Read Futuna-Aniwa Ibrani 6 Bible Online

Ibrani 6 - Futuna-Aniwa bible

Ibrani 6

¹A deyok aryi, nunci nun Du Yesus Kristus deyok ati deyok kouboka eteren dinyi lilirmuruna kum kubkwayeb. Erda, yuk deyok doboka, “Bikatabkwayeb,” tenen bikdob dinyi asi lilibde binkwayeb. Ati, nunci, “Malyi kun dinyi takloboka Er Imtamnyi bisi milibdarur,” en uram asi tuba-tuba kum eterebkwayeb. Ato en uram ara deyok koun dinyi akwe kurur ati, tuba-tuba kum eterebkwayeb.

²Tonda, ninyi me dongona yuk-yuk deyok ababyi deyok koun dinyi kurur ati, nun tuba-tuba lilirmuruna kum kubkwayeb. Tonda, “Molobmilibkwayeb,” tenen ninyi tam taruk deirin deyok ababyi deyok koun dinyi kurur ati, lilirmuruna kum kubkwayeb. Tonda, sun diamingnyi nang ara kam bukwaming deyok ton, Er Imtamnyi biryi nun kuramibyi dinyi nirya lilibkwande deyok ton ababyi deyok koun dinyi akwe kurur ati lilirmuruna kum kubkwayeb.

³Ati, nun Nai Imtamnyi biryi milibsici uca, nunci bikatabdob nang asi bikdob dinyi akwe lilibde bankwayeb.

⁴Ati, Er Imtamnyi biryi dib en uram biriman aryi berekeibmou nang ara dib tenena taklobmaringnyi ura, nunci sun ato kun nang asi, “Sun malyi kun dinyi takloboka Er Imtamnyi bisi milibdarur,” ebtibyi do? Ato tenen kum. Sun ato kun nang ara Er Imtamnyi karebsou dinyi doboka Er Imtamnyi Kanya Roh Kudus mikib asi dobdobmai cok, taklobmai ati, nun Nai dam tamuboka kum biting. Tonda, a nang ara Er Imtamnyi Uram mikib ab aminda kubkwande dinyi mikib ab dobdobmai cok, nun Nai bisi taklobmai ati, nun Nai dam tamuboka kum biting.

⁶A nang ara nun Du Yesus bisi taklobmai ati, sunci nun Nai dam tamuboka kum biting. Sun ato kun nang ara Er Imtamnyi Mi bisi ina ngilikmang ati, sunci nun Du bisi tamuboka ninyi urasintam aryi co lase deici bing dangnaming ati ebman.

⁷Er Imtamnyi biryi mo karebci uca, kouna-kouna teleb kuboka arande. Ara, mo ceboka tukwetam kwiribdongobci ura, du mouboka nong teleb marande. Ato tukwe ara du mourirande tukwe asi Er Imtamnyi biryi, “Teleb tukwe kurur,” tenen kisal dangdur.

⁸Ba, ton tukwe ara sungsunga aboka tiling-tilinga malyi du moubci ura, ato tukwe asi Er Imtamnyi biryi, “Malyi to dinyi,” eboka submanto dinyi kurande. Sirya kobdob ara Erci ato dinyi as uk dongobkwande. Ato kuboka Er Imtamnyi biryi sun Ersi taklobkwamingnyi nang asi wenebkwande.

⁹Ni kwityabwe, ni boukwe kusunun nang. Niryi ato esunun cok, niryi sunti, “Er Imtamnyi bisi taklobmang,” tenen kum kunun ati ebman. Sunci nun Nai bisi diboka milirandum tenen bingsunun. Er Imtamnyi biryi sunsi lemsin dinyi karebkwansir ati ebman.

¹⁰Nun Nai Imtamnyi biryi sunsi malyi kum kimsurur. Ati, sunci nun Du Yesus bisi milirandum ati Erci luba kum kibmar ati ebman. Ati, sunci bico kiboka sun kwityabwe dib tenen nang asi dirnilirandau ani, ukuryok tuba dirnilirandum ati nun Nai biryi luba kum kimsurur.

¹¹Sun nirya aryi tanglona kum uca busul kuboka nun Du Yesus bisi milibkwandum ati ato ebmab. Ara, sun dibde bukmarum dinyi kunubkwansir ati, sunci ato kunurmuruna teleb.

¹²Ati, nunci sunti, “Sulbalyi kanya bobingnyei,” tenenub. Erda, sun dib tenen nang yuk nang ato kuboka Er Imtamnyi biryi ebdeibsou dibde bukoka dobdobkwandum. Ara, dib tenena ab dibde buna ab biriman aryi Er Imtamnyi biryi ebdeibsou to dobdobkwandum.

¹³Ura, nun Nai Imtamnyi biryi nun aibwe Abraham bisi uram ebdeibmou cok, Erci katabum en uram eboka ebdeibmou. Nun Nai bira Iya Erebdobnyi kurur ati, Erci yuk nang si siboka katabum en uram kum ebmou. Erda, Erci, “Diboka kunubkwan,” tenen Erbaramnyi si siboka katabum en uram ebmou.

¹⁴Ati, nun Nai Imtamnyi biryi nun aibwe Abraham bisi ato eboka ebdeibmou, “Niryi kansi kisal dakinyi uca, kan yala nang ara ilinto kubkwaming,” ebmou. (Kejadian 22:17)

¹⁵Er Imtamnyi biryi ato ebdeibmou ura, er Abraham biryi a dinyi dibde buramwe.

¹⁶Nunda tukwetam nang aryi, “Ato-ato diboka kunubkwan,” eramibiryi, nunci erebdob nang si siboka erdeiriramib. Ara, yuk nang aryi nunti, “Diboka kunubkwande,” tenen bikwaming ati, nunci erebdob nang si siboka, “Ato-ato kunubkwan,” eboka uram erdeiriramib.

¹⁷Ura, nun Nai Imtamnyi biryi Er mabwe nermabwe asi, “Ato-ato karebkwansin,” ebsou ci, Erci, “Niryi a uram diboka kunubkwan tenen bikwaming,” tenebsou ati, Erci nunti erdeirisin uram dem kum ebsou. Erda, Erci Erbaramnyi si siboka katabum en uram ebtabaksou.

¹⁸Ura, nun Nai biryi nunti erdeirisin uram ara eblobman kum dinyi kurur. Tonda, nun Nai biryi katabum eboka ebtabakmou uram ababyi eblobman kum dinyi kurur. Nun Nai Imtamnyi bira tola uram kum erutnyi biryi Erci ebdeibmou uram diboka kunubkwansir ati ebman. Ati, nunda dib tenen nang nun Nai dam lemyandobmab nang ara kankana kum uca a uram asi dibde buna teleb.

¹⁹Nun Nai biryi nunsi ebdeibsou uram ara Erci diboka kunubkwande. Co ngun-ngun dararyangan keil ara katabum eboka darardeirirande to, Er Imtamnyi biryi, “Lebdeibkwansin,” en uram ara katabum eboka darardeirisurur. Nun dibde bunub dinyi ara talyi dinyi kuma. Erda, Er Imtamnyi ai bublan aling bisiboka Er Imtamnyi ai sirik wekmar ati katabum erdeirin dinyi kurur.

²⁰Nun Du Yesus bira Melkisedek yalanyi bitonyi kuboka Er Imtamnyi kan ninyi kan tikoka antanirdeirisin sienyi kibmou. Kibmou cok, Erci nunsi libkwamwe ati imtam ai kurur molon ai wekmou ura, Er Imtamnyi bisi dama deirirur.