Read Futuna-Aniwa Ibrani 4 Bible Online

Ibrani 4 - Futuna-Aniwa bible

Ibrani 4

¹Ura, nun Nai Imtamnyi biryi, “Taruk louboka bun ai kiknibdeibmase asi wengyandarur,” eboka nunbabyi ebdeibsou. Ato eboka ebdeibsou deyok aryi, nunci, “Er Imtamnyi biryi ebdeibsou to nunbabyi wanikminiksicei,” tenen nunci nundamnyi kalikdandoka Er Uram asi diboka kekebkwayeb.

²Ati, sun Israel yala nang minob kuramnyi nang ara Teleb Uram kekeramiryok, wanikminikmai to, nunbabyi neiktoto Teleb Uram kekebmabiryok, wanikminikibyei. Sun Israel yala nang ara Er Imtamnyi Uram kekeramiryok, sunci Er Imtamnyi bisi sun kanya kum deibmai deyok aryi, sunci lemsina kum dobdobmai.

³Lemsina kum dobdobmai bok, nunda nun Nai bisi nun kanya deirinub nang ara Er Imtamnyi biryi kiknibminikmou ai taruk louboka bun ai wengbinkwayeb. Ato dinyi ara Er Imtamnyi Uram aryi umbura kerek sekmou to kurur. “Ni yu weik kuranou ba, Niryi a nang ati ato eboka ebkatabmase, ‘Niryi kiknibminikwan ai taruk louboka bun ai asi diboka kum wekwaming.’ Er Imtamnyi biryi minob talak aryi er wa nirya asi sirya kiknibmou uca, Erci, ‘Taruk louboka bun ai kiknibminikwan,’ ebkatabmase,” ebmou.

⁴Er Imtamnyi Uram umbura aryi ato esurur, “Uki nabaryi kuramuryi, Er Imtamnyi biryi utotoa nirya kiknibmou ura, uki tabaryi tum berekwe ura, taruk loubmou,” esurur. (Kejadian 2:2)

⁵Tonda, Er Imtamnyi Uram yuk tam asi Erci ato esurur, “A nang ara niryi kiknibminikwan ai taruk louboka bun ai kum wengyankwaming,” esurur. (Mazmur 95:11)

⁶Ati, ninyi ton nang ara a taruk louboka bun ai wengbinkwaming. Ba, sun minob talak aryi Teleb Uram kekeramnyi nang ara sun kanya kat aryi, “Nun li,” teneramnyi deyok aryi, a taruk louboka bun ai kum wengbinmai.

⁷A deyok aryi, nun Nai Imtamnyi biryi teleb uki tum karebmasir ati nunsi namsir. A teleb uki tum ati Erci, “Ukuryok talak,” si dobmou. Nun aibwe Daud biryi minob talak aryi a uki tum ati lak kibsou. “Ukuryok talak ara sunci Er Uram kekebmunyi ura, sunci sun kanya kat aryi, ‘Ni li,’ ebmunyei,” ebmou. (Mazmur 95:7-8)

⁸Nun aibwe Yosua biryi menekoka sun Israel yala nang asi Kanaan mutuk bobinmou bok, a mutuk ara Er Imtamnyi biryi kiknibminiksou ai taruk louboka bun ai diboka kum kuramwe. Kanaan mutuk ara Er Imtamnyi biryi ebdeibsou ai taruk louboka bun ai diboka kubmati ura, Er Imtamnyi biryi, “Taruk louboka bun ai wengbiting,” tubto kum ebmate.

⁹Ati, Er Imtamnyi biryi kiknibminikmasou ai taruk louboka bun ai wengbana ara Er Imtamnyi biryi Er mabwe nermabwe ukuryok kuramib nang asi tuba erdeirisurur.

¹⁰Sun a taruk louboka bun ai wengbaramingnyi nang ara taruk louraming. Nun Nai Imtamnyi biryi utotoa nirya minob kiknibmou ura, taruk loubmou to, Er mabwe nermabwe Erci kiknibminikmou dam wengbana nang ababyi neiktoto sun mining wa ibloboka taruk louraming.

¹¹A deyok aryi, nunci busul weik kuboka, “Er Imtamnyi kiknibminikmasou ai taruk louboka bun ai wengbitibyi,” tenen kunubkwayeb. Ara, “Nun kankan asi ninyi tentok ababyi sun minob kuramnyi nang aryi, ‘Nun li,’ teneramnyi to kunubcei,” tenen Er Imtamnyi Uram kekebdarur.

¹²“Er Imtamnyi Uram ara talyi uram kuma,” tenen ato ebman. Er Imtamnyi Uram ara mikib weik kurur ci, ninyi on ya yu dina-dina ya ato kurur. A uram ara ninyi kanya aryi tenen dinyi yuk-yuk sekoka wimsurur. Ara, Er Imtamnyi biryi Er Uram biriman aryi, “Ara malyi dinyi, ara teleb dinyi,” eboka lak eteresurur.

¹³Ura, imtam tukwetam kuboka lulungnande dinyi ton lulungna kum kurande dinyi ton ara nun Nai urasintam aryi inibdob dinyi ton kum kurur. Erda, a dinyi nirya ara lak baning dem dinyi akwe kurur ba, nun Nai biryi asing eirisurur. Utotoa nirya ara Erda nun kuramib to nirya lilisurutnyi urasintam aryi lak kimdur.

¹⁴Ati, nunci, “Er Imtamnyi kan ninyi kan noutam tikoka antanirdeirisin sienyi bira nun Du Yesus Er Imtamnyi Mi kurur,” tenen lak eramib. Tonda, “Nun Du bira tukwetam aryi kuboka imtam welebinmou,” tenen lak eramib. Ati, nunci a lak eramib dib tenena asi diboka talebnurubdobkwayeb.

¹⁵Nun Du bira antanirdeirisin sienyi kurur ci, Erci, “Sun mitang nang asi milibniryi lebdeibkwan,” tenen nunsi diboka bico tenesurur. Isa sienyi Iblis biryi nunsi, “Sakeibtinyi,” tenen ukurderansir to, erci nun Du Yesus bibabyi ukurden dinyi utotoa nirya kareboka ukurderamwe. Ukurderamwe bok, nun Du Yesus biryi malyi kun dinyi ton kum kunuramwe.

¹⁶A deyok aryi, nunci ilil kanya bona kum uca, nun Nai Imtamnyi burur erebdob sokon dam bana teleb. Ati, nunci, “Nun Nai biryi bico tenen kisal daksici uca, Erci teleb uki tum karebsici uca, nunsi miliboka katabum ebkwansir,” tenen Er Imtamnyi urasintam aryi bana teleb.