Read Futuna-Aniwa 1Petrus 2 Bible Online

1Petrus 2 - Futuna-Aniwa bible

1Petrus 2

¹Ni kwityabwe, nun Nai Imtamnyi biryi ukuryok tenen dinyi sun kanya dam dongobdeibmasou deyok aryi, sunci sun yu kanya boramunyi malyi kun dinyi nirya bai donokdarur. Tonda, tola uram en dinyi nirya bai donokdarur. Tonda, “Ninyi aryi kisal daksiting ati, teleb dinyi kun nang ato kiknibdankwayeb,” tenen dinyi nirya bai donokdarur. Tonda, yuk nang ati bimsa yarin dinyi ab, tola ati eboka tatab-tatab en dinyi ababyi nirya bai donokdarur.

²Bai donokmunyi ura, alok mabwe nermabwe ukuryok deibmang mabwe nermabwe ato kuramun ci, sunci, “Mum dinin dinyi yibtibyi,” teneraming to akwe kubdarur. Mum dinin dinyi sirik ati kum ebman. Erda, kebdeiboka Er Imtamnyi Uram kekena ati ato ebman. Ati, sunci, “Er Imtamnyi Uram kekeramibyi uca, nun dib tenena ara tabakdongoboka-tabakdongoboka mikib kibkwansir,” tenen Er Imtamnyi Uram asi tuba-tuba kekebdarur. Kekebde baramunyi uca, nun Nai Imtamnyi biryi sunsi iya kam kun dinyi karebkwansir.

³Nun Du bira ninyi teleb kimdeirisinanyi kurur ati sunci eirirandum. Nun Du biti ato eirirandum deyok aryi, sunci Er Imtamnyi Uram diboka kekermuruna teleb.

⁴Ura, sunci nun Du Yesus Kristus biti, “Ai dona eremna keil atonyi, nun iya kam kurdeirisurutnyi,” teneboka nun Du Yesus dam yangana teleb. Ninyi aryi nun Du Yesus biti, “Bai donongna keil atonyi aca,” tenen dokdonokmai bok, nun Nai Imtamnyi biryi, “Dengna weik keil, iya teleb keil,” tenen nun Du Yesus bisi wibdeibmou.

⁵Ura, ni kwityabwe, sun nun Du Yesus bisi dib tenen nang ababyi ai don keil ato kurandum ati ebman. Nun Nai Imtamnyi bira ukuryok ai dobde barandiryi, sunda dib tenen nang ati, “Ni dobde baran ai umbura aryi iya kubkwaming,” teneransir. Ato teneboka ai dobde barandiryi, Erci sunda ai don keil ato nang asi keil ai dukoka dobdeibde baransir. Akai ara Er Imtamnyi biti ninyi dama deirin ai ato doransir ba, sunda Er Imtamnyi dam kun nang kurandum ci, Er Imtamnyi kan ninyi kan noutam kuboka antanirdeirin nang ato kurandum ci, sunci sun kanya dam aryi Er Imtamnyi bisi dama deirirandum. Sun deirirandum dama ara nun Du Yesus Kristus biryi doboka nun Nai Imtamnyi urasintam aryi deirirande uca, nun Nai kanya kilkil weik kurur.

⁶Er Imtamnyi kerek sengna umbura aryi nun Du Yesus Kristus biti ato kerek sekamwe. “Dirandum. Nira Imtamnyi biryi mutuk Sion dub asi ai doraniryi, ai kisok eremna keil tentok asi erebdeibkwan. A keil ara Nira Imtamnyi biryi wibdeibmase keil ara iya teleb keil kurur. Ba, unanyi-unaner aryi a ai kisok eremna keil bitonyi bisi dib teneramingnyi ara iya alyi kum kubminikwansir,” kerek sekamwe. (Yesaya 28:16)

⁷Sunda dib tenen nang ara nun Du Yesus biti, “Dengna weik keil atonyi,” tenerandum. Ba, sun dib kum tenen nang ara nun Du Yesus biti, “Bai donokman keil aca,” teneraming. “Sun tukwetam kuboka ai don nang ara anyi biti, ‘Bai donokman keil aca,’ teneramnyi. Ato teneramnyi bok, nun Nai Imtamnyi biryi Erti, ‘Iya teleb keil,’ tenen ai kisok eremna keil kibdeibmou.” (Mazmur 118:22)

⁸Tonda, nun Du Yesus keil atonyi biti Er Imtamnyi kerek sengna umbura aryi ato erur. “A keil ara ninyi yiban bisik libmaci aryi yan dum dukoka maryibaramingnyi ato kubkwaming,” ebmou. (Yesaya 8:14) “Yandum dukoka maryibaraming,” ebmar ara nun Du Yesus uram Teleb Uram ati, “Nun li,” teneraming ati ato ebmar. Er Imtamnyi biryi minob uca teneamwe uca, a nang ara Teleb Uram dokdonokingiryi, sunci keil yan dum dukoka tukwetam marbaraming nang ato kunung ati ebman.

⁹Ura, ni kwityabwe, sunda a kuraming nang ato kum kurandum. Erda, sunda nun Nai Imtamnyi biryi wibdeibsou nang kundarur. Sunda Er Imtamnyi biti ninyi dama deirin ai wa in nang kuboka abmun ci, Er Imtamnyi weik Sienyi amwetam nang kundarur. Sunda Er Imtamnyi dam kun nang kuboka abmun ci, teleb dinyi akwe kunun nang kundarur. Sunda Er Imtamnyi bisi milin nang kundarur. Nun Nai Imtamnyi biryi sunda malyi dinyi kurandau nang asi kunuk dam aryi kuboka naboka absou ci, lebdeibsou ura, Er milil weik berengnanyi dam boyanmasou. Ati, sunci, “Nun Nai biryi ato-ato kuboka teleb kimdeirisurur,” eboka Er si weik ebkwandum ati, nun Nai biryi sunsi nabmasou.

¹⁰Sun minob ura Er Imtamnyi milin kum nang kurandau. Ani, ukuryok ara nun Nai biryi karebsou uca, sunda Er Imtamnyi milin nang kurandum. Minob ura Er Imtamnyi biryi sunsi bico kum teneransou. Ani, ukuryok ara nun Nai biryi sunsi bico tenesurur.

¹¹Ni kwityabwe ni boukwe weik kusunun nang. Sunci, “Im dangna mutuk tukwe dangna mutuk yuk-yuk tingyandoka kuraming nang ato kuramibiryi, malyi nang kankan asi kuramib,” teneramun ci, sun kurandum atei nang aryi malyi kun dinyi kuraming ara milibmunyei. Erda, sunci, “Malyi kun dinyi kunubtibyi,” tenen kanya nirya ara bai donokdarur. “Malyi dinyi kunubtibyi,” tenen dinyi aryi sun dib tenen nang kanya asi malyi kibdeiboka wanikminiksicei.

¹²Ati, sunda Er Imtamnyi Uram walwal nang kankan asi kuramun ci, sunci teleb dinyi akwe kunubde bindarur. Ba, a nang aryi sunti, “Malyi dinyi kunung,” eboka tatab-tatab ebsingnyei. Erda, sun dib tenen nang aryi teleb kurandum to asing eibsingnyi ura, sunci sunti, “Teleb dinyi akwe kununung,” ebsingiryi, sunsi miliboka nun Nai Imtamnyi si weik ebkwaming. Ba, nun Nai Imtamnyi yuryangaci uki tum berekci ura, sun Er Imtamnyi Uram ati walwal nang ababyi sun dib tenen nang asi kisal dangsina teleb ati ebman.

¹³Ura, sunci sun tukwetam kuramingnyi kalingdansing nang yuk-yuk aryi uram ebdeibsingnyi tok asi kunubdarur. Ara, nun Du Yesus biryi nunsi arukdeibmasou to, sunci sun tukwetam kuramingnyi kalingsin nang ebdeibsingnyi tok kunubdarur. Ara, tukwetam kuboka weik sien nang iya mikib taleramingnyi nang uram asi kekebdarur.

¹⁴Tonda, weik sien nang amwetam bun nang aryi ebdeibsingnyi uram ababyi kunubdarur. Weik sienyi biryi er amwetam nang asi tingdeirirande ara, “Sun malyi dinyi kuramingnyi nang ara wenebingnyi ura, teleb dinyi kunuramingnyi nang asi kisal dakwanung,” tenen tingdeiriraming.

¹⁵Sien nang aryi ebdeibsingnyi tok kunubde baramunyi uca, sunci Er Imtamnyi teleb tenesurur tok kununkwandum. Er Imtamnyi biryi nunti teleb tenesurur dinyi ara ato. Sien nang uram kunubde baramingiryi, teleb dinyi akwe kunubde baramingnyi uca, sun walwal nang aryi tola ati tatab-tatab eramingnyi uram ababyi kilikingiryi, tatab-tatab ebman kum kubkwaming.

¹⁶Ati, sunci, “Nunda lebdandob nang kunub,” tenen kundarur. Lebdandob nang ato kuramun ci, sunci, “Nun kanya aryi teleb kuransici dinyi ur kunubde binkwayeb,” tenen malyi kun dinyi kunubmunyei. Erda, sunci Er Imtamnyi wa irmilin nang ato kuramun cok, Er Imtamnyi Uram kunubde bindarur.

¹⁷Ninyi nirya ara sunci, “Ni nai, ni kwin,” tenena teleb. Tonda, sunci sun kwityabwe dib tenen nang asi boukwe kibdandarur. Tonda, nun Nai Imtamnyi biti sunci, “Iya erebdob sienyi,” tenen ilil kanya bobdarur. Tonda, sun tukwetam kalingnansingnyi weik sien nang ati sunci, “Nun naiyabwe,” tenen sun ebdeibsingnyi uram kunubde bindarur.

¹⁸Sun yuk nang aryi ikin wa takurdeiriransing nang ara sun arungsin nang ati, “Nun naiyabwe,” teneramun ci, sun eransingnyi tok kunubde bindarur. Ara, sun arungsin nang teleb nang ababyi sun yu kimsina nang ababyi sunci, “Nun naiyabwe,” tenena teleb.

¹⁹Ara, talyi ati kulab-kulab eboka mambul kurdeiriransingnyi ababyi, sunci, “Nun Nai Imtamnyi biryi niti bingnurur,” tenen namin kanya bormuruna teleb. Ato kuramunyi uca, nun Nai biryi sunsi kisal dakwansir.

²⁰Ura, sunci malyi kun dinyi kubmamunyi uca, kulab-kulab onmasingnyi ura, nun Nai biryi sunsi kisal dakwansir do? Kum. Erda, sunci teleb dinyi kunuramunyi uca, mambul dinyi takubdeibsingnyi asi tanglona kum uca namin kanya boramunyi ura, nun Nai Imtamnyi biryi sunsi kisal dakwansir.

²¹Nun Nai Imtamnyi biryi nunsi nabdeibmasou ara, “Mambul dinyi dobdobingnyi ababyi, teleb dinyi akwe kunubmurubting,” tenen nabmasou ati ebman. Ninyi aryi minob uca nun Du Yesus Kristus bisi mambul kurdeiriramnyi ara Erci nunda dib tenen nang ati, “Lebdeibkwan,” tenen mambul dinyi bormururamwe. Ati, nun Du Yesus bira nunti kiklisina atonyi kuramuryi, mambul dinyi bormururamwe ati, nunda Er milin nang ababyi neiktoto ninyi aryi mambul dinyi takurdeiriransingnyi asi bobmurubkwayeb.

²²“Nun Du bira malyi dinyi ton kum kunuramwe. Tonda, tola uram ababyi ton kum eramwe.” (Yesaya 53:9)

²³Ninyi aryi nun Du Yesus bisi, “Malinyi,” eboka ina ngilingmai ababyi, Erci tamuboka sunsi ton kum kerebmou. Tonda, mambul dinyi takubdeirinmai ababyi, Erci sunsi, “Aminda dekoka obkwansin,” eboka uram ton kum dekeibmou. Erda, nun Du Yesus biryi Er kanya luknubdongoboka mambul dinyi bormururamuryi, Erci, “Ni Nai malyi kun dinyi nirya diboka liliboka wenerutnyi biryi niti bingnurur,” tenen nun Nai Imtamnyi taruk dam deibdongobmou.

²⁴Nun Du biryi co lase deici bing dakmai ara, Erci nun malyi kun dinyi ati, “Kilibkwan,” tenen iya mambul dinyi bobmou. Ati, nunci, “Malyi kun dinyi kuna aryi dian nang ato kuramoubwe,” tenen nun malyi kun dinyi taklobkwamoubwe ati, nun Du Yesus biryi nunti dibmasou. Tonda, nun Nai Imtamnyi urasintam aryi teleb dinyi akwe kunubkwamoubwe ati, nun Du Yesus biryi, “Lebdeibkwan,” tenen dilaka ilinto dobdobmou uca, Erci sun kanya malyi kuransou dinyi asi kwetebmasou.

²⁵Minob ura sun nirya ara malyi dinyi akwe kunurandau deyok aryi, waningdaming domba ato kurandau. Ani, ukuryok ara sunci nun Du Yesus domba kalingnanyi dam yanmarum ati ebman. Ara, sunci sun malyi kun dinyi takloboka sun kanya yuk-yuk asi kalingsurutnyi dam yandobmarum.