Read Futuna-Aniwa Yakobus 4 Bible Online

Yakobus 4 - Futuna-Aniwa bible

Yakobus 4

¹Ni kwityabwe, sunci unato ati kerebdandoka sun mamun ordarandum do? Sun mamun kererdaran dinyi ab ordan dinyi ab ara sun mining kanya dam aryi anasurur ati ebman. Ara, sunci sun kanya dam aryi, “A dinyi dobdobtinyi, o dinyi dobdobtinyi,” tenen malyi kanya borandum deyok aryi, sunci sun mamun kerebdandoka ordarandum se.

²Sunci, “A dinyi dobdobtibyi, o dinyi dobdobtibyi,” tenen ingkiringnandum bok, sunci kum dororandum. Dorona kum kuramunyi ati, sunci yu kanya boboka yuk nang asi kereboka diboka ordarandum. Sunci ingkiringdonmamunyi dinyi ara unato aryi kum dororandum do? Sunci Er Imtamnyi bisi, “Nai, a dinyi karebsurum, o dinyi karebsurum,” eboka molorona kum kurandum aryi, sunci sun ingkiringnandum dinyi kum dororandum.

³Ba, sunci Er Imtamnyi bisi moloboka, “Nai, a dinyi karebsurum, o dinyi karebnurum,” erandum ababyi, Er Imtamnyi biryi sun molona kum kunusurur. Ara, sunci malyi kanya borandum cok, molorandum deyok aryi, Er Imtamnyi biryi sun molon dinyi kum kunurdeisurur. Ati, sunci, “Er Imtamnyi biryi nun molona sirya kunubci ura, Erci nunsi karebsute dinyi dobdobmatibyi biriman aryi malyi dinyi akwe kunubmurubkwayeb,” tenerandum ati, Er Imtamnyi biryi sun molona kum kunurdeisurur.

⁴Sunda Er Imtamnyi bisi diboka milirmuruna kum nang kundarur se! Sunci malyi kun nang ati, “Nun kwityabwe,” teneboka abmun ci, milibmunyi ura, Er Imtamnyi bisi takloboka sunda Er ordana nang kimdarandum. Sunci a dinyi tenen bikmarum do kum do?

⁵Sunci Er Imtamnyi Uram aryi kerek sekamwe to ara kum bingdarur do? Er Imtamnyi Uram ara ato esurur, “Er Imtamnyi Kanya Roh Kudus ara nun kanya dam aryi kusurur ati, nunci yu tenen dinyi nirya ati, ‘Nun li,’ teneramib,” esurur. Ara, talyi ati ato esurur do? Ato tenen kum.

⁶Tonda, Er Imtamnyi biryi kisal dangna dinyi ilinto karebtabakoka dakmurubde basurur. A deyok aryi, Er Imtamnyi Uram umbura aryi ato esurur. “Er Imtamnyi biryi sun ererdaramingnyi nang asi bisik sengdur. Ba, sun luknubdongob kanya bon nang asi Erci bico tenesurur.” (Amsal 3:34)

⁷A deyok aryi, sunci sun kanya luknubdongobdandoka Er Imtamnyi Uram kunuboka abmun ci, isa sienyi bisi bisik sekmunyi uca, er ilil aryi bindobkwandur.

⁸Ni kwityabwe, sunci Er Imtamnyi dam yandobmunyi uca, Er Imtamnyi bibabyi sun dam yankwansurur. Sunda malyi dinyi kunurandum nang se. Sunci malyi kun dinyi takloboka teleb dinyi akwe kunubdarur. Ara, sunci taruk me ilingnamingnyi nang ato kubmunyi uca, du moubkwansir. Tonda, sun kanya bitinyi bon nang se. Sunci, “Malyi kun dinyi taklobkwayeb,” teneboka abmun ci, teleb dinyi akwe kunubdarur.

⁹Ati, sunci, “Se, Er Imtamnyi biryi nunsi talya wenebkwansir,” tenen mambul kanya bobdarur. Tonda, asimaka sangna mot ngunguboka sebde bindarur. Kilkil kanya boboka akwi turandum dinyi ara danguboka, “Se, nun malyi dinyi kuramoubwe,” tenen engen kanya bobdarur.

¹⁰Sunci sundamnyi ati luknubdongobdamun ci, nun Nai Arungdeirisurutnyi bisi si weik ebdarur. Ato kubmunyi uca, nun Nai biryi sunsi leboka erebdeibkwansir.

¹¹Ni kwityabwe, sunci sun mamun ati malyi uram erdana mem. Unanyi-unaner aryi sun kwit sun ka asi malyi uram ebingnyi nang ara Er Imtamnyi biryi, “Ukubdarur-Ukuna mem,” esurur uram asi yan yaniramingiryi. Tonda, sun kwit sun ka aryi kuramingnyi to liliboka, “Malyi kun nang kunung se,” tenen nang ababyi ara Er Imtamnyi biryi, “Ukubdarur-Ukuna mem,” en uram asi yan yaniramingiryi. Sun ato kuboka yan yaniramingnyi nang ara sundamnyi erebdandoka Er Imtamnyi arungdansir uram asi, “A uram ara malyi talyi en dinyi aca,” tenen ina ngilingnamingiryi. Ati, sunci Er Imtamnyi arungsina uram ati, “Malyi uram aca,” teneboka sunci Er Imtamnyi arungsina uram asi kununa nang kum kurandum. Erda, sunci sundamnyi erebdeibdandoka Er Imtamnyi biryi arungsin uram asi lilibda ukurderandum nang kibdanmarum.

¹²“Ukubdarur-Ukuna mem,” ena deyoknyi bira tentokwe kurur. Tonda, malyi kun dinyi lilina deyoknyi bira tentok kurur. Tukwetam nang ati ato kum ebman. Erda, nun Nai Imtamnyi biti ato ebman. Nun Nai bira ninyi lemdeirisina ati mikibnyi kurur. Tonda, ninyi wenena mikibnyi kurur. Asi, sun tukwetam nang kurandum ati, unato ati sunci yuk nang aryi kuramingnyi dinyi lilirandum do?

¹³Ni kwityabwe, kekendarur. Ton nang ara ato tenen erandum, “Arub kum ambutum kum ara nunci akatei kum okatei kum bindoka kubkwayeb.” Tonda, sunci, “Akatei kum okatei kum bindoka kwalina tentok kuboka abibiryi, dengna dinyi yuk-yuk kareboka dekdobibyi ura, co bok ilinto doronmabyi ani, nun atei tamuryankwayeb,” erandum.

¹⁴Ato eramun bok, ara talyi ati erandum. Ara, ambutum kubkwamasici dinyi ara nun kum bingnub. Ati, sunci, “Ambutum kubde binkwamab ara kam tuba kubkwamab do kum do?” tenen dinyi ara kanya kum teneirderandum do? Tonda sunci, “Nun tukwetam kam kubde baramib ara tiya ati kunmab,” tenen kum teneirdarandum. Nun tukwetam aryi kam kubde baramib ara tulum ato tiya anaraboka lak kiabci ani, kum danarorande. Ato kuboka nun ninyi ababyi tiya akwe kunub.

¹⁵Ati, sunci ato ebkwamandaute ara kikiman, “Yuk wa-yuk wa dobkwayeb ara nun Nai Imtamnyi biryi teleb tenen milibsici uca, nun kam tuba kuramibiryi, nunci a wa kum, o wa kum ibkwayeb,” tenebkwandarur.

¹⁶Ba, ukuryok ara sunci, “Nun Nai biryi milibsici ba, ibkwayeb,” tenena kum kurandum. Ato kuboka sunci, “Yuk wa-yuk wa ibkwayeb,” eboka sundamnyi erebdandoka kisal dangdarandum. Ato kun dinyi ara malyito dinyi kurur ati ebman.

¹⁷Ura, nunci, “Ato-ato kuboka Er Imtamnyi urasintam aryi teleb dinyi kunubkwanub,” tenen dinyi bingnamibiryok, a teleb dinyi kununa kum kuramibyi ura, ato dinyi ara Er Imtamnyi urasintam ara malyi kun dinyi kurur.