi nun kanya kat kubsicei,” tenen sunci sun mamun katabum ebdandarur.

¹⁴Nunda nun Du Yesus Kristus tam kibsou nang kunub. Ati, nunci yuma dibde buramoubwe to katabum eboka tanglona kum uca dibde bukibyi uca, nunda nun Du Yesus Kristus tam kibsou nang kunub ati ebman.

¹⁵Er Imtamnyi Uram ato esurur, “Ukuryok ara sunci Er Uram kekebmunyi ura, sunci sun kanya kat aryi, ‘Nun li,’ tenena mem. Ati, sun aibweyabwe aryi minob ninyi kun kum mutuk kuramiryok, Nira Imtamnyi biti, ‘Nun li,’ tenen ukurderanei to, sunci ukubmunyei,” ebmou. (Mazmur 95:7-8)

¹⁶Ura, unato nang ara Er Imtamnyi Uram kekebingiryok, “Nun li,” teneramnyi do? Musa biryi menekoka Mesir mutuk aryi boyanmou nang ara ato kuramnyi.

¹⁷Ba, unato nang ati nun Nai Imtamnyi biryi kwalina empat puluh baryi kuramuryi, yu kanya boramwe do? Er Musa biryi minob lebdeibmou nang ati nun Nai biryi yu kanya boramwe. Ura, nun Nai biryi, “Dibting,” teneramwe uca, a nang ara ninyi kun kum mutuk kuramnyi ba, diramnyi.

¹⁸Ura, nun Nai Imtamnyi uram ebkatabmou cok, Erci unato nang ati, “Niryi kiknibminikwan ai taruk louboka bun ai kum wekwaming,” ebmou do? Sun Israel yala nang kankan asi dib tenen kum nang ati ato ebmou.

¹⁹Ato dinyi ara lak kubmar. A nang ara Er Imtamnyi biti sun kanya kum deibmai deyok aryi, sunci Er Imtamnyi kiknibminikmou ai taruk louboka bun ai kum wekmai.