Read Futuna-Aniwa Yakobus 5 Bible Online

Yakobus 5 - Futuna-Aniwa bible

Yakobus 5

¹Sun bona bon nang ara kekendarur. Engen kanya bobdarur se. Sunci, “Er Imtamnyi biryi weneboka absiriryi, mambul weik kubdeibkwansir,” tenen asimaka sangna mot sebde kurorandarur.

²Sun bona bon dinyi ilinto talerandum ara a nirya ara ola kum dankwande. Ba, sun ongon aling teleb namin dinyi tuba ongorandum ara ola lubminikoka tarakwande.

³Dengna weik keil si emas ab perak ab talerandum dinyi ababyi ola kum dankwande. Sunci a dinyi nirya buluboka talerandum ci, yuk nang asi dengna kikiman kum karerandum ati, sun malyi kun dinyi sirya lak kibmasir. Sunci bona bon dinyi ilinto udikum deiboka bulurandum deyok aryi Er Imtamnyi biryi sunsi weik wenena aryi wenebkwansir. Ara, sirya kobdob uki tum berekmaci ura, sun malyi kun dinyi ara lak kibkwande ba, sunci sun kanya dam aryi, “Se nai e, nun bona bon dinyi ilinto buluramoubwe ara malyi dinyi kuramaburyi,” tenebkwandum. A, “Se,” tenen dinyi aryi sun kanya asi lukwansir ba, uk angnande to kuboka sun kanya ab, sun nong ab nirya yibkwansir.

⁴Kekendarur. Sun wa irmilin nang aryi sun wa tuboka gandum du dangsunung nang asi sunci dengna kikiman dinyi kum karerandum ati, a nang sun kanya ara mambul kanya weik boboka, “Se,” eboka namnaming. Ato eboka namnaming dinyi ara nun Nai Iya Mikibnyi biryi sirya kekerur.

⁵Sun bona bon nang ara yuk nang asi bico tenena kum uca sundamnyi bikwe kanya teneirdarandum ci, teleb yina-yina langdeiboka yirandum. Tonda, sunci, “Nun kanya teleb tenebdobibyi tok kunubkwayeb,” tenen sun dam nang akwe dirnilirdarandum. Sunda ninyi aryi, “A bisam ara ola yibdobkwayeb,” tenen winiraming bisam ato kurdarandum ati ebman. Ati, Er Imtamnyi biryi sunsi wenebkwansir cok, Erci neiktoto sunti, “Yina yin dinyi langdeiboka yibmang,” tenen obkwansir ati ebman.

⁶Sun bona bon nang ara teleb kun nang asi tatab-tatab eboka wenerandum. A nang ara wenebmanto deyok ton kum kuraming bok, sun dam nang aryi libdandobman kum kunung asi suncok talyi tam tatab-tatab eboka abmun ci, wenerorandum.

⁷Ni kwityabwe dib tenen nang, sunci sun kanya lamakdongoboka, “Nun Du Arungdeirisurutnyi yankwande,” tenen dibde bunkwandarur. Nun Du yangana dibde buna ara kwaning wa iroraming nang aryi kuraming to kubdarur. Kwaning wa ibdamingnyi nang ara co keta talak aryi, “Muryi talak dobci ura, yibdobkwan kwaning wa,” tenen wa iamingiryi, muryi talak dona ati dibde buraming to kuboka, sunbabyi nun Du yangana ati ato kubdarur.

⁸Ati, nun Du tamuryankwande uki tum ara dam kubmar deyok aryi, sun kanya katabum erdeirirdaramun ci, lamakdongoboka dibde bunkwandarur.

⁹Ni kwityabwe, sunci sun mamun tatab-tatab erdana mem. Tatab-tatab erdamunyi ura, Er Imtamnyi biryi tatab-tatab eboka wenebsicei. Nun Du bira nun malyi kun dinyi lilina deyoknyi kurur ara ola yankwande talak dam kubmar.

¹⁰Ni kwityabwe, minob ura nun aibweyabwe Er Imtamnyi Uram ebdeibmaci to lak etereramnyi nang aryi lamakloboka Er Imtamnyi bisi dibde buramnyi. Ninyi aryi a nang ara Er Imtamnyi biryi bongdonongnamwe nang asi mambul kurdeiriramnyi ababyi sunci namin kanya boramiryok, tanglona kum uca dibde buramnyi. Ura, sunci nun aibweyabwe ati, “Nun kiklisina ato nang,” tenen sun kunuramnyi to milibdarur.

¹¹Sun tanglona kum uca Er Imtamnyi bisi dibde bun nang ara Er Imtamnyi biryi kisal dangna nang kunung ati ebman. Nun aibwe Ayub ukuramwe dinyi ara sun nirya bingdarur. Ayub bira er dib tenen dinyi ati ukubdenmou dinyi deyok aryi mambul weik kuramwe bok, erci tanglona kum uca Er Imtamnyi bisi dibde buramwe. Ani, nun Nai Imtamnyi bira bico weik tenerutnyi ton boukwe weik kimsurutnyi kurur aryi nun aibwe bisi leboka teleb kibdeibmou. A kuramwe to sun nirya bikmarum.

¹²Ura ni kwityabwe, udikum kobdob tenen dinyi ara ato. Sunci, “Yuk nang aryi ni en uram asi dib tenebniting,” teneboka abmun ci, sunci ninyi si ab, mutuk si ab si siboka uram ebdarab ebmunyei. Tonda, imtam ai si siboka, tonda im dangna tukwe dangna ai si siboka, yuk dinyi-yuk dinyi si siboka uram ebdarab ebmunyei. Erda, sunci, “Ni uram dib tenebniting,” teneramunyi ura, “Yo, ato kubmar,” dem ena teleb. Tonda, “Kum, ato kum kubmar,” ena teleb. Ba, sunci ato kum eramunyi ura, Er Imtamnyi biryi sunsi wenebkwansir.

¹³Ura, sun kankan dam mambul kanya borandinyi kum, boranci ner kum kuranci ura, anyi kum a ner kum aryi Er Imtamnyi bisi, “Nai, lebnurum!” eboka molorona teleb. Ba, sun kankan dam kilkil kanya bonanyi kum, bon ner kum kunmaci ura, anyi kum a ner kum aryi Er Imtamnyi si weik ereboka mot semna teleb.

¹⁴Ura, sun kankan dam u yinanyi kum, u yin ner kum kunmaci ura, anyi kum a ner kum aryi, “Ni Er Imtamnyi bisi molobmilibniting,” tenebmaci ura, sun dib tenen nang kalingna nang asi namna teleb. Ba, a ninyi kalingna nang aryi nun Du Arungdeirisurutnyi si siboka co yung tong teleb dinyi doboka sun u yibmaci nang asi dikdongobkwanung. Dikdongobingiryi, sunci sun u yin nang ati molobmiliboka Er Imtamnyi bisi, “Nai, kwetebdum,” eboka molobkwanung.

¹⁵Ura, sunci, “Er Imtamnyi biryi dib ati lebkwande,” teneboka molobmangnyi ura, nun Du Arungdeirisurutnyi biryi sun u yin nang asi taruk taleboka kwetebkwande. Ba, a yun yinmaci nang aryi Er Imtamnyi urasintam asi malyi kun dinyi kunuamingnyi ura, sunci sun malyi kun dinyi lak ebingnyi ba, nun Nai biryi sun malyi dinyi kiliboka abdiryi, sun u yinmaci dinyi kwetebkwande.

¹⁶A deyok aryi, sunci, “Yun nakibdobkwayeb,” teneboka abmun ci, sun malyi kun dinyi lak ebdandoka sun mamun molobmilibdandarur. Ba, sun yun ara kwetebkwansurur. Ara, sun Er Imtamnyi urasintam aryi teleb kun nang aryi molormilina ara mikib weik kurur ati ebman. Nun Nai biryi ato molormilina diboka kekebkwandur.

¹⁷Nun aibwe Elia bira nun tukwetam nang kuramib atonyi kuramuryok, erci Er Imtamnyi bisi, “Nai, mo bisik sekdum,” eboka diboka molobmou uca, kwalina winiryi wala nabaryi ara mo iya mitika kum cemnamwe.

¹⁸Ani, nun aibwe biryi, “Mo tubto cebdur,” tenen Er Imtamnyi bisi tubto molobmou ba, nun Nai biryi karebmou uca, mo tubto cebmou uca, kwaning nong mabmou.

¹⁹Ni kwityabwe, sun kankan aryi ninyi tentok aryi malyi kun dinyi kubmariryi dib en uram takloboka sundamnyi wanikminikdanmangnyi bok, sunci a nang asi, “Sun malyi kun dinyi taklobting,” tenen ersi wenebmamunyi ba, er malyi kun dinyi taklobmaci ura, sunci anyi kanya asi boboka lebdeibmamunci. Ura sunci a dinyi asi diboka bobkwandarur, “Unanyi biryi wanikminikdanmarinyi bisi wenenmaci uca, er malyi kun dinyi taklobmaci ura, iya dina wenebmanto bok, asi boboka er kanya lebdeibmariryi. Ura, tonda anyi malyi kun dinyi asi Er Imtamnyi biryi sirya kilibmar,” tenen bikwandarur.