Read Futuna-Aniwa Yakobus 3 Bible Online

Yakobus 3 - Futuna-Aniwa bible

Yakobus 3

¹Ni kwityabwe dib tenen nang. Sun kankan aryi ninyi ilinto aryi, “Nunda Er Imtamnyi Uram dib en uram bingnub ati, nunda dib en uram eteren nang kibdatibyi,” teneboka ererdaranduma mem. Sun ato kuboka sundamnyi ererdeirirandum nang nirya asi niryi ato ebkwinsin, “Sunci sundamnyi erebdeibdandoka dib en uram eteren nang kibdamunyei.” Ato kuramunyi asi, Er Imtamnyi biryi ninyi nirya kunuraming to diboka lilirdeirisurutnyi biryi Erci nunda ninyi eteren nang kunuramib to tabakoka lilirdeirisurur. Ati, Erci, “Dib en uram diboka etereraming do kum do?” tenen nunda ninyi eteren nang asi tabakoka lilirdeirisurur. Tonda, Er Imtamnyi biryi sun dib en uram diboka kum etereraming nang asi tabakoka wenebkwande. Sunci a dinyi sirya bikmarum. A deyok aryi, sunci, “Ninyi eteren nang kibtibyi,” tenen talyi erebdamunyei.

²Nun tukwetam nang nirya ara malyi deyok ilinto kunub deyok aryi, nunci, “Teleb dinyi kunubtinyi,” teneramib bok, teleb dinyi nirya kum kunuramib, erda ton tuba sukloboka abibiryi, malyi uram tuba eramib. Bok, sun malyi uram ena kalikdandoka sun silalum kalingdaroramingnyi nang ara sun nong nirya ababyi diboka kalingdaraming deyok aryi, malyi dinyi yuk dinyi ababyi bisik sengdaroraming.

³Nun silalum ara diboka kalikdandobkwayeb ati ebman. Bisam kuda boyiban nang ara, “Bisam kuda bobinkwayeb,” tenen kuda u ngar-gnarya bisik asi dangurtalin tabwe birirdongonung. Ara, “Nun kanya aryi, ‘A bisik asi bobisurur,’ teneboka dangubtalebkwayeb,” tenen tabwe birirdongoraming. Ato kuboka nunbabyi neiktoto nun mining silalum diboka kalikdandobibyi uca, nunci nun nong nirya asi kalikdandoka yuk malyi kun dinyi kisibdonokibyi ara caknam kubkwansurur.

⁴Tonda, ninyi silalum ara weik mekwan deici yibarande co ngun-ngun dangurdeirin co lase ato kurur. Weik co ngun-ngun ara ilil weik mekwan yibarande asi dangurdeirin co lase mitik dinyi biriman aryi dangubtaleboka bobaraming. Ara, ibalya mikib aryi dordongonmaci bok, co ngun-ngun bobananyi biryi, “A bis birura, o bis birura,” tenen dangurtalerandiryok, dangurdeirin co lase mitikto dinyi biriman aryi dangurtalerande.

⁵Ato kuboka nun ninyi silalum ababyi neiktoto akwe kusurur ati ebman. Nun silalum ara mitikto dinyi bonub bok, nunci nundamnyi erebdandoka nun silalum biriman aryi deyok weik yuk dinyi-yuk dinyi anasurur. Tonda, nun silalum ara uk buk abde barande dinyi ato kusurur. Mitikto uk buk nun aryi abmaci uca, lengkerekoka abdiryi, bai mutuk weik asi yalibde yirande to kusurur. Ati, nunci malyi uram tentok ababyi ebibyi uca, yu tenen dinyi ilinto anasurur.

⁶Silalum deib aryi nunci malyi kun dinyi ilinto kouramib ati, ninyi silalum ara uk buk abde barande dinyi ato kusurur. Nun nong bonub dinyi kankan aryi nun silalum ara erebkaboka malyi dinyi ilinto kunubde ban dinyi kusurur. Malyi kun dinyi ara nun silalum biriman aryi deyok koubci uca, a malyi kun dinyi ara nong nirya dakdongobsici ba, nun nong kanya nirya malyi kibdeibsici ura, nunci nun yan taruk ab, yuk nong dinyi biriman ababyi, malyi dinyi kunub. Nun tukwetam kubde baramibyi talak nirya ara silalum deyok kouna deyok aryi, dakdongobsici uca, malyi kun dinyi tabangdongordaramib. Silalum aryi malyi deyok koun dinyi ara ilila uk mekwan sienyi si Iblis biryi deyok kourande ati ebman.

⁷Ura, bai bisam yuk-yuk ab, bai kam yuk-yuk ab, ara ninyi aryi tabwe deboka winiramnyi ani, ukuryok ababyi tabwe deboka winiraming. Tonda, imtam yibarande maka yuk-yuk ababyi ninyi aryi tomoboka winiraming. Mundu aryi yibarande dinyi ababyi ninyi aryi tomoboka winiraming. Tonda, ilila mekwan umbura kurande mekinaya ab, yuk dinyi ab ababyi, ninyi aryi tomoboka winiraming.

⁸Bok, ninyi silalum ara ninyi tentok aryi tabwe deboka winibmanto kum kusurur. Ninyi tentok ababyi ninyi silalum kalikdanman kum kurur. Ninyi silalum ara kwatima silalum ato kurur. Ara, nunci silalum umbura ara yu dinyi mitik kum langkariksou deyok aryi, silalum biriman aryi malyi uram anabsici uca, yuk nang asi malyi kibminikdandoka ordanub.

⁹Nun silalum biriman aryi nunci nun Nai Imtamnyi si weik enub. Ba, neik silalum biriman aryok nunci ninyi sumnamib. Ara, Er Imtamnyi biryi ninyi nirya asi Er kurur to kikniasou bok, nunci silalum deib aryi nun mamun asi, “Malinyi,” erdaramib.

¹⁰Ni kwityabwe dib tenen nang. Neik silalum biriman aryok kisal dangna uram ton, sumna uram ton anasurur. Ato kununa ara malyi dinyi kusurur ati ebman.

¹¹Me u tentok me aryok yin me teleb ab, sik me ab tonkwa ton anarur do? Ato ton kum kurur. Erda me teleb u yuk anaboka yuryibarur ura, malyi me sik me u yuk anaboka yuryibarur.

¹²Ni kwityabwe dib tenen nang. Tonda, co kwarang aryi kuboka co zaitun du ton moubdongobte do? Ato ton kum kurur. Tonda, co si anggur aryi kuboka ara co du moubdongobte do? Ato ton kum kurur. Tonda, malyi me u aryi kuboka teleb me ton anabte do? Ato ton kum kurur. Ati, sunci a dinyi teneibdeboka sun silalum kalikdandoka malyi uram ebmunyei. Erda, Teleb Uram akwe ebdandarur tenen ato ebman.

¹³Ni kwityabwe, sun kuranduma kankan dam, “Nunda bikdob dinyi tenen bingna nang kunub,” tenerdaramunyi nang ton kuramunyi ura, sunci Er Imtamnyi urasintam aryi teleb dinyi kunubdarur. Ati, sunci bikdob dinyi teneiramunyi uca, sun du moubsiri ba, luknubdob kanya bobdarur. Ato kubmunyi ura, yuk nang aryi sunti, “Bikdob dinyi tenen bingna nang diboka kunung,” tenen bikwansing.

¹⁴Ba, sunci, “Yuk nang dinyi asi ni dobdobtinyi,” tenen yu kanya bormururamun ci, “Nidamnyi erebdeibdankwan,” teneramunyi ura, sunci sundamnyi ati erebdandoka, “Nunda bikdob dinyi bingna nang kunub,” eboka kisal dakdamunyei. Sunci ato kubmunyi ura, sun kisal dangdaramunci eramunyi uram ara dib ati kum ebkwandum. Erda, tola erebdankwandum.

¹⁵Yu kanya tenena ton, sundamnyi ati wingdana ton, ara Er Imtamnyi biryi karesurur bikdob tenen dinyi aryi kum anarur. Erda, ato dinyi ara tukwetam nang kanya tam aryi anasurur. Ara, ninyi aryi malyi tenen kanya aryi anarur. Tonda, isa aryi, “Ato kubdum,” ebsici uca, anasurur.

¹⁶Ara, yu tenen kanya ab, sundamnyi ererdeirirdan tenen kanya ab kubmaci dikum ara ninyi aryi antanirdana kum uca sun mamun malyi kiminingdaraming.

¹⁷Bok, Er Imtamnyi biryi karesurur bikdob dinyi ara ato kum kusurur. Erda, a bikdob dinyi ara iya teleb dinyi kurur. Tonda, antanirdeirirdan dinyi kurur. Tonda, namin kanya akwe bon dinyi kurur. Tonda, Er Imtamnyi Uram diboka kunun dinyi kurur. Tonda, Er Imtamnyi Uram kunubde ban dinyi kurur. Tonda, langdeiboka bico kimdan dinyi kurur. Tonda, teleb du moun dinyi kurur. Er Imtamnyi biryi karesurur bikdob dinyi dobdobmangnyi nang ara ninyi urasin meimna kum dinyi kurur. Erda, udikum tenen kanya boboka teleb dinyi akwe kunubde banung.

¹⁸Ura, sun yuk nang ab antanirdeirirdaramingnyi nang ati Er Imtamnyi biryi, “Ni urasintam aryi teleb dinyi kunubde banung,” tenen langdeiboka teleb kurdeirirur.