Read Futuna-Aniwa 1Petrus 3 Bible Online

1Petrus 3 - Futuna-Aniwa bible

1Petrus 3

¹Ura, nerabwe ababyi sun akenyabwe uram kekena teleb. Er akenyi bira nun Du Yesus uram Teleb Uram ati, “Ni li,” tenenanyi kuranci ababyi, er ner aryi teleb dinyi akwe kununa teleb. Teleb dinyi akwe kunuranci uca, er akenyi biryi asing eiboka erbabyi, “Teleb Uram dib tenebkwan,” teneboka nun Du Yesus bisi milinanyi kibkwante. Er ner aryi uram deib aryi kum eterebci ababyi erci kikliboka teleb dinyi akwe kunuranci uca, er akenyi dib tenenanyi kibte.

²Ara, sun nerabwe aryi, “Talyi yon dinyi ton, malyi kun dinyi yuk dinyi kununa nun li,” tenen teleb dinyi akwe kununa teleb. Tonda, sunci Er Imtamnyi biti, “Nun Nai biryi malyi kun dinyi nirya ara wenerur,” tenen ilil kanya bona teleb. Ato kuboka teleb dinyi akwe kuramunyi asi sun akenyabwe aryi asing eibsingnyi ura, sunbabyi nun Du Yesus bisi milin nang kibwanung.

³Ati, sun nerabwe ara baitam dinyi ninyi asing eiboka kanya teleb kimna dinyi ati kweirya-kweirya kimna mem. Ara, “Ni kisok otong tabwe kouboka telebto kubdeibkwan,” tenen dinyi ukuna mem. Tonda, “Teleb aling dengna weik aling akwe ongobkwan,” tenena mem. Tonda, “Dengna weik keil si emas karakwan,” tenen kum. A kweirya don dinyi nirya ara ninyi kanya asi teleb kimdeirin dinyi kurur bok, nun Nai Imtamnyi kanya ara baitam kweirya don dinyi ara teleb kum tenesurur.

⁴Ati, nun Nai Imtamnyi biryi sun nerabwe ara kanya tam iya bikdob kweirya asi dobdobting tenesurur. A dinyi kunubkwamunyi ara ato dinyi asi kunubkwandarur, “Namin kanya boboka teleb kanya akwe bona teleb.” Nun nong bol teleb kimdeirin dinyi ara tiya dinyi akwe kurur bok, ukuryok kanya boboka Er Imtamnyi urasintam teleb kurandum dinyi asi iya kunubkwande kweirya asi dobdobkwandarur.

⁵Sun minob kuramnyi dib tenen nerabwe ara teleb kanya boramnyi uca, nun Nai Imtamnyi bisi dibde buramiryi, sun akenyabwe uram kunubde baramnyi. Ato kuboka sunci sundamnyi Er Imtamnyi urasintam aryi telebto kimdeirirdaramnyi.

⁶Ato kuboka nun tat Sara bira sunti kiklirdeirin ner ato kuramwe. Erci er akenyi Abraham bisi, “Ni akenyi,” eboka er akenyi eramwe uram ebman tok kunubde baramwe. Ura, sunda ukuryok kurandum dib tenen nerabwe ababyi nun tat Sara er nermabwe ato kurandum. Ati, sunbabyi nun tat kuramwe to teleb dinyi akwe kunuramun ci, ilil kum kanya bobdarur. Ato kuramunyi ura, sunci Sara er nermabwe ato diboka kuramunci.

⁷Ba, sun akenyabwe ababyi neiktoto kuboka bikdob kanya boboka sun nerabwe dam tonkwa kuramun ci, sun nerabwe ati, “Ni ner,” tenebdarur. Ati, sunci, “Nerabwe ara mitang ninyi yala ati dirnilibkwan,” tenen sun nerabwe asi kalingna teleb. Tonda, sunci, “Dib tenen nerabwe babyi, sal nang babyi iya kam kun dinyi tonkwa dobdobkwayeb,” tenen sunci sun nerabwe asi dirnilina teleb. Ati, sunci, “Ni ner asi diboka kum dibnilibnyi ura, nun Nai Imtamnyi biryi bisik sekoka nun moloramibyi to kum kunubsicei,” tenen sunci sun nerabwe asi diboka dirnilina teleb.

⁸Ura ni kwityabwe, sirya kobdob ebkwinsin uram ara ato. Sun nirya ara neik kanya boboka antanibdandoka kubdarur. Sun mambul kubmaci nang ati bico tenebdarur. Tonda, sunci, “Nunda duweityabwe ato kunub,” tenen boukwe kibdandarur. Tonda, namin kanya boboka abmun ci, sunci sundamnyi luknubdandoka teleb akwe kunubde bindarur.

⁹Ninyi aryi sunsi malyi kimdeiriransingnyi ababyi, sunci tamuboka malyi kibdeibmunyei. Tonda, “Malinyi,” eboka ina ngilingnansingnyi ababyi, sunci tamuboka, “Malinyi,” ebmunyei. Erda, a nang aryi sun malyi kimdeiriransingnyi ababyi, namin kanya boramun ci, teleb kimdeirina teleb. Nun Nai Imtamnyi biryi nunsi nabmasou ara, “Sun malyi kimdeiriramingnyi nang ababyi teleb kubdeibkwaming,” tenen nabmasou. Ati, sunci, “Nun Nai biryi iya kam kun dinyi karesina teleb,” tenen sun malyi kimdeiriransingnyi nang ababyi teleb kibdeibdarur.

¹⁰Er Imtamnyi kerek sengna umbura aryi ato eteresurur. “Unanyi-unaner aryi, ‘Mangkau akwe kuranyi ani, uki weik kubniryok asi wau louboka dibkwan,’ teneramingnyi ura, ‘Uki-uki nirya kuraniryi, teleb akwe kubkwan,’ teneramingnyi ura, a nang ara sun silalum kalikdandoka malyi dinyi ebingnyei. Sun sibambol aryi tola uram ebingnyei.

¹¹A nang ara sun malyi kun dinyi takloboka teleb dinyi akwe kununa teleb. Tonda, ‘Yuk nang ab antaniboka teleb akwe kubdobkwayeb,’ tenen teleb akwe tenen dinyi ingkirikoka dorona teleb.

¹²Nun Nai Imtamnyi bira sun teleb dinyi kunuramingnyi nang asi asing diransir ba, Er kanya kilkil kurur. Tonda, nun Nai biryi a nang aryi molona asi diboka amol kekerur. Bok, sun malyi dinyi kunuramingnyi nang ati Erci asing dirandiryok, ‘Malyi dinyi ni li,’ tenerur.” (Mazmur 34:11-15)

¹³Ura, sunci teleb dinyi akwe kunuramunyi ura, nun Nai Imtamnyi biryi sunsi kalikwansir. Ati, sunci, “Unanyi biryi sunsi malyi kibdeibsute do?” tenen ilil kanya bobmunyei.

¹⁴Ba, sunci teleb dinyi akwe kurandum deyok aryi, ninyi aryi sunsi mambul dinyi takubdeibsingnyi ababyi, nun Nai Imtamnyi biryi miliboka sunsi teleb kubdeibkwansir. A nang aryi, “Mambul dinyi takubdeibkwayeb,” eransingnyi bok, sunci ilil kanya boboka sirim talesina mem.

¹⁵Erda, sunci nun Du Yesus Kristus biti, “Iya Mikibnyi,” tenen ilil kanya boboka erebdeibdarur. Ara, ninyi aryi sunsi, “Unato ati dibde bundarur do?” eboka asibdesingnyi ababyi, sunci ukurlona kum uca kanya luknubdongoboka uram kisal dakdobmunyi ura, sun dibde buramunyi dinyi iya kam kun dinyi asi lak eterena teleb.

¹⁶Ara, namin kanya ab, luknubdongob kanya ab boboka abmun ci, sunci a nang asi lak eterena teleb. Ati, sunci teleb dinyi akwe kuramunyi uca, “Malyi kun dinyi kum kuramoubwe,” tenerdan kanya bona teleb. Sunda nun Du Yesus dam kun nang kuramun ci, teleb dinyi akwe kunuramunyi uca, sun tola ati tatab-tatab eransingnyi nang ara alyi kubkwande.

¹⁷Nunda teleb dinyi akwe kunuramibyi asi ninyi aryi mambul kurdeiriransingnyi ara telebto dinyi kusurur. Ara, nun Nai Imtamnyi biryi ato dinyi nunti teleb tenesurur deyok aryi, mambul dinyi bona ababyi nunti teleb dinyi kusurur. Bok, nunci malyi kun dinyi kunubibyi ba, ninyi aryi weneboka mambul kurdeiriransingnyi dinyi ara nunti teleb kum kubdeibkwansurur. Erda, malyito kubdeibkwansurur ati ebman.

¹⁸Nun Du Kristus bira nun malyi kun dinyi ati, “Kilibkwan,” teneboka aburyi, liki tentok aryi mambul dinyi bobmou ura, dibmou. Nun Du bira Er Imtamnyi urasintam aryi teleb dinyi akwe kunuramunyi kuramuryi, Erci nunda malyi kun nang ati, “Er Imtamnyi dam kun nang kibdeibkwan,” tenen dibmou. Nun Du Yesus bira ninyi aryi obmai ara Er nong sirik asi obmai ba, dibmou bok, kam bukeibmou tam ara Er Imtamnyi Kanya Roh Kudus aryi kam bukeibmou.

¹⁹Ura, Er Imtamnyi Kanya Roh Kudus mikib milibmou uca, nun Du Yesus bira Er ordana nang minob uca tabwe deamnyi nang asi binmou ura, Erci, “Niryi muna kibdongobman,” eboka lak erbinmou.

²⁰A nang ara minob uca Er Imtamnyi Uram kum kunuramnyi asi nun Du Yesus biryi, “Niryi muna kibdongobman,” erbinmou. Minob ura nun aibwe Nuh biryi ilila co ngun-ngun doramwe ba, nun Nai Imtamnyi biryi sun yuk nang ati, “Sun malyi kun dinyi taklobkwaming do kum do?” tenen dibde buramwe bok, a nang ara tanglona kum uca, “Er Imtamnyi Uram kekena nun li,” teneramnyi. Ato tuba teneramnyi ati, nun Nai Imtamnyi biryi karebmou uca, ilila me obmou uca, a nang nirya asi me yibmou. A malyi kun nang nirya asi me yibmou bok, nun Nai biryi Nuh mabwe silib antaniboka ninyi inbaryok lebdeibmou. Ara, ilila me noutam kuramnyi asi Er Imtamnyi biryi sunsi lebdeibmou.

²¹A ilila me obmou ara nun dib tenen nang me dongoransing me ati kiklibdeiboka kubmou. Ninyi me dongoransing ara nun Du Yesus biryi nun dib tenen nang asi lebdeibmasou dinyi asi lak itinto kurdeirin dinyi kurur ati ebman. Ninyi me dongon me ara, “Nun nong nining kubmaci ati me kekwayeb,” teneramib ato dinyi kuma. Erda, nunci, “Malyi dinyi nirya sirya bai donokmoubwe,” tenen bikdandoka nunci me dongona biriman aryi nun Nai Imtamnyi bisi, “Malyi dinyi tubto kunubibyei,” enub. Ati, nun Du Yesus Kristus kam bukokmou deyok aryi, Erci me dongona biriman aryi nunsi lemdeirisurur.

²²Nun Du bira imtam ai welebinmou ura, nun Nai Imtamnyi siriktam kuboka burur. Sun Er Imtamnyi Uram eryuryangan nang nirya ara nun Du Yesus biti, “Iya Erebdobnyi,” tenen Er Uram akwe kunubde baraming. Tonda, sun imtam tukwetam kuramingnyi sien nang nirya ab mikib nang nirya ab asi Erci muna kibdongoboka er amwetam kuboka Er Uram akwe keken nang kibdeibmou.