Read Futuna-Aniwa Ibrani 8 Bible Online

Ibrani 8 - Futuna-Aniwa bible

Ibrani 8

¹Nun lak ebmab uram deyok ara ato. Nun Du Yesus bira iya telebnyi kurur ci, Er Imtamnyi kan ninyi kan noutam kuboka antanirdeirisina sienyi kurur. Erda imtam ai welebindoka nun Nai Iya Erebdobnyi erebdob sokon siriktam kuboka burbinmou.

²Burbinmou ura, nun Du Yesus bira Er Imtamnyi dam kun ai kobdob aryi kurur ci, Er Imtamnyi biryi karebmou wa erebdob wa ibde barur. Sun Israel yala nang kankan kuboka antanirdeirin nang ara tukwetam kuboka dama deirin ai kuboka Er Imtamnyi biryi takubdeibmou wa kunubde baramnyi. Akai ara keis ol ai si Kemah Suci ai ara ninyi aryi doamnyi. Ba, nun Du Yesus bira Er Imtamnyi dam kun ai kobdob aryi kurur ci, Er Imtamnyi biryi Ersi karebmou wa kunubde barur. Akai ara imtam ai aryi kurur ba, Er Imtamnyi yuk aryi kikniamwe ai kurur.

³Sun antanirdeiriramnyi sien nang yuk-yuk nirya asi tingdeiriramnyi ara Er Imtamnyi urasintam aryi ninyi dama deiriramnyi ati tingdeiriramnyi. Ura, nun Du Yesus bibabyi antanirdeirin deyoknyi kibmou deyok aryi, Erbabyi Er Imtamnyi urasintam aryi ninyi dama deibkwamwe. Erda Er Imtamnyi bisi ninyi dama kum deibmote ura, Erda Er Imtamnyi kan ninyi kan tikoka antanirdeirin deyoknyi kum kurante. Ati, nun Du Yesus biryi Er mining nong bol ining karebdandoka Er Imtamnyi bisi dama deibmou.

⁴Nun Du bira imtam ai kuboka Er Imtamnyi dam kobdob kurur ai kurur cok, Erda Er Imtamnyi kan ninyi kan noutam tikoka antanirdeirisin sienyi kurur. Erda tukwetam kuboka Er Imtamnyi kan ninyi kan noutam kuboka antanirdeirinanyi kum kurur. Ara, Musa biryi minob kerek sekamwe to tukwetam kuboka Er Imtamnyi bisi ninyi dama deirin wa ibde baraming nang ara yuk nang kuraming. A deyok aryi, nun Du Yesus bira tukwetam kuboka antanirdeirinanyi kum kurante.

⁵Sun tukwetam kuboka Er Imtamnyi bisi ninyi dama deirin dinyi bobaraming nang ara tukwetam kuboka doamnyi keis ol ai si Kemah Suci ai kuboka wa ibde baraming. A nang ara Er Imtamnyi dam kun ai kobdob ara imtam ai aryi wa ibde kum baraming. Tukwetam ai kuboka Kemah Suci ai ara dib dinyi kum kurur. Erda, kukumna ato dinyi ton tiya dinyi ton kurur. Imtam ai ara diboka Er Imtamnyi dam kun ai kobdob kurur ati ebman. Imtam ai ara Er Imtamnyi dam kun ai kobdob kurur deyok aryi, Er Imtamnyi biryi Musa bisi, “Nira Imtamnyi bisi tukwetam kuboka keis ol ai si Kemah Suci ai dobdarur,” ebdeibmou cok, Erci, “Mutuk kon kuboka tonkwa kuranumwe ba, Niryi kansi lak kibmakise to sunci miliboka tukwetam kuboka ai kiknibdarur,” ebmou. (Keluaran 25:40)

⁶Ba, nun Nai Imtamnyi biryi nun Du Yesus bisi tikeibmou ci, Erci Ersi iya erebdob wa karebmou. Ara, nun Du Yesus bira antanirdeirisin sienyi Iya Erebdobnyi kibmou uca, Erda sun tukwetam kuboka antanirdeirin nang nirya asi outam kibdongoboka bisirur. Tonda, Er Imtamnyi biryi nun Du Yesus noutam tingnanyi biriman aryi ukuryok mururdeirisin dinyi karebsou ara minob karebsou mururdeirisin dinyi nirya asi outam kibdongoboka bisirur. Tonda, ukuryok mururdeirisin dinyi katabum erdeirin uram yuk-yuk ara iya Teleb Uram kurur ci, minob mururdeirin dinyi katabum en uram yuk-yuk asi outam kibdongoboka bisirur.

⁷Minob mururdeiriramnyi dinyi ara sunglona kum uca teleb dinyi kubmote uca, nun Nai Imtamnyi biryi minob dinyi unubdeiboka ukuryok mururdeirisina kum karebmasute.

⁸Bok, sun Israel yala nang minob kuramnyi nang ara Er Imtamnyi biryi minob mururdeirin uram kum kunubde baramnyi. A deyok aryi, nun Nai biryi a nang asi ato eboka kerebmou, “Nira Imtamnyi biryi ato eboka lak ebsin, ‘Aminda kubkwande talak aryi Nira Imtamnyi biryi sun Israel yala nang ab sun Yehuda nang ab tamuboka murubdeibkwayeb. Ara, ukuryok mururdeirina karebkwan. A ukuryok murubdeibkwayeb uram ara minob murubdeibmoubwe uram ato kum kubkwande.

⁹Minob ura sun Israel yala nang aibweyabwe ara Mesir mutuk kuramnyi asi Niryi taruk taleboka sunsi lebmasise. Lebmase ura, Niryi sunsi mururdeirina uram karebmasise. Karebmasise bok, sun Israel yala nang aryi a mururdeirina uram asi takloboka kum kunuramnyi. A deyok aryi, Niryi sunti yu kanya boboka dokdonokmase.’ Nira Iya Erebdobnyi biryi ato ebmase,” ebmou.

¹⁰“Ba, aminda kubkwande talak aryi Nira Imtamnyi biryi sun Israel yala nang asi ukuryok mururdeirina karebkwan. Nira Iya Erebdobnyi biryi ato ebman. Niryi, ‘Ato-ato kubdarur,’ en uram asi karebniryi, sun kanya dam yuk-yuk asi kerek sekeibnyi uca, sunci Ni uram asi diboka kekebkwaming. Nira Imtamnyi bira sun dam kunanyi iya kubkwan. Ba, a nang ara ni mabwe nermabwe diboka kubkwaming.

¹¹A talak ara ninyi aryi yuk nang asi, ‘Er Imtamnyi dam kun nang kubkwandarur,’ eboka kum ebdankwaming. Ninyi nirya ara Ni dam kun nang kubkwaming ati sunci ato eboka tuba yan kum memebdankwaming.

¹²Nira Imtamnyi biryi a nang sun malyi kun dinyi nirya asi kilibkwan. Nira sun malyi kun dinyi asi tuba kum teneibkwan. A deyok aryi, a nang nirya Ni dam kun nang kubkwaming ati ebman,” Er Imtamnyi biryi ebmou. (Yeremia 31:31-34)

¹³Ati, nun Nai Imtamnyi biryi, “Ukuryok mururdeirisina karebkwansin,” ebmou uca, Erci yuma kobdob mururdeiriramnyi dinyi ati, “Wisibdobwe dinyi aca,” ebmou. Yuma kobdob murdeiriramnyi dinyi ara wisibdobwe dinyi aca kubmar ati, tiya akwe kubmar ati, iya kum kubkwandur.