Read Futuna-Aniwa Ibrani 9 Bible Online

Ibrani 9 - Futuna-Aniwa bible

Ibrani 9

¹Ura, yuma kobdob mururdeirina wa iramnyi talak ara tukwetam kuboka keis ol ai si Kemah Suci ai kuramwe. Tonda, “Ato-ato kuboka Er Imtamnyi bisi molobdarur,” erdeirin uram ababyi kuramwe.

²Ati, Er Imtamnyi biryi, “Niti keis ol ai si Kemah Suci ai dobdarur,” ebmou uca, sun Israel yala nang aryi Kemah Suci ai dobmai. A Kemah Suci ai ara wiliboka dobmai. Bublan dam kuramwe wiliboka ai ara, “Er Imtamnyi Dam Kurur Ai,” eboka si doramnyi. Ba, dongtam aryi kuramwe wiliboka ai ara, “Er Imtamnyi Dam Kobdob Kurur Ai,” eboka si doramnyi. Bublan dam aryi kuramwe wiliboka ai umbura aryi weik uk buk diniboka burdeirin dinyi ton co lamna ton Er Imtamnyi bisi dama deiriramnyi kwaning roti ton a kuramwe.

³Ba, cang ongon aling dongtam ara, “Er Imtamnyi Dam Kobdob Kurur Ai,” kuramwe.

⁴A wiliboka ai umbura aryi dama deirin dam emas dinyi dongobdeibyi. A dama deirin dam ara tong teleb dinyi asi uk aboka Er Imtamnyi bisi dama deibkwamnyi. Tonda, co sangkol ara Mururdeirisina Kerek Sengna Dongobdeibyi Co Sangkol emas dinyi ababyi a kuramwe. A co sangkol umbura aryi moyok emas dinyi dongobdeibyi. Ba, a moyok umbura ara Er Imtamnyi biryi kareramwe kwaning roti si Mana dongobdeibyi. Tonda, nun aibwe Harun taleramwe kama ababyi co sangkol umbura dongobdeibyi. Er Imtamnyi biryi, “Harun bira niryi tikeibmase antanirdeirinanyi kurur ati lak kibkwan,” tenen karebmou uca, Harun taleramwe kama ara betekoka keta dobmou. Tonda, kerek sengna keil bitinyi ababyi co sangkol umbura aryi dongobdeibyi. A keil bitinyi asi Er Imtamnyi biryi, “Ukubdarur-Ukuna mem,” en uram kerek sekamwe.

⁵Ura, co sangkol emas dinyi deici dina-dina ara Er Imtamnyi Uram eryuryangan nang si Kerubim asi kiknibmai. A bitinyi nang ara Er Imtamnyi berengdeirin dinyi lak kimnandei ci, sun maka ol ato dinyi borandei ci, co sangkol siklina co asi irina kurandei. A siklina ara, “Nun Malyi Kun Dinyi Kilisurur,” siklina co kuramwe. Ura, Er Imtamnyi ai umbura aryi kuramwe dinyi nirya ara kiklin dinyi akwe kuramwe bok, nunci a dinyi yuk-yuk asi lilibde kum bankwayeb.

⁶Sun Israel yala nang aryi Kemah Suci ai sirya dobmai ura, akai umbura dinyi nirya liliboka deibmai ura, sun Er Imtamnyi kan ninyi kan noutam kuboka antanirdeirin nang ara Er Imtamnyi bisi dama deiriramnyi. Ara, sun antanirdeirin nang ara bublan dam kuramwe wiliboka ai si, “Er Imtamnyi Dam Kurur Ai,” uki-uki nirya wengnamiryi, Er Imtamnyi bisi dama deiriramnyi. A nang ara dongtam kuramwe wiliboka ai wekman kum kuramnyi.

⁷Ba, Er Imtamnyi kan ninyi kan noutam kuboka antanirdeirin sienyi bira dongtam kuramwe wiliboka ai si ara, “Er Imtamnyi Dam Kobdob Ai,” ur wengbaramwe. Ara, erci akai asi tuba-tuba kum wengbaramwe. Erda, kwalina tentok bisiramwe ura, uki tentok akwe wengbaramwe. Ur wengbinkwamwe uki tum berengnamwe ura, antanirdeirin sienyi biryi kiknibminikoka sapi ining doboka dongtam kuramwe wiliboka ai ur wengbaramwe. Ati, erci, “Er Imtamnyi biryi ni walwal aryi malyi kun dinyi kilibnute,” tenen, “Sun Israel yala nang walwal aryi malyi kun dinyi kilibsute,” tenen wengbaramwe.

⁸Er Imtamnyi Kanya Roh Kudus aryi nunsi a deyok ati ato lak kimsurur. Tukwetam kuboka keis ol ai si Kemah Suci ai tuba kuramwe ba, Er Imtamnyi Dam Kobdob Ai imtam ai kobdob ara wengbana kum tuba kuramwe.

⁹Minob dinyi nirya ara ukuryok talak kurande dinyi asi kikliboka minob lak kibdeibmou. Minob talak aryi Er Imtamnyi bisi dama deiriramiryok, a dama deirin dinyi ara nun malyi kun dinyi diboka kum kiliramwe. Kum kiliramwe uca, ninyi kanya ara, “Malyi dinyi kuramoubwe asi Er Imtamnyi biryi diboka kum kilibmou,” tenen ilil kanya tuba boramnyi.

¹⁰Minob antanirdeirin uram ara yina-yina yin dinyi deyok akwe takurdeiriransou. Tonda, me ilingna dinyi deyok akwe takurdeiriransou. A takurdeiriransou dinyi nirya ara ninyi kanya asi kum kiliransou. Erda, baitam dinyi akwe takurdeiriransou.

¹¹Ura, nun Du Yesus Kristus bira Er Imtamnyi kan ninyi kan noutam kuboka antanirdeirin sienyi kibmou ura, Erci nunsi teleb dinyi ukuryok dobdobmab dinyi karebkwansou ati Er Imtamnyi bisi dama deibmou. Ati, nun Du Yesus bira tukwetam kuboka dama deirin ai kum wengbinmou. Erda, Erci imtam ai aryi kuboka iya teleb ai sirya wengbinmou. Akai ara ninyi aryi kum kiknibmai. Erda, Er Imtamnyi biryi kiknibmou. Akai ara Er Imtamnyi biryi kiknibmou im dangna tukwe dangna dinyi yuk dinyi ato kum kurur.

¹²Nun Du bira, “Imtam kuboka dama deirin ai wengbinkwan,” tenebmou ci, kambing ining ton sapi ining ton kum bobmou. Erda, er mining ining diksakmou biriman aryi iya lemsina asi karebsou ura, Erci imtam ai kuboka “Er Imtamnyi Dam Kobdob Kurur Ai,” wengbinmou.

¹³Minob ura sun Lewi yala aryi kuboka antanirdeirin nang ara, “Er Imtamnyi biryi nun Israel yala nang asi dobdobsute,” tenen kambing ining ton sapi ining ton doboka sun Israel yala nang deici aryi dingdongoramnyi. Tonda, sapi oboka uk dabmai ura, sunci uk sikci doboka sun Israel yala nang deici aryi kwemdongoramnyi. A dinyi nirya ara malyi kun dinyi diboka kum kiliramwe bok, kiklin dinyi akwe kuramwe.

¹⁴Ba, nun Du Yesus Kristus Er ining ara kiklin dinyi kum kurur. Erda, Er ining ara nun malyi kun dinyi diboka kilisurur. Erda Er Imtamnyi Kanya Roh Kudus biriman aryi Erdamnyi karebdandoka Er Imtamnyi bisi dama iya teleb dinyi deibmou. Nun Du Kristus Er ining aryi nun malyi dinyi kilibmasou deyok aryi nunci, “Nun malyi kun dinyi kilibmasou,” tenenub uca, nun Nai Imtamnyi kam kurutnyi urasintam aryi kuboka Er Uram asi kunubkwayeb.

¹⁵Nun Du Kristus bira Er Imtamnyi kan ninyi kan tingdur ci, ukuryok mururdeirisina deyoknyi kurur. Ara, “Er Imtamnyi biryi ebdeibmou to, Erci nabmou nang ara kisal dangna iya kubkwande dinyi asi dobdobkwaming,” tenen Erda ukuryok mururdeirisin deyoknyi kurur. Nun Du bira Erdamnyi karebdandoka dibmou uca, Erci minob mururdeirin talak aryi malyi kuramnyi dinyi ababyi nirya kilibmou.

¹⁶Nun tukwetam nang ara, “Ni dibmanyi ura, ni mabwe nermabwe aryi ni bona bon dinyi talebkwaming,” tenen bona bon dinyi ebdeiboka kerek sengna sengnamib. Ara, “Ni mi biryi a dinyi talebkwande, ni nebnyi o dinyi talebkwande,” eboka kerek sengnamib. Ati, er bona ebdeibdinyi bira kum dibci ura, er mabwe nermabwe aryi er bona kum dordoraming.

¹⁷Bona bon dinyi erdeirin kerek sengna sekmounyi biryi kam tuba kurur ba, er mabwe nermabwe er dinyi kum dobdobkwaming. Ura, sirya dibmou ati lak kubci ura, sun mabwe nermabwe aryi sun nai ebdeibmou dinyi yuk-yuk asi talebkwaming.

¹⁸Er Imtamnyi biryi karebsou mururdeirisina ababyi neiktoto kurur. Nun Du Kristus bira Er ining sirya diksakmou ba, sirya dibmou ura, Er Imtamnyi biryi nunsi iya kam kun dinyi karebsou. Minob mururdeiriramnyi talak ababyi neiktoto kuramnyi. Kambing sapi asi sirya obmai ura, sun ining dobmai ura, mururdeiriramnyi.

¹⁹Ati, Musa biryi Er Imtamnyi Uram ebmurubmou ci, “Ato-ato kubdarur,” ebmou. Sirya ebmou ura, erci sapi ining ton kambing ining ton doboka me ab tonkwa talbalibmou. Ura, erci ining me asi toubdongoboka, “Ukubdarur-Ukuna mem,” en kerek sengna deici donokmou. Tonda, erci sungsunga si Hisop ara bi aling aryi koubdongobmou dinyi taleboka ining me toubdongoboka sun bulubmai nang dam donokmou.

²⁰Toubdongoboka donokmou ci, erci sun bulubmai nang asi ato ebmou. “A ining biriman aryi Er Imtamnyi biryi mururdeirisina asi sirya kunubmasir. Ati, sunci a mururdeirisina uram asi diboka kekebdarur,” ebmou. (Keluaran 24:8)

²¹A sirya ura, er Musa biryi keis ol ai si Kemah Suci ai ara Er Imtamnyi dam kurur ai ababyi ining doboka dikdongobmou. Tonda, akai umbura kuramwe dinyi yuk-yuk asi erci ining doboka dikdongobmou.

²²Ati, Er Imtamnyi biryi, “Ukubdarur-Ukuna mem,” en uram eteresurur to, utotoa nirya ara Er Imtamnyi urasintam aryi dobdobmanto kubkwande ati ining aryi kilinub bok, ton dinyi mitikanun ara ining aryi kum kilinub. Tonda, ining dingsangna kum kuante ura, nun malyi kun dinyi kilibman kum kuransute.

²³Tukwetam kurande dinyi ara imtam dinyi kikliramnyi dinyi ara, “Er Imtamnyi urasintam aryi dobdobmanto kubte,” tenen kambing sapi ining doboka kiliramnyi. Ara, Er Imtamnyi biryi, “Ining aryi kilibmunyi dinyi akwe dobdobkwan,” eboka arukdeibmou deyok aryi, a dinyi ara bisik sekmanto kum kuramwe. Ba, nunda Er Imtamnyi mabwe nermabwe ara kambing sapi ining biriman aryi Er Imtamnyi urasintam aryi dobdobmanto kum kunub. Erda, utotoa nirya bisibkaboka dama deirin dinyi iya teleb dinyi biriman aryok nunda Er Imtamnyi urasintam aryi dobdobmanto nang kunub. Ara, nun Du Yesus Kristus biryi Erdamnyi karebdandoka iya teleb dama deibmou deyok aryi nunda Er Imtamnyi urasintam aryi dobdobmanto nang kunub.

²⁴Ati, nun Du Kristus bira tukwetam kuramwe ai ara Imtamnyi Dam Kobdob Ai kum wengbinmou. Erda, imtam ai kuboka dama deirin ai ara Er Imtamnyi Dam Kobdob Ai wengbinmou. Akai ara ninyi aryi kum doamnyi. Ati, nun Du Yesus biryi kiklin ai kum wengbinmou. Erda, imtam ai kuboka Er Imtamnyi dama deirin ai sirik asi wengbinmou. Sirya wengbinmou ura, Erda nun Nai Imtamnyi urasintam tikoka nunti molormilisurur.

²⁵Minob ura Er Imtamnyi kan ninyi kan noutam kuboka antanirdeirin sienyi bira Er Imtamnyi Dam Kobdob Ai wengbinmou ara liki tentok asi kum wengbinmou. Erda, kwalina tentok sirya bisiramwe ura, ur wekwamwe uki tum berengnamwe ura, er wengbaramwe. Ara, er mining ining boboka kum wengbaramwe. Erda, kambing ining boboka wengbaramwe. Bok, nun Du Yesus Kristus bira Er Imtamnyi ai tuba-tuba kum wengbarande. Erda, liki tentok asi wengbinmou ci, Erda Er Imtamnyi urasintam aryi iya kurur.

²⁶Nun Du bira Erdamnyi karebdandoka dama tentok a kunum deibmou. Im dangna tukwe dangna sirya kiknibmou talak aryi kuboka ninyi yala ara malyi dinyi kuramnyi ani, ukuryok ababyi malyi dinyi kuraming. Ati, nun Du Yesus biryi mambul dinyi boboka tuba-tuba kum dirur. Erda, sirya kobdob talak asi anabmou ura, Erci Erdamnyi liki tentok asi karebdandoka nun malyi kun dinyi nirya asi a kunum sirya kilibmasou.

²⁷Ninyi nirya ara liki tentok asi dibmangnyi ura, Er Imtamnyi urasintam aryi binmangnyi ura, Er Imtamnyi biryi sun malyi kun dinyi lilibkwande.

²⁸Ura, nun Du Yesus Kristus bibabyi liki tentok asi Erdamnyi karebdanmou ci dibmou ura, Er Imtamnyi urasintam aryi binmou. Ara, ninyi ilinto aryi malyi kun dinyi kilibkwamwe ati, Er dibmou. Ura, aminda kubkwande talak aryi nun Du Yesus tubto anabkwande ara Erci nun malyi kun dinyi tubto kum bobkwande. Erda, Erci nunsi lemsina iya teleb dinyi karebkwansir ati tubto anabkwande.