Read Futuna-Aniwa 1Petrus 4 Bible Online

1Petrus 4 - Futuna-Aniwa bible

1Petrus 4

¹Ura, nun Du Yesus Kristus bira tukwetam kuramwe ba, mambul dinyi boramuryi, nun malyi kun dinyi nirya kum daneibmou. Ati, sunci sundamnyi kiknibminikdandoka a dinyi teneibdarur. Ara, “Nunbabyi nun Du Yesus Kristus kubmou to kuboka miliboka abibiryi, mambul dinyi boramibyi uca, nun kanya dam aryi malyi tenen dinyi tuba kum kunubkwayeb,” tenebkwanub.

²Ato tenebibyi uca, nunci tukwetam kam tuba kuramibiryi, nun malyi tenen dinyi ara iya kuna mem. Erda, Er Imtamnyi biryi erdeirisurur to asi kununkwanub.

³Sunda minob ura Er Imtamnyi Uram walwal nang kurandau ci, sun kanya aryok malyi tenerandau dinyi akwe kunurandau. Ara, “Sal ner talyi yobdatibyi,” tenen dinyi kunurandau. Tonda, anggur du yung me ilinto yiboka walina talerandau uca, sun kwityabwe ab tonkwa malyi kun dinyi ilinto kurandau. Tonda, nun Nai Imtamnyi biryi “Iya malyi kurur,” tenen dinyi kunuboka sunci kwemdina molorandau. Sunda minob ura ato dinyi ilinto kurandau ati, sunci, “Nun malyi dinyi kuramoubwe ara a kunum sirya taklobmoubwe,” tenebmunyi ura, tubto kunubde bana kum kunkwandarur.

⁴Ba, sunci sun malyi kurandau dinyi taklobmandau ci, sun malyi dinyi kuramingnyi nang asi tuba kum milirandum ati, a nang aryi, “Naie, unato ati nun malyi kunuramib to tuba kum miliraming do?” teneransing. Ati, sunci ninyi kanya aryi malyi tenen dinyi langdeiboka kum kunubde barandum deyok aryi, a malyi kun nang aryi sunda, “Malyi nang se,” eboka ina ngilingnansing.

⁵Ina ngilingnansing bok, nun Nai Imtamnyi biryi a nang asi wenebkwande. Ara, Erda minola yaci ura, kam nang ton, dian nang ton, sun malyi kun dinyi lilibkwandanyi biryi sunsi, “Se, unato ati sunci ni uram kunun nang asi ina ngilingdarur do?” eboka sunsi wenebkwande.

⁶A deyok aryi nun Du Yesus kam bukokmounyi biryi sun minob uca Er Imtamnyi bisi miliramnyi bok, nun Du uram Teleb Uram ara kekena kum kuramiryi, diamnyi nang ati Teleb Uram lak etererbinmou. Ara, nun Nai Imtamnyi biryi ninyi nirya wenebkwande to kuboka a nang ababyi sun malyi kuramnyi dinyi liliboka sun nong asi wenebmou ba, sirya diamnyi. Ba, a sirya diamingnyi nang ababyi sun kanya dam aryi Er Imtamnyi biryi ebdeibsou to kunubde binkwaming ati, nun Du Yesus biryi a nang ababyi Teleb Uram lak etererbinmou.

⁷Im dangna tukwe dangna kurande dinyi nirya ara sirya kobdob kubkwande talak dam kubmar. Ati, sunci sun tenen dinyi kalikdamun ci, sun kanya darabdongoboka malyi kun dinyi bai donokdarur. Ura, sunci, “Nunda nundamnyi kalikdandoka nun Nai bisi molobibyi uca, Erci nun molona kekebkwansir,” tenen sunci sundamnyi kalikdandarur.

⁸Tonda, sunci kalingdana bikdob dinyi ara sun mamun diboka boukwe weik kimdana teleb. Sun mamum boukwe weik kibdamunyi uca, ninyi aryi sunsi malyi dinyi ilinto kurdeirisingnyi ababyi, sunci a dinyi tuba kanya kum teneibkwandum.

⁹Tonda, sun kum eiriramunyi atei nang aryi sunsi yandobingnyi ura, “Du dongona nun li se,” tenena mem. Erda, sun kanya loboka a nang ababyi yina karena teleb.

¹⁰Nun Nai Imtamnyi biryi, “Yuk nang asi dibnilibkwanung,” tenen nun nirya asi mikib dinyi yuk-yuk karebmasou. A deyok aryi, nunci busul kuboka nun Nai biryi mikib karebmasou tok kuboka yuk nang asi dirnilina teleb. Ara, nun Nai Imtamnyi biryi langdeiboka karebde basurur dinyi yuk-yuk asi nunci likniboka bokoka karerdana teleb.

¹¹Nun Nai Imtamnyi biryi silalum caknam karebsici ba, uram eramingnyi nang ara sun silalum caknam aryi Er Imtamnyi Uram eterena teleb. Ba, nun Nai biryi kwaning kareboka yuk nang asi dirnilin mikib karebsici nang ara Er Imtamnyi biryi karebmasou mikib deici aryi yuk nang asi dirnilina teleb. Ba, nun Nai biryi nunsi nun Du Yesus Kristus biriman aryi mikib yuk-yuk karebmasou ara nunci nun Nai Imtamnyi si weik ebkwayeb ati karebmasou. Nun Du bira a mikib yuk-yuk asi dobdobmou ci, nun dib tenen nang asi bongdeirisurur ati, nunci Er si tanglona kum uca tuba-tuba weik ena teleb. Amin.

¹²Ura, ni kwityabwe boukwe weik kusunun nang. Ninyi aryi sun dib tenen nang asi mambul kurdeiriransingnyi uca, sunci, “Naie, unato ati mambul kurdeiriransing do?” tenen kum. Sunda nun Du Yesus bisi milin nang asi mambul kurdeirisina ara, “Nun li,” tenen dinyi kuma ati ebman.

¹³Erda, ninyi aryi sunsi mambul dinyi kurdeiriransingnyi ara sunci, “Nun Du Kristus bisi mambul kurdeiriramnyi to, nun Er milin nang ababyi neiktoto mambul kurdeirisinung,” tenena teleb. Ato teneramun ci, sunci kilkil kanya bona teleb. Ukuryok mambul kurdeiriransingnyi ababyi, kilkil kanya boramunyi uca, aminda ababyi kilkil kanya bobkwandum ati ebman. Ara, nun Du Yesus Iya Mikibnyi biryi imtam aryi kuboka yuryangaci ura, sunsi kisal dakwansici uca, sun kilkil kubkwansir.

¹⁴Ninyi aryi sun Kristus milin nang kuramunyi deyok aryi, “Nun li,” tenen ina ngiliksingnyi ati, sun kanya mambul kusina mem. Erda, sunci, “Nun Nai Imtamnyi biryi nunsi kisal dangsurur,” tenen kilkil kanya bona teleb. Ara, ninyi aryi ina ngiliksingnyi ababyi, Er Imtamnyi Kanya Roh Kudus ara sun dam iya kusururci erebdeibkwansir ati, sun kanya kilkil kusina teleb.

¹⁵Ninyi aryi sunsi mambul kimdeiriransingnyi ara ninyi diboka obmarum deyok aryi, mambul kimdeirisingnyei. Tonda, yuk nang dinyi ukula dobmarum deyok aryi, mambul kimdeirisingnyei. Tonda, malyi kun dinyi yuk dinyi kubmarum deyok aryi, mambul kimdeirisingnyei. Tonda, talyi uram yukmarum deyok aryi, mambul kimdeirisingnyei.

¹⁶Ba, ninyi aryi sunti, “Se, Kristus milin nang ara nun li,” tenen malyi kibdeibsingnyi ura, sun alyi kuna mem. Erda, sunci, “Nunda nun Du Yesus Kristus si lak en nang kunub,” tenen kilkil kanya boramun ci, Er Imtamnyi bisi si weik ena teleb.

¹⁷Ukuryok kuramib talak ara nun Nai Imtamnyi biryi Er mabwe nermabwe asi malyi kun dinyi lilibkaliboka wenebkwansir talak kubmar. Ati, Er Imtamnyi biryi nun Nai uram diboka kunubde baramibyi nang asi deyok kouboka malyi kun dinyi ati wenebkwansir. Ato kubsici ati, nun Nai uram Teleb Uram asi, “Nun li,” tenen nang ara mitikanun wenebkwande do? Ato tenen kum. Erda, Erci a malyi kun nang asi bisibkaboka diba ati wenebkwande.

¹⁸Tonda, Er Imtamnyi kerek sengna aryi ato eboka eteresurur. Sun Er Imtamnyi urasintam aryi teleb dinyi kunun nang ababyi mambul dinyi ilinto boraming bok, Er Imtamnyi biryi kum lebkwana ato kuranci ba, mambul ilinto dobkwamingnyi ani, lebkwansir. Ura, sun, “Er Imtamnyi Uram kununa nun li,” tenen nang ton sun malyi kun nang ton ara Er Imtamnyi biryi lebdeibkwante do? Ato tenen kum. Sunda iya malyi limdon wenebkwande. (Amsal 11:31)

¹⁹A deyok aryi, nun Nai Imtamnyi biryi karebsou uca, mambul dinyi boramunyi nang ara nun Nai biti, “Nun Kikniansounyi bira Er Uram erlona kumnyi biryi nunsi kalingsurur,” tenen sun mambul boramunyi dinyi ababyi nun Nai taruk dam deirina teleb. Sun kurandum to nirya nun Nai taruk dam deiriramun ci, sunci tanglona kum uca teleb dinyi kunubmurubde bindarur.