Read Futuna-Aniwa Yakobus 1 Bible Online

Yakobus 1 - Futuna-Aniwa bible

Yakobus 1

¹Teleb ni kwityabwe! Ni Yakobus bira nun Nai Imtamnyi ab, nun Du Arungdeirisurutnyi Yesus Kristus ab aryi arungnaniringnyi kunun ci, niryi sun Israel yala nang kuboka Er Imtamnyi mabwe nermabwe kurandum nang asi, “Teleb,” ebmasin. Ara, sun Israel yala amolbaryi nang aryi deibdob nang ara im dangna tukwe dangna mutuk nirya binsekmandau ani, yuk nang kankan aryi tingbindoka kurandum asi niryi, “Ni kwityabwe,” ebmasin.

²Ni kwityabwe dib tenen nang, kekenindarur. Sun kanya mambul kurdeirisin dinyi yuk-yuk sun dam yangasici ababyi, sunci kilkil kanya boboka Er Imtamnyi bisi tanglona kum uca milibmurubde bindarur. Ara, ninyi aryi, “Dib tenen dinyi taklobting,” tenen sunsi malyi kibsinibsingnyi ababyi, sunci tanglona kum uca iya dib tenebdarur. Ara, ninyi aryi sun dib tenen dinyi ukubdendoka mambul kibdeibsingnyi ababyi, sunci mambul kanya bobmunyei. Erda, nun Nai bisi dib tenermururamun ci, kilkil weik kanya bobdarur.

³Sunci a deyok ara ato tenen bikdarur. Nun dib tenen dinyi ati sakeibsici dinyi yuk-yuk ara talyi dinyi kuma. Erda, nunci a dinyi nirya ati, “Nun li,” tenen muna kibdongobibyi uca, nun dib tenena ara katabum ebtabakwansurur ba, nunci nun Nai bisi tanglona kum uca milibmurubkwayeb.

⁴Ura, sunci dib tenebmunyi ura, sun kanya dam aryi nebdob nang kuraming to kuramun ci, sunglona kum uca bikdob dinyi bikoka iya teleb dinyi kubkwandum.

⁵Ato kubmunyi ura, sunda sun kankan aryi tonyi biryi, “Bikdob tenen dinyi suklobmanir, ton kum doronun,” tenebci ura, anyi biryi Er Imtamnyi bisi moloboka, “Nai, bikdob tenen dinyi ton karebnurum,” ena teleb. Ato eboka molobdobci uca, nun Nai biryi er molobmaci tok kunuboka abdiryi, er kanya dam bikdob tenen dinyi karebkwande. Nun Nai biryi yu uram kum karebkwansir. Erda, sun Ersi molobmangnyi nang nirya asi teleb dinyi langdeiboka karebde basurur ati ebman.

⁶Bok, “Bikdob tenen dinyi karebnurum,” tenen molobmun ci, sunci sun kanya dam aryi, “Karebkwande kum, kum karebkwande kum,” tenen kankana kubsicei. Erda, sunci sun kanya dam aryi, “Er Imtamnyi biryi diboka kekeboka kunubdeibkwamanir,” tenen molobmunyi ura, kunubdeibwansurur. Ara, sun kanya dam aryi katabum eboka dib tenebmunyi uca, Er Imtamnyi biryi sun molobmamunyi dinyi kunubdeibkwansurur. Sun kanya dam kankana kubmasiri bok, moloramingnyi nang ara Er Imtamnyi bisi molobingnyi ababyi, nun Nai biryi sun molobmangnyi tok kum kunubdeibkwandur. Sun kanya kankana kun nang kanya ara katabum en dinyi kum kurur. Erda, sun kanya ara ilila mekwan aryi ibalya donmaci uca, me lontik-lontik ena ara tamurbina tamuryana kimnande to kuraming.

⁷Ati, sun kanya kankana kusici nang aryi Er Imtamnyi bisi, “Ato-ato karebnurum,” eboka molobingnyi asi Er Imtamnyi biryi sun molona kum kunubdeibkwandur ati ebman.

⁸Sun ato kun nang ara kanya bitinyi bon nang kunung. Sun kunuraminyi dinyi nirya ara katabum en kum dinyi akwe kurur.

⁹Ni kwityabwe dib tenen nang, sun kankan dam bona bon kum nang kurandum ara, “Nunda tukwetam bun nang kunub,” tenen mambul kanya bobmunyei. Erda, sunci, “Er Imtamnyi biryi nunsi erebdeibsou ba, nunda Er Imtamnyi mabwe nermabwe kunub,” tenen kilkil kanya bobdarur.

¹⁰Ba, sun kankan aryi bona bon nang kurandum ara, “Nun bona ilinto bon nang kunub,” tenen sundamnyi erebdamunyei. Erda, sunci sun kanya luknubdeibdandoka, “Nun bona bon dinyi ara tiya atikwe taleramib dinyi ara sungsunga aryi ola yalakdobci ba, kerketa kulursangnande to kubkwande dinyi asi talenun,” tenebkwandarur.

¹¹Sungsunga keta tiya atikwe obmaci ani, kiting anamyandoka deibci ura, tin aryi sungsunga yalakoka, kerketa kulubsakoka, kerketa bok teleb to kurande dinyi ara amirande. Ura, sun bona bon nang ara busul weik kuboka co bok ingkiringnamingnyi dinyi ara tiya atikwe kubkwaming.

¹²Ni kwityabwe, sun dib tenen dinyi ukubdesici dinyi aryi sunsi ukubdesici bok, sunci tanglona kum uca dib tenebdarur. Tanglona kum uca dib teneramunyi ura, sunda Er Imtamnyi biryi kisal dangsurur nang kurandum ati ebman. Ara, ukurderisin dinyi aryi ukurdesici bok, sunci katabum eboka dib tenebmurubmunyi ura, Er Imtamnyi biryi sunsi erebdeiboka iya kam kun dinyi karebkwansir. A iya kam kun dinyi ara nun Nai biryi sun Ersi boukwe weik kimna nang nirya asi karebkwansir.

¹³Ura, “Malyi dinyi kunubtinyi,” tenen kanya asi sun kanya dam wengyangasici ati, sunci, “Er Imtamnyi biryi nunsi, ‘Ukubdenkwan,’ tenen a malyi kun dinyi nun kanya dam dongobmasir,” ena mem. Er Imtamnyi bira, “Malyi dinyi kubtinyi,” tenena kum kurur ati, Erda ukurden kumnyi kurur. Tonda, nun Nai biryi ninyi asi, “Malyi kun dinyi kubting,” tenen kum ukurdesurur ati ebman.

¹⁴Erda, nun kanya dam ara malyi tenen dinyi aryi nunsi ukurderansir. Ara, nunci nun kanya dam aryi, “Malyi kun dinyi kubkwan,” tenebibyi uca, nun kanya dam aryi malyi tenen dinyi anaboka nunsi bowanikoka sangdeiriransir.

¹⁵Ba, “Malyi kun dinyi kubkwan,” tenen dinyi nun kanya dam deyok kounsici ura, nunci a malyi kun dinyi kuramib. Ura, nunci malyi kun dinyi tabakdongoboka-tabakdongoboka kuramibyi ura, weik wenen dinyi ara iya dina dinyi dobdobkwayeb.

¹⁶Ni kwityabwe ni boukwe weik kimsunun nang. Sunci tola uram dib tenebmunyei.

¹⁷Nun Nai Imtamnyi bira kiting wala yuk berengna nirya kikniamunyi kurur ati, Erci malyi dinyi kum karesurur. Erda, iya teleb dinyi ab, kisal dangsina dinyi ab akwe Erci nunsi karesurur. Nun Nai bira dangurdana kum uca Er iya telebnyi kurur. Dangurdan dinyi mitik dinyi ababyi Er dam kum kurur.

¹⁸Nun Nai biryi minob teneibmasou to, Erci Er Uram deib aryi nun kanya dam aryi ukuryok kanya kiknibmasou. Ara, Erci, “Ni kiknibmase dinyi ara imtam tukwetam dinyi nirya kankan aryi du nang kibkwaming,” tenen nunsi kiknibmasou.

¹⁹Ni kwityabwe, ni boukwe kimsunun nang. A ebkwinsin uram asi sunci luba kum kibmunyei, erda iya teneibde bindarur. Ninyi nirya ara ukurlona kum uca bikdob uram kekebdarur. Ba, sun ninyi kanya dam aryok anabsici uram ati ola ebmunyei. Tonda, yu uram ababyi sunci minola karebmunyei. Erda, namin kanya asi bobdarur.

²⁰Nunci yu kanya ati boramibyi ura, Er Imtamnyi biryi arukdeibsou dinyi teleb dinyi ara kum kunubdeibtibyi.

²¹A deyok aryi, sunci, “Talyi yobkwan,” tenen dinyi nirya bai donokdarur. Tonda, yuk nang asi malyi kimdeiriramunyi dinyi nirya taklobdarur. Sirya taklobmunyi ura, sunci sun kanya luknubdeibdandoka Er Imtamnyi Uram sun kanya lemsina ati, mikib uram sun kanya dam dongobsou asi diboka dobdobdarur.

²²Ati, sunci Er Imtamnyi Uram diboka kekebmamunyi to kuboka kunubde bindarur. Amol dem keken nang kibdamunyei. Amol dem akwe keken nang kibdamunyi ura, sunci sundamnyi bowanikminikdankwandum.

²³Sun Er Imtamnyi Uram amol dem akwe kekebloboka kununa kum nang ara luba kimna nang ato kunung. Kiklin dinyi ara ato. Ninyi tentok aryi kimil dam bindoka sun mining urasin dirdanmangnyi ura, “Ni urasin ara atonyi-ato ner kurur,” tenen kimil dirdanmangnyi ura, bikdanbingnyi ani, sirya dibdandengiryi, yuk ai bindoka ukurlona kum uca, “Ni urasin ara unatonyi-unaner,” tenen kanya teneirdanmangnyi uca, luba kimdaraming to nang kuramingiryi.

²⁴

²⁵Ba, sun Er Imtamnyi biryi, “Ato-ato kubdarur,” en uram diboka dirnilin nang ara ato kum kunung. A nang ara tanglona kum uca Er Imtamnyi biryi aruksou uram iya Teleb Uram asi diboka talebdongoboka amol dem keken nang kum kimdanung. Erda, sunci tanglona kum uca a ninyi kanya lemdeirisin uram kekebmangnyi to diboka kunubingnyi ura, sunci yuk dinyi-yuk dinyi nirya kuramingnyi ba, Er Imtamnyi biryi kisal dangna dinyi dobdobkwaming.

²⁶Ura, ninyi tentok aryi sun mining silalum kalingdana kum kubmangiryok, a nang ara sun dam nang ati, “Nunda Er Imtamnyi Uram kununub nang,” tenen waningminingdaraming. Sun sundamnyi kalingdana kum uca talyi uram en nang ara Er Imtamnyi bisi diboka kum milinung. Erda, sunci Er Imtamnyi bisi moloboka miliraming bok, talyi tam ati moloboka miliraming.

²⁷Nun Nai Imtamnyi bisi kanya teleb kurdeirin dinyi ara ato kurur. Sun kwaknamwe mabwe nermabwe dirnilin dinyi ton, sun sulyi nerabwe asi dirnilin dinyi ton asi teleb kun dinyi kurur. Tonda, sun malyi kun nang aryi kuramingnyi to ara, “Nunbabyi dakdongobsicei,” tenen dinyi ton kurur. Ato kun dinyi yuk-yuk ati Er Imtamnyi biryi, “Udikum kanya bon dinyi,” ton “Iya teleb dinyi,” tenerur.