Read Futuna-Aniwa Ibrani 7 Bible Online

Ibrani 7 - Futuna-Aniwa bible

Ibrani 7

¹Ura, anyi minob kuramunyi si Melkisedek bira weik sienyi kuboka Salem atei nang asi kalingnamwe. Kalingnamuryi, erda Er Imtamnyi Iya Erebdobnyi bisi wa irmiliramuryi, ninyi kan Er Imtamnyi kan noutam tikoka antanirdeirin sienyi kuramwe. Ura, nun aibwe Abraham ab er milin nang ab sun Kanaan nang weik sien nang ab ordanmai ba, muna kibdongobmai ura, sun mining mutuk tamuryanganmai ba, anyi Melkisedek biryi nun aibwe Abraham ab ebdanmarei ci, nun aibwe bisi kisal dakmou.

²Ura, nun aibwe Abraham ab Melkisedek ab ebdanmarei ba, nun aibwe biryi er muna kibdongobmou nang bona bon dinyi nirya asi doboka bokeibmou. Bokeibmou cok, erci bongna dinyi takubaryi asi kibmou ba, bongna tentok asi Melkisedek bisi karebmou. Anyi, “Melkisedek,” er si ara nun uram danguboka, “Weik Sienyi, Er Imtamnyi Urasintam aryi Teleb Kunanyi,” kurur. Er arungnamwe atei, “Salem,” atei ara danguboka, “Antanirdeirin atei,” kuramwe. Ati, Melkisedek bira Salem atei sienyi kuramwe deyok aryi, erda, “Antanirdeirin sienyi,” kuramwe. [1]

³Melkisedek er nai si ab er kwin si ab er aibweyabwe si yuk-yuk ab ara ninyi kum bingnung. Tonda, Melkisedek deibmou talak ab er dibmou talak ababyi ninyi kum bingnung. Ati, Melkisedek bira kikliboka Er Imtamnyi Mi iya kam kurutnyi bitonyi kuramwe. Ati, Melkisedek bira Er Imtamnyi Mi bitonyi kuramuryi, Erda Er Imtamnyi kan ninyi kan tikoka antanirdeirin sienyi tanglona kum uca kiklirdeiriramwe.

⁴Ura, Melkisedek bira nun aibwe Abraham bisibkaboka Iya Erebdobnyi kuramwe ati teneibkwayeb. Ati, nun aibwe Abraham biryi Melkisedek biti, “Ni nai,” tenen ersi bongna tentok dinyi asi karebmou ati ato ebman. Ara, Abraham biryi er ordana nang asi muna kibdongobmou ura, erci a nang bona bon dinyi doboka bokeibmou ci, bongna dinyi takubaryi kibmou ci, bongna tentok asi Melkisedek bisi karebmou.

⁵Ura, sun Lewi yala nang ara sun Israel yala nang kankan kuboka Er Imtamnyi kan ninyi kan tikoka antanirdeirin nang kuramiryi, sunci Er Imtamnyi Arungdeirin Uram deib aryi sun kwityabwe Israel kankan aryi yuk yala nang asi ato eboka moloramnyi, “Sun bona bon dinyi nirya bokeiboka bongna dinyi takubaryi kibmun cok, bongna dinyi tentok nunsi karebsindarur,” eboka moloraming. Ara, sun Israel yala nang kankan asi yuk yala nang ababyi nun aibwe Abraham yala nang kuraming bok, sun Lewi yala nang ara a nang ara sun kwityabwe kuramnyi nang asi, “Sun bona bon dinyi bokeiboka nunsi bongna tentok karebsindarur,” eboka moloraming.

⁶Ura, Melkisedek bira Lewi yalanyi kum kuramuryok, erci Lewi er aibwe kisok si Abraham taruk aryi bona bon dinyi aryi kuboka bongna tentok asi dobdobmou. Sirya dobdobmou ura, Melkisedek biryi nun aibwe Abraham bisi kisal dakmou. Ara, Er Imtamnyi biryi, “Kisal dakwan,” eboka ebdeibmunyi bisi Melkisedek biryi kisal dakmou.

⁷Ura, amwetam kun nang ara erebdob nang asi kisal dangnaming do? Ato tenen kum. Erda, erebdob nang ara amwetam nang asi kisal dangnaming. Nunci a dinyi diboka bingnub. Ati, Melkisedek biryi nun aibwe Abraham bisi kisal dakmou ati, erda nun aibwe Abraham bisibkaboka Iya Erebdobnyi kuramwe.

⁸Sun Lewi nang ara, “Sun bona bon dinyi bokeiboka bongna tentok asi karebsindarur,” eboka moloramingiryok, tukwetam nang kuraming ati dimnaming. Ba, Er Imtamnyi Uram eteresurur to, bongna tentok asi dobdobmunyi Melkisedek bira kam kurutnyi tuba kurur.

⁹Nun aibwe Abraham ab Melkisedek ab ebdanmarei ba, Abraham biryi yal dakwamunyi si Lewi kum deibmou. Kum deibmou bok, Abraham bira Lewi er aibwe kisok kuramwe. A deyok aryi, nunci, “Sun Lewi yala nang ara bongna tentok asi bulurdeiriraming nang aryi sun aibwe kisok Abraham biriman aryi Melkisedek bisi bongna tentok karebmai,” ebtibyi.

¹⁰

¹¹Sun Lewi yala nang ara Er Imtamnyi kan ninyi kan tikoka antanirdeiriramnyi bok, sunci antanirdeirin dinyi dib dinyi kum boyangaramnyi. Sun Lewi yala nang ara Er Imtamnyi kan ninyi kan tikoka antanibdeibkwamnyi deib aryi Er Imtamnyi biryi sun Israel yala nang asi kunurdeirin uram minob uram karebmou ati ato ebman. Sun Lewi yala nang ara antanirdeirisina dinyi dib dinyi kurdeirirantingnyi uca, Er Imtamnyi biryi yuk antanirdeirisinanyi kum tikeibmasute. Bok, Lewi yalanyi Harun ab er yala nang ab aryi antanirdeirisin dinyi ara dib dinyi kum kurdeiriramnyi. A deyok aryi, Er Imtamnyi biryi, “Yuk yalanyi bisi tikeibnyi uca, Anyi biryi Ni kan ninyi kan tikoka antanirdeirin dinyi dib dinyi iya boyankwande,” tenen nun Du Yesus Melkisedek bitonyi bisi tikeibmou.

¹²Er Imtamnyi biryi minob antanirdeiriramnyi nang asi unubdeibmou ci, nun Du Yesus yuk yalanyi asi tikeibmou. A deyok aryi, Er Imtamnyi biryi Er kunurdeirin uram minob uram ababyi nisintum takloboka unubdeibmou ci, kunurdeirin uram ukuryok uram asi karebmasou. A dinyi ara bisik sekman kum kurur ati ebman.

¹³Minob talak aryi Er Imtamnyi kan ninyi kan tikoka antanirdeiriramnyi nang ara Lewi yalanyi Harun yala nang kuramnyi. Ba, nun Du Yesus bira sunsi unuboka antanirdeirisurutnyi kibmou ci, Erda Harun yalanyi kum kurur. Tonda, nun Du Yesus yala nang ara antanirdeirisina nang kum kuramiryi, sunci yuk nang asi likniboka Er Imtamnyi bisi ninyi dama kum deiriramnyi.

¹⁴Nun Du bira Yehuda yalanyi kuramwe ba, er yala nang ara antanirdeirisina nang kum kuramnyi ati lak kubmar. Er Musa biryi Harun ab er yala nang ab ati, “Er Imtamnyi kan ninyi kan tikoka antanibdeibkwanung,” ebmou cok, Erci sun Yehuda yala nang ati, “Sunbabyi antanirdeirin nang kibting,” kum ebmou. Musa biryi ato kum ebmou bok, Er Imtamnyi biryi nun Du Yesus bisi tikeibmou.

¹⁵Tonda, nun ebmab to ara Er Imtamnyi biryi nun Du Yesus Melkisedek bitonyi kuboka iya kam kurutnyi bisi tikeibmou ati ebmab. Ara, Harun yala nang asi unubdeibmuryi, Erda Er Imtamnyi kan ninyi kan tikoka antanirdeirisurutnyi kibmou. Nun Du bira antanirdeirisurutnyi kibmou deib aryi nunci tabakoka, “Lak kusurur dinyi kurur,” tenen bingnub. Ara, “Er Imtamnyi biryi Er kunurdeirin uram minob uram barwetam kibdeibmou,” tenen bingna dinyi ara tabakoka lak kimsurur.

¹⁶Nun Nai Imtamnyi bira, “Ukuryok antanirdeirisurutnyi bisi tikeibkwan,” teneamwe ba, Erci, “Antanirdeirin nang deibdobanyi bisi tikeibkwan,” kum teneamwe. Erda, nun Nai biryi, “Din kumnyi kuboka iya mikibnyi bisi wibdeibkwan,” tenen nun Du Yesus bisi tikeibmou.

¹⁷A deyok aryi, Er Imtamnyi Uram umbura aryi nun Du Yesus biti ato ebmou. “Kanda Er Imtamnyi kan ninyi kan tikoka antanirdeirisurutnyi iya kubkwandim. Kanda Melkisedek bitonyi kuboka Er Imtamnyi wa iya ibkwandim,” ebmou. (Mazmur 110:4)

¹⁸Ati, Er Imtamnyi minob ura, “Harun yala nang ara Ni kan ninyi kan tikoka antanibdeibkwanung,” eboka arungdeiriramwe ani, Erci ukuryok aryi a arungdeirin uram asi dongtam deibmou. Minob antanirdeiriramnyi dinyi ara malyi kun dinyi kilisina asi diboka kum boyangaransou deyok aryi, mitang dinyi ton talyi dinyi ato kuramwe.

¹⁹Er Imtamnyi biryi Musa biriman aryi minob arungdeiriramwe uram ara sungloramwe uca, antanirdeirin dinyi iya teleb dinyi kum boyangaransou. A deyok aryi, minob dinyi ara mitang dinyi ton talyi dinyi ato kuramwe ati ebman. Ani, ukuryok ara nun Nai Imtamnyi biryi ukuryok uram ebdeibsou ci, nun Du Yesus bisi antanirdeirisurutnyi tikeibmou. Nun Du bisi tikeibmou deyok aryi, nunci, “Er Imtamnyi biryi nunsi diboka lebkwansir,” tenen katabum kanya boboka dibde bunub. A dibde bunub dinyi biriman aryi nunci Er Imtamnyi dam banub.

²⁰Ura, minob talak ara nun Nai Imtamnyi biryi sun Harun yala nang asi tikeibmou ci, Erci katabum en uram kum ebtabakmou. Ani, nun Nai biryi nun Du Yesus bisi tikeibmou ci, Erci katabum en uram ababyi ebtabakmou. Ara, “‘Ukuryok antanirdeirisurutnyi bira iya antanibdeibkwande,’ tenen diboka bikting,” tenen nun Nai biryi katabum en uram ebtabakmou.

²¹Minob talak aryi Er Imtamnyi biryi katabum erdeirin uram kum ebtabakmou. Ani, nun Nai Imtamnyi biryi nun Du Yesus bisi tikeibmou ci, Erci katabum en uram ebtabakmou. Ati, nun Nai Imtamnyi biryi nun Du Yesus bisi ato ebmou, “Nira Iya Erebdobnyi biryi katabum erdeirin uram ebmakin ci, ‘Ato-ato karebkwankin,’ en uram ebdeibmakin. Kanda Ni Imtamnyi kan ninyi kan noutam tikoka antanirdeirirumnyi iya kubkwandim ati ebmakin, Niryi Kanti ato teneankise to ara Ni kanya dam danguna kum uca iya tenekunun,” ebmou. Er Imtamnyi biryi nun Du Yesus bisi ato ebmou.

²²Ati, Er Imtamnyi biryi katabum erdeirin uram ebmou deib aryi nun Du Yesus bira Er Imtamnyi ab ninyi ab antanibdeiboka mururdeirisina deyoknyi kibmou. Nun Du biryi ukuryok mururdeirisurur dinyi ara minob mururdeiriramnyi dinyi asi bisibkaboka iya teleb dinyi kurur ati ebman.

²³Ura, sun minob antanirdeiriramnyi nang ara tukwetam nang kuramiryi, diramnyi. Diramnyi deyok aryi, antanirdeirin nang ilinto aryi unubnin-unubnin antanirdeiriramnyi. Ati, a nang kankan asi ninyi tentok ababyi iya kum antanirdeiriramwe.

²⁴Ba, nun Du Yesus bira iya kam kurutnyi kurur ati, Erci tanglona kum uca Er Imtamnyi kan ninyi kan noutam tikoka antanirdeirisurutnyi iya kurur.

²⁵Nun Du bira Er Imtamnyi kan ninyi kan tikoka antanirdeirisurutnyi iya kurur. Iya kurur deyok aryi, Erda Mikibnyi biryi sun Er dam yangan nang asi sunglona kum uca lemdeirisurur. Ara, Erda iya kam kurutnyi biryi sun Er dam biriman aryi Er Imtamnyi dam baramingnyi nang ati tuba-tuba molormilibde basurur. Tanglona kum uca iya molormilibde basurur deyok aryi, Erda mikibnyi biryi nunsi sunglona kum uca lemdeirisurur.

²⁶Nun Du bira Er Imtamnyi kan ninyi kan tikoka sunglona kum uca antanirdeirisurutnyi kurur deyok aryi, nunda dib tenen nang aryi Erti, “Yuk nang asi bisibkaboka antanirdeirisina ati iya kikibnyi kurur,” tenenub. Nun Du bira Er Imtamnyi urasintam aryi iya teleb kurutnyi kurur ci, malyi kun dinyi ton kum kurur. Erda kilibdob kanya borutnyi kurur cok, malyi kun nang atonyi kum kurur. Tonda, Er Imtamnyi biryi nun Du Yesus bisi iya erebdob si karebmou ci, Ersi erebdeiboka imtam ai welebdeibmou.

²⁷Nun Du bira sun Harun yala nang aryi kuboka Er Imtamnyi kan ninyi kan noutam kuboka antanirdeirin sien nang kuramnyi to kum kurur. Sun Harun yala nang ara malyi dinyi tuba kunuramnyi deyok aryi, sunci, “Er Imtamnyi biryi nibaramnyi malyi kun dinyi kilibnute,” tenen ninyi dama deiriramnyi. A sirya ura, sunci, “Er Imtamnyi biryi sun Israel yala nang yuk nang ababyi sun malyi kun dinyi kilibte,” tenen dama tamuboka deiriramnyi. A dinyi ara uki-uki nirya kunubde baramnyi. Ba, nun Du Yesus bira malyi kun dinyi kum kuramwe deyok aryi, Erci, “Ni malyi kun dinyi kilibsute,” tenen Er Imtamnyi bisi ninyi dama ton kum deibmou. Erda, Erci yuk nang sun malyi kun dinyi asi sunglona kum uca kilibkwansou ati Erci Erdamnyi karebdandoka Er Imtamnyi bisi dama deibmou. Ara, Liki tentok aryi Erci Erdamnyi karebdandoka ninyi dama deirin dinyi iya teleb dinyi karebmou. Liki tentok asi Erdamnyi karebdanmou deyok aryi, nun Du Yesus biryi aminda aryi ninyi dama tamuboka ton kum karebkwande.

²⁸Er Imtamnyi biryi Musa biriman aryi arungdeirin uram deib aryi sun Israel yala nang aryi, “Antanirdeirin sien nang kibkwanung,” tenen sun Harun yala nang tingdeiriramnyi. Ara, a nang ara tukwetam nang kuramiryi mikib kum kuramnyi bok, sun Israel yala nang aryi a nang asi tingdeiriramnyi. Ani, aminda aryi Er Imtamnyi biryi ukuryok uram katabum erdeirin uram karebmou. A katabum erdeirin uram deib aryi Er Imtamnyi biryi Er Mi biti, “Antanirdeirin sienyi iya kubkwande,” tenen tikeibmou. Sirya tikeibmou uca, nun Du Yesus bira antanirdeirisin sienyi iya telebnyi kibmou.