Read Futuna-Aniwa Yakobus 2 Bible Online

Yakobus 2 - Futuna-Aniwa bible

Yakobus 2

¹Ni kwityabwe dib tenen nang, sunda nun Du Iya Erebdobnyi Yesus Kristus bisi dib tenen nang kurandum ati, sunci ninyi urasintam meiboka, “Anyi bisi dobdobkwan, onyi bira dokdonokwan,” tenen kanya bona mem. Erda, sunci ninyi nirya asi boukwe weik kimna teleb.

²Sun dib tenen nang aryi neik ai yandoka tonkwa buluboka wekmamunyi ura, sunci bona bon nang asi, “Nun kwityabwe,” eboka kirorandum. Ba, bona bon kum nang ara, “Atonyi bira nun li,” tenen kum kirorandum. Tonda, namin ongon aling ongorandiryi, taruk dongona emas dongorandinyi bisi, “Nun kwit,” erandum. Ba, kwilibdob ongon aling ongorandinyi bira, “Nun kwit,” ena kum kurandum. A deyok aryi, niryi sunsi, “Ninyi urasin meimna mem,” ebmasin.

³Ura, sunci dibdeboka ongon aling namin dinyi ongorandinyi bisi, “Nun kwit, ur yarum. A sokon teleb asi buryarum!” erandum. Ba, bona bon kumnyi, ongon aling malyi ongororandinyi bira, “Kanda otam tikdum!” erandum. Tonda, “Kanda, sokon teleb ai ara buna mem, erda ai amsuna ai ni yan donokman ai asi bukdum,” erandum.

⁴Sunci ato kurandum dinyi ara malyito dinyi kurandum ati ebman. Ati, sunci sun kanya dam aryi, “Bona bonanyi bisi dobdobkwan, ba bona bon kumnyi bira dokdonokwan,” tenerandum ara malyito tenen dinyi kurandum. Sunci ato kuboka ninyi urasintam meimnandum ci, sunci bikdob dinyi kum kurandum. Erda, malyi kanya bon nang ato kiboka sun dib tenen nang ara, “Anyi telebnyi, onyi malinyi,” tenerdarandum se.

⁵Ni kwityabwe dib tenen nang, ni boukwe kimsunun nang, kekebnindarur! Nun Nai Imtamnyi bira ninyi wibdeibsou ara unato nang asi wibdeibsou do? Ninyi aryi, “Tukwetam bun nang aca,” teneramingnyi nang bona bon kum nang asi Er Imtamnyi biryi wibdeibmasou ati ebman. Ara, “A nang asi dib tenen dinyi langdeiboka karebnyi uca, sunci dib tenen dinyi mitik kum bobkwaming,” tenen Erci nunsi wibdeibmasou. Tonda, nun Nai Imtamnyi biryi sun Ersi boukwe weik kun nang ati ebdeiamwe to, Erci nunti, “A nang asi ni amwetam kun nang kibdeibnyi uca, iya kam kun dinyi dobdobkwaming,” tenen wibdeibmasou.

⁶Nun Nai Imtamnyi biryi sun bona bon kum nang asi wibdeibmou. Ba, sunda dib tenen nang kurandum cok, sunci sun bona bon kum nang ati, “Ato nang ara nun li,” tenen ina ngilingnandum se! Sun bona bon nang ara sun bona bon kum nang asi teleb kurdeirirandum do? Ato kum kurandum. Sun bona bon nang ara sun bona bon kum nang asi mambul kurdeirandum se! Sun bona bon nang ara bico tenena kum uca sun bona bon kum kurandum nang asi talyi ati tatab-tatab eboka malyi deyok lilin nang dam bobaraming.

⁷Sun bona bon nang ara nun Du sunsi taleboka Arungdeirisurutnyi si, iya erebdob si asi ina ngilingnaming ati ebman. Ati, sun dib tenen nang ara nun Du Yesus Erebdobnyi amwetam kurandum bok, unato ati sunci a bona bon nang yuk nang asi malyi kurdeirin nang asi, “Nun kwit,” eboka kirandum do?

⁸Sunci ato kubmunyei. Erda, sunci Er Imtamnyi biryi, “Ukubdarur-Ukuna mem,” ebmou uram asi kunubdarur. A uram deyok kobdob tenen dinyi ara ato kurur, “Sundamnyi boukwe kurdarandum to kuboka, yuk nang ababyi neiktoto boukwe kibdarur.” (Imamat 19:18) A uram ara Er Imtamnyi Uram umbura aryi kerek sekamwe to, sunci teneibdeboka kunubdarur. Ato kuramunyi uca, sunci Er Imtamnyi urasintam ara teleb dinyi kubkwandum.

⁹Bok, sunci ninyi talyi boukwe tenena kum uca urasin meiboka, “Anyi bisi dobdobkwan, ba onyi bira dokdonokwan,” teneramunyi ura, sunci malyito tenen dinyi kuramunci. Ato tenen kuramunyi dinyi ara Er Imtamnyi biryi, “Ukubdarur-Ukuna mem,” ebdeibmasou uram asi yan yanirandum.

¹⁰Er Imtamnyi biryi, “Ukubdarur-Ukuna mem,” en uram yuk-yuk ebsou bok, a uram deyok ara tentok akwe kurur. Ati, nunci Er Imtamnyi arungsina uram yuk-yuk kunubtibiryok, arungna uram tentok asi kum kunubtibyi ba, nunda Er Imtamnyi arungsina uram tentok asi kum yan yanibmab. Erda, Er Imtamnyi biryi, “Ukubdarur-Ukuna mem,” en uram deyok nirya asi yan yanibiryi.

¹¹Ara, Er Imtamnyi biryi, “Sal kum ner kum ukula yordana mem,” ebsou cok, Erci, “Ninyi ordana mem,” en uram ababyi ebsou. (Keluaran 20:13-14) Asi, nunci ner ukula yon dinyi kum ukuramibyi bok, ninyi obtibyi ura, nunci Er Imtamnyi biryi, “Ukubdarur-Ukuna mem,” en uram deyok nirya asi yan yanibmabibiryi.

¹²Er Imtamnyi biryi, “Malyi kun dinyi takloboka abingiryi, ninyi kanya lemdeirin dinyi sirya dobdobingiryi,” tenen “Ukubdarur-ukuna mem,” en uram nunti karebsou. Ura, sunci, “Er Imtamnyi biryi Er arungsina uram ara ninyi kanya lemdeirisin uram deici aryi nun malyi kun dinyi lilibkwansir,” teneramun cok, uram teleb akwe eramun ci, teleb dinyi akwe kunubde bindarur.

¹³Ara, ato deyok ati ebman. Nunci, “Yuk nang asi bico tenena kum uca sun malyi kun dinyi bita liliboka wenebtibyi,” teneramibyi ura, nun Nai Imtamnyi biryi neiktoto bico tenena kum uca nun malyi kun dinyi liliboka wenebkwansir ati ebman. Ato ebman bok, nun Nai bira bico weik tenesurutnyi kurur. Ati, sun yuk nang asi bico tenen nang asi nun Nai biryi wenena kum kubkwande. Erda, Erci a nang asi bico tenen lebkwande.

¹⁴Ni kwityabwe, ton nang ara sundamnyi ati, “Nunda dib tenen nang kunub,” erdaramingiryok, Er Imtamnyi Uram kum kunuraming. Ato tenen dinyi ara diboka dib tenen dinyi kurur do? Ato tenen kum. Nunci Er Imtamnyi Uram kununa kum kubibyi uca, ato tenen dinyi aryi nunsi lebkwansute do? Ato tenen kum.

¹⁵Ati, sun kankan nang aryi sal kum ner kum aryi ongon aling kum ongoranci kum, kwaning ataranci kum asi sunci, “Da birum. Kan yuk aryi tin ongon aling asi da bindoka ingkirikoka ongobdobdum. Ba, yina ara da bindoka ingkirikoka yinmaminyi ba, boubkurur,” ebdiryok, erci boukwe kimna kum uca, ato nang sun nong bulub dinyi karena kum kubci ura, Er Imtamnyi Uram asi diboka kunubmariryi do? Er Imtamnyi biryi sunsi kisal daksute do? Ato kum kubsute.

¹⁶

¹⁷Ura, ato kuboka nun dib tenen dinyi ababyi neiktoto kurur. Ara, sibambol dem deici aryi dib tenebibiryok, Er Imtamnyi Uram diboka kum kunubibyi ura, nunda Er Imtamnyi bisi diboka dib kum teneramibiryi. Ba, nun dib tenen dinyi ara din dinyi ato kubkwansir.

¹⁸Ato ebman bok, ton nang aryi ato ebting, “Ni kwit e, kanda dib tenenanyi kurum ba, nira Er Imtamnyi Uram kununanyi kunun,” ebting. Asi, ni Yakobus biryi sun ato ebmating nang asi uram dekeibtinyi. Dib tenen dinyi yuk, Er Imtamnyi Uram kunun dinyi yuk kurura kuma. Erda, a bitinyi dinyi nirya ara tentok kurur. Ati, kanci Er Imtamnyi Uram kununa kum uca dib tenerandim do? Ato tenen kum. Ba, nira dib tenena kum uca Er Imtamnyi Uram kununun do? Ato tenen kum. Erda, Er Imtamnyi Uram kunuramibyi deib aryi nun dib tenen dinyi lak kimdeirirura.

¹⁹Ati, sunbabyi, “Er Iya Erebdobnyi tentok a kurur,” tenen dib tenendarur do? Diboka tenebmarum bok, ato tenen dinyi dem aryok sunsi kum lebkwansir. Ato dinyi ara isa mer ababyi, “Er Iya Erebdobnyi tentok a kurur,” tenen bingnung ci, sunda, “Weik wenena kareboka wenebminiksicei,” tenen ilil weik aryi sun sirim asa kuraming.

²⁰Sunda talyi dinyi akwe tenen nang se! Dib tenena ab, Er Imtamnyi Uram kununa ab, ara yuk-yuk kuma. Erda, antaniboka tentok dinyi kurur ati ebman. Dib tenena dem ara kikiman kum dinyi akwe kurur. Ba, din dinyi ato kurur. Ati, niryi sunti, “Dib en uram bikoka lak ebkwanting,” tenen a dinyi lak kibkwinsin.

²¹Ati, niryi nun aibwe Abraham biryi kubmou dinyi asi kikliboka uram ton ebkwan. Nun aibwe Abraham bisi Er Imtamnyi biryi una deyok aryi, “Ni urasintam aryi teleb dinyi kunurandanyi,” tenen kisal dakmou do? Nun aibwe biryi Er Imtamnyi Uram kununa kum uca dib teneramwe deyok aryi, kisal dakmou do? Ato tenen kum. Erda, nun aibwe biryi Er Imtamnyi Uram kunubmou ci, er mi Ishak bisi, “Er Imtamnyi biti dama deiboka obkwan,” tenen karebmou deyok aryi, Er Imtamnyi biryi ersi kisal dakmou.

²²Ura, nun aibwe bira Er Imtamnyi bisi dib teneramuryi, erci Er Imtamnyi Uram kunuramwe. Er dib teneramwe dinyi ab, Er Imtamnyi Uram kunuramwe dinyi ab, ara yuk-yuk kum kuramwe. Erda, antaniboka kurandei. Dib tenen dinyi dem ara sungloninto kurur bok, Er Imtamnyi Uram kununa aryi sunglon dinyi dangdongoraming to dinyi kurur.

²³Nun aibwe biryi Er Imtamnyi Uram kunuramwe ara Er Imtamnyi Uram sekeibwe to kunubmou. “Nun aibwe Abraham biryi Er Imtamnyi bisi dib tenebmou uca, Er Imtamnyi biryi erti, ‘Ni urasintam aryi teleb dinyi kurandanyi,’ tenen ersi kisal dakmou ci, nun aibwe biti, ‘Ni kwit,’ eboka namnamwe.” (Kejadian 15:6)

²⁴A kiklina uram deici aryi nunci ato dinyi tenen bikdobkwanub. Dib tenena dem deici aryi Er Imtamnyi biryi nunti, “Ni mabwe nermabwe,” eboka kum dorosurur. Erda, dib tenena dinyi ab Er Imtamnyi Uram kununa ab deici aryi Erci nunsi dorosurur.

²⁵Tonda, yuk minob kunuamwe dinyi aryi doboka neik uram atikwe eterebtabakwinsin. Ara ato. Talyi yortamwe ner si Rahab bibabyi Er Imtamnyi biryi unato dinyi deici aryi, “Ni nebnyi,” teneboka dobdobmou do? Er dib tenen dinyi dem deici aryi dobdobmou do? Ato tenen kum. Erda, a ner aryi sun Israel yala nang aryi ninyi bitinyi bokdeibmai ba, sun wengbinkwamnyi atei meimbinmarei nang asi, “Sun ordana nang aryi a bitinyi nang eiboka obingnyei,” tenen er ai deici tam inibdeibmou. Ani, lebdeibmou ci, yuk bisik kuboka bokdeibmou ba, bindobmarei deyok aryi Er Imtamnyi biryi, “Ni nebnyi,” teneboka dobdobmou.

²⁶Ato kuboka ninyi nong ara isin kum kuransute ura, kam kum kurantibyi. Dib tenena dinyi ababyi neiktoto kurur. Dib tenen dinyi dem ara din dinyi ato kurur. Ba, dib tenen dinyi ab, Er Imtamnyi Uram kunun dinyi ab, antanibdeibtibyi ura, isin neb-neb en dinyi ato kurur.