Read Futuna-Aniwa 1Petrus 1 Bible Online

1Petrus 1 - Futuna-Aniwa bible

1Petrus 1

¹Ni Petrus bira nun Du Yesus Kristus biryi bokdonoknounyi kunun ci, Teleb Uram eterebde bananyi biryi sun dib tenen nang asi “Teleb,” eboka kibmasin. Sunda Er Imtamnyi biryi wibdeibsou nang im dangna tukwe dangna mutuk dantam-dantam nirya bindoka tingbinsekmandau nang asi kibmasin. Ara, sunda Pontus mutuk kurandum nang ab, Galatia mutuk kurandum nang ab, Kapadokia mutuk kurandum nang ab, Asia mutuk kurandum nang ab, Bitinia mutuk kurandum nang nirya asi niryi kibdobmasin.

²Nun Nai Imtamnyi biryi sunsi minob uca bikansou to, Erci sunti, “Ni mabwe nermabwe kibdeibkwan,” tenen minob wibdeibsou. Tonda, Er Imtamnyi Kanya Roh Kudus aryi sunsi Er Imtamnyi dam kun nang kibdeibsou uca, sunda teleb dinyi akwe kunubde barandum. Tonda, sunci nun Du Yesus Kristus Uram kunubkwandau ba, nun Du Yesus ining aryi sun malyi kun dinyi kilibkwansou ati, nun Nai Imtamnyi biryi sunsi minob wibdeibsou. Nun Nai Imtamnyi biryi sun nirya asi kisal dangsina teleb. Tonda, Erci antanibdeibsici uca, kilkil kanya langdeiboka karesina teleb.

³Nunci nun Nai Imtamnyi si weik ena teleb. Ara, nun Du Yesus Kristus Er Nai kobdob asi si weik ena teleb. Nun Nai bira nunti iya bico teneransou ci, Erci nun malyi tenen dinyi kilibkaboka ukuryok tenen kanya kiknibminikoka dongobdeibsou ba, nunci iya kam kun dinyi dibde bunub. Ara, nun Du Yesus Kristus kam bukokmou uca, nunda ukuryok tenen kanya boboka nunci nun Du Yesus bisi katabum eboka dibde bunub. A deyok aryi, nun Nai Imtamnyi bisi si weik ena teleb.

⁴Nun Nai biryi, “Iya kam kun dinyi karebkwan,” tenen ukuryok tenen kanya nunti dongobdeibsou. A iya kam kun dinyi ara nun Nai biryi imtam ai asi kalingsurur ati, waningminingsina dinyi kum kurur ci, kum daneibman kum kurur.

⁵Sunci dib teneboka dibde burandum uca, nun Nai Imtamnyi biryi sunsi diboka kalingsurur. Erci sunsi tuba-tuba kaliksici ura, nun Du Yesus tamuryankwande uki tum berekde ba, nun Nai biryi kiknibminikansou lemsina lak kibdeiboka karebkwansir.

⁶Sunci a berekwande uki tum dibde buramun ba, sun kanya kilkil weik kusurur. Sunsi uki mitikanun kuramun bok, ninyi aryi, “Dib tenena taklobting,” tenen sunsi mambul dinyi ilinto takurdeiriransingnyi ababyi, sun kanya ara iya kilkil weik kusurur.

⁷A mambul dinyi takurdeiriransing ara talyi dinyi kuma. Erda, sun dib tenena asi katabum erdeirin dinyi ati ato kurur. Ara, ninyi aryi mambul dinyi takurdeiriransingnyi ababyi, sunci tanglona kum uca dib tenebmururamun ci, sunci, “Nunci diboka dib tenenub,” tenen bingnandum. Sun dib tenena ara bikdob dinyi dengna weik dinyi ato kurur ati ebman. Dengna weik keil si emas dengna ara mitik to. Ba, sun dib tenena ara bisibkaboka dengna iya weik dinyi ato kurur. Keil sirik asi bingnande emas ara uk ai dabmangnyi ba, keil sirik ara uk leiboka koroksakdobci ura, emas lak kimnande to, sun dib tenena ababyi neiktoto kurande. Ara, ninyi aryi sunsi mambul kurdeiriransing ba, sun dib tenena lak kimnansir. Uca, nun Du Yesus Kristus imtam aryi kuboka yuryaci ura, Erci, “Ni kwityabwe, tanglona kum uca, dib teneranindau,” eboka sunsi diboka kisal dakoka erebdeibkwansir.

⁸Nun Du bisi asing kum eirirandau cok, sunci Ersi boukwe weik kurandum. Asing kum eiriramun cok, sunci nun Du Yesus bisi dib tenerandum ba, sun kanya ara langdeiboka kilkil weik kusurur.

⁹Ara, nun Du Yesus biryi sun dib tenen nang kanya lebdeiboka sun dibde burandum dinyi iya kam kun dinyi karebkwansir ati, sun kanya kilkil weik kusurur.

¹⁰Ura, sun minob talak aryi Er Imtamnyi Uram ebdeibmaci to lak etereramnyi nang aryi a lemdeirisin dinyi ati minob bikoka lak etereramnyi. A nang ara sun ukuryok kurandum nang ati ato eboka lak etereramnyi. “Er Imtamnyi biryi sun aminda kubde binkwaming nang asi kisal dakwande,” eboka eterermururamiryi, sunci busul kuboka a lemdeirisina deyok ati diblilibde baramnyi.

¹¹Ara, nun Du Yesus Kristus dam kunanyi Er Imtamnyi Kanya Roh Kudus biryi sunsi minob uca etereramuryi, nun Du Yesus Kristus biti ato ebde baramwe. “Yuma kobdob ara ninyi aryi Ersi mambul dinyi weik takubdeibingnyi ura, aminda tam aryi Er Imtamnyi biryi Ersi iya weik erebdeibkwande,” ebde baramwe. Er Imtamnyi Kanya Roh Kudus aryi sunsi ato eboka etereramwe uca, sunci a uram ati, “Una talak aryi a dinyi kubkwande do?” tenen, “Una kuboka kubkwande do?” tenen ingkirikde baramnyi.

¹²Ingkirikde baramnyi bok, Er Imtamnyi biryi sunsi ato eboka lak kibdeibmou. “A lemdeirisin dinyi ara sun kurandum talak aryi kum kunubdeibkwan. Erda, sun aminda kubkwaming nang talak aryi kunubdeibkwan,” eboka sunda ukuryok a talak kurandum dib tenen nang ati ato ebde baramwe. Ara, sun a dinyi minob bikoka etereramnyi nang ati Erci ato kum ebde baramwe. Ura, a lemdeirisina ara sun Teleb Uram eterebde baramingnyi nang aryi sun ukuryok kurandum nang ati lak eterebde baransei. Ara, Er Imtamnyi Kanya Roh Kudus imtam aryi kuboka bokwetebmounyi biryi milibde baramwe uca, Teleb Uram eterebde baransei ci, lemdeirisin dinyi ati lak etereransei. A lemdeirisin dinyi ara ilil weik tenen dinyi kurur ati, Er Imtamnyi Uram eryuryangan nang ababyi, “Naie, a dinyi kunubdeibkwande ara nunbabyi diblilibtibyi,” tenenung ati ebman.

¹³A deyok aryi, sunci, “Nun Du bisi tanglona kum uca milibkwayeb,” tenen sun tenen dinyi nirya kalikdamun ci, sundamnyi kiknibminikdandarur. Tonda, sunci, “Wanikminikibyei,” tenen sun kanya yuk-yuk asi nurubdobmun ci, kalikdandobdarur. Ato kuramun ci, sunci, “Nun Du Yesus Kristus yuryangaci ura, Erci nunsi lebkwansir,” tenen katabum eboka dibde bukdarur.

¹⁴Ati, sunci, “Nunda Er Imtamnyi mabwe nermabwe kunub,” tenen nun Nai Imtamnyi Uram diboka kunubde bindarur. Sunda minob ura nun Nai Imtamnyi bira walwal kurandau ura, “Malyi dinyi kubtibyi,” tenen dinyi akwe kurandau ati, ukuryok ababyi tubto a dinyi kanya teneiboka kunubde bimunyei.

¹⁵Erda, sunci nun Nai Imtamnyi dam kun nang kibmun ci, teleb dinyi akwe kunubdarur. Ara, “Nun Nai nun nabsounyi bira iya teleb dinyi akwe kurutnyi kurur to, nunda Er dam kun nang ababyi neiktoto teleb dinyi akwe kunubkwayeb,” tenen kununa teleb.

¹⁶Er Imtamnyi Uram kerek sengna umbura aryi ato kerek sekmou, “Ni Imtamnyi bira teleb dinyi akwe kununun deyok aryi, sun Ni dam kun nang ababyi teleb dinyi akwe kunubdarur.” (Imamat 19:2) Ato ebdeibmasou deyok aryi, nunci teleb dinyi kununa teleb ati ebman.

¹⁷Ura, sunci Er Imtamnyi bira ninyi urasin meiboka, “Anyi bisi dobdobkwan ba, onyi bira yakdonokwan,” kum tenesurur ci, sun ninyi yuk-yuk malyi kuramingnyi to kuboka wenebkwansiranyi bisi ilil kanya bobdarur. Sunci tukwetam tiya atei kuramunyi ura, malyi kun nang aryi kuraming to milibde bimunyei.

¹⁸Ati, sunci, “Nun aibweyabwe aryi etereransei dinyi ara talyi dinyi asi kunubde binamoubwe asi nun Du Yesus biryi nunsi lebdeibmasou ati, a talyi dinyi tubto kunubibyei,” tenena teleb. Ati, sunci ato dinyi tenen asi bikdobdarur. Nun Du biryi nunsi lebdeibmasou dinyi ara tiya kurande dinyi si emas perak dinyi dekeiboka kum lebdeibmasou.

¹⁹Erda, nun Du Yesus Kristus Er ining ara, “Iya weik dengna,” tenen dinyi biriman aryi Erci nunsi lebdeibmasou. Nun Du Kristus biryi nunsi lebdeibmasou ara Er Imtamnyi dama deirin domba ato deiboka nunsi lebdeibmasou. A domba ara malyi domba kum kuramwe. Erda, Er Imtamnyi bisi dama deirin dinyi iya teleb dinyi kuramwe ati ebman.

²⁰Nun Nai Imtamnyi biryi yuma kobdob aryi imtam tukwetam kum kikniamuryok, Erci nun Du Yesus Kristus biti, “Ninyi Lemsinanyi kibkwan,” tenen wibdeibmou. Ura, yuma kobdob talak aryi wibdeibmou ani, nun Nai biryi karebsou uca, sirya kobdob talak kubmou bok, nun Du Yesus bira ukuryok ninyi kibdanmou. Ara, nun Du Yesus biryi sunda sirya kobdob talak aryi kurandum nang ababyi lebdeibkwansou ati, Erci Erdamnyi lak kibdanmou.

²¹Ura, nun Du biryi sunsi sirya lebdeibsou biriman aryi sunci nun Nai Imtamnyi bisi dib tenerandum. Nun Du dibmou asi nun Nai Imtamnyi biryi kam bukeibmou ura, iya erebdeibmou. Kam bukeibmou uca, sunci nun Nai Imtamnyi bisi dib teneramun ci, sunci, “Nun Nai Imtamnyi biryi iya kam kun dinyi karebkwansir,” tenen dibde bundarur.

²²Sunci dib en uram asi kunubde barandum uca, sunci sun kanya dam aryi malyi kun dinyi kilirkarongne nang ato kurandum. Sunci malyi kun dinyi kilirkarong kanya borandum uca, sunci sun kwityabwe dib tenen nang asi diboka boukwe kimnandum. Ato kurandum ura, sunci sun kwityabwe asi sunglona kum uca sun kanya nirya aryi boukwe kimdarandum.

²³Ato kubkwandum ara nun Nai Imtamnyi biryi karebsou uca, Erci sun malyi tenen dinyi kilibkaboka ukuryok tenen dinyi sun kanya dam dongobdeibmasou. A ukuryok tenen dinyi dongobdeibmasou ara tiya ati kum dongobdeibmasou. Erda, iya ati dongobdeibmasou. Erci, dongobdeibmasou dinyi ara tukwetam yala tiya dinyi ato asi sun kanya dam kum koubdeibmasou. Erda, sun kanya dam koubdeibmasou dinyi ara Er Imtamnyi Uram aryi iya mikib dinyi ton iya kunubkwande dinyi ton asi koubdeibmasou. A deyok aryi, sunci sun mamun boukwe kimdana teleb.

²⁴Er Imtamnyi Uram kerek sengna umbura aryi a deyok ati ato eteresurur. “Ninyi nirya ara sungsunga tiya kurande ato kunung. Tonda, co keta bol telebto dinyi kurande bok, tiya atikwe kurande. Nun tukwetam nang ababyi neiktoto kunub. Ara, nun nong bol telebto kuransir bok, tiya atikwe kunub. Sungsunga ara ola yalangnande ba, co keta ara ola kulursangnande to, nun tukwetam nang ababyi ola dimnamib.

²⁵Bok, Er Imtamnyi Uram ara tiya dinyi kum kurur. Erda, tanglona kum uca iya kubmurubkwande,” ebmou. (Yesaya 40:6-8) Ba, a uram ara nun Du Yesus uram Teleb Uram kurur asi nunci sun nirya asi lak etereransoubwe.