Read Futuna-Aniwa Ibrani 5 Bible Online

Ibrani 5 - Futuna-Aniwa bible

Ibrani 5

¹Ura, Er Imtamnyi kan ninyi kan tikoka antanirdeirin sien nang yuk-yuk ara sundamnyi ererdeirdana kum kuraming. Erda, Er Imtamnyi biryi ninyi kankan aryi a nang asi wibdeiboka tingdeirirur. Ara, yuk nang asi unuboka Er Imtamnyi biti wa inung cok, sunci Er Imtamnyi bisi dama deiriraming. Tonda, “Er Imtamnyi biryi nun malyi kun dinyi kilibsute,” tenen domba sapi oboka Er Imtamnyi urasintam aryi bobaraming.

²Er Imtamnyi kan ninyi kan tikoka antanirdeirin sien nang ara sunbabyi mitang nang kunung deyok aryi, sunci sun walwal nang ab sun malyi kun nang ab ati bico tenenung.

³Er Imtamnyi kan ninyi kan tikoka antanirdeirin sien nang ara sunbabyi mitang nang kunung deyok aryi, “Yuk nang aryi malyi kun dinyi kilibte,” tenena akwe kum kuraming. Erda, “Ni baramnyi malyi kun dinyi ababyi kilibnute,” tenen Er Imtamnyi urasintam aryi dama deiriraming.

⁴Er Imtamnyi kan ninyi kan antanirdeirina sien nang ara sundamnyi kum tingdeirirdaraming. Erda, Er Imtamnyi biryi sun yuk-yuk asi nabde barur. Ara, nun aibwe Harun bisi minob nabmou to, Erci sun antanirdeirin sien nang aminda kubkwamingnyi nang ababyi namnamwe.

⁵Ura, nun Du Yesus Kristus bibabyi neiktoto Erdamnyi kum tikeibdanmou. Erda, Er Imtamnyi biryi erebdeiboka Ersi, “Ni kan ninyi kan noutam tikoka antanirdeirin sienyi kurum,” eboka nabmou. Ati, nun Nai Imtamnyi biryi nun Du Yesus bisi ato ebmou. “Kanda Ni Mi kurum. Ni Kan Nai kunun ati ukuryok lak kibman,” ebmou. (Mazmur 2:7)

⁶Tonda, Er Imtamnyi Uram yuk tam umbura aryi Erci ato ebmou. “Kanda Er Imtamnyi kan ninyi kan noutam tikoka antanirdeirisinanyi iya kubkwandim. Minob kuramwe sienyi Melkisedek antanirdeirinanyi kuramwe to, kanbabyi neiktoto antanirdeirinanyi iya kubkwandim,” ebmou. (Mazmur 110:4)

⁷Ura, nun Du Yesus ninyi kiboka tukwetam kuramuryi, Erci Er Imtamnyi bisi tuba-tuba moloramwe. Ara, engena engeramuryi, Erci uram ebdaraboka Er Nai lebkwamunyi bisi moloramwe. Ura, nun Du bira luknubdongon kanya boramwe ati, tonda, “Ni Nai uram kunubkwan,” tenen kanya boramwe ati, nun Nai Imtamnyi biryi Er molona kekebmou.

⁸Nun Du bira Er Imtamnyi Mi kuramuryok, Erci Erdamnyi kum erebdeibdanmou. Erda, Erci mambul dinyi ilinto boramwe uca, Er Imtamnyi Uram diboka kunuramwe.

⁹Ura, nun Du Yesus bira sunglona kum uca Er Imtamnyi Uram kunuramwe ura, nun Nai Imtamnyi biryi karebmou uca, Erda ninyi Lemdeirisinanyi iya kibwe. Ara, nun Du Yesus Uram kunuramingnyi nang asi lemdeirisinanyi iya kibwe.

¹⁰Ura, nun Nai Imtamnyi biryi nun Du Yesus bisi erebdeiboka, “Kanda Ni kan ninyi kan noutam tikoka antanirdeirinanyi iya kurum,” eboka lak kibmou. Ara, minob kuramwe sienyi si Melkisedek bitonyi kiboka antanirdeirin sienyi iya kibwe.

¹¹Nun Du bira antanirdeirisin sienyi kurur ara deyok ilinto kurur bok, a deyok eteresina ara ikin weik kurur ati ebman. Sunci ato uram minola bikman kum kurandum deyok aryi, niryi ato ebman.

¹²Sunda nun Du Yesus deyok ati uram tuba-tuba kekerandau cok, sunci a uram asi liliboka kum bikmarum ati ebman. Ati, sunci a uram eterena ati kikib kum kurandum. Erda, mitik mabwe ato kurandum ci, Er Imtamnyi Uram deyok kouboka bingna dinyi ababyi bita kum bikmarum. Ati, sunci eterena deyok kum bingnandum ati, deyok kouboka bingna dinyi akwe eterebkwansin. Deyok tabakoka bingna dinyi kum eterebkwansin ati ebman.

¹³Sunda mum yin mabwe nermabwe ato kurandum cok, “A dinyi ara teleb dinyi, o dinyi ara malyi dinyi,” diboka kum bingnandum ati ebman

¹⁴Dib en uram ati deyok tabakoka bingna dinyi ara sun “A dinyi ara teleb dinyi, o dinyi ara malyi dinyi,” tenen bingna nang aryi ur kekebkwaming. Sun ato kun nang ara alok mabwe ato tuba kum kunung. Erda, wise nang kibmang uca, kwaning nong ato dinyi ur yinung.